شفت مشهد عن كاسترو بحكي المعلق لدعاية عن برنامج وثائقي عن أكم محاولة إغتيال تعرضلها يلي هيه أكتر من 600 آه جد واو .. كاسترو بأكتر من 600 روح؟؟

مش هون الفكرة يلي طلعت براسي في هاد المشهد كاستر بيتصاوب وبكون وراه زي حرس أو نائب وبيركض بس يوقع كاسترو .. تطلعت على نظرة هاد الشخص واستغربت ,, زي كأنو خايف مرعوب على هاد الشخص ..

فكرة إنو الناس كيف بتترأس .. بتتبع .. بتستقل – وكلو بإختيار مش بالغصب ,, بالعميان ,, بالطرد تباعاً .

كيف الناس بتبني لحالها فكر مختلف وبتعرضه على العالم .. كيف الناس بتختار فكر معين بيقنعها أو بكون قريب منها أو بيوافق مبادئها بالحياة أو إنو يبتعد عن أي شي وأي حزب وجهة وفكر ويختار هوه بحالو يكون لنفسه إتجاه بيكون بالعادة مجموعة من الأفكار والمبادئ من أكتر من إتجاه وفكر بما معناه ,, من كل وادٍ عصى - بدون زيادات على هذا المعنى - .

كيف لما تقعد مع شخص من هدول ويبلش يحكيلك أو تناقشه ويعطيك من فكره ونظرته والمواقف يلي مر فيها والرفض من الآخرين ولحظات الضعف والقوة .. ويبلش النقاش يمتد ويمتد بدون جمل زي والله مافكرت فيها أو ما مر عليي أو مابعرف أو حتى بدون مايعصب - العصبية تاعت غطاء مابيعرف – ويستمر لدرجة جد ممتعه ومشبعة للعقل إنو تحكي آه هاد الشخص ترأس هاد الفكر أو إتبع هاد الفكر أو حتى إستقل عن هدول الإتجاهات عن قناعة ورضى وحرية , مع إني بحس إنو القناعة يمكن بتشملهم .

بس في سؤال إنو كم هدول الجهات مع تفتحها قادرة تتقبل الغير .. وتتقبل مثلاً لو عم تجتمع مع جهة تانية تقبل إنو الجهة التانية هيه يلي تقود في حرب مثلاً أو إجتماع أو أي شي تاني ..

الرئاسة فيها تفرد أو ضم للمجموع؟

التبعية إنقياد وانصياع وأي تغيير صعب ولازم يكون جماعي حتى لو صدر من فرد؟

رح أترك كل هالجدل لناس بتمنى أشوف منهم كتير في حياتي .. أشخاص متنورين - آه متنورين مش منفتحين لأنو هاي الكلمة صارت مبتذله لحد كبير - المهم يكونوا قادرين على محاورة العقل وقادرين يعطوا الجواب الكامل المقنع بشكل واضح مش إنو أنا بعطيك جواب غبي مغلف وإنتا إفهم الباقي على كيفك ومايتعنتر بفكره ويتزمت فيه ويتقبل إني أرفض إجابته أو أضيف عليها ومايكون عندو مانع إنو يغير شي من مبادئه مش على أساس التطور لأ بس على أساس إنو أكتشف شي أصح أو يعدل من مبادئه إزا وجد فيها غلط .

حوار العقل حاجة إنسانية والإختلاف في الأفكار مطلوب زي كل شي في هالدنيا زي الألوان والطعم والأشياء والكائنات كلها وإلك كامل الحرية إنك تغرف وتتقمص وتتجه في أي منحى تختاره ,, مش غلط الإنضمام لحزب أو فكر أو تنظيم أو مجموعة وتتبع فكرها أو حتى تقود فكر .. الغلط إنك تنعمي عن أي شي تاني وتنتقده قبل ما تنتقد حالك أو توازنه مع مايقابله في فكرك وترفضه بشكل مطلق معتقداً إنو بهاي الطريقه رح تثبت وجودك وتأكد على غلط فيك إزا كان هاد المختلف صح أو أصح منك.