تعب المشوار




 زمان ما اجيت هون ،، زمان ما حدا اجى هون ،، تقول اتفقنا كلنا نختفي …

اشي سافر وشاف ما شاف وقلبت افكاره ورجع تاركنا ،، اشي هاجر وتركنا من اولها وكان حالف الا يترك كل اشي بذكره في حاله ومع هيك مستمر يقارن كل اشي بشوفه فينا ،، تجوز/ت وخفونا كأننا عيبه او ماضي معيب ههههه (وانا مالي يا لمبي؟) ، في يلي انقطعت به السبل مع الباقي ، في يلي اذا انوجدنا وجد واذا اختفينا ملوش مصلحه يفتش ، في يلي كبر على هالامه يلي نص شخصيته منها ، في يلي لسا بفتش كل ما هزه الحنين ، في يلي نفسه بس مقروص وخايف ، في يلي شايف وبراقب من بعيد وساكت ، في يلي ممششششش فاضي يحك راسه يلي مش لاقي يحلقه او بطل يحلقه كون الزمن عمل فعله ، في يلي نسي ،، وفي يلي انتسى ،، وفي غيبه الموت … (ادعوا لهيثم شيشاني بالرحمة) .

انا من نوع الناس يلي بحكيلك (بحبش يرجع الزمن) من باب ان الرجعه بتحمل فيها معاني الألم يلي عشتها ، مافي اشي برجع ببلاش عكل حال ، لا شكرا ، بنفس الوقت ما عندي حل للظرف الحالي ، شو بالايد لعاد؟ تعيش عالاطلال ، كل واحد ذكرياته في كيسه ، باقي الاسماء والصور في ذاكرة تخزين مخفيه في ابصر وين ، واللي يقولك قابلني قطّعه .

وين صرنا والسؤال الاكتر يلي بسأله لحالي شو كان تغير لو كله اللي صار ما صار؟؟ معقول شخصياتنا هي نفسها قبل وبعد ، ويعني ما تأثرت بهالكم الهائل من الاشخاص والاحاديث والاضطرابات النفسية والعاطفية يلي شهدتها آلاف الساعات والهواجس والعلاقات؟ طوش وقيل وقال وحب ولدنه والتنمر يلي بعجبك (مكنش عوقتنا اسمه هيك)  وتنكيت عيار تقيل وعبيط وزمباوي ، في ناس بسيطه وفي ناس هبلة رسمي بتشكك في حالك انك صاحي ولا انتا الاهبل؟ ، في ناس ساعدت بمقابل وببلا ، حكي وحكي وحكي بفايد وببلا .

فاتنا القطار وهرمنا ،، مرقنا من الزنقه وحتى بعد ما تغيرت الحاره ، والوجوه شاهت اختلفت ورجعت بشكل او بآخر ، اشي مشى علينا واشي تجنبناه ونجينا منه ، ما نجينا من ذكرياتنا ، ليه كنا نستمر ونعمل بحالنا هيك؟ شو كننا عم نحاول نثبت ؟ مافي بورد عليه نقاط تسجيل ومين فاز ومين خسر وكم ضل الوقت ، وكنا مستعجلين ، ليه؟ كنا عم نهرب من حدا او خايفين من حد براقبنا؟ … لعاد شو نحكي هسا يلي واحدنا خطوته /نبضه /توتره /وساعات نومه مسجله (بالفانيه) وكل اشي بتسجل من قائمة افلامنا لشو قرأنا كتب هالسنه لشو أكلنا ووين سكننا وشو رقم رحلتنا وصورها بالتفاصيل المصطنعه ، وقادره اعرف حضرتكم وين اشتغلتوا باليوم وبالمنصب وتاريخك من ايام مدرستك الاولى الى (حاليا) ، بتحب ابعتلك نسخه من رسالتك الماجستير؟ / ابحاثك؟ مقالاتك؟ بتوقع ما عندك نسخه منها صح؟ .. كلنا هيك .

بتتذكروا دفاتر ارقام التلفون؟ لا مش الدليل ، بقصد الدفتر يلي كان جنب التلفون الارضي وكان فيه مرتبه الارقام حسب الابجديه كانت دفاتر زغيره (مش الاجنده ولا المفكره بتاعت التفكير قصدي)، كبرت مش لان الارقام كترت ، لا ، من كتر ما كنا نخربش وتتغير الارقام ، مدخل فلسطين صفر ولا ٢؟ بتلاقيه نفس الرقم مكتوب بالرقمين ونتصل على نفس الرقم بالمدخلين ، هسا البني آدم الواحد بده سجل لحاله ، حامل تلفون واحد بشريحتين والواتسابين كل واحد على رقم غير الشريحتين والفيسبوك على ايميلين وقس على ذلك مقاسين او اربعه ، اه مقاساتنا كلنا تغيرت ،، لا ، مش عضلات ، اسكت هون ، كل واحد عارف عن شو بحكي ، لا المشد مش رح ينفع هسا يا صفيه ولا الشاي الاخضر اسكتي واقعدي.

اينما كنتم ، وشوما كان وضعكم ونفسيتكم ، ورغباتكم وحجم عائلاتكم ووجباتكم وواجباتكم ، ودائرة اكتآبكم ، وعدد مرات اعتقالكم بمرض الكوروهنا ، وكم مره تركتوا شغل وسبيتوا عحالكم في بلدكم او غيره ، على حجم اشتياقكم لكل شي نفسكم تحبوه وتكونوا فيه/معه/بوقته …. الخ الخ ،، انتو ناس مناح ، كنتوا ناس مؤثرين ولا زلتم ، وصوركم وضحكاتكم وظهوركم ولو كان (اونلاين) وردودكم واحزانكم وافراحكم وتجمعاتكم وانفاسكم لا زالت تصدح في ذاكرت شخص شخصين او اكثر ، انتو مش لحالكم دام هيك ، انتو متواجدين في قلوب ناس كثير وانتو ما بتعرفوا … طبتم وطابت ازمانكم .

وهاك السجره العتيقه ،، يلي ما كنت تطيقا ،، حبيتا واشتقتلا واشتقتلك ، :dance:.

هذا البوست اهداء لجميع المحاجيب في منتديات ابو محجوب سابقاً ، abu mahjoob forum 

حساب القرايا والسرايا

خلال مشاهدتي في سنوات ماضية لمسلسلات من امثال سي اس اي وشبيهاتها تبين لي بأن هاي النوع من المسلسلات وجزء كبير من السينما كمان بعتمد على فكرة ( العادة ) بمعنى انو التحليل الجرمي لمسرح الجريمة والوصول الى المجرم كان بعتمد على تتبع العادة يلي بسلكها ذاك النوع من الناس يلي يندرج تحتهم المجرم .. ما بعرف ازا كان هالإشي هوه نفسه الستيريو تايب او مجرد تأصيل للعقدة او االأحداث من قبل المؤلف ليرسخ في اذهان الناس ان الواقع فعلا هيك او حتى نسخه من قصة فردية على باقي المجتمع او على فئة من المجتمع واكبر دليل على ذلك انو انخلق في روسنا افكار كتيره عن مجتمعات فقط من الافلام واعتقد فاهمين كيف الغرب بتفرج علينا سندا لكون المجتمع الامريكي لحاله بياخد من التلفاز ٦٠ بالمية من ثقافته وفي المقابل كيف احنا بنشوف الغرب يلي بعمرنا ما اجتمعنا فيهم او عرفناهم بس برضو من التلفزيون والسينما والادب .
 
ركزي شوي ركزي ... بعد ما عايشنا التلفزيون وتعلمنا حركاتها المكررة وافشات الافلام والمسرحيات وكل الافكار يلي حتى المؤلفين والمخرجين صاروا يقلدوا بعض .. يعني وبعد تكرارها على ادمغتنا لعشرات المرات للسبعين سنة الاولى في حياتنا صار راسخ في ذهننا كتير شغلات متوقعين انها لما تصادفنا المفروض نعمل/نحكي هيك او يتلوها هيك او تكون نتيجتها هيك سندا انو الانسان في الامور يلي على وشك التعامل معها اما يرتجل (سواء بناء على اساسات وتفكير سليم او بشكل عفوي زي اللي بقطع شارع) او برتجع خبرة شخص غيره تعامل مع هيك موقف .. ودام علاقاتنا مع الاشخاص شبه فاشلة ومفككة وملغمة عدا عن ان الخبرات بتوصلك منقوصة ومليانه كذب وحذف ل ٧٠٪ من المعلومات فيها .. فا بتصفي عم تسترجع خبرة من التلفزيون وهون ما بحكي عن اقتباسات المسرحيات وافلام عادل امام بل بحكي عن موقف معين يكون تصورك انو اذا تصرفت مثل موقف الممثل او البطلة رح ينتج نفس النتيجة يلي وصلولها همه .

اكبر دليل على ان اللي في التلفزيون تم المحاولة لتطبيقه في كافة فئات المجتمع انك اكيد سمعت مأسات شخص او شخصه حول الحب والشغل والحياة انو ليه بفرجونا انو هيك الحياة وهيك مش هيك وبحكولنا "قصص واقعية" و "الواقع المجتمعي" والخ الخ .. عدا عن تدمر علاقاتك الاجتماعية بناء على انها مش متوافقة مع العالم (يلي محصور بين شاشة التلفاز والريموت) لأنك ببساطة بتكون مقتنع باللاوعي انو هدول الناس يلي في الشاشة ناس وبشر وعائلات وحب وحياة وكلهم هيك طيب ليه ما اكون انا هيك؟؟

بعد وقوعك من الثقوب التي تظهر في ركاكة الحبكات السنمائية والعقد للقصص اللي بحكولنا عنها دراما واقعية .. وتصل الى درجة ال (آآآآه هسا فهمت) وتبلش تسترجع كل شي مر على حياتك في مواجهتك للتلفزيون وتبلش تصاب بخيبات الامل من اول معرفتك انو المصارعة الحرة مجرد تمثيل .. مرورا بعدم امكانية تطبيق اي حركة من ابطال الملاعب وكابتن ماجد .. ثم انك ازا طلعت على التلفزيون رح تبين مصفرن وابو كشه واواعيك مبهدلات وما رح تحكي كلمتين على بعض .. ثم يتلوها انك كرجل مش كل النسوان رح تعاملك زي الحج متولي وان كنتي بنت مش دايما رح يحبك ابن الجيران او دكتور الاسنان او ازا قعدتي سنة في السجن وتطلعي ما رح يضلوا حواجبك مثل ما همه وشعرك ازا نفشتيه مش رح يصير سكسي كيرلز .

يمكن ما عندي هالتطور الاجتماعي او الحياة الاجتماعية الصاخبة يلي ممكن ااكد فيها انو يلي بصير في التلفزيون واقعي او لأ .. بس بعرف انو حتى واقعنا يلي عايشينه بطل متل ما هوه .. بطل الرجل هو اللي بنحرق دمه على فلسطين (المفروض اكمل واخواتها بس قصدي عما سبق وليس عما يتلوا) بس عم بنحرق دمه على برشلونه والريال .. المرأة العقلانية يلي كانت تحكم البيت وينسمع كلامها صارت تنضرب وتتبهدل ويرجع تصنيفها لما بين ساقيها زي ايام الجاهلية .. صحيح كنا نغني اعطونا الطفولة بس هسا الاطفال صارت تحكي اعطونا دفى ومي وشوية انسانية من بعد التعذيب والتربيط بالجنازير والقتل والاغتصاب يلي على ودنه .. يعني صرنا احنا ما بنشبه احنا .

وهون يبطح السؤال نفسه قائلا .. بكوننا مجتمع مخلخل وغير قادر على تأسيس اي تصرفات مقبل عليها في المستقبل القريب والبعيد بناء على اي خبرات انسانية او تلفزيونية كوننا يعني لا لاقيين مجرب ولا لاقيين حكيم .. وكوننا شعب عقله على قده (قلنا على قده يعني قيس قدك واعرف قديه عقلك قبل ما تطرقني مسبه) وعالأرجح ما رح نستخدمه .. السؤال يقول: طيب كيف رح نصفي نتعامل مع بعض اونقدر نتعامل مع بعض في مواقف اول مره؟ .. وهون انا بقترح تعميم فكره قد تكون .. وهون بقول قد .. قد تكون ناجحة الى حد ما .. وهون برضو بقول الى حد ما .. قد تكون ناجحة والى حد ما وممكن البعض تعجبه .. وهون بقول ممكن البعض - طيب خلص سكتت من غير لف ودوران خلصينا - انو يا جماعة اي شخص انت بتعرفه وهوه بعرفك وصار موقف بينكم ما واحد منكم (بحكم معرفتكم ببعض ومعرفتكم انو ما واحد منكم عنده خبرة بطريقة التصرف بهيك موقف) صادفه من قبل فا اعملوا زي ما بعملوا في تصور السينيما لا لا مش القصة والعقد وهالحكي .. قصدي تصرفوا عادي وواجهوا الموقف وازا ما نجحتوا من اول مره اعملوا (كااااات وقفوا.. مره تانية ثري تو وان اكشن) وبترجعوا تتعاملوا في هاد الموقف مره تانية وهكذا .. وبعد هيك بنصحكم تعمموا خبرتكم على غيركم من البشرية ضمن تجربة حديثة معاصرة واقعية اجتماعية وتمكنوا الغير من الاخذ بخبراتكم وهيك لا بموت الراعي ولا بتفنى الغنم .. وغطيني يا كرمة العلي تراني مش فاهمه عن شو بحكي.

بالأمس





نهاية العالم ونهاية اليوم

مع الانتشار الدائم للأفلام التي تبشر بنهاية العالم المأساوية ونهاية البشرية السوداء بشتى الاشكال من بداية الغزو الفضائي الى تدمير الكرة الارضية وفناء البشرية الا من ممثل اجنبي في العادة بكون امريكي .. فا يبطح السؤال نفسه عن موقعنا احنا أي الانسان العادي يلي ما إلو وما عليه وكيفية مواجهته لهذه الفكرة المنيلة بستين الف نيلة بالرغم من انه يتم استثنائنا دائما منها طبعا يخصم من ذلك أهرامات مصر ومن يقطن فيها بالإضافة الى احياء الهند وباكستان التي ترمز الى العالم العربي وبرضو ما بعرف ليه .. يعني ماشي انا مابعرف احكي كلمتين هنديات على بعض بس بنفس الوقت يشار الي لما احكي بالانجليزي (هاد ازا ما خلو لهجتي جيبرش) بتكون دائما بلكنة هندية او حتى بلكنة روسية .

مش هون ابدا موضوعي (اللكنة والصورة العربية في اعينهم) .. انا موضوعي يتعلق بنهاية العالم بالنسبة النا .. وهون انوه للسادة القراء الواعيين انو انا ما بحكي عن يوم القيامة والحساب ، بل انا مجرد بقارن نظرتهم لنهاية العالم بما ما تعني لنا نهاية العالم بمنظورنا الخاص زي ما حكيت المرتين السابقات .

يعني همه بالنسبة الهم هو براكين وزلازل واسفلت الشوارع بيتكسر (مش من مشي اللمبي عليه طبعا) وبالنسبة الهم البحر بغضب وبهوج عالعالم بهالتسوناميات وبجرف البشرية والعساكر ببنوا جدار والناس تتساقط خلف الجدار واشي بحكيلك زومبيات واشي بحكيلك القرود بتصير تمشي وتطخ بهالناس .. المهم انو في جرافك عفق بصير .. وطحشة ناس بتبلعها الارض .. وسيارات حبطرش واقفة بالشوارع .. رياح سوداء وزوابع تحمل البشر والبقر على حد مش سواء والباقي عندك .

اما بالنسبة النا غير .. احنا بنشوف نهاية العالم غير .. زي جدة غير .. احنا بنتهي عالمنا لما نعرف انو الراتب رح يتأخر عن قسط القرض .. لما نعرف انو حطينا يلي فوقنا وتحتنا في مشروع وانتصب علينا .. يدق ناقوس الموت لما وحدة بتحب واحد ويلقطها اخوها او حتى يجوزوها من غير من تحب او حتى ترسب في التوجيهي او اي امتحان .. وتتوقف ساعة الزمن لما بنت تكتشف انو كاين في بقعة قد راسها على بنطلونها وما حد حاكيلها او حتى بنت كاين ساحل الحجاب وشعرها من الاطراف مبين او كتفها مبين بدون ما تنتبه او حتى لما تكون بأول الدوام ويخرب اشي زي حذائك او حزامك او تنخلع ايد شنتتك .. ويبنشر عداد عمرك لما تكتشف انو وقعوا منك مصاريك او ضاعت فلوسك وانت ما بتعرف وين وقعتهم حتى .. وضاع العمر يا ولدي اذا ضيعت رقم مهم او هويتك او جواز سفرك في غربة او حتى نسيت جواز سفرك وتذكرته على باب المطار او وانت بالثلث الاخير من الطريق .

نيلة تنيل الدنيا صار معي احباط قد راسي .. مش عارفه اكمل المهم انو وصلتكم الفكرة .. انو يا جماعة احنا ناس بسيطين يعني ابسط من الطحالب في هاي الامور ونجمنا خفيف اقل شي بنبئنا بنهاية عالمنا الخاص .. مش محتاجين بركان ننصرع فيه ولا اصطدام كل كواكب المجرة فينا عشان نحس بالنهاية .. لأننا ببساطة انهز بدننا اكتر من فيفي عبدو وعشنا الصدمات اكتر من سيارات ملاهي الجبيهة الترويحية وشفنا الخراب والدمار والتجريف اكتر من اي لعبة اكس بوكس ومش رح ننقز بعد ما صرنا خبرة في اصوات التفجير وانوار القنابل والرصاص والصواريخ وهدير الدبابات والجيبات يلي على شوي رح يصيروا الصغار يقلدوا اصواتها مع اصوات البسس والعصافير .. يعني احنا تعدينا هاي المرحلة من نهاية العالم ووصلنا للجهة المقابلة ورجعنا .. وحابة ابشرهم انو رحنا على البحر وبلطناه ورجعنا زحلقة عليه .. وحاليا زاهدين في ما تبقى النا من خلقة هاللي ظل فينا من عقل .

ومع كل هالصورة السوداوية القاتمة والكاتمة اكتر من ريحة الأرجيلة ويلي انا بحكي اسمها جاي من الارجل يعني الأجرين وريحتها بتخزي زي ريحتهم لما تطلع .. بس بحب اذكركم باللحظة اللي بتروح فيها من دوامك والدنيا غاسليتك بالمطر والبرد وتبهدلت بالترويحة والأزمة وتبهدلتي بالمواصلات .. تذكروا هديك اللحظة يلي بتوصلوا فيها باب البيت وبتشلحوا جراباتكم المبلولين وتدفوا حتى لو على عين الغاز وانتو بتشموا ريحة الشاي بالميرمية او شوربة العدس وتتدثروا زي القذافي قدام التلفزيون وعيونكم تتغازل من النعس .. تذكروا اللحظة يلي بتروحوا فيها واواعيكم ملزقة فيكم من الشوب او اي قطعة اواعي لازقة بجسمكم رغما عنكم وتبدلوا بأواعي مبهبطة وواسعة زي الخيمة واغلبها بتكون ما جار عليه الزمن من اواعيكم او اواعي غيركم وتحس انو جسمك بتنفس حرية .. وتذكروا اللحظة يلي لما تكون ميت من العطش والجوع بساعات رمضان وانت مخك بسترجع كل اشي زاكي (شفته) بحياتك وتقعد تحكي لحالك انك رح تصرف ما تبقى من راتبك على هاد الأكل واللحظة يلي تحط اول لقمة فيها او اول نقطة مي فيها وترجع تتغير افكارك وتقبل بأي اكل وتطمنك نفسك انو اه كانت نزوه في حياتك ورح تمر مر الكرام وان الخطيئة اللي كنت رح ترتكبها انعصمت منها يا انسان يا مؤمن .. وتذكرهداك الليفل في كاندي كراش او اي لعبة اخرى او حتى مبارات كرة قدم وكان هالشي واقف في زورك ومؤرقك وباطت تشبدك وتتغلب عليه .. ولا تنسى حتى موبايلك او لابتوبك او اي جهاز عزيز عليك يلي يخرب خراب شنيع ويحكيلك احدهم انو اه لسا في امل وبالفعل يصلحولكياه من دون ما تروح الداتا .. وغيرها الكثير الكثير ..

يلي بدي احكيه انو مابعد الضيق الا الفرج .. فا استنوه


كماليات ليس إلا


بتذكر اليوم اللي دخلنا فيه أول مره مسجد الحرم المكي .. كنا يا دوب داخلين مكه قرر رئيس الحملة ندخل على طول على الحرم وحسب ما بتذكر كنا وراه رجال ونساء وأطفال ندعي من وراءه ونهرول الى داخل الحرم باتجاه الكعبة ,, وبكوني بنت صغيره ما كنت فاهمه إيش اللي بصير (شو مبتغاه او القصد منه) بعرف انو رايحين نشوف الكعبة بس هيبة الموقف واختلافه خلاني متأهبة في تلك اللحظة ,, ولا زلت وانا على مشارف ال 30 (مش مشارف مشارف بس قربت يعني) مصدومه من هاي الذكرى وكيف أنا الصغيره حسيت بذاك الاحساس .

دعاء وذكر ,, آمين ,, رافعه ايديي ,, حفاة ,, تعبانين من السفر ,, وعم (بركض لصغر حجمي) ,, وإذ تتجلى الكعبة المشرفة أمامي .. وهيبتها انفرضت في داخلي بشكل غريب لدرجة كنت رح ابكي .. وكوني صغيره وقد الفطعة .. سقفها كان بحدود السما وكأنك بتتفرج على السما ,, صدمه ,, استغراب .. مشاعر ما لقيتلها تفسير لا قبل ولا بعد ., ببساطه مشهد ما بقدر اشيله من راسي .

في مشهد مشابه سواء من قريب أو من بعيد .. كنت على احد المواقع وكان في مصور منزل مقطع لنفسه بصور خطوات أقدامه على احدى الأدراج ,, اصابني الفضول اعرف شو آخر الدرج .. وكان انفراج خطواته ورفعة كمرته متوافق مع نهاية الدرج يلي هيه كانت .. (قبة الصخرة) .. ببساطه استرجعت نفس الشعور يلي حسيته .. زي كأنك تتفاجئ بعيد ميلادك .. تلتقي بصديق عزيز ,, تشوف حبيب .. ببساطه شعور لا يوصف .

كان عنوان الصورة يلي قرأته لاحقاَ (الطريق إلى الأقصى) .. نزلت لأشوف التعليقات وإذ بصراع شرس ما بين المعلقين .. يحتد ضراوة بين ناس كثيرين في الآونه الأخيرة .. شو الغاية منه أو شو الهدف منه في النهاية ما بعرف وليه أصلا تطور لعراك ونزاع وصراخ ما بعرف .

بجوز ناس تحكي يمكن يهود وعرب بتقاتلوا .. لا بالعكس هالخلاف بين ناس عاديين ولا يرتقي حتى ليكون حوار ديني أو حتى تثقيفي متكامل .. هو ببساطه صراع ما بين (قبة الصخرة) و (المسجد الأقصى) .. وانو لا تضلكم تغلطوا وفضحتونا ومن هالحكي وكلام آخر بحال انزعه من دماغي لانو حكي فاضي (ما دون التفرقه أقصد) .

لا أنكر أن الأعلام والنت يصور القدس كاملة ومختزلة بقبة الصخرة .. مستثني باقي معالمها أو أهم مراكزها الدينية سواء للمسلمين أو المسيحيين .. للدرجة يلي ترسخ في ذهننا انو القدس = قبة الصخرة .. وبالمقابل رح اعطي آخر كم صورة واحكيله جاوب بسرعه واختار شو هو الحرم المكي رح يختار الكعبة .. واسأله عن المسجد النبوي يمكن يخربط بين تاج محل ومسجد الشيخ زايد .. هاد أمر انتشر ولا شك لو تسأله عن برج ايفل او قوس النصر او تمثال الحرية ما رح يخيب معه .. المسألة مش متعلقة بالجهل بقدر ما هي عبارة عن معلومات عامه اندرجت مره مرتين في حياتنا حول مقدساتنا مره في المدرسة ومره على حيط غرفة المدير يلي نخاف ندخلها وانتهى .. ما بين فرنسا الحب وامريكا الحرية هي مرتبطه بالعاطفة والمال فا لازم نتعلم عشان بلكي اجتنا فرصه أو بلكي الأجانب سألونا عيب ما نكون بنعرف .. عدا عن تكرار هالصور مليار مره في كل اشي بحياتنا .

سواء قبة الصخرة او المسجد الأقصى او حتى باب المغاربة أو حتى السوق القديم أو حتى قرى القدس ومحاسيمها (حواجزها بالعبري) الأمر ببساطه مترابط ببعضه .. لو راحت بوابه بتروح التانية ولو سقط احد المساجد رح يروح أخوه .. الأمر لا هو بالتسمية ولا هو بالصور .. الأمر إنو يكون بينك وبين الساحة (يلي فيها كل المساجد) كم كيلومتر وتنمنع تدخلها .. الأمر تكون من نفس القدس وما تقدر تزورها .. الأمر اللي ينحكالك حرام على بلابله الدوح حلال على الطير من كل جنس .. يعني الجنوب إفريقي أو من الهنلولو ممكن يزور المصلى المرواني وإنت يلي مكتوب بهويتك فلسطيني مواليد القدس يحكولك روح ممنوع تدخل .. الأمر انك تشوف ولاد وبنات تموت على بوابها وما تقدر تسحب جثتهم .. الأمر انك تشوف المصاحف والسجاد فيها يتدنس وأنت ما تقدر تخطي عتبتها حتى .. الأمر أنك تشوف حجة قد ستك وأكبر لحالها محنية الضهر رايحة تصلي الجمعة زيها زي اي انسان على كرة الأرض وتشوف ابن 18 اصغر من احفادها يتمقطع فيها ويحكيلها تروح عدارها .. الأمر انو يصدر قرار بحبسك وتغريمك والحجز على كل اموالك وفوقها تضل مديونلهم بس لأنك ساكن في بيت ورثته عن جدك وجد جدك في احدى ضواحي بيت المقدس ,, الامر انك تشوف قبور جدودك والقادة يلي ماتوا عشان كرامتك تتهدم شواهدهم وينكتب عليها عبارات بذيئة .. الأمر انك متأكد انو هاد الأشي إلك هاد المكان من حقك ويكذبك كل العالم .. وفي الآخر يزيد عليك البل أحدهم ليحكيلك انتا فوق هاد غلطان هاد مش الاقصى يا غبي .. وخليك انتا غبي وكلنا نضل اغبيا .. مش هون العيب أبداً .. العيب في مكان تاني اعتقد ...

على القناة الثانية

Dear dairy

شو في ابشع من أنو انسان يشوفك بعكسك
يشوفك بأنك كل إشي مش انتا
ويكون مقتنع بهالإشي
إنتا بنظره الشخص الشرير تبع المسلسلات
انتا عاطل انتا كذاب انتا لئيم انتا مجرم
انتا ما بتحس بغيرك انتا ببساطه مش انسان
هل انا داعش؟
هل انا كوكتيل؟
يعني هل انا باد بيبول؟

Now Playing

والأمر الواقع..يويا
قمع ومواجع..يويا
ممنوع تشكي ..يويا
وممنوع تحكي..يويا
طب نسكت ليش..يويا
لقمة العيش..يويا
يلعن أبوها ..يويا
علي جابوها..يويا
ليش السكوت ..يويا
ما كله موت.. يويا
ونموت بعزة .. يويا
ولا موتة معزة.. يويا

.....

.....

خانة إقرأ

خانة إقرأ
اشي بصدم الصراحة

أسوأ العباد عند الله

أشعار

آني لأعرفهم من قبل رؤيتهم والماء يعرفه الظامي وما وردا

ريكو من دد

ريكو من دد
لا زال في الجمجمة

حقوق المؤلف

جميع الحقوق في الصور أو النصوص المقتبسة أو الفيديوهات أو الأفكار وحتى نموذج البلوج كلها تعود لأصحابها لا أنا لا أنسب ما أضيفه (من غير ابتكاراتي الخنفشارية) لنفسي وإنما الإضافة لغايات التوضيح والتأمل وباقي النصوص المكتوبة فا من كتابتي وسواليفي الخاصة

شو كمان شو كمان شو كمان؟
آه وما عندي فيسبوك لا حد يدور عليي ويحكيلي متنكرة
i hate it

عداد الطقس

About Me

My photo
عمان, Jordan
بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض