اشي بقهر
قسماً بالله إشي بقهر ,, لما تشوف شب أو رجل أو حتى بنت متعلمين أو مش متعلمين حتى وتلاقيهم مش قادرين حتى راسهم يفكروا فيه بلاها ثقافة وفلسفة وكتب وحكي كبير ,, تلاقي الواحد منهم مش عارف يشغل مخه ,, مش قادر يفكر هوه لحاله إلا لازم حد يفكر عنه ويصدر القرار وينسخه نسخ عنه .. وهالحكي بحكيه بأي شي في الحياة بالأفكار والمطق والسياسة والحياة الإجتماعية والأكل واللبس .
شو بقرفني مثل إلبس على ذوق الناس وكل على ذوقك ,, ليه شو جاييني من الناس همه يلي كاينين بيصرفوا عليي لألبس وأتلبس عشان أعجب عيونهم ريت عمر ما عجبهم إشي ,, وبقهروك بس يحكوا " أنا عمري ماشفت حد متلك " ,, شو هالتخلف ضروري يكون في حد متلي لأنتسخ عنو ولو بكره شغلة وفكري مختلف عنها ضروري يكون في علّامه أو مغني أو سياسي يطلع يحكي أنا مابحب الكوسا عشان لما حضرتي أحكي لأ مابحب الكوسا تقتنعوا وتحكوا آه شفنا حد متلك الشخص الفلان؟؟ .
وبتلاقي الواحد منهم زي الأهوج مش عارف كيف بدو يلخمك الكلمة ورا التانية ليثبتك مكانك ويحكيلك إرجع وصير زينا وفكر متلنا ترى إزا ماكنت معنا إنتا ضدنا وإحنا مافي حد ضدنا ومابنسمح لحد حتى يكون ضدنا ,, وهاد هوه حوارهم المستور بالخط العريض والمستقى من كلامهم في هيك حوارات .
في مرات شغلة بتصير بالأوضاع السياسية زي رئيس بدو يطلق مرته أو زي بن لادن طالعين طلعتهم قال شو ملاقيين في بيتو أفلام إباحية وطاوشين الناس فيها ,, أو من هالشغلات يلي بلا طعم ,,, يا أخي وأنا مالي جد جد أنا شو بتفرق معي لما يعطوني إحصائية إنو نص مستخدمي الإنترنت لديهم حساب على الزفت بوك .. وااااو من ورى هاي الإحصائية رح أنضم إلهم؟؟
يعني ربنا كرّم الإنسان عن كللللللللللللللللللللللللللللل شي بهالدنيا والمخلوقات بالعقل وبالقدرة على الإختيار , لشو مش قادرين نفهم هاي الفكرة ونستوعبها ,, دماغنا أعقد من أعقد كمبيوتر بهالعالم وحساس وبنفس الوقت آلة دمار بحد ذاتها .. قادره تنتج وتتعلم وتبني وتهد وتغير وتفهم لغات وأفكار وتحفظها وتتذكر حتى الروائح والأصوات وتقرر وتكشف وتختار وتحس ,, والأحلى من هيك إنو كل واحد عندو متله كل واحد ربنا خلقله دماغ زي يلي حكيت عنه .. شو بنستنى؟؟ .
بتتبع هاي الفكرة فكرة النظرة المبعدية للأمور بكل أبعادها وبأهميتها وبأولويتها ,, في أشياء مهمه في أشياء ما إلها داعي في أشياء بلا طعم في أشياء أولويتها قصوى وفي أشياء لا بد منها في أشياء تحسينية وهاي برأيي لا بد منها في أشياء إلنا الخيار ناخد أجزاء منها وفي أشياء بتختلف من شخص لشخص ومن حالة لحالة بمكانتها بالترتيب .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
8 comment:
ارضاء الناس غاية لا تدرك
فالافضل انت انتِ تكوني راضيه و بس
الكل بحب ينتقد و الكل بحب يوجّه....الكل بدو يمارس دور الخنفشاري و ابو العرّيف
طنشيهم و ولا كأنهم بحكو
نفس اللي بدهم اياكي نسخه عن حد بعد فتره راح ينتقدو و يتهموكي انّك امّعه و بتقلدي الناس وما الك شخصيه
هيك العالم....هيك البشر
بدهم يتسلو فبتسلو بالعالم و بنسو اكبر مصيبه بحياتهم...حالهم!!!!
او مرات بحاولو يتناسوها بانهم يلتهو بالعالم, او يمكن علاج نفسي لعقدة النقص عندهم هو انهم يلتهو بالعالم :$
من الاخر
انسي و طنشي و اعملي اللي بريحك و همه بعد فترة بتعودو عليكي وعلى اسلوبك
كتّرت حكي و شرّقت وغرّبت لاني بعاني و عارفة وعايشة اللي بتحكه :(
يسعدك ربّك
اكثر اشي بضايقني بالدنيا هاي المقولة : كل على ذوقك والبس على ذوق الناس
على اساس الواحد لما يلبس بنطلون مسحول بكون لابس على ذوق الناس يعني؟
whisper
فهمتيني غلط
أنا ما كان قصدي أحكي عن الناس يلي بتنتقدني
أنا يلي عم بنتقد ناس ما عم تعرف بشو تهتم وبشو تفكر
ودايره ورا الأفكار الغبية ومش قادرة تشغل عقلها
ومش قادره تستقل بذاتها وعم تتبع غيرها
ببساطة لأنو هاد الأسهل
زي المثل يلي إمي دايما بتحكيه
قول فش بريح
وهيك نفس الشي ما يفكر أريح
وبتلاقيهم بيتكالبوا على مواضيع وسخافات ما إلها طعم
ولو يرجعوا يفكروا بينهم وبين حالهم رح يستسخفوها
وبيحكيلك الكل هيك ليش أكون غير عن الناس
وبدحشولك مثل الموت مع الجماعة رحمة واللبس زي الجماعة رحمة والغلط زي أغلاط الجماعة رحمة
مش إشي بقرف إلا نتفه
lunar
يعني دخيلك يلي بيحضر المسلسلات التركية
ويلي عندو خمسه أو سته فيس بوك ويلي حامل تيليفونين أو تلاته أو أكتر شو مفكر حالو الناس عم بتحبه أكتر
مفكر حاله على الموضه وقادر يندمج بهيك مجتمع؟
صدقني لما أكون في قعدة والكل بحكي عن الخلويات أو الزفت بوك "كالعادة" وأنا مابكون فاهمه شي بعمل حالي ولا كأنهم بحكوا شي زي كأنهم بيحكوا في جاروشه وفي الآخر بسفقهم كلمتين أصحيهم على حالهم بس جد الناس وصلت مرحلة تبلييييد رسمي
بكونوا عم يحكو عن المسلسلات التركية وفي مواضيع سافله وعادي بفسرولكياها إنو مسلسل بدنا ننبسط شوي بكفينا القتل والذبح يلي بنشوفه كل يوم
تقول إنو يلي إنقتلوا أو عم يستشهدوا كان في خاطرهم ورمقهم الأخير إنتو جماعة التفاهه لتيجوا تنقذوه أو بدو يعتذرلكم إنو آسف أزعجكم بصورة جثته الممزعه في كل مكان ويقلق منامكم بولاده يلي استشهدوا معاه أو تيتموا بعده
ومن كل هالأحداث يا بديروا وجههم بالصورة يلي حكيتلك عنها أو ببلشولك في مواضيع ثانوية زي موضوع بن لادن تركولكياه وإنبحتولك إنو كان عندو أفلام إباحية ,, والناس عم تضحك على حالها وغرفها متروسة بالذي والتي وإلخ إلخ .. طب يعني شو خلص هاد يلي أخدتوه من كل هالموضوع؟
جد إشي بقرف مش بضحك
إلك شوكولاطتين
وحدة على البوست
و الثانية على
" إلبس على ذوق الناس وكل على ذوقك"
:)))))))
haitham
مافهمت
وضح أبن أفصح
أيوا إلي بيقول عليها دلوقتي
وبالنسبة للشكولكلاته عن بستنى توصلني بغضون 3 أيام بعد هيك يحق لي رفع دعوى مطالبة
مع الحجز التحفظي على جميع شاكاليطاتك قصدي أموالك
لا تستغربي من أمة لا تقرأ
ولا يوجد ثقافة حقيقية
اتحداكي ان تجدي شخص يتكلم في السياسة مثلاً وقد قرأ حتى تاريخ بلده
نحن لدينا ثقافة التقليد والقشور
والكثير من المتعلمين لدينا لا يفقهون شيئا في الحياة
شعوب بدها طخ ودمتي بكل الخير
سراج الماضي
المشكلة لو مافي يمكن مصيبة
بس جد هالأمة والجهلة يلي فيها بتحسيهم عين مقلوعة
العاطل بخرب على الصالح ,, ولو إنسان بفهم بيقعد مع مثقفين بتلاقيهم بعايروا فيه في فلان وعلتان من هالأمة يلي مابينحكى عنها غير منحلة وهابطة
Post a Comment
:وكيل المكومنت قال