استاذه ... أستاذه ... 

نعم أستاذ ؟

تعالي شوي ...

(صوت تلفزيون الأستاز عالي شوي .. المراسل "المصري" عند باب الأستاذ بيتفرج من الطرف

صفنت فيه .. ضحك .. زادت الحيرة .. )

دخلت على غرفة الأستاذ وأنا وجهي لعند التلفزيون وبمشي وراسي بلف لورا ..

أقعدي .

قعدت وأنا صافنه بحاول أفهم شو في على التلفزيون ؟؟

وفجأة زي لما تستوعب الوضع زي يلي غرقان في المي وهسا دفش حاله وطلع .. هاد ؟؟ هاد مبارك؟؟

صفنت في الأستاذ .. بحكيلي شو مش عارفه إنو اليوم محاكمته؟

رفع الصوت .. وبلشت المحاكمه ..

آه بنحضر جلسات بأكتر من شعر راسنا وشفنا محاكمات الرئيس صدام .. ((للأسف)) .

بتعرفي إنو هاي المحاكمة .. (وهون بلشت المقارنات بين  محاكمة هالنذل مع محاكمة الرئيس العراقي الراحل) ومتأكده إنو كتير ناس قارنوا بين المحاكمتين .....

جابوا صورة القفص كما يقال .. ما كانت واضحه الصورة .. لا شعورياً رفعت جسمي وقربت كأني عم بحاول أشوف أوضح .. بعدين رجعتلي الفكرة إنو هاي صورته في التلفزيون ... أول ما خطر في بالي إنو 

(كيف كان وكيف صار) و (عمره تخيل حاله يكون في هالمكان؟؟) .

عم بفكر في ولاد مبارك وبتزكر عيلة إجت سكنت في عمارتنا (مثال كتير بسيط) وفي جاره بالطابق الأرضي بتعمل قزايز مخللات ومن هالحكي وتتركهم بالشمس بالجنينه تاعتهم .. الجاره الأولى لما كانت تشوفها تحطهم وتروح .. تبعت بناتها يسرقوهم .. شو في أوسخ من إنك تعلم ولادك السرقة أو الكذب أو الإعتداء ؟؟ وهيو جرهم للمرمطه والبهدله ...

أكتر شي كرهته في المحاكمه المحاميين .. ولابسين أسود بإسود وبتقاتلوا وبدافشوا وما حد فاهم على حد والقاضي ضيع الطاسه وبدور عليها بهديك اللحظة للكم المهول للمحاميين (والشهادة لله كترت المحاميين ممكن تخرب كل شي مش بس الطبخة) هاد بالإضافة لإنو ببساطه أبصر أكم مليون عم يتفرجوا على هالقاضي والضغط النفسي كبير .. (صحيح كتير حكوا إنو القاضي ما ضبط الجلسة .. بس حط حالك مكانه "بشكل واقعي" وأكيد ما رح تلخم أقل منه) .. واللحظة يلي طالت فيها مشاكل المحاميين بلشت أحس بالملل .

الخصم بحب يماطل ... "نكتة محاميين على هاي الواقعة"  .. وجد سخرية بحد كبير وزي ما بنحكي .. تحشيييش .

وأعتقد اللحظة يلي شفنا فيهم إنهم وراء القضبان بعيوننا زي يلي تشفينا .. وبس .

مابعرف إتجاه القضاء والبينات والدفاعات كيف رح يكون .. مابعرف كيف وبشو رح يحكم القاضي .. ماحد بعرف حتى .. ومن الصعب نتوقع ونتأمل أن يكون قضاء عادل .. لا "قضاء وقدر" بحسب نكتة أستاز فوزي D :  بس رجاءنا في ربنا كبير .. وربنا يسهل .. بس بحكيها كلمة .. الحرامي يلي بيننا إزا سرق شغلة الكل بتبلغ الشرطه وبكحشوه في أوضه متر بمتر وبيبقاله صاحب .. سلومه الأقرع ما يعرفش أخوه .. وفي التخشيبه بياكل يلي فيه النصيب .. والقاتل بروح على أبو زعبل .. ويلي بعتدي وبياخد حق طفل صغير وحج كبير وبنت في عز شبابها بيتضرب بالجزمة القديمة وتبقى عيشته نيله سودا ويتهفي ورا الشمس .. ومبارك شخص عادي .. ويجب أن يحاكم مثله كمثل أي شخص .. وبحكي للي بدافع عنه عشان رماله عضمه .. هاي العضمه سرقها من عيله مش ملاقية مي نضيفة تشربها حتى .