سواق التكسي والشوكولبس
مع إني مش معجبه كتير بأسلوب الشربكه في العناوين .. والمواضيع المختلطه .
إلا أني يلي بدي أكتب عنه اليوم .. مترابط إلى حد كبييير مع بعض .. مش كتير .. يعني شوي هالقد .
الموضوع إنو بيوم من الأيام في أحد التكسيات سأل سواق تكسي .. شو أكبر نعمه ربنا أعطاها للأردن والأردنيين ؟؟
طبعاً أكيد بدكم تفزوا من مقاعدكم (حلوه مقاعدكم .. بتزكرني بدروج الخشب القديمة تاعت المدرسة) .. آه رح تفزوا وتقولولي "الأمن" وبالفم المليان وباللهجة الأردنية .
بس جواب سواق التكسي كان غريب .. جاوب .. "أكبر نعمة ربنا رزقنا في الأردن هيه الفقر" .. طبعاً أنا أخدت جنب وقلتله في عقلي (ساي وااااات؟؟!!) .
صار يشرح ويحكي كيف الخلايجة بتعاملوا مع المصاري .. صار يحكي عن ناس وأشكال وألوان .. صار يحكي المصاري شو بتعمل في البني آدم .. وكمل حوار طويل ما تبعت معه لأنو وصلتني الفكرة وسرحت فيها .
معقول الفقر يكون نعمة .. ؟؟
أكيد كلكم سمعتوا عن أكتر من مليونير أو ملياردين تبرع بنص ثروته أو كلها كما قرأت هداك اليوم عن مليونير نمساوي تبرع بكل ثروته ليشعر بالسعادة .. فكرت وقتيها إنو عمرك وصلت مرحلة في حياتك إنو كل رغباتك الآنية أشبعت أو أو أو بلحظتها كانت بإيدك القدرة تشبعها ووصلت بجزء من هاي اللحظة إنو مش جاي على بالك تعمل شي .. أو تتعامل مع الشي بتهاون؟؟
في مثال ممكن يكون مشابه .. : مرة كنت أنا وأختي بحكيلها تطلعي ولادك مبسوطين على شو سيدهم بجيبلهم بس إمبارح لما رحت على المول الفلاني وإشترتيلهم مليون شغلة نتوروها وأغلب الأشياء إنكبت .. فا بتحكيلي بجد .. بابا لما ياخد ولاد أختي بياخدهم على دكاكين بسيطه وبفلتهم يشتروا أكم شغلة بعشرة وخمسة أو بياخدهم على مكان وبيختارلهم كم شغلة زي بعض .. وبالفعل كلللل شي بيشتريلهمياه بياكلوه .. قبلها بيوم كانت أختي ماخدتهم وأشتروا سنكرز وباقي الأنواع الغالية .. بس ما تصرفوا بهاي الأشياء زي يلي أشتروها مع سيدهم .. وهالشي بينطبق على كتير شغلات من لبس وألعاب وأغراض .
وكمان شغلة .. مع إنو فلم محروق .. بس بصراحة مع الوكيل الخميس الماضي كان عنوانه عادات وتقاليد .. وكانت الناس تناقش وتبعت عن أشياء قديمه .. بسيطة .. ذكريات مابتكلف شي .. ببساطة ذكريات ولأول مره جمعت الناس يلي داقوا المر .. وتم استثناء فئة الصويفية وعبدون وخلافه واستئصالهم بهالأكم ساعة .. بلحظات الناس صارت تتمنى يرجع الشي البسيط .. زي لما العيلة تجتمع أو الأصحاب ويتزكروا .
دخولاً لارتباط الجزء الثاني من العنوان مع الجزء الأول كما أزعم .. فبحكيلكوا هاي الكيكه (شوكولبس) تتواجد أكيد في الدكاكين والمحلات البسيطة والمتوسطة وأي مكان عادي .. لدرجة إنو اليوم زميلتي في المحكمة (صرت أحكي زميلتي زي يلي عن جد) المهم في مصري ببيع أشياء للموظفين فا نطت بخلقته بتحكيله معك شوكولبس .. طبعاً أنا صفنت فيها إنو إنتي كمان عندك هاد الداء يلي عم بعاني منه .. وحششنا على السواليف يلي بتصير معنا في معانات الإدمان منها .
هاي الحبة سعرها أكتر من مصروفي اليومي من الصف التمهيدي إلى الصف التامن على ما أعتقد .. بعديها إجتني آخر زيادة "شلن" في المراحل التابعة بعد ذلك (أي وصل لربع دينار) .. آه كنت بعاني زي الكل في المدرسة وبالجامعة كمان .. (يا حلاوة في الجامعة لما ييجي موعد القسط مش عارفه ليه يومها كنت أخاف لدرجة يهيئلي إنو أبوي على شوي بدو يعلقلي مشنقتي) .. يعني منيح ما كانت واصليتلي في الجامعة (بلاش أشرحلكم معادلة مصروفي بالجامعة درءاً للفضايح) .. وكلمة للحق تقال وضعي بكما ذكرت كان مع سوءه أحسن من كتير ناس .. بس الناس يلي كانوا في مجتمعي المحيط .. مجتمع لئيم ونذل ومفشخر في هالشغلات حتى في نفس الشله .. حتى أبسط الشغلات على حلاوتها كانت تصير شي بوجودهم "مصدر إحراج" .
الموضوع بعرف أه إنو أنا وإنت وإنتي وكتير عشنا نفس الحالة .. عشنا حالة بجد طلعت في عيوننا عشيرة شحادات .. والنتيجة يا ننولها بعد جهد مرير وتحويش مصروفي كان أغلب الوقت يروح مننا بنصبه .. أو نترجى أهالينا ونضل نعيط لحديت في الآخر ننسى شو طلبنا وعلى شو كنا نعيط .. أو نحقد على الشغلة وتطلع من نفسنا وكتير شغلات لهسا حاقدين عليها من وقتيها .. أو نسمعلنا رأي عجيب غريب من ناس كبار أغلبها كانت عن الأذى الجسدي يلي رح يسببه ما نطلبه .. وفي بعض الأحوال بدن مرتب أو يخوفونا بالبعبع الأكبر للولاد الزغار (اليهود) و (الدكتور) حسب المجتمع والثقافة .. أو تضلها بالنفس وما أكثرها .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
3 comment:
الساعة بعد 10 و لازم أكون
زززززززززززززززززززززززززززززززز
و
خخخبششششششششششششششش
من زمان
بس جد إنو عشنا هالحالة كلنا!
صباحووه
ونسيتي المليونير الإنجليزي إلي إنتحر على الهواء
بغض النظر شو أسبابه ,, مع إنها ما أقتنعني أنا
كزاب هالشوفير,, الفقر مش نعمه
نقمه
والي بحكي عنها نقمه,, بكون إموقف محله بدوش يتقدم شبر ,, ويتعب ويخابط ويلاخم بهالحياة الصعبه
الجزء التاني
بصراحه أنا أكره أي منتج بكون بطعم الشوكلا
او يكون لونه أسود
أنا بنفسي " برضو " اشياء من الطفوله إنحرمت منها
تافهه وصغيره
مسجل وك مان,, مظليه عليها رسومات زهريه, بوت اميجو " لإنه عيب للبنات" ’’ كندرة لون زهري " لونها عيب وفاقع"
لوووول,, مسقعني صحيح
الفقر مش نعمه...ولا نقمه
الفقر بهدله!
اسجل اعجابي بالشوكولبس ...زاكيه كتير
Post a Comment
:وكيل المكومنت قال