همه وإحنا
يعني حالياً عم بكتب وبراسي صور وكلمات وأشياء جد يعتصر لها قلبي ,, ولكن ,, وهون اللكن ضرورية لأن دائماً الواحد بحكي الحمد لله على كل شي أعطانياه أو منعه عننا لغاية لا يعلمها إلا هو عالم الغيب وحده لا شريك له ,, وهون بيظهرلنا أهمية لا شريك له ,, واعتقد الكل فاهم الموضوع .
طبعاً كلنا من ولاد الطبقة (إحنا) المتوسطة والفقيرة و (همه) ولاد الطبقة الراقية أو الغنية دايماً في صراع خفي بدور بيننا بداخلنا تجاههم ,, دايماً ومن إحنا زغار ولاحظها على أي طفل لما يشوف ولد إبن فرير أو حتى أي طفل يملك ما لا يملك ولما يسأل أبوه ما بلاقي أي استجابه أو رد غير (ما معنا يابا) (الله برزق) (إن شاء الله إن شاء الله) وتتكرر وتتراكم منها ما ينسى ومنها ما يعلق في الذاكرة ومنها ما يسبب العقد النفسية ويحز بالنفس ومنها ما بضل يزن في بالك وبالمقابل تزن على راس أهلك لحديت ما تستحصل عليها أو على كف ومسبه مرتبات وبعدها يتحول إلى شكل تاني يلي هو الكره .
كنت هداك اليوم لساتني داخله المحكمة فا لقيت على بابها حج كبير ختياااااااااااااااااااار وعم يفتش في جيبته وطلع منها فراطه وليست بالكثيره وبعد فيهم .. أول شي خطر في بالي إنو .. يا الله يا الله يا الله .. زي كأنو عم بضرب شي تحت إيدي أو عم بعاتب بحد قدامي ومقهوره منه وما طلع مني كلام عتب عليه إلا بالإستياء والركون إلى الله .
هاي الصورة مع صور تانية سواء لناس غرباء أو لشخص قريب أو أنا شخصياً ويمر عليي موقف إنو شوف هالبني آدم مايسوى شلن وشخص تاني يتوزن بدهب ما معو غير شلن .. سمت بدن ومغصة وصداع شديد .
متأكده زي ما أنا بتذكر بحالي إنو إنتو كمان لسا بنفسكم لعبة من أيام الطفولة .. ممكن ما تكون لعبة ممكن يكون صاحبتي في بيتهم تخت ليه إحنا بننام على الفرشات؟؟ .. ليه ما عندك يا بابا سيارة وصاحبي أبوه عندو سياره .. ليه يا ماما إنتي مش حلوه زي إم صاحبي (زي حلقة ماروكو) .. ليه إحنا هيك وليه همه هيك ,, ويدور النزاع النفسي داخل رحى الحياة .
هاد خطر في بالي هسا أسميه التفرقة العنصرية مع النفس ,, يعني إنتا في داخلك تحكي أنا فقير وما معي وهوه غني ومعه .. مع إنو لا هاد مش مقياس للتفرقة (الغنى والفقر) .. ممكن المقياس القدرة الإيمان العلم أو أي شيء ممكن يشكل داخل الإنسان دافع ليخليه يستمر في الحياة أو يستمر في شيء معين .. القدرة والإيمان والعلم والثقافة والتربية والأخلاق وحلاوة الروح والرقي في التعامل والحنية والحب وأكتر هاي الشغلات ممكن تخف من درجة لدرجة بس صعب تروح على خلاف الفلوس .
إنتا عم تفرق بينك وبينه/ا إنو هيه/هوه أحسن مننا وبعمري ما رح أكون متله .. وإلخ إلخ مع مجموعة وباكج جلد الذات .. زيدوا عليهم التفرقة العنصرية من الآخرين .. بتزكر وأنا في الروضه كانت في بنت غبيه وشنعه بس أبوها دكتور في الجيش كان ما ييجي على المدرسة إلا بالزي الأخضر وطبعاً المعلمات والمدير كلهم يرقصوا حواليه وحوالين بنته ويكبر راسها ويصير ما حد قادر يحكي معها وتصير البنت الأولى وهيه تجاوب متى مابدها ولو جاوبت غلط عااااادي مافي مشكله .. جد صورة أبوها وهيه مش راضية تطلع من راسي .. بعد هيك المدرسة التفرقة كانت من اللهجة والأصل (شوف التخلف) .. بعد هيك الجامعة وما أدراك ما الجامعة العلااااااااامه بتنحط على اسم العيلة يا سلام .. بعد هيك الشغل والكل عارف شو بصير على ما أعتقد .
يلي حكيت عنه هاد من الجهات والسلطات العليا .. زيد عليه قرف الأقران وتقزيزهم يا ويلييييييييييي ... فلان لابس لبس جديد .. فلانه شعرها طويل وعليه بكل ملونه .. فلان دفاتره مجلده بتجليد ملون .. فلانه بتحكي مدني .. فلان جاي من مدرسه خاصه .. فلانه معها موبايل جديد وسياره .. فلان أبوه بدو يعينه سفير ,, فلانه وفلانه معزومين على بارتي .. فلان دارس في الأميريكان سكول .. فلانه جابت منحة وبدها تطلع على جامعة في بريطانيا .. خلااااااااااااااااااااااااااااااااااااااااااااص خلص خلص أسكتي .
في المحكمة شفت بنتين بس على يومين مختلفين بنت من نوع النيرد ويلي كل الدكاتره يحبوها لأنها قال شو بتفهم أكتر مننا كلنا .. وبنت من بنات فرير والأميريكان سكول والعربي المكسر .. البنت الأولى لاقتني في المحكمة بتسألني عن شغلة نص الشعب بعرفها في المحاكم (عن التبليغ عن طريق محضري شركة أرامكس) طبعاً أنا صفنت قلت وااااال الدنيا كيف دواره وفي آخر اللقاء حكتلي أعطيني رقمك عشان أي يوم تكوني فيه في المحكمة خليني آجي معك أشوف الإجراءات .. هسا أنا مابنكر إنو البنت حابه تتعلم ونقطه تحسب لها بس جد كيف بعد ما كانت بنت ماخده إمتياز تيجي عليي وتسألني شو تعمل .. هسا البنت التانية شفتها عند أحد القضاة يلي عم بحضر عندهم ووقفت هيه وفتحوا جلسه تفضلي (انتبهت إنها لساتها متدربه) .. سكتت صكمن بكمن على راي اللمبي .. يا الله سبحان أيام حموري وباسم ملحم أيام ما كنتي تتنطتي قدامهم وتحكي أنجليزي مفكره حالك موسوعه أوكسفورد .
آه مش جاي أشمت وبعرف مرت عليكم مواقف وماقدرتوا تشمتوا .. آه صعبت عليي إني أشمت فيهم (زي موقف الغاز) آه ماقدرت ,,, ما عرفت ,, كنت بدي أحكيلهم حسوا شو خلتوني أحس ,, بس ماقدرت لأنو لما كنت مكانهم زمان كنت مش طايقه حالي ومش ناقصني شي يزيد عليي .
الأشي الأسخم أو الطامة الكبرى إنو يكون واحد مايسوى (وبرأي الجميع سواء العلني أو السري) ما بسوى مااااااا بسوى .. وهوه يلي يمشي وهوه يلي (عُملِتُه) يلي تمشي وإنتا يلي تضل واقف مكانك ,, وقد ماحاولت تتغلب بتلاقي حالك يا عم تستنسخ شو يعمل يا عم تعمل شي ما بيجي عند الناس قد نص يلي بيعمله ولو حاولت تطلعه من راسك تلاقيه بيطلع من حيث لا تعلم .
في كتاب نيران صديقه للأسواني (مع تحفظي عليه وعلى الكتاب أكمل) إلا أنه حكى جمله وحيده أعادة صياغة نظرتي لهاد الأمر ,, حكى عن أبن عم يحلل شخصية وحياة أبوه .. أبوه اشتغل وعمل واجتهد متله متل غيره .. بس أبوه ضل تحت وغيره طلع فوق حتى من أقرانه كان يعمل كل شي يعملوه بس كان بفتقد لشيء ووصفه الأسواني ب (اللمعه) .
تسمعوا ناس تقول .. آآآخ لو معي مليون كان بعمل البلاوي ,, آخ لو عندي عزوه كان طخيته وجليت أهله عن وجه هالأرض .. لو إني وزير كان بعمل وبسوي .. لو إني كذا بعمل كذا .. ساعيتها بتعرف ليه ربنا مارح يعطي هالبني آدم مليون أو عزوه .. ببساطه ربنا أعلم بتوزيع الرزق والأرزاق أياً كانت أو الأعطيات أو حتى يعطيه الخلفه ,, ولأنو بعرف ما بداخلنا ,, ضيف إلى ذلك كله قوله تعالى :
{ من كان يريد العاجلة عجلنا له فيها ما نشاء لمن نريد ثم جعلنا له جهنم يصلاها مذموما مدحورا (18) ومن أراد الآخرة وسعى لها سعيها وهو مؤمن فأولئك كان سعيهم مشكورا (19) كُلاًّ نُّمِدُّ هَؤُلاء وَهَؤُلاء مِنْ عَطَاء رَبِّكَ وَمَا كَانَ عَطَاء رَبِّكَ مَحْظُورًا (20) انظُرْ كَيْفَ فَضَّلْنَا بَعْضَهُمْ عَلَى بَعْضٍ وَلَلآخِرَةُ أَكْبَرُ دَرَجَاتٍ وَأَكْبَرُ تَفْضِيلاً(21) } صدق الله العظيم (سورة الاسراء)
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
7 comment:
إحنا بنحب ننصب محاكم ونحاكم ونحكم ونتبأ عن الناس ومنهم
خلص هيك,بنحب نحللهم ونحلل شخصياتهم من برا
مع إنه " بعض الأحيان" جوات الناس اللي بنحاكمهم إشي كويس بس بده فرصه يطلع ع السطح
بحبش أقرر إنه هالبني أدم وصولي أو نيرد أو مش, بس من لبسه وطريقة مشيه او حتى علاقاته حوليّ
لإنه عند أول دقره حقيقيه بتنكشف مكنوناته ونفسياته
وبجوز هوه بيعمل هالشي تلقائي مش بخبث او أجندات هوه راسمها من قبل
كلنا إنحرامنا,حتى ال " أغنيا" إلا ما أهاليهم منعو عنهم شي ك عقاب أو ك كسل
ف بتصفي انه الواحد يقدر ينسى هالحرامان ويشتغل ع حاله ويجيبه من كد جبينه
أو يضل يجلد بماضيه ويلعن أفطاس الفقر
بتزكر إنه " والدي" الله يحفظه كان عنده تحفظ وخوف من فكرة ال " وكمان" والمسجل كله للبنات بشكل عام
وضليت انق فتره طويله جدن عبيل ما أجيبه
وماجبته إلا وأنا بالكليه من مصروفي
خلص تناحه ع قله وعيّ ع إختلاف بيني وبينه
برضو مش إحنا اللي بنقرر إنه هاد اللي معه مصاري بسواهن أو ما بسواهن
لا إحنا منزلين ولا منزهين ولا ربنا حكالنا إحكمو عليهم ,وأحكولي شو بطلع معكم
صباح الخير,,
um ommar
يا حبيبتي شو إنو قلبك أبيض زي البفته وما بتحقدي على ولا حدا ولا حدا ولا حدا
كلنا بنعرف هالكلام ولو بيوم صدر منا بنرجع بنعاقب ونحاسب حالنا
القصة بتكون في الجانب المعتم في أنفسنا
نعم نحن إلنا ظاهر الشيء فقط أنا مابقدر لو بعد تسعمية سنه أعرف مكنوناتهم وأصلا ما عندي القدرة أعرف مكنونات كل شخص بمر عليي بأي لحظة وبأي ثانية شي مستحيل
أنا بحكي عن حزة النفس باللحظة يلي حتى مرات بتكون فيها بينك وبين حالك مثلاً شفتي شغله بتحكي لحالك ليه مش قادره أجيبها وغيري قادر؟ في هاي الحالة إنتا عم تفكري بينك وبين حالك مش في غيرك
الكل موقن في فكرة عدم المساواة بين البشرية والكل متأذي منها .. وإحنا مش راضيين نساعد حالنا ولا نساعد غيرنا .. جارتك فقيره مش ضروري تتبرطعي قدامها إنو عندك وما عندك أقل ما فيها يعني بنصير زي ما ممكن نقول في المياه الحيادية لا الفقير بحقد ولا الغني بيتعزز
وبين قوسين الفكرة مش فكرة غنى أو فقر
حاساكي " كالعادة " بتتمئلسي عليّ بس هاد مو جديد ع علاكتنا
لا قلبي بالمره مش أبيض وعندي خانه حقد مستحيل تصدقيها
ف بلاها هاي الأبيض والبفته
الجانب المعتم اللي بتحكي عنه بخلينا نتطلع ع مذيعه من ورا شاشه ونحكي ونتحاكا عليها
منا عشان هيك جبتلك قصه الوكمان,إنها بتحز ببالك ليش أنا لأ
ليش انا ممنوعه اطلع الرحلات والبنات بقظوها طشاشات طول السنه
هالشغله مش بإيدك تتحكمي فيها بيني وبينك, خلص بتضل نفسك بدها الشي اللي بريحها بوقته حتى لو ما ناسب هالحل الطرف التاني
البرطعه,بتصفي مرض نفسي
قيسي عليها إنه انا عندي أولاد وغيري ربنا حرمها و24 ساعه عم بحكيلها عن حركات أطفالي وبورجيها صورهن
بترجع إنتي بوعيك وإلا مش بوعيك لمى بتناقشي او بتشوفي هيك قصص وبتتعايشي معها
محكيتش عن الغنا ,قصدي إنه فش حدن منحرمش شو ماكانت طبقته الإجتماعية
um omar
والله لو تعرفي جد في شغلات بتصير معي وك لو امزع حالي نصين لو أصير برنسيسة خلص مافي مجال بالمره تزبط معي الشغلة أو أحسن الناس بتعاملني بنفس الطريقة يعني مثلاً لو سين من الناس بعمل شي وأنا قبليها بكون عامله هاي الشغلة لأ تقولي كأنوا السين من الناس شغلهم على طعم التفاح وأنا على طعم الخيش
جد بحس بعبثية مطلقة وبتفاهة مش طبيعية يعني بالله عليكي في ناس وزلام برخصوا من حالهم طب أنا محترمه ليه بتعاملني شي والبنت المشخلعة يلي بتيجي تاخد منك معامله بتعاملها وجه تاني
بس بتعرفي مرة من المرات دكتورة حكتلنا أوك في واسطة في الدنيا وهمه ياخدوا الأي والخ إلخ إنتو لو طلعتوا ونزلتوا ما رح تعملوا شي فا تقبلوا الواقع لا تخليها هيه شغلكم الشاغل
من ناحية جوابها منطقي بس من ناحية تانية شو جابلنا سكوتنا إلا لنكون ورا وليه أنا أقبل هيك بس بالمقابل السلطة أو الهيئة هيه هيك مزاجها تقبل من غيرك وما تقبل منك شو بدك تمشي الدنيا على مزاجك؟؟
ليش وصل الحكي فينا ل هون
ستلاف مره حكيناها إرضاء الناس غاية لا تدرك
وإنتي بس تعملي اللي عليكي وتكوني بدك تستني تقدير ل تعبك من الناس,رح تنخذلي كتير
وحتى لو كانو " ل غيرك" برياله وهمه أقل من أدائك وإبداعك
بدك تتعلمي تقسي ع حالك وع الناس
إنه أنا هاد أقصى شي ممكن أقدمه بأقصى طاقتي وإمكانياتي
شكرك, كان بها
ما شكرك,ع الأقليه بكون ضميرك مرتاح إنه لو رجع فيكي الزمن مره تانيه مارح تتراجعي ورح يكون أدائك نفس الشي
بعمرك بحياتك ما تنتظري شكر من بني أدم
حتى أهلك؟ تخيلي
عارفه ليش, لإنه همه ما بحسو فيكي وف حرقتك ت تنجزي الشغله , وبقدرو الشغل ع غلاوة الشخص اللي أنجزه
فاهماني أكيد؟
أزا ما قدرت أمشي الدنيا ع مزاجي
ع الأقليه باخد منها الي بريحيني وبطنش اللي جالطني
الدنيا والحياه بتنعاش مره واااااااااااااحده بس
يا بتعيشيها صح وعلى كيفك ومبسوطه
يا روحي إحفري قبرك وإستنى أجلك أحسنلك
يما السوداويه يماااااه
um omar
والله على قولتك الواحد يعمل يلي عليه والباقي عند ربنا
ولا تستني جميلة حد وحتى لو بدهم يشكروكي ويمدحوكي شو بدهم يعطوكي نوبل للسلام ولا نجمة وشاطره وأحسن بنت عندي وأحسن محامية في الدنيا
بحكوا الكلام ما بساوي شي ,, الواحد جد يعمل يلي عليه ونقطه إنتهى وخلهم همه يحفروا قبورهم بحالهم أنا شو خصني
يوما منك بومه
هي سادس مره بسمع هالإسبوع وصف البومه؟
غريب صح؟
الشغله جدن صعبه,بس بدها إرادة وشوية صبر
بعدين بتصيري متهتميش حتى للشكر والعرفان والتقدير
وتشوفيه تحصيل حاصل
وتبطلي تفرحي "زي الصغار" بس تسمعي حدن بشكر ف شغلك وفيكي
ههههههههه
خليكي معي, ح وديكي البحر الأخظر
Post a Comment
:وكيل المكومنت قال