نسخه
مارح أحكي عن التميز والإختلاف والإنفراد والغير وإلخ إلخ .
مممم بدي أحكي عن شغلة عم بنتبهلها إنو .. مثلاً لو تحكي مع واحد في السياسة تلاقيه بحكيلك .. فلان حكى والرئيس قال والمحلل السياسي قال والجزيرة قالت والقانون بحكي .. طب وبعدين .. إنت شو رأيك بالمختصر المفيد .. بحكيلك إي أنا داري بطل حد فاهم شي .
تشوف حياة واحد أو وحده تلاقيها .. شغل .. أكل .. نوم .. فيسبوك .. تلفزيون .. المسلسلات ما غيرها .. لبس .. وعدد على إيدك وإنت عارف لوين أنا رح أوصل من فكرتي .
أفتح موبايل فلان تلاقي ,, أغاني جديدة (أغلبها عليها اسم الموقع وبجوده منخفضه) .. صور إلو في كل مكان ممكن بحياتو راح عليه .. سورة الكهف .. فيديو لولد زغير .. برامج ما إلها داعي (وما أكثرها) .. صور لممثلين وممثلات .. وفي بعض الحالات صور سافله .
إقرأ أكثر من مجلة نسائية رح تلاقي الموضوعات التالية .. الموضه (يلي ما حد بلبس متلها) .. المكياج (يلي للتصوير فقط لا غير) .. الطبخ (على أساس ناقصها) .. عالم الطفل (برضو على أساس ناقصها أو على أساس رح تقرأ وتستفيد) .. موضوع سخيف عن المرأة والرجل (ما إلو أي معنى في كل هالدنيا منذ الخليقة) .. وكمان قصص من حياة الممثلات والفنانين (ما الناس تاركه شغلها ومشغالها عشان تقرأ إنو الفنانه فلانه لما طلقها جوزها كان بسبب ... ) .. حتى الشعر بلا طعم .
حتى التميز صار مجموعة استنساخات ,, البنت لو بدها تتميز بتحط عشرين صوره على الفيسبوك والتويتر أو صورها وهيه مزلطه على المدونات وبتتعرف على ألفين شب وبتتخصوع وبتتخلوع أو بتحاول تنضم لأي مجموعه وبتصير تعمل كل شي كل شي متلهم وكذلك الشباب حتى لو بدو يثبت وجوده بتلاقيه بثبته بإنضمامه بالأكثريه .
رحت على أكتر من دكتور أسنان وحكولي نااااااااااااافس الحكي .. ولما رحت على دكتور رابع أو خامس حكالي لو عملتي يلي حكولك عنه كان إندمتي طول حياتك .. في المحاكم تلاقي الناس والمحامين بتبعوا نفس الطابور نفس الأفكار نفس الطرق نفس الكلمات وإزا غيرت شي بتكون غلطان .
إزا فكرت بطريقه تانيه بتكون موضع شك .. لأ أنا لازم أعمل هيك .. لازم أتبع نفس الأسلوب نفس الطريقه نفس الحركة نفس الكلمة نفس الإتجاه نفس الأفكار ........ خلاااااااااااااااااااااااااااااااااااااااااص .
طبعاً كل يلي حكيته كووووم .. والطامه والكومه الأكبر إنو كل ما ذكر أعلاه مفكر حاله النسخة الأصلية .. زي أنور عكاشه وهوه بيزغط البط .. والأنكى إنو في ناس مقتنعه شديد الإقتناع بهاد الحكي .
يعني .. شب الإيمو (يلي همه بلبسوا أسود وأحلاق وتاتو وشعر منكوش ومكتئب) بعتبر حالو شي أوريجينااااال خااااالص .. ومشجعي الفريق الفلان كل واحد بشجع فريقه بطريقه منفرده (مع إنو بالنهاية فستق فاضي) ... ((مش زي فكرة وزير الشباب والرياضة في موضوع الفرق الرياضية)) .. في ناس ماسكينلك عبارة نحن لسنا الوحيدون ولكننا الأفضل يعني على شوي بدي أنتحر من العبقرية .
لسا في طامه أكبر مفكره الدنيا خلصت وخلص كل الأشكال فيها وإنختم العلم ( زي الطراونه لما بحكيلي إنتي شو بتألفي وتحللي ما خلص الفقه والعلم القانوني خلص من بعد السنهوري) يعني بدي أصدقك وأقول آمين وربنا بقول (وما أوتيتم من العلم إلا قليلاً)؟؟ ... بدي أصدق إنو فلان وعلتان هوه يلي عرف الدنيا وأنا رح أضلني مكاني .. شو هوه كان شوال سكر وخلص؟؟ .
ناس كتير بتحكيلك بتمنى أترك بصمه في هالدنيا .. طب شو عملت بحياتك لتمشي في هاد الطريق؟؟ .. ناس يتعتبر حالها مميزه بإنفرادها .. آه في ناس أصل مش نسخ .. بس قديه هاد الأصل مش بالتحصيل الحاصل بطلع نسخه؟؟ .. يعني أنا بركب ليجو وإنتا بتركب ليجو أنا ركبت مزرعه وإنتا ركبت بيت .. هيك هيك عم نشتغل في الليجو نفس المبدأ نفس الألوان .. ليه تتبع الأفكار السياسية تحليل القانون الدولي والتاريخ والأحداث ما زال إنت قادر بجهدك الفكري تبني شي جديد ؟
ليه تكون دكانه ما زال إنت قادر تكون مصنع؟
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
9 comment:
بالزبط هيكد
https://islamicnewvision.files.wordpress.com/2012/04/art0006841.jpg
المصيبه إنه بعالمنا اللي عايشين فيه بتنقهري لمى تشوفي ف بلاد تانيه إلي عنده أي تميز أو أفكار هوه اللي بطلع وبنشهر وبصير "حدوه" ليهم
بعكسنا, أي شي بتختلف إنت فيه عن الركب الساير
رح بتصير إشي " شاذ" وملكش لازمه و وجودك تضيع وقت
عكشاوي,هاد لحاله مدرسه و محافظه و جامعة بالسخافه
قال اليوم بهدد السعوديه إنه يبعتلها طيران يخسفها خسف؟
هوه أكبر علمه كم عود ف رزمه الجرجير, وكم سخيف بده إيشغل بقناته ت يلم مشاهدين تافهين متلهم
المجلات والمواقع الإكترونيه عم بتدور ع أكتر شي بنعمله بحث ع محركات البحث زي جوجل وياهو
إنه شو اللي لافت نظر العالم عشان يعملو ربح سريع
بهمهمش الأخبارات التانية, او الثقافيه
اللي بده اخبارات ثقافيه لازمن يكعى ت يلاقيها
صرتي تحسي إنه إزا في " نسوانه" مبدعة ومشتغله ع حالها ومش دافنه حالها بالبيت والشغل والأولاد
صرتي تحسيها إشي غريب؟
حتى مش إشي الواحد يتطلع إليه ويتمنى يصير زي هيك؟
يا إما بتكون إم كشه,يا إم بتكون زاته ولادها وعلا سنقه عشره؟
بما إنك دعستي ع عرق ال "عكشاوي " عندي
تفضلي هاد
http://www.youtube.com/watch?v=bIyo57bAQes&feature=g-u-u&context=G29b133eFUAAAAAAACAA
تعمليلناش فيها آيدنتتي كرايسس و دراما و بدك تبصمي على هالدنيا و هيك
مش ناقصنا!
لول
----
شغلتك بسيطة، لازم نعمل سحر لعمو الطراونة و باقي أعضاء اللجنة -ما غيرهم- لأنك متعقدة منهم ، خذي مني الصافي ،، أنا قريت بمجلة عن تحليل الشخصيات و أتبعتها ب 3 مدونات لمتخصصين في علم النفس و متأكد من اللي بقولو
---
مهو يا ستي المصنع انحرق! خلينا على الدكاكين ، ما بيلبقلنا غير هيك
---
بالملاكمة: اختراع الشعب اليهودي كتاب أكثر من رائع، لو معاي مصاري كان بنشره على كل أوروبا و أوقيانوسيا و كندا :)
um omar
إنتي بس مقهورة من نغاشة
وهوه عفكرة أكبر مثال عن شو بحكي إنو هوه عبارة عن نسخة كل شي في حياته عن نسخة وأثبتلك لما صار يقارن حاله في البرادعي .. يعني أوك إنت عندك صفات ومميزات بس هاي الصفات والمميزات عاملها عشان الكل بعملها فا بتصفي متلك متل غيرك ما عملت شي جديد ما طلعت بشي جديد مش عم تعمل شي لمعنى مش عم تبغى في عملك وعلمك وحياتك غاية معينه مش عم تحقق هدف غير إنك ... غير إنك .. مش عارفه أكمل الجمله وجد بحكي
عم بفكر أكمل جملتي مش قادره وما أعتقد همه قادرين يعرفوا يكملوها لأنو هاد الوضع ما إلو إلا حيط ونهاية مسدودة ,, طب ليه؟؟
ربنا معطيك .. ربنا فاتحلك المجال لمليون شغله مليون طريق وشارع ومكان وحياة ليه إتباعك لطريقة معينه تعتبره هوه الأشي الأصلي؟
Haitham
مجرد إنك وصلت لنفس فكرتي يعني في غيري بفكر بنفس الموضوع والدنيا مستويات .. ليه ناس مسيطر في مخها إنها مستوى واحد؟
وإزا إنحرق المصنع يعني في بالأصل مصانع ولسا في مصانع على أمل ما إنحرقت .. في ناس عندها يكون إمعه لناس تانيين إشي فخر إلهم .. الإشي البشع إنو مافي ناس تحكيلهم إنو لأ يلي بتعمله غلط وعندك خيارات كتير
وبالنسبة للملاكمة على سيرة النشر بدي أحكيلك إنو وجعني ضميري إني إشتريت كتاب لواحد يهودي وكسبته حداشرليره شو ما كان هاد الكتاب
بحس حالي مش قادر اعلّق عندك , جد بتكتبي شغلات في قلب الصميم نفسه
شكرا وجهودك مشكورة
LUNAR.
المشكلة إنو إنا كمان كل ما إنتا تعلق بحس في شي غلط
وبرجع بقرأ النص كمان مره أتأكد وين السهوة يلي سهيتها
خلااااااااااااااااااااااااااااااااااااص
خلص بصير أقرأ بدون ما أعلّق
:)
lunar.
لا يا حرامك لا يا لحافك هوه يا بتطخه يا بتكسر مخه
وجميع آرائكم محل احترام
Post a Comment
:وكيل المكومنت قال