بنص العرس .. عاللوج قاعدين بنتفرج على الناس حوالينا كل الناس مبسوطة لدرجة بتحسها مبالغ فيها مخبيه جوات نظرات وحقد وحسد ولا مبالاة وزهق وشوب ونعس ... وفي الناس يلي جد مبسوطة واحنا مبسوطين على انبساطهم .

ولاد زغار .. تقاليد مش معروف راس ابوها .. ناس مابتعرفها .. وجع راسي من الطرحة .. الجرافة مدايقته .. بنتفرج ببعض بنضحك وعم تمر الدقايق .. عم يزيد توتري .. وجود أهله كلهم ووجود أهلي كلهم .. بسمع كلماته بسمع لهفة عشقه .. وهوه بحكيلي كنا وين وصرنا وين .. بلحظة من اللحظات بحكيلي "أنا مش مصدق إني في عُرسي" بضحك بس الدمعة بعيني من فكرة كيف زلمتي عم يفكر وقدية عظمة الرجل ونقاوته لما يعبر عن مشاعر حبه البريئة .

كل حركة علينا محسوبه ومش عارفين نتحرك .. والكل عامل حاله بفهم وعارف شو يعمل وبدويانا ما نغلط ونضل زي الألعاب  وكأن الناس قدام الكاميرا غير يلي رح يكونوا على شريط العرس وصوره .. بتفرج كأنو اللوج مغناطيس وأي حركة بنعملها الناس بتلقطها زي كمرات المراقبة لدرجة حاولت اعمل كم حركة والمعازيم عم تتفرج وتتحرك زي اللي مبرمجين على نفس الحركة .. صح شي بضحك بس بزيد الضغط في يوم بحكوا عنه يوم فرحي عرسي اليوم الكبير ... إلى آخره. 

صار موقف ازعجني .. حسيت رف قلبه على زعلي .. ماقدرت اكمل زعلي مع رفة أحن قلب بعيشله .. وكملنا دقايقنا في معزوفة التقاليد التي لا بد منها .

بلحظة بفتش عليه لقيته بحكي مع صاحبه بس في حوار شبه مكثف .. اتصالات .. سيجاره عم تولع بين اصابعه ناسي انها بين إيديه وشتت انتباهي إلو مجموعة نسوان المفروض قرايب بس مش قرايب سلمت عليهم طبعا النسوان الأكبر سناً لا يخلو كلامهم من تعليق من هون وكلمتين بمغصوا من هون .. هاد غير الوصايا العشرة لليلة الزفاف والسنوات العشرة يلي تتبعها تيجي وحده من قرايب إمي ترصفهم في داني قبل ما أطلع للصالون عشان ما اصير زي بقية هالبنات "عالأغلب قصص صارت معها او مع بناتها" عشان ما يضحك عليي لا تخلو من بعض التفاصيل المزعجة للأسف .. والرد عليها .. صفنه مع صدمه كيف خالتو كبيره تحكيلي هيك شغلات  ..  إحم إحم .. لا زالت الصدمة تلف راسي أكتر من دبابيس الشعر ونار السشوار .. ووجهي يلي بحكني ومش عارفه أحكه .

راحوا ورجع هوه وبعيونوا ضحكة بعرفها .. ضحكة انتصار ودخول التحدي .. ياساتر استر شو في؟ .. حبيبي شو في؟ ضحك وضلو ساكت .

اجى موعد رقصتنا لحالنا .. مسك إيدي شد عليها وحكالي "شو ماصار إعرفي إني بحبك" .. هاي أول مره بخاف هالقد بلعت ريقي وقلت يا رب سترك .. الناس كلها قعدت وإحنا بالنص نرقص .. خففوا الضواو .. شوي شوي فلت إيدي وقرب منو واحد من يلي بشتغلوا في القاعه ووشوشه .. كل يلي قدرت اسمعه .. "ماشي بس لا تنسى الباب" رجع شد على إيدي وتطلع عليي وهوه على وجهه نفس الضحكة .. وسألني .... "رح تحبيني لو شو ماصار؟" .. حسيت في شي تقيل صاير .. ابتسمت وحكتلو اكيد ياعمري .. خلال ثواني فلت إيديي ولقيته حاملني وطلع من باب القاعه وبنزل الدرج بسرعة والسيارة واقفة عند البوابه ركبني فيها سكر الباب .. ركب جنبي ... وياااااا فكيك .

حاولت أستوعب الموضوع .. حاولت أفهم شي .. حاولت ""بس خفت أكمل"" أفكر في مصير يلي في القاعة .. أهلي وأهله .. كل هالسواليف لفت في راسي .. بس لقيت حالي بفك الدبابيس من شعري وبمسح في المكياج .. وأنا سرحانه والرب راعيني .. صفنت فيه حسيته في غمرة سعادته وكأنه هسا إجا اخدني من الصالون وطالعين عالقاعة/على عرسنا .. "حبيبي فكيلي الجرافة مش رح أعرف أفكها وأنا بسوق" .. بفك فيها وأنا صافنه فيه .. سألني "خايفه؟" .. ضليت ساكته .. "معاي مابدي تخافي من شي" .