حكتولي الرجل مقهور .. أي حطوا بالخرج
يعني مابقهرني إلا زلمة "تنتون على قولة إمي" مابسوى في سوق الرجالة تلاته مليم قاعد بنظر وبتمنظر على النساء يعني نفس مبدأ يلي منشف حلق البنات .. وبيجي بقولك ثلاثة إذا بتغيرهم بتنفتح عليك الرزقة البيت والسيارة والمرة .. إن شاء الله بغيرولك جلدك تسعين مره في الآخرة يارب .
بستغرب إنو جد الزلام في مجتمعنا ماخدين مقلب بحالهم وهمه كلهم دون استثناء إن ما كان في مجال بكون في المجالات الاخرى متل عرموش العرمط لا بحل ولا بربط .. أي ضفدع بخت هالشغلة لسا كل واحد نازل بتمقطع فينا وبقوللك بالآخر بتضل الأنثى نص المجتمع وهيه الأم والأخت والست وال وال وال .. أي رووووووووووح .
لأ وفي إجتماع كنا فيه بحكوا فيه عن الإنتخابات بقوللك واحد فطحل إنو كيف الأنثى بدها تنتخب مرشحة أي هيه لما بدها تزبط شعرها بتروح على كوافير (مع العلم أن الكويفيرية جميعهم منفدين على بعض وفهمكم كفاية) وإزا مش عارفه شو بتروح على زلمه وإزا مش عارفه شو مش عارفه إيش ولعيه تلعي قلبك على هالدراسة الإحصائية يلي نسفت فيها سلسفيت أهلينا ودخيلك على المرشحين الرجال .. همه من ناحية مرشحين مرشحين وزكام حاااااد ومش قادرين يشموا .. وإملأ الفراغ .
يلي بقهرني إنو جد النسوان تسترخص بحالها وترمي حالها على الزلمه والسبب unknown أو بالأحرى error في أخت هيك تربية عظيمة عشناها .. أي قسماً بالله النص الأول من حياتي عشتو بتمنى قال شو أكون ولد من كتر سواليف ستي يلي بدها تطلق إمي من أبوي عشان ما بتجيب ولاد وكل خلفتها بنات .. وفي المقابل إمي كبتت الضغط فينا وشفت بعيني البهنكه والعز يلي عاشه أخوي (ولا زال) لأنو ببساطة شو "ذكر" أي لو بصير رئيسة دولة العالم الكبرى رئيسة كل البشرية إمبراطورة قيصراية سلطانه زفت بوجه اليهود رح أضلني أقل وأقل لأسباب واهية .. يييي البنت لو طلعت عالمريخ بترجع للطبيخ .
ولعية تلعي قلب الطبيخ وقلب يلي إخترع هيك أمثال زي وجهو المصدي وكل حد بحكي وبتبرطع بهالمثل لأ وفوقها بقولك تضرب النساء بالنساء أي في زلام قسماً بالله على الحال يلي هوه فيه (مش بالوضع الطبيعي يلي خلقه فيه ربنا) شكلاً وحجماً وكرشاً وقرعتاً (حتى ما نظلم في ناس قرع بس بكون شكلوا لطيف أو وراثتاً) يعني أشي بغثي المعدة وهو كان سبب تشريع ووجود مبدأ الخلع في الشريعة الأسلامية .
المسألة مش مسألة تعميم بس هالسوسة متأكدة إنها في عضمة كل زلمة موجودة .. مرات بقول في حالي إنو جد مرات يلي بتكون كاشف سره أو ماسك عليه ممسك وهوه في ذاته عارف إنك مستحيل تحكي سره رح يتمقطع فيك وإنت أصلاً alrady تنظر إليه نظره دونية من ورا السر المهبب يلي بتعرفه أنتي ولا حد غيرك فا كيف لما يخون شغلة إنك مؤدبه وضابه (مش رح أستخدم مصطلح تاني عشان مابحب أكتب بلا قافية) ضابه لسانك ومش فاضحيته على الملأ على هالأشياء يلي بتخجل فيه .
بس جد يا بنات تطلعوا حواليكوا .. بقولولك الشب ما بحب (المكلكعة) أو بالنكليزي بكولك girl with packages يعني بنت حامله سواليف وعقد معها .. بس حقيقتاً الزلام على أضرب وأسخم وخصوصاً عقدة المريخ والطبيخ .. بحس جد الزلام بخافوا من البنت مش بتخوت وما بحكي عن الخوف الجسدي .. ما رح أشرح أكتر لأن كل البنات يلي عم تقرأ أختبرت هاد الشعور وستظل وكلامي بس مجرد تأكيد إنو سستر يو أر نوت ألون وفاهمين أعتقد قصة معص راس القط ومعروفة للجميع .
وبالنسبة لمقولة المريخ حابه أرد عليه بالمثل وأحكيلوا ... بكل رباطة جأش التي تحملها فيروز في أغانيها كأغنية بتسأل إذا بهواك (على سياق وطريقة ومنبع الكلام مش المقصود المعنى) :
الرجل إذا طلع على المريخ برجع يحكي وين الطبيخ ...
الكاتلة
أم السعد
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
19 comment:
ضفدع بخت :dream:
هاي جديده بصراحة
في " بعض" رجال مابعرفو من الدين إلا مثنى وثلاث ورباع وبدن تكملة الأية
والمثل تاع الرزقة اللي حكيته
من كام يوم نزلت مشكلة ع النت عن وحده جوزها كزب عليها وسافر سنتنين وحرمها من كلللللللل شي وعلى أساس بحوش ومش طالعله لسه يسحبها عنده
وإز به
طارقها جيزه من أول يوم سفر
المصيبة مش بالمشكلة ,, المصيبة في الناس اللي جاوبت وبرربرت موقف الزلمة إنه عمل صح عشان "يستعف" أوم بئا أنا نزلت دبك وسبسبه لأبو موزه
شغلة الصبي والبنت, حرام ماشتفها من إمي وإبوي
بس شفتها من عائلة أبوي
إحنا 5 بنات و ولد
والولد الأخير أجا بعد ما كل الي كانو إينقو ع إمي إنه جيبي ولد,, كانو توفو هههههه
الموت أرحم شكله
قوية,, كملي كملي :dream:
أم عمر
لا في أحدهم لما واجهته إنك مابتصلي ولا عارف من الدين غير هالآية قاللي إنو هيه "سنة" متروكة من الدين .. بالك شخص عم يفتيلك في هالمسائل وبنظر عليكي شو بتتوقعي هالشخصية يلي عليه ولا المستوى يلي حقيقتاً لازم يكون فيه
بس مع هيك أنا بحكي عن شرذمة القوم ما بحكي عن الكل ترى في "زُلم" وجودها بفتح النفس على الأكل حتى لو كان زلط وبعطي المرأة مكانتها زي ما هوه حافظ كرامته وعندو هيبة ورجولية ومش مولدن وبخابط في كل شي وكما قالوا رجل والرجال "قليلووووو" واسبت يا حضرت القاضي آلولووو
أنا ما أنكرت وجود البعض الأخر
وبعرف ناس معرفة شخصيه من كتر ما هوه مأدي واجبه تجاه بيته وعائلته بساعد بالجلي والشطف لإنه " حرام" تعبو اليوم أهل البيت
بجد بحكي
البعض الأخر,, بكون حاااااااااافط كل الردود الجاهزة الباردة للمناقشة في موضوع بخصوص الزلومية وتوابعها
وطلعتلنا شغلة جديدة’’ قال إنه النسوان ملزومين بشغل البيت" غصب مش عن طيب خاطر
تعي رقعي تعي؟؟
أم عمر
شغل البيت وإلخ يمكن ما يكون مقياس نتفق عليه أو إنو ناس كتير تتفق عليه بس هيه شغلة مبادئ وإحترام إنتي بتعرفي كلمة الزلام بتسوى كتير عن الأنثى وبرضو المواقف
يعني شو معناها كل هالحكي يلي بلى طعم مش غلط تفكرلك دقيقتين تلاته في كلمتك قبل ما تدجها بس في ناس الأحسن يدجها عشان يبين على طبيعته المخدوعه فيها الناس
شو بعرفني سولافة طرمه
ضفدع مين!
لاااااااااا
هاي بسهولة بتروحي فيها قدح و ذم!
ههههههههههه
بس جد قوية، اول مرة بسمعها!
---------
هو هاظ أطقع من فيروس أقوى رشح حيمر على البشر، للأسف!
عالم ذكوري بامتياز، و امتياز سلبي أكيد!!
--------
بس هالسوسة متأكدة إنها في عضمة كل زلمة موجودة = بسسسسسسسسسسسسسس برضو مش هيك فشة الغل! :P خليتيها زي (مو 90% ,,, حرام ,, خلينا نقول 88.756% منهم) :) #الرحمة
-------------
هو كلو المرجع للنشأة و التربية اكيد، كلمة فضفاضة بس بصراحة هوه مربط الجحش بالأخير (شو! انتي بطلعلك تضفدعي يمين و شمال و احنا لأ!)
خخخخخخخخخ
-----------
* لويش أم عمر ما ييجيها شغل مستعجل و طويييييييييل و تبطل تسرق أفكاري و تسبقني و تعلق
نيهاهاهااهاهاهاهاا
ذكرتيني هداك اليوم الظروف خلتني أقعد مع واحد ساعة كاملة لا يفقه فيما يقول من هدول الشاكلة... أقسم بالله إيدي اليمين بدها تطلع من مكانها وتلطشه كف بنص وجهه بس أنا مسكتها ورجعتها محلها بشق الأنفس وحكيت بنفسي خلص يا بنت المثل بحكي "داروا سفهائكم"
شو بدنا نعمل السفهاء كثار من الرجال اللي زي هيك والنسوان اللي بتربي هيك رجال... وعلى قولتك مو كل الرجال هيك فيه رجال ما شاء الله عليهم
فرحانة أوي يختي!
طييييييييييييييييييييييييييييّب
شيشاني
ام عمر جاي تستقوي وعم تشد من أزرها الباشا عقيد اسيل
توني قريت تعليق لبعقيد أسيل
بس برضه منّي خاييييييييييييييييييييف
-------
بس قبل ما .. بحب أذكركو إنو الضرب مش هو الحل!
نور هانم يملؤها الغضب، و الله خفت و أنا بأقرأ ما تطلعيلي من شاشة الكمبيوتر و تدقي بخناقي!
لأ و مين وقف معك، إم عمر بجبروتها، منيح إني بعيد عنكم بلاش يصيبني عيار طايش.
هوني عليكي مش محتاجة، في عالم الغاب الغلبة مرات بتكون للأقوى لكن معظم الوقت بتكون للأعقل، و لولا هيك كان ما عمرك شفتي أسد في حديقة حيوان أو سيرك.
بس عجبتني شغلة:
"البنت لو طلعت عالمريخ بترجع للطبيخ"،
"ثلاثة إذا بتغيرهم بتنفتح عليك الرزقة البيت والسيارة والمرة"،
"تضرب النساء بالنساء"...
من وين بتجيبو هالحكي؟!
المهم الطبيخ جاهز و إلا لسة؟
:-)
صالح
نوووووو أم بوسوبول والله نورت يا خال
وبالنسبة للحوار رح اترك الميكروفون لأم عمر هالمره
3 على البطل؟ و الشمس بعينه كمان!
أنا بقول انفد يا رفيق صالح.. ميزان القوى الكعكية الظلاكية معووج -جدًا- ها هنا :{
عمو صال صال,,إنت سبيسيال كيسس
يعني حتى لو إنت من أتباع أو نوع الجنس الأخر
رح بنسامحك لطيب أصلك وحسن تعاملك وتعاونك معنا في الفتره الأخيرة
----
القاعدة أعلاه إستثنائية ولا تتكرر وأي حدن بده تكيسر أصابع أو تطبيش راس يرفع إيده
أم عمر
أنا بشكك في نوايا كل حد
وأشك حتى في نفسي على رأي أيمن رضا
وهاد المستخلص من قوله
"من وين بتجيبو هالحكي؟"
وذلك إن دل على شيء فذلك يدل على تملصه من التهم الموجه لهم وكأنو إحنا يلي نتبلى عليهم تبلي
له له له
بعدين ياشاطره وعشان ما تنفهم غلط
كل الناس اصلهم طيب وعلى راسهم الخال صالح
وهذا لا يتعارض مع ما تم ذكره
بعدين بطبق عليكي إنك مقموعه في هذا المجتمع الذكري البحت الأبوي أباً عن جد
آخر تعليقين:
انتو بتقولوا كلام يصعب على أمثالي فهمه
هيثم
أبوك حيسيب البيت يا معلم سلطان
آه آه آآآآآآع
البيت حتطربق فوق دماغ أهلينا يا بو السلاطن
حلوووووووو عنييي
من الإنلفونزا ومن كتر ما هيه ضاربه
صرت مخربطه عشرطعشر مره من الصبح
وطلبت بالحرف الواحد إنه أي حدن بحكي معي يعيدلي كلامي عشان أتأكد إني حكيت صح
:(
مرفوع عنك العتب
وظعك صعب و مظطرين نداريكي يا إم عمر
حزني على الإنفلونزا = كبييييييييييير
خخخخخخخخخخخخ
-----------
ظاع المحصول يا نورنياتي
عوض اشترى بمصاري المحصول = كعك و علكة!
Post a Comment
:وكيل المكومنت قال