جهل ام قلة معرفة؟
(المذكورين في هذه التدوينة هم أشخاص قلة على ما أتمنى .. أنا لا أعمم .. أنا أكتب حالياً عما رأيت في فترة زمنية معينة)
متذكرين زمان لما كانوا يدرسونا عن الإحتلال العثماني .. والأمور يلي كان يستهدفها .. وكنا ندرس إنهم كانوا يهدوا المدارس أو يمنعوا الدراسة وكان هالموضوع يستهدفوه لغايات إضعاف الأمة وسوقها إلى الجهل وإفراغها من بناءها الأساسي .. طبعاً ما درسناها بنفس الطريقة يلي حكيتها ههههه.
وبعد هيك واجهنا قصة جيل الهمبرجر والتلفزيون والجينز (على وصفهم) وكانوا يحكوا إن هاي الأمور بلشت تشتت الأمة عن همها الأساسي وتشغل الشباب عن أهدافة وإشغاله بما لا طعم ولا رائحة له .. أو كما يصفون .
أيامنا هاي أكيد الكل سمع فكرة إن الكل حامل (سمارت فون) بس للأسف لا يحمل من (السمارت) أي نسبة .. ببساطة كتلة غباء ماشية .. جيل لا هم له غير الشكليات وحريتي وشو أنا بدي أعمل .
بس للأسف في خضم كل هاي الأمور يلي صارت .. كان الجنس الذكري (وبرأيي وليس كلهم من طرفي التشبيه) يتفوق على الجنس الأنثوي .. كون الذكر بلف وبعيش وبعايش في هالحياة وبتعلم من الحياة يلي بحكوا إنها أكبر مدرسة .. وأقلها لو ما تعلم شي .. أقلها تعلم كيف يتعامل مع الأنفس والنفسيات وعلى كثرها .. بس بتضل نسبة تعامله أكثر من الإناث .
يلي بحكيه عن غصة في قلبي من البنات يلي بتعايش معهم .. يلي بشوفهم .. ويلي بخاف بلحظة إن البنت يلي بشوفها وبحس بقلة معرفتها أكون أنا مثلها .. وبالفعل كان ولا زال هاد الكابوس يحوم ويستمر في خاطري .
عن شو بحكي .. سبق هاد الموقف يلي رح أحكيه تباعاً مواقف كثيرة .. لكن هاد الموقف الأكبر هوه كان الصدمة الكبيرة .. وأكرر ""مش كلهم مش كل البنات"" .. الموقف كان كالتالي .. رايحة على انتخابات نقابة المحامين .. وأول ماشفت كان في محامي تارس باب النقابات بنات أمامير وإلخ إلخ وبطلبوا من المحامين يسوتوا للأخ المحامي يلي متعاقد معهم .. أول ضربة على العنق .. دخلت أصوت وطلعت .. بلشت أسأل البنات وأستفهم بناء على شو وسنداً لشو ومع مين صوتوا وكان الإجابات تنم عن لا إنتماء لا معرفة لا غاية ولا هدف ولا مبدأ غير (حكولنا إن فلان منيح) .. تاني ضربة على العنق .. قعدت مع فئة تانية من البنات .. على أساس أدخل في الجو الإنتخابي يلي بمارسه لأول مره بحياتي ويلي منعني ما هو مذكور في هاي الفقرة المهم وبنص الوقت صارت وحده من البنات تحكي عن الطبخ والمعجنات والكل بشاركها في الحوار .. ثالث ضربة على الراس هالمرة .. ببساطة حملت حالي وطلعت وعلى قولة رئيس لجنة الإنتخابات يا هنيال يلي نايم في داره .. تباً .
غير الرخوصة .. وغير الحركات يلي ما إلها داعي غير جذب الذكور .. وغير اللبس الهشك بشك .. وغير كل ما يلفت النظر وغير الحجاب أبو نفخة يلي إمبارح لما شفت بنت لابسته كل يلي فكرت فيه (البنياتا ويكون معي العصاية وحد يغمي على عيوني) .. للي ما بيعرف البنياتا يبحث عنها وبفهم قصدي .. وغير إنو بعض البنات بطلت تعرف قيمتها وإن شعرتها تسوى ستين ألف زلمه من يلي ترخص حالها إلهم .. يعني فوق العمى يلي ذكرته خراب الديار من العقل المفرغ من أي نسبة معينة من أي شي ممكن يفيدها في حياتها العامة (غير الطبخ والخلفة والمكياج) .. أحكي معها في العلم .. ( ) .. إحكي معها في الدين .. ( ) .. إحكي معها في السياسة .. ( ) .. إحكي معها في الجغرافيا السموم والأدوية التاريخ الجو الاحداث يلي بتصير أي شي تكنولوجيا جرائم الإغتصاب السرطان الأدب الفن (الفن الآخر مش ستار أكادمي) أي شي .. ببساطة ميييييييح .. وإن أعطت رأيها .. تبكي الأنفس .. ليش ليش لييييش .. ليش من نسبة خمس بنات قعدت معهم وخمس شباب نسبة 4 إلى 1 يلي يتكدسهم الجهل المدقع .. وببروزولك كلامهن .. يختي أنا بفهمش في السياسة .. يختي أنا أصلاً أدبي .. يختي شو جاينا من كل هالهم .
ليه في حد بقبل على حاله هالشي ؟؟ .. كيف في حد بقبل على حاله هالشي ؟؟ .. الوضع العام؟؟ أكيد وصحيح هاد السبب الرئيسي بس يمكن كسره .. الوضع المادي؟؟ أكيد بس ممكن تتخطيه لو اقلها بتقرأ الجريدة يلي تفرش فيها الطاولة عالغدا .. الوضع النفسي؟؟ ههه مش رح أرد .. البيئة؟؟ البنات يلي قدرت تخبي الخلويات عن أهلها قادرة تخبي كتاب عن أخوها .. علم بدون فايدة؟؟ ببساطة العلم بالشيء ولا الجهل به .. والمصيبة الأكبر إنو الكم الأكبر من البنات ما بتعاني من كل ما ذكر .. بس البنوته مدلعة وما تبغى تعور راسها بهسوالف .. حابة أحكيلها عمى يطرشك وريت راسك عوار دايماً يا مشوهه صورتنا بين القاصي والداني وبين اللي يسوى واللي ما يسوى .
يمكن حد يحكيلي فعلاً يلي قال "البنت لو طلعت المريخ ترجع للطبيخ" وفعلاً "حقوق المرأة في المطبخ" يلي قرأتها عن ضهر باص هيوندا زغير .. خليني آخدها من عمق هالمقولة .. مش بحكولك يلي مابيجي معك تعا معو؟؟ .. ماشي .. حالياً يا عزيزاتي الرجال الأكارم بفتشوا على عروس متعلمة (صحيح عشان يطمها) بس المقصود هون لازم تكوني تحملين شهادة جامعية لتحصلي على عريس الغفلة عشان تعلميلو ""ولادو"" تقولوا مهيه بتخلف إلو وفعلاً سمعتها من نسبة كبيرة شغلة ""ولادو"" .. المهم فا يا عزيزتي تعلمي ليفيدك بالخلفة والزواج وإنتي بتتعلمي ومضيعة الوقت في هالجامعة ومضيعيتو غلبي حالك شوي وتعلمي مش غلط أبداً .. تاني شي يا أخونا الحبيب إذا بدك أختك ما تنحرف يلي طول اليوم قاعد بتحلف بعرضها .. وعشان مرتك وأختك وخالتك وبنت أخوتك ما يلعبوا بعقلهم الشرذمة وما تجيبلك العار والشحبار وتصير بتفهم وتشتغل وتصرف عليك (كما في نسبة منيحة من العائلات) خليها تتعلم خلي التعليم واحد من حقوقها في المطبخ .. وديها على مدرسة طبخ ولا معهد تغذية عشان تدير بالها على بطنك .. مش بتقول درهم وقاية خيرٌ من دينار علاج ؟؟ .. إييييه حاسة نسبة الفهم عندي نزلت النص من لما كتبت هاي الفقرة .. تباً .
هالحكي رح نتحاسب عليه جميعاً سواءً الاب والاخ وغيرهم ما سعوا في تعليم الاناث يلي حواليهم او الانثى نفسها ما علمت واشتغلت على حالها .. ربنا أول كلمة نزلها على رسولنا محمد عليه السلام (إقرأ) .. آه هيه نفسها اسم القناة يلي بتيجي على التلفزيون يلي بس تفتح عليها بالغلط بتتكهرب وتغير على اي قناة غيرها .. اسلوب ساخر وزنخ وبعتذر عنه .. بس صدقاً في ناس كتير هيك حالها لإنتشار اسماء القنوات .
حابة أحكي شي قريب وبعيد من هالموضوع وهو من صميم شغلي ومن تجربتي الشخصية .. السبب يلي رسولنا قال ناقصات عقل .. تأكيداً لأمر ربنا إن شهادة الأنثى تؤيدها أنثى أخرى .. السبب الرئيسي للموضوع ما بتعرف شو هوه إلا لما تعايشه .. أنا شفت رجال مثل الجبال .. قدام القاضي بس ييجوا يشهدوا العرق يزرزب من جبينهم وبينربط لسانهم .. وصدقوني هاد الأمر منحة من ربنا .. ونقصان العقل والله أعلم إنحصر في هاد الموضوع .. المرأة قادرة تعمل كثير .. وبتعمل كثير .. ودماغها ربنا صممه بطريقة تقدر تعمل أكتر من شغلة بنفس اللحظة ليش بتعمل بحالها هيك ؟؟ .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
4 comment:
الحجاب أبو نفخة
ما بعرفه و لا بدي!
---------------
كوكب ذكوري بامتياز حصري سلبي لمليونين سنة ضوئية!
الله يعينكو على هبلنا و جهلنا اللي حيودينا كلنا بداهية!
------------
كيف تطيلين رموشك في 11 يوم أهم من أي شي بالمعمورة
و الباقي عندك!
----------
الشباب مش احسن بس مسيطرين أكثر و بس!
حاليًا على الأقل
استني شوي و بتشوفي الشب بيترجى البنت تلاحظه
-----------
الطبخ = مش كثير بنفهم لما أحكي رأيي بالمسألة
بس الحكمة بنظري
- أيام ما كان ليه نظر-
من إنو الزوجة غير ملزمة بالطبخ و النفح و لا حتى الغسيل و غيره
هو لإبراز دورها بعمارة هالكوكب اللعين
و ليس فقط حتى بتربية أولادها و تنشئتهم
-على اعتبار أن الزوج يعمل و يعيل و مش عارف شو-
إنو الأدوار الرئيسة للزوجين هذه هي
و بس
هذا رأي و لا أقول أنه مستند لتحليل ديني و لا بطيخ و لا حتى لدليل عمراني إنساني
مين إنساني
و ليش أنسى
ما علينا :)
----------
شهادة المرأة = و هنا ليس راي بل فقه و إن شاء الله غن وجدت الدليل أرسله لاحقًا
و لكن هناك رأي بأن ذلك في الشهادات
المتعلقة بالموال و الدين خصوصًا و لا تعميم للشهادات كلها
يعني لو جريمة مثلًا
فشهادة المراة كشهادة الرجل!
و بلاش ندخل بمتاهة ناقصات عقل
لأنو بكفي انتقائية و غوغائية بتفسير الأحاديث!
My friend...
Now all of these girls you mentioned are illiterate? I got the impression that they are lawyers like you... or at least law graduates...
Y3ni darseen...
The problem is not in the education, the problem is in the shallow minds that can do nothing more than passing exams (At their best ya3ni)
We are in a big trouble :-)
Allah y3een...
Swan Lake
والله كلامك مزبوط..
أول شي ما تتوقعي كل البنات زيك! يعني ممكن انت تشوفي حالك عادية لأنك بجد متعلمة ومثقفة ومفكرة (من التفكر والتدبير) بس في الحقيقة درجات الذكاء والتفكير تتفاوت بين الناس واللي عندك مش ضروري يكون عند غيرك. يعني طبيعي جدا يكون فيه ناس نسبة الذكاء عندهم متفاوتة بين الكثرة والقلة. هذا لا يجعل منهم أقل "آدمية" من أي حدا... بس بخليهم "عوام" والحقيقة إنه الذكاء هو "الخاص" ومش موجود عند الكل.
ممكن يكون الأهل هيك ربوا بناتهم.. المظهر هو المهم.. روحي عالمدرسة اسم انك بتتعلمي وفوتي جامعة اسم إنك خريجة جامعة واشتغلي اسم انك موظفة بس مظاهر قدام الناس وليزيدوا أسهمها في سوق العرسان... عن جد الشباب بحزنوا!!!
وعلى قولتك بدور ع"متعلمة" تدرسله ولاده بس ما بدور على واحدة تستوعبه بالأول وتحتويه ويحتويها قبل ما ييجوا الأولاد! معاييرنا في الزواج مخربطة..
المهم خليني أضحكك شوي.. هاي الفكرة مرت على بالي قبل وقعدت فترة أراقب بهاي الفئة من البنات... وللحظة حسدتهم!! لأنه ما عندهم هموم. ما بفكروا لبعيد ولا بتعمقوا بالتفكير ولا بحاولوا دايما يكونوا أحسن مما هم عليه... وصدق من قال ذو العلم يشقى بالنعيم لعقله واخو الجهالة في الشقاوة ينعم..
بس بالآخر وصلت لمرحلة أعترف بوجود فئات أخرى في المجتمع اهتماماتها لا تمت للتعقل بصلة بس ذلك لا يعني إنهم أقل مني أو أنا أحسن منهم.. خصوصي إنهم وعلى ما يبدو مبسوطين بحياتهم بالرغم من قلة التفكير اللي عندهم.. وهذه يا عزيزتي ميزة حقيقية كتبت لهم تماما كما أنعم الله عليك بالتعقل والتفكر :)
وآسفة اني طولت
نورنياتي بيصير أفتحلك قلبي؟
كل "ضربات العنق" حسيت فيها وانت عم بتعديدها :)) ولو أنه أول ضربة كانت بالنسبة إلي
"الاحتلال أو الاستعمار" العثماني
هو فعلاً احنا هيك تم تلقينا بس بعد ما كبرت وقرأت وسمعت...من المجحف وصف هديك المرحلة بالاستعمار
هيك فترة حكم ..كان فيها ايام منيحة وحضارية وكان فيها ايام سودا
(هاد أقل اشي أهمية بالتدوينة عارفة بس حبيت أفش قلبي اذا ما كان عندك مانع)
وبعد قراءة التدوينة وقراءة التعليقات يمكن ما بقدر أضيف اشي، بس بصراحة حاسة حالي بوافق أسيل انه هدول البنات لوهلة بينحسدوا...هو فعلاً اشي بيضحك بس الناس يلي عندها دماغ وبتفكر فعلاً هي المهمومة
أكيد ما بتمنى أكون محلهم بس قادرة أفهم ليش طلعوا هيك...يمكن التربية ويمكن لانه ببساطة..أريح
Post a Comment
:وكيل المكومنت قال