غلط

كيف المفروض تجمع بين شي ينتمي إلى صفات الخير والإحسان وال (الإشي المنيح) وتضمها إلى أحد صفات أو علامات الشر وال (الإشي المش منيح) ألا وهو الإدمان ,, زي يلي بدو يوصف واحد بالعبقرية ويحكيله ونسمع أمثالها كثير .. "ولا فلان إبن حرام في تصليح السيارات" .. مدحاً لهاد الشخص بقدرته المهولة على فهم الميكانيك .. وغيرها وغيرها .. وبالمثل الإدمان على كل خير ببساطة شيء برأيي بحسه منفر ولا يحمد عقباه .

كيف؟؟

رح أعطي مثالين عايشين فينا إحنا المجتمع البسيط أول مثال يلي هوه فعل الخير .. يعني بالمعنى البسيط تكون منيح مع الناس .. مش غلط تكون منيح مع الناس في مواقف ومواقف ثانية غليظ لما في هاد الموقف من إساءه مثلاً أو إعتداء على دين أو أخلاق أو أشخاص أو تنبيه لهاد الشخص إن يلي بتعمله غلط وأنا مش رح أساعدك عليه .. بس إحنا ما شاء الله داااااااااااااااعسين على العمياني بسبب وبلا سبب وأكبر مثال إمي .. بعرف إن هالموقف الكل رح يعتبره سخيف بس صدقاً لحد هسا وأنا كل ما أشوف بنت حامله لعبة البيبي الصغير بحس حالي زي أطفال الحرمان وعلى شوي بدها تسح دمعتي من كثر ما إمي كانت تاخد ألعابي وتعطيهم لكل من هب ودب وبتذكر لعبة البيبي يلي كنت مسميتو (البوبو الأصلع) أعطته لبنت هيه وإمها أول مره بزوروا بيتنا .. هاد أصغر مثال وخذ على مقاسه كل شي .. لدرجة بحس إمي وأنا من بعدها رح نعطي الناس عيوننا عشان الناس تضل بخير والناس تضل تحبنا .. تضل تحبنا .. إييييه .

المثال الثاني الحب لنتماشى مع الخيط يلي سحبناه في الفقرة الأولى .. فكرة الحب وتواجد الحب .. وإدمان الحب .. يلي هوه ببساطة فكرة مغرية وبتحدى أي شخص يجول بذاكرته وما مرت عليه فترة إلا وكان طالع من قصة حب وصار فيه زي مدمن الكوكايين صار يفتش على أي حد يكون معه أو يحبه أو يرتبط فيه .. وبتذكر فلم جوليا روبرتس (eat pry love) لما حكت لصاحبتها كل يلي بتذكره إني يا كنت في علاقة حب يا طالعة منها يا في علاقة حب جديدة ما عمرها كانت حرة بحالها .. ولو بعطيكم شي كتير سمعتوه .. عشان مش بالضرورة تصدقوا كلامي .. هيه فكرة ال (ريباوند) يلي هيه ببساطة علاقة عاطفية مؤقتة فكرتها جاية من كرة السلة لما يضربها لاعب الفريق (أ) على سلة فريق (ب) وتضرب بحلقة السلة وترتد وهون بصير النزاع لييخطفها أحد الفريقين ويسرقها الفريق (ب) وياخدها على سلة الفريق (أ) أو نفس اللاعب من فريق (أ) يرجع يسرقة الكرة يلي كانت على وشك تدخل ويرجع يسجل .. لخبطيطات .. الفركة إنك شغلة فشلت فيه وهاي الحالة بدك ببساطة تنازع لتسترد خسارتك بطريقة التجربة زي اللاعب يلي كان بحاول يسجل .. ببساطة خسر أول مرة بدي يحاول ينط وينازع يسحب الفرصة الثانية ممكن بمدافشة أو بدون تفكير ليحاول يعوض خسارته .. وللأسف علاقات الريباوند هي أحد آثار إدمان الحب وأثرها بكون شديد على الطرف يلي برتبط في الشخص الذي فشل في علاقته .. لأن ببساطة بكون تمضاية وقت وتنعكس هاي الآثار على الشخص الجديد بالغالب ويلي مع الوقت بينسحب صاحب علاقة الريباوند منو بدون سبب .. والإحتمال الأكبر إن صاحب علاقة الريباوند يرجع للأول أو يدخل في علاقة جديدة ثابته .. والطرف الجديد من علاقة الريباوند بدخل في علاقة ريباوند جديدة .. وتستمر الأمر كسلسلة تستمر .. تستمر .

أعطيكم مثال ثالث .. همه المتشددين أو المتزيدين في الدين .. أو حتى الأشخاص العاديين .. يلي بفكروا بحالهم إنو يلي عملناه في الدين قليل .. لازم نعمل أكثر .. وهيك رح نكون أصحاب دين أكتر من غيرنا .. وأكثر وأكثر وأكثر .. إزا صمنا .. رح نصوم عن كل شي وكل الوقت .. إذا صلينا ودعينا .. رح يكون كل الوقت وطول الوقت .. إذا طلب منا التخفيف من شيء .. رح نقطعه عن حالنا أبرك وأحسن .. وإذا كانت شغلة بتعطينا هالخير والحسنات رح نكررها ألف وألفين .. وكل شيء حرام ومش مستحب رح نبعد عنه كل البعد ونقطع عنه أي طريق ممكن يوصل إلو سواء من قريب أو من بعيد .. لحد ما يوصلوا مرحلة ينقطعوا فيها عن كل شي موجود بهالحياة .. حتى لو كان أمر بسيط .. حتى لو كان عادي .. وبيعتكفوا ليمارسوا كافة أنواع العبادات يلي همه بيعتقدوا إنها مخلصهم .

شو سبب كل هالشغلات ؟؟

ببساطة نفس فكرة الإدمان .. أول مرة بتكون الشغلة حلوة وفيها سعادة فائقة وراحة نفسية ممكن تكون الأعظم على مر حياة هاد الشخص .. وبصير عندو رغبة بتكرارها وتكرارها ليرجع يعيش نفس الموقف السابق .. وبالأمثلة الثلاث السابقة رح يوقع أو ما رح يرجع يعايش نفس الشعور (مع إن يمكن رجعت عاشت الشعور مرة ومرتين وتلاته) بس هاد ما بمنعه يرجع يجرب مره ومرتين وسبعة وألف .. لأنه ببساطة عينه على الجائزة يلي هيه تكرار ذات الشعور برضا الأشخاص عنه وحب الناس إلو في المثال الأول يلي هوه بسموه (disease to please) .. وفي المثال الثاني شعور النشوة وال (butterfly effect) يلي بصير في المعدة هاد غير خاصية التملك سواء إنت تكون ملك شخص أو بالعكس والإهتمام يلي بنصب منك عليه وحده وبالعكس والدباديب والطلعات وإلخ إلخ .. وفي المثال الثالث أعتقد بكون من نزع الخوف من العقاب أو بشعور الأمان يلي موجود لكل الأشخاص بس لهدول الأشخاص بحس حاله صار بأمان إذا صلى كتير أو صام كل اليوم مع العلم إني تعمدت أجمع بين عبادات المسلمين والنصارى في هاد المثال لغاية في نفسي .

وشو الصح يختي؟؟

مش غلط تعمل خير .. بس ربنا قال:  "ولا تصعر خدك للناس ولا تمش في الأرض مرحا" كون منيح مع الكل ولا تكون ممتنع عن الخير مع الناس (على اختلاف نوع الخير سواء بالصورة المعنوية أو المادية) بس بنفس الوقت كون معتدل فكر قبل كل شي بسيطة صح؟ .

مش غلط تحب وتنحب .. بس الغلط إنك تإذي شخص ما إلو دخل بعلاقة ريباوند أو بتحميل خبراتك السلبية للعلاقة الجديدة الطويلة لأن ببساطة إنتا بتكرارك لهاد الوضع لا إنت بتكون مرتاح وبتترك وراك ناس مهشمين ضعاف ومكسوري القلب أو ببساطة وحوش كاسرة بتصنع بذاتها علاقات أخرى ريباونديه فاشلة وتستمر الشناعة كما ذكرت .

مش غلط تتعبد .. ربنا خلقنا أمة وسط وخلقنا بإعتدال طلب منا نعبده وأنزل علينا أحكام العبادات وكل ما يتعلق بالصلاة والصوم والزكاة وبنفس الوقت شرع الزواج والحب فيه وخلق الفواكة والخضار واللحم ومنحنا نعم السباحة والخيل والعقل والقراءة والعلوم طلاقة اللسان واختلاف هالدنيا يلي كل هدول ببساطة هيه نفسها عبادة كونك بتاكل وبتحمد ربك وبتتجوز وبتخلف وبتتعلم لتعمر الأرض تقرأ وتحكي وتتعلم لتنشر الخير والدين (بشكل أو بآخر) .

ولكل ما سبق يعجز لساني عن كل شرح من لما تجلى في ذهني قول ربنا :

وَابْتَغِ فِيمَا آتَاكَ اللَّهُ الدَّارَ الآخِرَةَ وَلا تَنسَ نَصِيبَكَ مِنَ الدُّنْيَا وَأَحْسِنْ كَمَا أَحْسَنَ اللَّهُ إِلَيْكَ وَلا تَبْغِ الْفَسَادَ فِي الأَرْضِ إِنَّ اللَّهَ لا يُحِبُّ الْمُفْسِدِينَ. [القصص:77].  صدق الله العظيم .

الكاتلة

أم السعد