طبعاً إمبارح وفي أمان الله والدار أبيش بيها حدا --- أوووووووخ ,, لاقيت الفلم المذكور أعلاه ويلي كل عادة ببين فيه الأخ المناضل يلي فوق بكامل أناقته المعهوده والرجولة الطاغية يلي تترافق مع شيباته والشعر القاتل والضحكة الدباحة وركازته يلي ممكن تنفر منه كتير بنات بش بالنسبة إلى هو المطلوب .

مش هون الموضوع .. بعرف بعرف مسحت دقني من الريالة .. O_O .. قصة الفلم إلى حد كبير رافقتني من فترة معينة بحياتي .. والقصة يلي كان يسردها كل مره في محاضراته كانت بحد كبير شو يلي عشته في هديك الفترة ولا زلت مع شوية ضعف .

يلي بحكي عنه إن بفترة غامقة مرت بحياتي كل يلي كنت أفكر فيه إني طالعة على قمة جبل وكل ما بطلع أكتر بصير الحمل يلي معي يتقل عليي أكتر حتى لو ما كان كبير .. وبالفعل للضرورة استأصلت جزء كبير من (أغراضي الخاصة) (ذكرياتي) (الأشياء يلي بتعلق فيها كتير) (أشياء المفروض إلها معني أو تعطي معني) ... تقريباً كل شي وصفيت فعلاً زي ما كان يحكي .. وزي ما كان عايش .. وكان السبب الرئيسي بالأغلب (الناس) يلي كمان استئاصلتهم بجانبي لأنهم أصلاً كانوا ضايفيني على الهامش فا أنا أخذت الحمل هالمرة وحكيتلهم باي .. فاهمه عليكم .. ومش مستعدة أضل حامله أهتمامي فيكم على أكتافي .. وبعرف مارح تزعلوا ولو زعلتوا للأسف بطل يهمني .

طبعاً للأسف ما وصلت للنتيجة يلي خلتوا يتصرف هيك أو يعيش مسار حياته هيك لأن صار في دوشه ورجعوا أهلي عالديار :k:  بس أخدت يلي بدياه .. شو سببي أنا؟؟ .. جزء منه مابدي حد يمسك عليي شي .. مابدي حد يذلني في شي يخصني .. مابدي يكون عندي أشياء كتير تشتت إنتباهي .. شغله وحده بتكفي .. بحب أرسم حدود حالي .. أعد أشيائي وأقدر أحصيهم .. وهون بحكي عن الأشياء المادية .. بالنسبة للأشخاص ومن فترة قريبة صرت ك (ستارتر كت) أعرف إن هاد الشخص رح يبيعني .. أنا مش من أول إهتماماته .. رح يتركني بمشاكل .. رح يدوشني بشغلات ما إلها داعي .. تكلفة مالية .. رح يخليني أكذب بمرحلة ما وهاد شي بفغصني فغص وبعتذر على هالمصطلح .. وآخرها إنو يعيشني في علاقة حيرة مع نفسي كوني بوجوده مارست مخالفة أخلاقية على أي مستوى كانت حتى لو اكب ورقة على الأرض (آه مستوى المخالفات عندي نوعاً ما شديد حتى مع إني بنغصب أعمله) مع استمرار العلاقة بكون ببساطة حاملة هالليستة وبعمل (تشك) على كل بند بصير .. وبعيش بالنهاية أعراض الإنسحاب .. وأعراض الفقدان .. والبحث المقرف عن أي حد يعبي هالفراغ القميء .

شو جابرني أعيش هالشي .. وبقصد هالشي (التقشف يلي عايشه جورج كلوني) هو كل ما ذكر أعلاه .. أنا صعب عليي اعيش حياة حد ماسكني من ايد بتوجعني .. صار صعب كتير إنو أضيف لحياتي ستارتر كت مقرفة زي ما ذكر أعلاه .. صعب كتير أقعد مشغولة بشغلات فعلاً ما إلها داعي في مقابل شغلات ممكن اوجدها تكون ممتعة أكتر .

الإشي الحلو بالموضوع يلي اعطاني بصيص أمل إنو لاقى بنص الفلم حد يعاني من نفس ألوان الفصمان يلي هوه بعيشه وهي الموجوده في الصورة أعلاه .. وحتى بعلاقتهم (المتشردة) كانوا ببساطة قاطعين أشواط الحرج والحساسيات وليش ووين وأبصر إيش وعشان شو وليش أنت هيك ومش متل باقي العالم .. وهون بحكي تباً لكل يلي اعطيتهم ستارتر كت وبجدارة أخدوا علامة عشرة/عشرة .. ورح ييجي يوم أقدر فيه أخبط ببطونكم ولو طال الزمن .. أو أعتقد الدنيا بتلف بتلف وبتلحقكم خطيتي .. وعلى قولة فؤاد المهندس واللي ييجي في الولايا عمره ما يكسب .

ملاحظة زغيرة .. يلي بقرأ هاد البوست لا يفكر إنو سم كايند أوف هاف أكريزي ليدي هاف أ سايكو .. لا لا هالشغلات ما حد جربها مسبقاً وفعلاً ما حد عرف عنها غير حضرتك عزيزي القارئ .