عمركم فكرتوا في شي حسيتوا في شي قرأتوا شي وشعرتوا في شي خاص فيكم .. واللحظة يلي أعلنتوا فيها لحد تاني بالحكي عن الشي المذكور اعلاه وسمعتوا حالكم شو بتحكوا حسيتوا بقلة اهمية هالشي على الرغم من انو كان عامل ضجة بداخلكم او حاسينوا شي كبير؟ 

مش شي جديد يلي بحكي فيه .. سمعتوا من ناس كتير وناس تانيين .

عمركم صار معكم موقف انكم مستنكرين كيف لان او علتان عم يعمل هالشي وانت مستغرب كيف يعمل هالشي .. كيف هيك .. ليش هيك .. وتعطي حكمك وفي النهاية تتذكر موقف انتو نفسكم عاملين بذاته يمكن مغصوبين يمكن مجبورين عليه يعني صار (ظروف) .. وفكرتوا بلكي صار مع هالفلان ولا العلتان متلكم متلهم؟ .

مش هون المشكلة .. المشكلة كيف سمعت حالك عم تحكي عن موقف أصلا كان صاير معك .

تكون عم تشكي همك لشخص (واحذر انو فعلاً الشكوى لغير الله مذلة) .. وتحكيله لهاد الشخص وهوه ينصحك ويبلش يحلل بالموضوع (والاغلب يشكيلك عن مصيبته عأساس تهون عليك مصيبتك وتقلب انت تواسي فيه) .. ويتكرر هالحكي ومش بالضرورة هاد الشخص ممكن برضو تكون فكرة المشكلة نفسها او طريقة فزعك عن هاد الموضوع .. وبيوم تسمع تحليل ذات الشخص الاول لحد تاني وتشوف قديه تحليله سخيف يلي هوه نفسه كان الجواب يلي اعطاكياه وانت بلعته .. او انك تسمع نفس شكواك من او تقرأها بس من حد تاني .. ولأصعبها عليكم تسمعها صارت مع حد بتككككرهههه .

السؤال الأصعب يلي بتفكره في حالك انو أنا هيك؟ .. انا كنت هيك؟؟ .

المسألة مسألة نضوج؟ ما اعتقد هيك (يعني يلي شفته/عايشته كان في مرحلة وهسا انا صرت افهم اكتر) الصراحة لهسا مش لاقيتلها حل او تفسير .. يمكن شي بشابه كيف بنطيق شغلات من ناس بس من ناس تانيين لأ .. في ناس لو دخن ورقة السيجارة لحالها ما رح اطيق ريحته وناس ممكن تدخن هيشه وما احس .. في ناس على شناعتها ما بتشوفها وناس بتستفزك شناعتها .. ممكن يكون متل هيك انو شغلات بنتقبل نعيشها نحكيها بتعلقها بظروف معينه بس بظروف تانيه لأ؟ واذا ممكن نضيف كمان الشخوص معها؟ .

لإحقاق الحق (موضه جديدة في تدويناتي) .. نفترض سخافة الحكي يلي فكرت فيه (الفقرة الاولى) او نفترض العمله يلي عملتها شنعه قياسا بالموقف يلي استنكرته (الفقرة التانية) .. او حتى قديه شكواك طرمه (الفقرة التالته) .. في ناس بتسد السخافة يلي فكرت فيها وبدعمك وممكن ينبهك على شي نسيته وانت تحكي حسسك بسخافته (الاولى) .. او يأكدلك انك متأكد من ظروفك بس هوه (العلتان) مش بالضرورة صار معه متل ما صار معك .. وشكواك يتعامل معها بحساسية على طرمها (التالته) .