جد بستغرب من هالأشخاص .. بعني بعرف انهم موجودين من الأزل .. بس جد شو بجبرك تكون منافق هالقد وكذاب وبوجهين والادهى من هيك انو على عينك يا تاجر .. الاشي منهم بكذب قدام ناس ما بهموهم ولا هدول الناس مهتمين .. يعني ببساطه حوار الطرشان .

الصورة التانية هيه الاشخاص يلي تبديلك مثلاً استيائها من موضوع معين او في قصتي تستاء من شخص معين وتكرهه شديد الكره لكن بنفس الوقت تتعامل معه بشكل طبيعي وبتصرفات احسن من الطريقة يلي تتصرفها معي .. يعني جبن مثلاً وخوف من هاد الشخص انك مش قادر تبديله استياءك منو؟ لا والأنكى بحذرك انك تتعامل معو او بزعل اذا تعاملت معه لكن هوه مش مشكلة .. زي المثل القائل نفسي فيه تفو عليه (والحشيمة للجميع) .

انا ما بحكي عن الناس يلي نكرههم ومضطرين للتعامل معهم لان ببساطة بكون اسمها تنفيس عن غضب مش اكتر .. اما انك تقعد تحكي عن شخص قادر تستغني عنه بحياتك ومش مرتبط كتير فيك وبنفس الوقت آذاك وخلاك تكره الأرض يلي تمشي عليها وفي الآخر بس تشوفه تحبه قد عيونك ؟

في شي ناقص في الصورة ومش مكتمله عندي ..

الصورة الثالثة يلي بيتصرف معك على شكل وبحكي بشكل وبلحظة بينكشف معدنه الخايس .. صدقوا مش محتاجه الشغلة مليون موقف او موقف قد الجبل .. ممكن تكون كلمه زغيره .. ممكن يكون اي شي بسيط مش بقولوا البني آدم مغطى بقشة؟ الاشي يلي بضحك بالموضوع انو فعلاً لو عمل (الشكل الاول) او ما عمله .. صدقاً ما كانت انقلبت الدنيا .. يعني حسن تعاملك (والاغلب لغاية) وهالاحترام والتفخيم من الشخص المقابل كان ممكن تعيش بدونه لأن الناس والعقل البشري عالأغلب من كتر التحطيم النفسي ما بصدقها .. يعني فوق زيفك وخداعك وتفاهتك عم تغلب حالك على شي الناس (الصاحية عالأغلب) مابفرق معها كلامك .. وبعاملوك زي باقي البشر وبحترموك لحديت ما يبين معدنك التنك .

ومن ناحية اخيرة ما اعتقد انها نوع من المرونة انك تخلي حقدك وكرهك ونفسيتك المعفنه او حتى لنوخدها بشكل ايجابي تخبي نفسيتك الرافضة للآخر سنداً لأمر متعارض معك .. اقعد معه احكيلك انا ما بطيقك لتصرفاتك بس انا مضطر اتعامل معك .. لا تحكيله بس برضو مش ضروري تشوه صورتك قدام ناس تانيين وانتا بتخبي مقتك ورفضك لشخص معين .. مثال اوضح زي اليهود والشعوب المجاورة .. دامك بتكرهه لا تضلك قاعد بحضنه وبعدها تقول نرفض الكيان الصهيوني .. احترنا يا اقرع .. يعني يا صدام يا سادات .. بلاه كلينتون .