لف وإرجع
هداك اليوم وأنا عم بحضر على اليوتيوب طلع عندي فلم مكتوب فيه (محمد vs عيسى) أنا ما حضرته وما حبيت أحضره ويوتيوب بشكل عام العناوين المستفزه فيها ببعد عنها وبجوز كتير منكم وقع في هيك مواضيع أو سمع أو صار موقف معه أو غيره .. الموضوع إنو (إلى جانب عدم إحترام إن المذكورين هم أنبياء ورسل الله يلي أقل ما فيها قول النبي محمد والنبي عيسى وقارن متل مابدك) فا همه بتحزبوا لجهة في مواجهة جهة أخرى - متل ما همه بعتقدوا ,, غافلين بشكل تام إن سيدنا عيسى جزء من إيماننا تخيل مش جزء من الإسلام لأ جزء من الإيمان يلي هو تقريباً الأساس .
بغض النظر عن إنك بتحاور شخص مسيحي (وأفضل أحكي نصراني) وإنك بتخاطبه بمعتقداته حول سيدنا عيسى وحول وكذا وهيك والنبي محمد .. الشغلة مش مسابقة عمو إنو لأ سيدنا محمد الصح وسيدنا المسيح (أو ما يدور حوله) غير صحيح وهيك ومن هالسواليف لأنك ببساطة دامك تنسف وجود السيد المسيح (ويلي من ضمنها الأساسات يلي نتشارك فيها معهم) إنت عم تمسح جزء كبير من الإيمان ومن الأساس يلي بني عليه الأسلام .. كون ربنا مهد للإسلام عن طريق الرسالات المتتابعة - لا إنفصال أو تعارض بينهم ,, رسالة الإسلام أرست ما جاء به سيدنا المسيح أضافت عليه وضحت وفصلت ,, الرب واحد والرسالة واحدة والتعدد كان بالرسل ,, وأنا بعرف إن يلي بحاور بعرف هالمعلومة .. بس بغفلها لما يبلش النقاش مع - غير المسلمين .
شغلة تانية مشابهة إلها لما صار الإعتداء السافر بالرسم الكاريكاتيري والفيديو والأفلام على سيدنا محمد ,, ناس كتير طلعت ببالها شغلة إنو همه تمسخروا هيك لا إحنا بدنا نردها عليهم ودامهم نصرانية فا ....... عارفين التكملة ,, هاي هاي عمو لأ فهمت الموضوع غلط إنتا ,, وصفيت عم تعمل متلهم على حالك .
رابع شغلة فيما يتعلق بسيدنا المسيح وسيدنا موسى وحتى بهاي الأديان (الصحيح منها - يلي ضل) ليش ما بفور دمنا بس يعلقوا أو يغلطوا أو يسبوا أو يتمسخروا عليهم؟؟ ,, ليه ما حد بتدايق (من المسلمين تحديداً) لما يجيبوا صورة أو تشخيص للسيد المسيح وسيدنا موسى في أفلامهم ,, آه عرفنا سيدنا موسى بيجبوه لابس دشداشه خيش وسير (وعالأغلب حبل) على خصرة وحامل عصاه وإلخ إلخ .. وسيدنا المسيح بالشكل المعهود (ويلي رجحوا إنو شكل دافنشي حسب ما شيكت آخر مره) وبجسدوا في الأفلام والمسلسلات وأغلها الأنيميشن ,, يضاف إليها النكت والكاريكاتيرات المسقه والفن الهابط ,, وترى هالشي موجود وسابق على الاستهزاء بالرسول محمد الكريم .
آخر سطر في الفقرة السابقة كتبت (رسولنا محمد الكريم) ,, وبنحكي ربنا وإلهنا وقرآننا ,, وآه ال (نا) عائدة على المسلمين ,, هاي تياسة صح؟ .. هاد كيف وإحنا ما بنعرف إنو الرسول محمد نازل على البشرية جمعاء مش على قوم محدد ,, وهاد كيف لو ما بنعرف إن الله هو إله الكون وكل البشرية جمعاء سواء أنكروا أو أعتقدوا بغير ذلك ,, وهاد كيف لو ما بنعرف إنو القرآن هو هداية للناس .. للناس .. للناس .. لأ مش للعرب فقط ,, لأ مش للمسلمين فقط ,, لأ مش لحد دون حد آخر جاء المصطلح عام (للناس) .
آخر شي بدي أحكيه إنو هاد الأمر لازم الكل ينتبهله .. الموضوع صحيح (المسلم من سلم الناس من لسانه ومن يده) ,, هاد أمر خارج عن الموضوع ,, وهاد ما بمنع إن يكون في تأكيد وإضافة لما تعيشه البشرية من ضعف في لحظات كتير .. الآية رح تكون أوضح من كلامي وإحتمال كبير تكونوا متبحرين في تفسيرها أكتر مما ممكن أشرحه ..
قال تعالى: ((ولا تسبوا الذين يدعون من دون الله فيسبوا الله عدوا بغير علم)) .. شوف ما أرحم ربنا .. (بغير علم) .. صدق الله العظيم ,, الشغلة مش شغلة لا تدافع وعليك تربيطات وفوبياهات ومليون إعتبار وإعتبار .. الشغلة إنو في الأسلام كل شيء في الدنيا مشمول ,, كل أمر كل كلام كل شخص كل شيء فا صعب إنك تحارب أمر ثابت بأمر آخر ثابت ,, دافع عن الأمور كلها وواجه الشاذ أو الغير حقيقي منها أو الغير مستند على أمر ثابت .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
3 comment:
يعني ولا الي نصيب اجي هون اعلق
كلما بدي اكتب كومنت بصير اشي
بس الخلاصة انك ابدعتي و انا ببصم معاكي
بس
السؤال
من وين بتعرفي مقالب الجاسوسين؟
:-D
بحيرة البجع
ههههه
إف أي تل يو ذن أي شود كل يو
والله عرفتهم لما قبل فترة حضرت فيديوهات
(MAD) على النت
بس الصورة طلعت معي بالصدفه ما كنت قاصدتها
حيها حيها
واااااااااال
صاروا واصلين عاليوتيوب هدول كمان! ههههه
انا بعرفهم من مجلات بساط الريح
:-D
يفضل تعريفها لأنو لو ما بتعرفيها فاااا... اف اي تيل يو اي شود كيل يو لووووووووووول
هاي مجلة كتيييييير قديمة... عنا اعداد اكبر مني بالعمر... لما صدرت انا كنت لسا مش مولودة هههههه
بحيرة البجع
Post a Comment
:وكيل المكومنت قال