هسا أنا حاليا بحكي مع البني آدم فلان الفلاني اسم والدته فلانه فلاني الجنسية ويحمل الرقم الفلاني , شخص محدد بالشخصية والمكان والزمان والأكثر تحديداً انو واقف قدامي او في حوار معي لحاله وما معي حد تاني وبنحكي في موضوع داخل فيه علاقة ترابطية بين شخصين (اياً كانت نوع العلاقة) وبكرر مافي حد داخل في هاد الحوار غيرنا ,, حلو الكلام؟ .. ولأزيدكم من الشعر بيت إنو عم نحكي عن تصرفات بتخصه وحده وتصرفات بتخصني وحدي وكل واحد مرتبط ومسؤول عن أفعاله سواء ما قام بها أو ما سيقوم بها .

فجأة (زي نكتة يلي تعلم كلمة فجأة جديد) يخترق القبة الحديدية للحوار الفاشل (من الأساس لأن هيك حوارات مع هيك ناس فاشله أكيد تنعكس على نوع الحوار بالفشل) وبحكي/تحكي أصلا لو أنا حد غير كان كنت عملت كذا وكذا أو لو كنت حد غيري كان ما قلت/تصرفت/فكرت/رديت ..إلخ بهاي الطريقة ,, اصلا انا بعمل بأصلي وبعاملك/بعامل غير .. إلخ ,, بأحسن شي في الدنيا وغيري كان ضرب/سب/تعامل بسوء/بهدل الدنيا .. إلخ ,, فجأة بدخل في دوامة إنو يلي قدامي البني آدم الجنيون الأصلي الحقيقي الأساسي يلي الناس تحج إلى معبده المليء بالأدب والاخلاق الكريمة يلي مش ممكن تلاقيها عند حد تاني أبداً أبداً .

ذات المومنت يلي تدخلي فيها في صدمة (هاه؟! - آه الهاه ما غيرها يلي بتعرفها) وبصير في موقف بين حالي إنو أوك إحنا قاعدين (بنتقاتل أو في مشادة) يعني في مشكلة وإنتا إجيت أبهرتني بإنك تصرفت بالطريقة الأحسن وكل حد غيرك أسوأ منك وبالتالي طالما إنت أخدت المستوى الأعلى فا الحوار أو المشادة أو المقاتلة إنتهت لإنو الإنسان ما بقدر يعيب على الإشي الصح وبالتالي هوه إنتصر وذلك يتطلب تباعاً إني أحس إما بالخجل من نفسي إني (إفتعلت المشكلة) أو أشعر بالفرح إنو هاد الشخص (أحسن شخص في الدنيا لأن كل حد غيره سيء) .. ويت واات؟؟ .

عزيزي المحاور بمسي عليك وبحكيلك (          ) والله يعجز الكلام عن مواجهت هيك موقف يعني دمرتني خلص حطيت النقط على الحروف ويعني رح نكحش ابو الأسود الدؤلي وخلص ,, شوف شوف لهسا مش قادرة اعمل اشي وبحب اتركك مع هذا المشهد يي بصراحة يعني رح يكون أكتر عمقاً عما في دواخلي يا مهلس يا مصرمج.

لا وهاد النوع من الاناسين بنقسم على نفسه إلى نوعين 1- أنا احسن من غيري 2- بظل احسن من غيري , حيث يكون الجزء الأول عبارة عن تفضيل النفس وإبراز شخصية سيئة في المجتمع .. مثلاً: أنا أحسن من غيري ضليت ساكت بس غيري بضربك كفين .. أما القسم الثاني بكون بظل أحسن من غيري .. مثلاً: صحيح أنا ظربتك بس بظل أحسن إنو ضربتك لأن غيري كان طخك .. وهنا لا بد من التنويه إنو نفس الفئة تستخدم أسلوب إسأل غيري .. مثلاً: إسأل أي حد في الشارع رح يحكيلك هاد إنسان مش منيح بس أنا صبرت عليك وحكيت لا خليك العاقل .

يلي يثير إنتباهي إنو ليه هاد الشخص دايماً يختار المقارنه بالنوع الأسوأ؟؟ .. يعني ليه غيره دايماً النذل الشرير الدواوين أبو جرائم الشرف والأخلاق ومجرمي المجتمع وتقال الدم والوقحين والحيوانات الحبرتيه وإلخ إلخ .. يعني ليه مثلاً ما تستخدم حضرتك ((لا مش حضرتك تبعت السيسي والعياذ بالله منه)) اسلوب إنو "غيري كان ممكن سألك ليه عملتي هيك وحاول يقنعك بالعقل أو يقتنع منك بالعقل؟" لأ أكيد لأ ما رح يستخدم هاد الأسلوب ولا ماكان في مثل (ماحد بحكي عن زيته عكر) .. بس السؤال الثاني يلي يطرح نفسه إنو: عمو الذيب من وين جبت مثال معين بالذات لتستخدمه؟ .. يعني ليه أخترت (قياساً على المثال أعلاه) تقارن نفسك بالواحد يلي يضربني/يطخني؟ بالذات دون غيرهم؟ والسؤال الذي يبطح نفسه على قولة صديقتي فيدو هوه كيف بتعرف إنو غيرك بعمل هيك شغلات في هيك مواقف أو من وين بتعرف هيك ناس أو ليه أنا كان ممكن أعرف ناس حيوانات متل هيك ليضربوني أو يطخوني على فرض المثال بالقياس على أسلوبك؟