بقدروش ,, مستحيل ,, مششششششش ممكن ,, لازم ولا لا لا بصير بدنهم يحكهم ويهرشهم وعلى شوي بصير معهم أكزيما وجرب إذا ما عرفوا ,, مافي مستحيل مش ممكن ,, تقول ثقب أسود وبدهم يسدوه ,, عين الشمس هسا رح تتغطى ,, روتين لازم أداءه ,, ترهل نفسي إداري لا بد من إجراءه ,, بيروقراطية حياتية لا بد من تنفيذها .

يا ولاد الحلال شو يعني مش هيك ,, لأكون واضحة ومتأكده هاد الأمر بالذات كل بني آدم في الدنيا عاش هاد المثال ,, وقيسوه على أي شيء تاني ,, هاد في فئة من الناس كل يوم رمضان لازم تسأل شو طابخين ,, لازم تعرف شو رح تتزهرم وتتدولق وتضلغص كل يوم ,, بغض النظر عن مبدأ إنو الصيام مش للأكل وإنتو ما بتفكروا إلا ببطنكم ,, لأ بترك حاله ومحتاله وبستلمك ,, شو تغديتوا وشو أفطرتوا وشو تسحرتوا؟؟ ,, وهاد الموضوع لازم كل يوم يحكيلك حتى لو يوم ما شفته فيه لازم يعرف ,, ولو كان زميلك في الدوام رح يسألك عن دوام العطلة شو وقتيها أفطرتوا ,, فصبر جميل والله المستعان ,, المشكلة إنو في أيام (زي كل البشر) الناس بتطبخ طبخة كبيرة وبتضل على يومين ولو حكيتله طبخ بايت بتطلع عليك نظرة حزينه إنو يا حرااااام إحنا بنطبخ كل يوم ليه إنتو بتاكلوا اكل بايت ,, فا بستحي الواحد يحكي خصوصاً إذا كنت قرفان الطبخ وبدكاش تعمل أكل وممكن يضل الأكل تلات أيام والرابع بنقضيها حواضر أو صحن بعتولنياه الجيران .. تباً .. أنا هاد الكابوس عايشني منذ الطفولة وحتى رمضان الماضي ,, الواحد بدو يعيط يعني .

طبعاً في نماذج للأسئلة نفس مبدأ الخوارزميات يلي اخدناها في التوجيهي ,, تبعت الدراسة مثلاً .. س: أدبي ولا علمي .. ج: أدبي .. س: يي جد درستي جامعة؟ ,, ج: أه وتخرجت من تسعين سنه .. س: جد وشو درستي؟ ووين درستي وكيف كنتي تروحي وكم معدلك وكم دفعتي وشو سويتي اشتغلتي تدربتي لقيتي شغل تاني كيف الشغل كيف الناس مع مين بتشتغلي آآآآآآآآآآآآآآآآآآآآآآه ,, يقطع اليوم اللي شفت وجهك فيه يلعن أبو تباً أمك .. هاد غير منظومة الزواج إزا متجوز في نسق معين من الاسئلة إذا مش متجوز في مسلسل تركي الليلة بدو يتألف من 170 حلقة بفضل ستر الله معك (والله دايماً بسترها معنا ومع جميع خلقة والحمد له) ,, يعني بتصفي براسك أفكار سوداوية ,, وبتلعن الساعة اللي بيوم مريت عن بسطة ببيعوا فيها أمواس ومشارط وقناوي وما وقفت واشتريتلك كم شغلة.

الحمد لله إني بنازع نفسي ما أعرف ,, لدرجة إنو الناس بتحسني غبية وهبلة إنو في مليون شغلة في ألف حد حواليي وألف موقف صار وأنا فيه وما بعرف تفاصيله ,, بس في ناس بتحس راسها زي برنامج الأكسس في أعمدة لازم تعبيها ولا بطلع عندك إيرور إنو لااااا ههناك معلومات ناقصة يا أورلانزو ,, في رؤوسهم بحرٌ من التساؤولات ,, وطول النهار بتسائلوا .

طبعاً ينقسم هدول الأشخاص حسب ملاحظتي إلى عدة أقسام بعرف منهم أكم قسم .. في قسم بسأل من باب تعباية القعدة كلام أو فتح سيرة ليس إلا ,, وهدول بتلاقيهم بضربوها إذا لزقت لزقت وإنفتح موضوع وعلى الأغلب بنسوا شو سألوك مع إنو ممكن يكون سؤال محرج بالنسبة إلك وتضل تتقلب طول ليلك من سمة هالبدن ,, بس همه رح يسألوه لأنو كما قلت مش مهتمين بالموضوع قد ما همه سألوه من باب يضيع وقت .

النوع الثاني من باب إنو تعود على هيك ,, بسأل عشان لازم يسأل ,, منو عشان لما يقعد مع ناس تانيين ما يضل ساكت بل يملأ الفراغ بما سمعه منك أو جاوبتياه تقول لقاء صحفي وبدو ينقله إلى باقي الأفراد والمجتمعات وعالأغلب بكون نوع حشري (بفتح الحاء أو كسرها نفس الشي) ,, وبحب نظرة الآخرين لما يدلو بدلوه والناس تتوسع أحداقها وتقول عن جااااااد؟؟؟ .. أعتقد عرفتوهم وكل مجتمع في متلهم ,, بدهم سيرة الناس يعلكوها بقعداتهم ,, ولو سألتهم مثلاً شو بهمك هالسؤال؟ بصفن فيك ,, صفنة زي جزء من الخوارزمية يلي ما بوديك على مكان .

النوع الثالث النوع المسموم يلي قاعد عشان يفتش على عيوبك وهفواتك ويعلو على ما أنت فيه .. مع إنك إنسان لا إلك ولا عليك وعايش حياتك زي كل هالناس .. بس الأشخاص يلي عندهم عقدة النقص بدعم يبرزوا في المجتمع حتى لو جد هاد المجتمع هوه أفضل منهم بس عقدة النقص مشنعة فيهم ,, المهم هدول الناس بتحس إنو سؤالهم مدروس وجوابك مراقب وبدخل على أجهزة شديدة الحساسية تعالج الموضوع لطرح السؤال الذي يليه ويكشف أكثر عن كنه أعمالك ويشوف شو ممكن يطرقك سؤال يجيبلك الدور يعني مثلاً: عن جد إنتا خلصت دراسات عليا وبتشتغل وراتب عالي ومتجوز وإلك بيت لحالك وسيارة .. بس مخلف؟ وإزا مخلف بنتين؟ بحس باليأس بس فجأة بسترجع جاهلية الماضي وبحكيلك ...(((يعني ما عندكم ولاد؟؟))) .. وهون في داخله يحس بالنشوة والانتصار وبشوف حاله في ستاد أولومبي وعلم بلاده يرفرف والأموات يغنون هشتكنا وبشتكنا يا ريس .. خلص لا تحاول هاد الشخص إنتصر عليك مافيها سلم أمرك لربنا ,, وعفكرة أنا هاي السنة صادفت فئة ماعندهم مشكلة يكفروا والعياذ بالله أو يذكروا أشي مخالف الشرع والدين ,, المهم يبينوا حالهم غلبوك وأبكموك ,, ومن الأمثلة البسيطة عليها كما ذكرت خلفة الولاد .

كلنا في صورة أو أخرى وقعنا في هذا الباب .. بس ما انتبهنا إنو عملنا هالشي .. وحتى أنا برضو ما كنت أنتبه لبعض الشغلات لحد ما حضرت فيديو للدكتور عبد الكافي حكى فيه عن هذا الأمر تطبيقاً لحديث الرسول عليه السلام (من حسن إسلام المرء تركه ما لا يعنيه) وذكر عدة أمثلة إحنا بتصير معنا على طول بنسألها وبنتدخل فيها بدون ما ننتبه ,, ويمكن يقول مننا إنو عادي هالسؤال مافيه اشي .. بس برضو يلي إنتا بتحكي عنو عادي يمكن ما يكون عادي بالنسبة لغيرك ,, في ناس جد كنت أحكي سؤال عادي بس أحس الحرج في عيونهم وأكره الساعة اللي سألتهمياها وحتى الناس اللي بكرههم ما بحاول استخدم هاد الأسلوب لأنه فعلاً مش رح ترضى عن حالك بعد هيك .. الله يهدينا ويجعلنا خفيفين على الناس .