صديقي الأعز - إقرأوه كلو
صراحة مستغربه إنو صارلي كم سنه عامله هالمدونه وما خطر على بالي أكتب عن أعز وأقرب شي عرفته بحياتي ..
بعرف رح تتخوتوا عليي .. بس بعرف إنو يلي رح أحكي عنو موجود فيكم إنتو كمان وبتعرفوا بالزبط عن شو بحكي في هاد البوست
صديقي الأعز عفكره هوه يلي نخر براسي لأكتب عنو هالحكي .. شاكه إني كاتبه عنو قبل .. بس مع هيك بحكيله يا عمي ابسط عم بحكي عنك لحالك اليوم ..
صديقي الأعز مش بدعه .. مش صديق خيالي .. وبنفس الوقت مش موجود أو ما إلو كيان جسدي مستقل (مع إني كتير نفسي أعرف كيف رح يكون) .. وهوه كمان مش حد تعرفت عليه عالنت أو عالموبايل أو شفته أو حبيته أو حبني - إزا حد منكم سأل - .
مابعرف هوه ذكر أو أنثى بس الغالب إنو هوه ذكر لأنو صوته ضخم شوي ودايما شديد وحازم بس بنفس الوقت مهستر وجواته مليون موال وموال .. والحكي يلي بيحكيه مش وساوس شيطانية أو فيي جنون أو أي مرض نفسي .. يلي بحكي عنه وجوده طبيعي .. ما حاولت أفتشله على تفسير .. بس حد زيي عاش أغلب حياته مراقب مش متفاعل أكيد بيتكون معو بداخله شخصية تحاوره لتكون الصوت التاني يلي تناقشه وتتفاهم معو وتبرز على طاولة الحوار كل الأدوار وكل الشخصيات اللازمه لاكتمال حوار من أي مستوى كان ..
الحد يلي عم بحكي عنو هو - الصوت الداخلي يلي في راسي - المونولوج الداخلي ,, صوت الراس ,, الضمير مع إني ما أعتقد إنو الضمير بحد ذاته .. يمكن النفس الأمارة بالسوء ,,, الصوت يلي بتحكوا عنه في كتاباتكم "حكيت في حالي " .. ما بعرف بس
هوه بالمختصر الصوت يلي بتسمعه براسك
شو ما كنتوا بتسموه .. بس هوه هاد الحد يلي بتلاقيه جواتك بيصرخ بكل شي نفسك تحكيه وتعمله كل شي المفروض كنت تحكيه
الصوت يلي وعينيك عم تراقب هوه بكون عم يحلل براسك
هوه يلي بيتوجع ويسب بالغالب .. وهوه يلي بكذب كل شي بتشوفه في مواقف .. وبيصدق أشياء إنتا ما بدك تصدقها في مواقف تانيه
هوه بعمل مصالحات وتنازلات وهوه يلي بحذرك وهوه يلي بفلتك على الغلط - هون أعتقد بتكون وسوسة الشيطان - .
بس أحلى شي لما يصير هاد الصوت يزكرك بشغلات بتضحك أو شغلات ما بتخطر عالبال .. وبتصير بدك تمسك حالك ومش قادر
مرات بكون واحد يحكي معك ويحكيلك أنا بعمري ما رح أخونك أو أنا ما بكذب عليك ومن هالحكي وهوه بنفس الوقت - الصوت الداخلي - بتلاقيه فتح مليون ملف وملف في راسك وعم ينكش عليك إنو هاد الشخص سبق وخانك وعم يخونك أو سبق وكذب عليك بدليل كذا وكذا وكذا .. بس بهاي اللحظة ما بحاول آخد أي إجراء وبغصب حالي أصدق الشخص يلي قدامي .. وأكيد بلحظتها الصوت الداخلي بيحرد وبيحكيلي بكرى رح تندمي وبيغيب وبيرجع لما أكون جد ندمت .
أنا كل يوم عم بنوجع أو بعصب بحياتي من شغلات ما بتبين للكل .. أو ما بكون صريحه فيها مع حد .. لأنو ماحد بحب الصراحة وبدليل ما كنت وصلت لهيك مرحلة إني أنوجع من شخص وتوصل بيناتنا مرحلة إنو بس عم بضحك في وجهه لأني مش قادره أبين وجعي قدامه .. لأنو هوه لما وجعني ما أعتقد رح يفهم أو يقبل على حالو تهمة إنو هوه كذاب ووجعني وآذاني .. شو بكون نفسي أحكيه بكون محبوس جواتي بالصوت الداخلي عم بصرخ وعم يسب وعم يبهدل وما بخلي وما ببقي .. وبينصحني أكون قوية وما أخاف
كلنا عندنا هاد الصوت .. بعرف إعترفوا
حابه أحكيله لهاد الصوت إنو بعرف مغلبتك معي أكم يوم
وبعرف إني تعبانه بهاي الفترة وصار فيها مآسي وساكته عنها
بس بحب أحكي إنو أنا عم بقوى كل يوم أكتر وبييجي يوم أتغير
وأصير قادره أحكي الكلام المناسب لكل شخص بلحظتها
سواء كانت منيحا أو عاطله .. حسب ما بدر منه
حد حابب يحكي شي ؟؟
لأنو كتير حابه تشاركوني هاد الموضوع بالذات
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
25 comment:
ممكن ناس كثير تتهمك انك مشرّتة - اسف عالكلمة
بس انا شايف انه كل حرف كتبتيه صح
"
الصوت يلي وعينيك عم تراقب هوه بكون عم يحلل براسك
"
بس أحلى شي لما يصير هاد الصوت يزكرك بشغلات بتضحك أو شغلات ما بتخطر عالبال .. وبتصير بدك تمسك حالك ومش قادر
"
مزبوط 100% , وبزيد كمان لما الصوت الداخلي يصير يعلّق على شغلة بتشوفيها ويحكي شغلات مثل : حبيب الله شو هاذ؟؟
تطلع كيف عامل؟؟
ارحمينا يا انجلينا
شغلات زي هيك
من اروع واصدق ما كتبتي جد
أنا عندي هالصوت..بس هو صوتي (نفس صوتي اللي بسمعه لما أحكي مش اللي الناس بسمعوه مني)
وبحب هالصوت بصراحة بحسه أعقل مني وشغل تحليل منطقي :/
بس اللي بعقد انه دايما "بيخاطبني" المخاطَب وبصيغة الأمر..مش المتكلم؟!
lunar
صراحة كنت خايفة من ردت الفعل
وكنت شاكه إنو والله ممكن إنت تفهم عليي لأنو بشوفك مرات بتكتب جملة "حكيت في حالي" أو ما شابه بس كنت متوقعه حد يحكي عني مشرته
ياعمي كلنا مشرتين
بس جد هداك اليوم القاضي وهو بحكي بقراره عن تقدير الأجر
يوم فيوم
شهر فشهر
سنه فسنه
طلعت ببالي
زنغا فزنغا
طب شو بدك تعمل قدام هيك قاضي وتفقعها ضحكه
أشكرك على الرد
Dreamy Villager
لول هوه آه صح بالعاده بكون بؤمر وبيتخوت كتير زي ما حكى لونار
وجد بحسه عزيز عليي
ليش يا ترى ؟
يا نور ... خليتيني أفكر كتيــــر وبعمق
شكراً إلك
كلنا أكيد عندنا هذا الصوت وبيغلبنا كتير
واتوقع بنشعر بالرضا عن انفسنا لما يكون صوتنا المسموع هو صوتنا الداخلي نفسه
الضمير عن البعض زماااااااااااااااااااااان مات
و شبع موت كمان
---
كثير منا الصوت الرأسي/القلبي/ الداخلي مغلبه
و بعضنا هو اللي مغلب هالصوت!
فهمتي علي؟
لأ! بعرف
:]
صباح الخير
ذكرتيني بالمحاميه آلي ماكبيل....مسلسل كان يعرض قبل كم سنه ...مش عارفه اذا شفتيه
بس بطلة المسلسل محاميه وبتحكي مع"الصوت"كتير:) بس وانا اقرأ في البوست تخيلتك مع "الصوت" عموماً ومالو...منيح منا اللي مشرتين وبس لووول
نور
الله يسعدها شو دايما مغلبتك أنا
بس إزا إنتي بتشعري بالرضا
أنا دايما مقاتله وطاع وطيع وشد شعر
haitham
أصلا إنت أكتر واحد بحس صوت الراس بزن عليه
وأرجع أقرأ شو بتكتب بتنتبه
لووول
وأعتقد إنت الوحيد يلي مغلب الصوت
لوول
naysan
أنا يلي بعرفها آلي مكبيل
تحشيش كانت بس أحلى شي لما كانوا يغنوا في الحمام
لوووول
بس المشرتين بتصير مع يلي بحكي مع حالو بصوت عالي
أما أحنا ملتزمين حدودنا وصراعنا بكون داخلي ما بطلع لبرات راسنا
Nwreah : أجت إم عمر تتفلسف هساعيات
um Omar: الله يسامحك حكيت اللي ف بالي لا أكتر ولا أقل
"هي إشتغل عند اول ما فكرت أرد عليكي هون"
أه,, في منه هالحكي
أنا بلاقيه بشتغل عندي بالأكتر لمى أبلش أفكر ف موضوع وأكون بدور ع ردة فعل الطرف اللي قبالي
بيصير مسلسل تركي,, ع فلم هندي
حتى لو ماصار شي من اللي خطر ع بالي,, أو ع قولتك اللي " بالي" املاه عليّ
مش هوه هاد الضمير؟؟
وإلا مش شرط يدلنا ع الخير,,
الصوت اللي دايمن بدور ع مصلحتنا حتى لو ع حساب غيرنا
بعرف,, بتفلسفس زياده,, بس إنتي طلبتي المشاركه
umommar
ام عمر كلنا بنتفلسف
شو الجديد؟؟
عمرك سرحتي مع الصوت وبطلتي تسمعي
شو الحد يلي قبالك بحكي معك؟؟
:هيثم بكل فخر .... موااااااافق:
خخخخخخخ
عادي إزا حكيت
أه ,, كتير
بس أنا مش مصاحبيته زيك,, مابسمعله ومنختلف أكتر ما منتفق
LOOOOOOOOOOOOOOOOOOOOOOOOOOOOOOOOOOOOL
على زنقة فزنقة
متت من الضحك , جد الله يعينك على هيك موقف
:S
بالعكس , الشكر الك على هيك بوست
أنا كتير بحكي مع حالي
و صراحة هاد الصوت اللي معي أحيانا بيخوفني لأنه متلك بحسّه شخص تاني يعني كأنه جزء مستقل مني
ما تضحكي علي بس والله والله بسمعه بإدني بيحكي معي و صوته بيختلف أحيانا بيكون مذكر أحيانا مؤنث
عادة هاد الصوت بيقلّي الحقيقة عبلاطة عشان هيك بكرهو جدا..لأنه بحب أكذب عحالي و الحقيقة بتطلع بتخزي دايما
بعرف انه موجود و عمره ما بيروح
أحيانا بسمعله لأنه بكون بطلت قادرة أكذب عحالي،بس لو أتركله العنان ما رح أكون مبسوطه بحياتي بالمرة
و رح أخسر كتير اشياء انا مؤمنة فيها لأني اخترت اني أأمن بس
ما بعرف اذا انا و انتي عم نحكي عن نفس الاشي بس انا هاد الصوت "الابرز" عندي لووول يعني في اصوات تانية بس مش كتير الها تأثير و عادة بتكون اشياء فطرية متل الحدس و هيك
يلا خدوني عالعصفوريّة
:yai:
haitham
هع هع إنتزعت منك إعتراف
قويون أنا قويون
umommar
ومالي بتهبشي فيي تقولي عامليتلك عمل
ودافنيتو في تم ميت
.. هيك عم يحكيلي
برأيك لازم أسميه؟.
انتي مسميته إشي
lunar
المشكله بتصير معي مرات جد بكون عم بحقد على الحد يلي قدامي وبنسى شو بدي أحكى أو بنسى أسمع
شكلي جد إنجنيت؟؟
rain
في فرق بين الضمير يلي بكون إنتي نفسك
وبين الشيطان يلي بوسوسلك إنو يلا
عادي
ما في مشكله
إنسي
ومن هالحكي الخايس تاعو
وفي فرق بين تسمعي أصوات زي يلي عندهم وسواس قهري وفي أفكارك نفسها بتكوني تفكري فيها
وفي آخر نوع يلي بحكي هوه مع حالو مش بصوت تاني
إنتي من أي نوع؟
وبعدين ما إسمهاش عصفوريه يا فصيحه يا متعلمه يا بتاعت المدارس
أسمها الفحيص أو الرشيد
وبالضفه بنحكي بيت لحم
وفي مصر بحكوا الصرايا الصفرا
وفي ليبيا بحكوا زنغا زنغا
:-o:
مش هيك...ولا وحدة منهم
يعني مش عارفة كيف اشرحلك،الصوت هاد بيقلّي الحقيقة عبلاطة يعني في المواقف اللي بيضطر الانسان فيها يسوّي حاله مقتنع و راضي و ما في مشاكل هاد الصوت بيدجلّي ياها هيك
الحياة ما بتمشي بدون ما نجمّل الحقائق احيانا صح؟
احيانا هاد الصوت بيقلّي اديش هالشخص اللي قدامي مثلا كله عبعضو غلط و اديه اللي عم أقلّه اياه كذب
بس طبعا ما بقدر امسك هاد الحدا و اقله انت واحد غلط كلك عبعضك
و هاد مش ضمير لأنه ضميري هو اللي بيحزن عالناس و ما بيرضى يأذيهم بالحقيقة البشعة
و هاد مش الشيطان لأنه بالعكس الشيطان بيكذب علي و بيحلّي الكذب بعيني
و الصوت اللي بيحكي معي مش صوتي،يعني ما بيشبه صوتي
و مستحيل أكون مجنونة لأنه المجانين ما بيعرفوا انهم مجانين و ما بيميزوا انه هاي الاصوات طالعة من عقلهم
فبالاخير ما بعرف شو هو هاد
انتِ قوليلي
LOOOOL tzakaret fi Finding Nemo lama Doory tesma3 soot abu Nimo w t2ollo "enta dameery?" :woops:
جميل
أمير
أشكرك
بس أحكيلي شو الوضع عندك
ترى أجمعنا كلنا على ما كتب أعلاه
أي شخصيه أحنا نقدر نخلقها داخلنا ونسمعها وما بنحددها بأي أطار وجوز أنه نغيرها متى ما بدنا
أمير
والله في منو الحكي
طب ويلي بكون قاعد فجأة بلاقي حد براسو بناقش فيه
أو بموقف تكون مع حد هوه يحكي وانت صافن فيه وفي نزاع جواك إن مثلاً ول عليه شو حمار
وانتا عم تبتسم أو مش تعبر عن شي
هل هاد الصوت هوه كمان إحنا أو طرف تالت أو شخصية أبتكرناها؟
بالحقيقه نعم كل الشخصيات الي داخلنا هي أبتكارنا ونتف معها ونختلف وسبب الأتفاق بكون ولبد قناعتنا وسبب أختلافنا معها لما نحتاج أنه نساير أو نتعايش مع الواقع
أمير
طب وأنت كيف الوضع عندك؟
كم بتساير وكم بتعايش؟
كيف بتقدر بأيام إنك تتعايش مع الواقع وأنت بداخلك في حوار تاني
بدك شي تاني
أو بدك تحكي شي تاني .. ومش قادر تساير
هاد الصراع الداخلي يلي بصير مع الشخص لو وصلت في مرحلة إنك تسكته كل مره بحجة الواقع
وين قناعاتنا رح تروح؟
رح ندفنها؟
أو هاد الصوت نفسه بيتركك لصوت تاني؟
Post a Comment
:وكيل المكومنت قال