الاستهلاك الإعلامي
مش رح أحكي عن الحرب الأعلامية والمواجهات والسيطرة من دولة على إعلام وإلخ إلخ .. مش رح أحكي عن أزمة الحجاب والنقاب والمناهضات الدولية وخصوصاً الفرنسية ضدهم .. مش رح أحكي عن إتجاهات الغرب ضد العرب والتغيير أو نظرتهم للرجل بأنه إرهابي والمرأة إنها متهضه - سمعت تعليق من كوميدي بيحكي الغرب غلطان لما يحكي عن الرجل العربي إرهابي والمرأة العربية متهضه .. حكى لو يعرفوا شو بصير في البيوت بيحكوا الرجل متهض والمرأة إرهابية لووول - وإلخ إلخ من المواضيع مع تطرقي إلي جانب منها بشكل عام .
الموضوع يلي بدي أحكي عنها هوه الإستهلاك الإعلامي بجميع وسائله .. الإذاعه الإخبارية والأفلام والمسلسلات والإعلانات بجميع صورها والتوجهات الإعلامية بكافة الطرق والوسائل والتعاملات الدولية والعربية كمان - ترى في حركة عربية سخيفة ضد العرب نفسهم - وإنو كيف يلوك هذا الإعلام بجميع وسائله المذكورة مواضيع محدده منها يلي ذكرتها زي الحجاب والإسلام والإرهاب <--- الكلمات الأكثر إستخداماً على مر الوقت.
ومنها شغلات كتير مثلاً زي العمليات التفجيرية .. مابعرف إزا معلوماتي صح بس حسب ما بتذكر كانوا الكتائب الفلسطينية يطلع واحد أو وحده من الشهداء الكبار ويعلن بعد تأديته العملية الإستشهادية بشرح الواقعة .. في فيديو مصور قبل العملية ,, كانوا يطلعوا حاملين المصحف ملثمين بالحطه الفلسطينية وبيذكروا كل ما ينعش القلب الفلسطيني المقهور .. وبيختموا بالحرية للقدس وفلسطين ,, الله أكبر الله أكبر -- بيترافق معها الحزام الناسف والكلاشنكوف أو أي سلاح آخر .
طبعاً هاي الصورة صرت أشوفها أكتر من مكان ,, خصوصاً دعايات التلفزيون "أنا مسلم أنا ضد الإرهاب" وهون بتبادر بذهني سؤال زغير إنو انا مسلمه أنا بعرف هالحكي بس ليه جايبينها على تلفزيون عربي؟ روحوا إقنعوا غيركم وحالكم بهالحكي وإنتوا كل يلي عاملينه بتكرروا نفس المشهد صورة شهيد باعت فيديو بهدد بالقتل لغايات إرهاب العدو .
وتتكرر الصورة وأول ما يخطرر ببال الناس صارت 1- مسلم 2- ملتحي 3- مصحف 4- سلاح 5- علم أخضر 6- حزام ناسف 7- وفي بعض الأحيان وأغلبها حديثاً شخص معصوب العينين على ركبه وبيستنى الموت 8- الله أكبر الله أكبر .
ما بتتصورا قديه بتجرحني وبتدايقني هاي القصة وتكرارها واستهلاكها بشكل بلا طعم ,, طبعاً أنا ضد أي تطرف وإصابة المدنيين العزّل في أي بلد كان سواء بهاي الطريقة أو طريقة تانيه .. بس والله تشوه المبدأ ومات بالإعلام وكل مابدهم يتخوتوا عالعرب بفلم بنط واحد حواجبه أخمل من شعره ولابس حزام ناسف وبدوا يفجر حاله ,, بلاقي صور تخويت كتير عالنت بنفس الصور حتى مره كنت بفتش عن صور بسس لقيت بسه رابطين على بطنها حزام وأكم علبه ورابطين على راسها شي بشبه الغتره وإنها هاي بسه إرهابية والباقي عندكم .
وغير هاي الشغله منها اليوم سمعت خبر إنو صدام لسا عايش وبهدد يرجع وإنو يلي شنقوه مش هوه - سؤال جانبي حد طاوعه قلبه وحضر لحظة الإعدام؟ - وطلعت كتب وتحقيقات إنو في 40 شبيه لصدام ,, والصوره الأبشع يلي تكررت صورته وهوه قاعد وعم يفحصوا أسنانه وشعره ,, شو مقرف الوضع كان من كتر ما كانوا يكرروها ويعيدوها ويزيدوها إنو خدوا استلموا على هالزعيم يلي كنتوا تحكوا وتتحاكوا عنه هيه " أشعث أغبر مذلول" حتى لو إنو مالقينا أسلحة دمار وطلعت بخوف فينا بس هيو مسكناه وعم بنذل فيه عشان نذلكم بزياده والإشي الأقرف إنو في فئة منحلة إنبسطت وصارت تزقف .
ونفس الشي صار لكتير مبادئ وشخصيات تم بث صور وقصص لتتكرر الفكرة في الراس ولا شعورياً بتصير زعزعه بالنفس إزا الإنسان ما لحق حاله بتفسير واضح أو كان بيتملك أساس سليم واثق منه لو شو ما صار ومن الشرق والغرب في مذيعه أمريكية اسمها روزي أودونل أكيد بتعرفوها كانت إلها آراء كتيره ومختلفه عن الأوضاع الأمريكية وحضرت الحلقة يلي صارت فيها مشكله ويلي بوصفوها إنو كان أكتر نقاش حاد في حياتها المهنية وحكت فيه :
"655,000 Iraqi civilians dead. Who are the terrorists? ... if you were in Iraq and another country, the United States, the richest in the world, invaded your country and killed 655,000 of your citizens, what would you call us?"
بتحكي إنو 655 ألف عراقي ماتوا .. مين الأرهابي ,, لو إنت كنت في بلد تاني والولايات المتحده إحتلت بلدك وقتلت 655 ألف من مواطني بلدك شو رح تسمي الولايات المتحدة؟ ,, ومتزكره كملت في نقاشها وكملت بما معناه " مش عشان اسم فلان محمد يعني هوه إرهابي .. يلي بيقتل 655 ألف شخص أعزل هوه الإرهابي "
طبعاً قامت الدنيا طاع وطيع من بعض الجهات عليها والناس بلشت تكرهها .. أو كرهوا الناس فيها وفي كتير برامج حواريه أو مسلسلات كان يتم نقدها .
زي ما مواضيع كتير مباحه وصارت زي العلكه البايته يلي رح تدوب في التم كمان شوي وصار فيها إشباع وتخم من قبل الناس وزهقتها الناس وبطلت تطيق تفكر فيها - زي الشأن الفلسطيني ,, لما بدنا نحكي عن شغله طولت بنحكي عنها شو هيه كاينه قصة الشرق الأوسط لتطول هالقد أو آه إنتو الفلسطينية بس تصير مشكلة بتحطوها على طول بضهر اليهود - وصارت الناس تتحاشى الخوض فيها كون الأكثر إنتشاراً وقوة هوه الصح كون فكرته تكرر في تلفزيونات وإذاعات وإنترنت وإعلانات ودول وقرارات فا أنا وأبوي يلي علمني عن اليهود أو النقاب وإلخ غلط وهمه يلي صح كون مش معقول مليون حد رح يكونوا غلط وأنا وأبوي وسيدي صح .
وجنباً إلى جنب تتكون المواضيع المحرمه أو التابوهات والملتصقه بالفيتو في بعض الأحيان تقولوا هيه والفيتو وجهان لعمله واحده ,, منها اللوبي الصهيوني واسلحة الدمار في العراق وعدد القتلى العراقيين وغيرها وغيراتها يلي نكشه الويكيلاكس فرد مره - وإنتو عرفتو شو صار ب أسانج تاع ويكيلاكس - وغيرها حتى بالشؤون المحلية من قضايا الفساد والمية يلي بتمشي من تحت الناس وغيرها بالدول العربية يلي الحل فيها ليسكتوا الناس عنها بإنهم يزيدوا معاشاتهم أو كما ظهرت الصورة إنو أعطوهم جزره ولسا القادم أعظم والله يجيرنا .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
2 comment:
كأنك بقلبي !! انو الواحد بيتفهم ليش ممكن الآخر يتهجم علينا .. الآخر بيكرهنا ، مش فاهم علينا ، بدوش يفهم علينا ، عذره معو ، بس لما احنا نعمل صورة نمطية عن حالنا و نعادي حالنا هذا الاشي اللي بيحط العقل بالكف.
أنا بحلم باليوم اللي نقدر فيه احنا العرب و المسلمين انا ندخل بالنكتة .. انا بدل ما نحس بالاهانة و الزهق انا نلعب معهم على طريقتهم و نقلب عليهم الطاولة زي ما عمل ستيف مارتن بهذا الفيديو
http://www.youtube.com/watch?v=tWNLhptltBg
صدام مش عايش
هذا اولا ً و مشااااان الله إذا بتتذكري إنو كبري الخط شويتين
هذا ثانيا ً
---
الإعلام = تجارة ممزوجة بسياسة نتنة فشو بدها تكون المخرجات يعني!!!
Post a Comment
:وكيل المكومنت قال