أول قبضه
تحشيش كانت أول مره باخد فلوس أنا إشتغلتها .. كان شعور غريب إنو آه أوك بلشت أنا أجيب مصاري وبغنى عن فلوس أهلي ..هسا الفلوس يلي كنت آخدها ويلي عم باخدها لازالت تدرج تحت مسمى مستحقات للتدريب ,, كوني لساتي مش محاميه بل لازلت تحت التدريب .
وفي حين غيري مابياخد ولا نكله من التدريب (بالأصل مش المفروض ياخد المتدرب فلوس) فأنو أي مبلغ شو ما كان بالنسبة إلي وقتيها إشي كتير كبير وبزيل سطوة أهلي عليي يلي كانت لفترة طويلة بالفلوس من بعد ما صرت أملك قرارات شغلي يلي إجت بعد تحديات كبيرة ومواجهات أثبتتلهم بالوجه القاطع إني قدها .
بس شعور لما تبلش قادر تصرف على حالك ومشاويرك وأكلك ولبسك وكل ما بتشتهيه نفسك بالطبع شعور منفصل بحد ذاته عن أي موضوع تاني .. صرت قادره بنفس اليوم تحكي مثلاً صاحبتي يلا نطلع بنطلع وفلوسي في جيبتي ومش محتاجه أحس بالأحراج قدام أهلي إنو بدي أطلع أعطوني فلوس .
أهلي ما كان عندهم مشكلة الفلوس .. بس دايماً ومن عمر زغير كنت أحوش كل مصروفي لأشتري كل يلي نفسي فيه حتى شغلات ما ممكن تخطر على بال أي حد فيكم يلي الأهل مفروض يوفروها لولادهم ,, بس لسبب ما . ماكنت أرضى بهالحكي وأحوش وأشتريها وأنبسط إنو آه هاد من فلوسي هاد يلي أنا أخترته هاد يلي أنا جبته .
بتزكر واحنا زغار أهلي بعد ما حد ييجي ويعيدنا بالعيد كانوا يحكولنا هاتوهم بنحوشلكمياهم .. وبالفعل كنت أعطيهم إياهم ويدوب الملح في الماء .. بواحد من الأعياد ما كزبت خبر -- استلمت العيديات من هون وهووووب طراخ على السوق يلي جنبنا وأشتريت ألعاب وأشياء زاكية للحد يلي ما قدرت فيه إني أحملهم وشحطت الكياس وراي .. إجا المسا وعرفوا أهلي بهالحكي وإنسفقت بهدلة بعمري وإتاخد يلي ضل من المصاري ويلي كنت مخططه تاني يوم أرجع وأكمل فيهم على باقي محل الألعاب ,, ولهسا والله العظيم كل ما أمر من عند المحل بتنتابني لحظة فراغ داخلي ما بتتفسر .
يمكن لأجل هاي اللحظة عم بنتعش كل مره باخد فيها فلوس شغلي ,, كل مره بطلع فلوس من جزداني وبشتري شو ما بدي .. بطلع مشواري وبصرف حتى لو بصرف كل فلوسي ,, مابتفرق معي ,, مش ملزومه أصحي أبوي كل صبح "بابا بدي أطلع" برد عليي " طيب شو بدك" بنقهر من جواتي " يعني شو بدي ,, بدي مصروف" بتمر لحظة سكوت "قديش بدك؟" وبهاي اللحظة بالذات بكون نفسي لو أطلع مشي على المكان يلي بدي أروح عليه ما بحكي لأ ,, أيام الجامعة كرهت حالي وكان نفسي أشتغل بأي شي بس إنو أقدر أستغني عن هاد الموقف المحرج - حسب ما أنا بعتبره - وأرتاح .
مره كنت بحكي هالحكي لصاحبتي بس هيه كان موقفها غير إنو ماعمرها فكرت بهاي الطريقة وإنو الأهل ملزومين على مصروف البنات بالتحديد وإني مش شب لأشعر بهيك حرج سألتها إنو مابتحبي بيوم تشتغلي وتستلمي راتب وتجيبي شو مابدك ردت عليي إنو لو شو ما أشتغلت مارح يكفوها فلوسها ومارح تجيب كل يلي بنفسها وبالأخير رح ترجع تطلب فلوس من أهلها ,, استغربت إنو آه هيك أغلب البنات بتفكر ,, وهيك الوضع الطبيعي وهاي الغاية من إنو ربنا شرع للذكر مثل حظ الأنثيين مش لأنو أحسن بل لأنو ملزوم يصرف على الأنثى ويلي بطلعلها نصيب من الورثة بكون إلها لتصرف على حالها (بزيادة يعني) وهيك باقي الجوانب المتعلقة بالشأن المالي .
بس مع كل هاد بحسها ميزة إضافية لكوني مستقله مالياً عن أهلي إلى حد ما ,, بس المشكلة يلي بتواجهني إني مابعرف أحوش ,, بفكر إنو لشو بدي أحوش وعشان شو .. بس صار لازم أحوش ليكفو فلوسي لآخر الشهر تخيلوا لوول لأني من أول يوم بستلم بتلاقيني هوووووب صارفه نصهم على الأشياء يلي تشهونت عليها الشهر يلي قبل وشغلات فارطه ,, بس مع هيك صارت تأثر على مصاريفي الأساسية بس الحمدلله مكفييني في كتيييييييير أشياء .
- موضوع جدلي أكثر من اللازم- .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
4 comment:
مساء الخير
الاستقلال الاقتصادي لا يعني الانفصال
انما يعني استقلال القرار وحريّة اتخاذه
رح تقولي
مهو الانفصال يعني قرار مستقل وحريّة
رح اقولك
لا ...الانفصال هو القطيعة
والقطيعة تعادل الخطيئة
الحياة هي استقلال
والاستقلال بيدأ بالاستقلال الاقتصادي
وينتهي بالاستقلال والحريّة الكاملة
دونما انفصال عن العائلة والاهل
دمتِ بخير
ومبروك
والمفروض اول قبضة تروح حلوانات
الاستقلال المادي هو بداية الطريق للاستقلال بشكل عام
انا مع ان يكون كل شخص مستقل مادياً عن أهله لكي تكون قرارته نابعة منه
أتفهم تماماً شعورك والغبطة التي تشعري بها من اول "قبضة" ، فهو شعور رائع بأنك أصبحت انسان منتج في المجتمع
الانفصال باتخاذ القرارات لا يعني أبداَ العصيان أو التمرد بل هو حق لكل إنسان
yosef
صراحة أنا كتبت آخر فقرة وكانت مش الفكرة مش مكتمله في راسي وهيه جدلية إلى حد كبير .. بس مع هيك الفكرة نفسها لا تشكل القطيعة ,,
في أهل بخافوا من هاد الفكر كونه بيعني في مرحلة ما فقدان سيطرتهم على أولادهم وبشكل خفي فقدانهم السيطرة على شي كان لوقت طويل تحت أمرتهم .. كونهم بينسوا في مرحلة ما الدور الرئيسي إلهم وبينسوا إنو آه في يوم من الأيام رح يطلعوا ولادهم من البيت ,, وهاي بالجهة المقابلة ما بتعنيلي يلي هيه رفض السيطرة والتمرد والخروج عن المألوف عشان أثبت شخصيتي
بالعكس هاي الفكرة حكيت عنها مكملة لفكرة الإستقلالية بجزء زغير زي يلي بيتعاقد مع فنان معجب بإبداعه بس مع هيك حصره بألوان وأشكال وحط عليه شروط وضله واقف فوق راسه ليعرف شو بده يعمل .. فاهم عليي كيف
إنو في أشياء مابتيجي إلا مجموعة "بكج" كامل وصعب تفصل شي عن شي لأنو الناتج نوعاً ما بيطلع مشوه
وبرجع بحكي إنها الفكرة جدلية أكتر من اللازم زي ما عدلتها فوق وكمان مش فكرة متكامله في راسي
وأولها كانت مواصلات وأكل .. أصلاً ما كنت عارفه شو أعمل فيهم .. زي ما بحكوا صاحب المال تعبان فيه
سراج الماضي
اول شي شكرا لزيارتك
:D لازم نأهل ونسهل عالباب
بس صراحة الاستقلال المالي لازم يكون متكامل
يعني مش تخلص راتبك من أول الشهر وتقعد باقي الشهر على مصروف من الأهل .. لأنو رح تضل تتعاير إنو وين راحوا مصاريك
وماكانت غبطه قد ما كانت لحظة تفكير إنو آه هسا صرت أعتمد على حالي بكل النواحي
وهسا صار الطريق أصعب بمرتين .. والأبشع من هيك روح التحدي يلي بتبرز وعنادة الراس يلي بتكتر إنو مستعد تعيش بأقل من المستوى يلي أهلك كانوا معيشينكياه ولا ترجع تطلب منهم .. المشكله بتضلها تزن هالشغله بالراس .. بس يلي بيمشي بهالطريق بيصعب عليه يرجع يمشي بهداك الطريق
بس مع هيك كل شي إلو حلاوته وإلو شعور الإنجاز الداخلي وبيزيد من حدة النظره للأشياء ووزن التفكير
Post a Comment
:وكيل المكومنت قال