قلم .. خط .. كتابة
الخط وما أدراك ما الخط
عندي شغف كبير بالخطوط وأنواعها وطرق رسمها
كنت كتير أحبها بس أيام المدرسة كنت أكره لما يعملولنا إمتحان فيها
قال شو إمتحان خط إنو بالله جد شو هالتخلف
الحمد لله على مره الوقت ومع ثقتي بحالي بما أكتب صار يتحسن خطي وصرت أحس إنو بيحمل شخصيتي أنا وروحي أنا بكل حرف وبكل لفه وبكل شخطه فيه لدرجة صرت أصفن ساعات وساعات وأنا ماسكه القلم وبرسم وبخربش أغلبها كلمات ومرات أحرف ومرات أحرف بس بأشكال هندسية وكالعادة في كل ورقه بكتب عليها رح تلاقوا فيها زوايا .. حكولي إنو معناها كبت نفسي
نظرتي لأي حد خطو أقرب للرسم من إنو كتابه بتكون مختلفه وفي ناس بحسها لسا بتكتب على خطها من أيام المدرسة.
بس في ناس خطها روشتات مابيعرف يقرأها غير شخص فاهم شو بيكتب مش إنو عم يقرأ شو مكتوب ,, زي أستازي لما يكتب بحسه عم يكتب لغة حوار مش يكتب لغايات الطباعة والقراءة لأنو مخو بكون في بلد تاني وبحلل وبمنطق وبيوزن في شو بدو يحكي
حالياً في المكتب لما مانعرف نقرأ كلمه منه مابنحكي ممكن تقرألي هاي الكلمه ,, لأ لأ بنسأل ممكن تترجملي هاي الكلمة .. ومع الوقت وشغلنا خصوصاً وإحنا في المحكمة وبدنا نكتب أشي بسرعه صرت أعرف إنو الرسم في الخط عبارة عن رفاهية ,, حتى لو إنتا بتملكها دون تعليم رح تمر عليك لحظة وتحسها عبء عليك إذا كنت مستعجل أو صار عندك فيض فكري وبدك تلحق تفرغه أو تنقله على ورق.
ما إلي أي حق إني أعلق على خط أي حد لأنو الخطوط منسجمه مع شخصية كاتبها ومتطابقه معو زي لون شعره وفكره ,, وكل إنسان إلو خط يميزه ويفرقه عن غيره مش بس بالتوقيع بل بالكتابه العادية ,,
مره خلاني أستازي أحضر جلسة خيره للمضاهاة يلي بتكون بدهم يقارنوا خط المدعى عليه على الورقه المدعى بها مع خطه قعد الخبير وقعد موكلنا جنبه .. اكتب اسمك ,, اكتب تاريخ اليوم ,, أكتب جملة كذا كذا كذا ,, أكتب تحت السطر ,, أكتب فوق السطر ,, أكتب بين السطرين ,, وقع ,, وقع بخط أكبر ,, بعد شوي بيحكي الخبير أكتب بإيدك الشمال ,, أنا هون إنصدمت إنو جد آه ممكن يكون بيكتب في الإيدتين وعم يوقع بإيد ويكتب بإيد (كون الخط يختلف من إيد للتانيه) طب موكلنا إلتخم لأنو ما كان بيعرف يكتب بالشمال وضلو دقيقتين يحاول يمسك في القلم ,, مسكه وكتب أكم خربوشه .
الكتابه والخط موضوع كتير كبير كونه وسيله من وسائل الحوار ,, بس بيختلف فيها إنها بالنسبه إلنا إنو إلها قوة وكل حرف بتكتبه إلو معنى سواء في عقد أو أوراق دعاوي أو بينات,, وفي مواضيع أكبر من هيك بس مارح أتشعب أكتر من هيك .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
4 comment:
أنا عقدتي درس الخط كانت!
منت أهرب من الحصة
يمكن الدرس الوحيد اللي كنت أهرب فيه
خطي بشع
haitham
لوول
صراحة كانوا يعقدونا
وحتا لهسا قد ما أرتب خطي
أبوي بحكيلي خطي خرابيش
3ayoo6
الحمدلله انه في كمبيوتر ولا كان ولا حدا فهم ردودي في المدونات :)
أنا خطي لا يقرأ غير بمعجزة
سراج الماضي
أصلاً ما إجتنا مصايب الخطوط إلا من ورى الكمبيوترات
متزكره بالمدرسة ما كان عندي قدرة أكتب غير على طاولة مستوية قدامي مما يعني إني مابعرف أكتب على الحيط أو اللوح بلفظ أصح ,, كان خطي شكل بالدفتر وشكلين على اللوح
وكل كلمة ما إلها دخل في التانية
Post a Comment
:وكيل المكومنت قال