الشعب يريد أن يريد
تنبيه : الرجاء القراءة بين السطور .
جايه اليوم أحكيلكم عن الحج (الاسم غير محدد) وحابه أحكى بالتحديد عن حياته هوه وعائلته وأقاربه .. هاد الزلمه يلي شايفينه عايش بفيلا بأرقى المدن والمناطق المزوده بكل ما تشتهي الأنفس .. بجنان الأرض ومراتعها مزودة بكل ما يخطر على بال وموصله بأفضل التقنيات وأساليب العيش الرفاهي ,, وبما أنه شايفينه كبير في السن فهو متقاعد من وظيفة كان بعمل فيها طول حياته معزز مكرم فيها بعد عمر طويل وتم تكريمه بعد انتهاء خدمته من قبل مدراءه وزملاءه ,, وهوه مرتاح حالياً في بيته أقصد فيلته ومبسوط بروح وبيجي بسيارته يلي اشتراها بكل أريحية وبدون أي جمارك مغالى فيها أو أي تعقيد ,, ويذكر بأن أولاده السبعة وبناته كلهم جوزهم وسكنهم في بيوت بناها على أراضيه يلي ما حد استرجى يقرب عليها ويلي حمتها الدولة بقوانينها من أي أعتداء وزودتها بكل الخدمات الأساسية .
أولاده وبناته استطاع وبكل سهولة تعليمهم في المدارس الحكومية المشهود لها بالرقي العلمي والمزودة بأفضل التجهيزات لراحة الطالب وبعد تفوقهم دخلوا الجامعات (كلهم) وما كان في أي عبء على الحج من الناحية المادية أو حتى مواصلات ومصاريف أولاده .
والحج فخور بأنه بيقدر يدخل أي مؤسسة استهلاكية مدنية أو عسكرية ليشتري منها ما توفره له الدوله وهاد كلو دون أي حاجة لإثبات شخصية أو أثبات مواطنه ,, كأنوا رايح على كارفور .. وموفر فيها جميع السلع الأساسية والكمالية والمحمية من أي غلاء غير مبرر أو ضرائب لا سمح الله ..
زوجته الحجة الله يخليلوياها لما كانوا الناس ييجوا يخطبوا بناتها كانوا يسألوا عن الدين والأخلاق والعلم - مش إشي تاني - وبعد الرد كانت تبادر الخاطبه وتعرض مواصفات العريس من إمتلاكه عمله الخاص الناجح يلي أحيط بكافة التشجيع من قبل الوزارات المختصة وعمله هاد مندرج من دراساته الجامعية وعنده شقة وقادر على إعالة كريمة الحج بكل حوائج الحياة الأساسية والكمالية ..
وللأسف ابن ابنه للحج تعب ومعاه مرض مستعصي وبالفعل حمل ابن ابنه وأخذه على احدى المستشفيات المبنية بأيادي وتبرعات أبناء وطنه الحبيب وحالياً يتلقى العلاج اللازم بمتابعه حثيثه دون تكاليف علاجية زي هالدول التانية.
مره من المرات كان في إزعاج من قبل أكم أزعر في حارة الحج فقام الحج بالتوجه إلى أقرب مخفر وقام بتقديم شكوى ضدهم وقامت الجهات المختصة بأخذ إجراءاتها بالطرق القانونية السليمة وبأداء واجبها دون تحيز ,, وتم تحويل الشكوى وتتبعها ووصولها بشكل أصولي إلى دار القضاء ,, وتم النظر في الدعوى بكل موضوعية وحيادية ورقي قانوني فكري من قبل ثلة من القضاة الأحرار .
والصورة يلي ببكي فيها هاي لأنو عم بيغادر أرض البلد وهاي قصة طريفة حيث أنو قبليها بأكم أسبوع من الحجز الحج قدم على طلب لأول جواز سفر إلو - طبعا الحج مابحب يفارق أرض هالبلد - وعاملوه الموظفين بكل إنسانية ولطف ومراعاة لعمره وخلال أيام معدودة حصل على جواز السفر لأداء مناسك الحج والمنظمة رحلاتها والمسيره بشكل فاخر ومريح ومراعاه شديده لحجاج البيت الحرام من البلد وكانوا كل شوي يتصلوا يتطمنوا على البعثه ويخبروا أهاليهم عن طريق وسائل الأعلامية المختلفة المستقلة منها والحكومية .
وكل يلي بيخطر في بالي حالياً مقطع عادل الإمام في مسرحية شاهد ما شافش حاجه ,, وحلوة تسمية جماعة اللي بالي بالك شهود ومش شايفين حاجة من الحياة الواقعية المريرة التي يخوضها الإنسان على تراب هذه البلد :
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
10 comment:
إييييييييييييييييه
فكرك بيتبناني مشان أعيش كم يوم زي حياته الرغيدة
حياته كالأحلام ، لدرجة كنت ما حأصدق إنو في حياة هيك
الأستاذة نور نياتي هانم؛ كإنك بتحكي عن واحد عايش في المريخ؟! بس على علمي ما في حدا عايش ع المريخ
هيييي! نور هانم! إصحي! بيكفيكي نوم، قومي بلاش تتأخري ع الشغل
saleh & haitham
صراحة ما توقعت ما تفهموا القصد من شو أنا كتبت
وأستاز صالح إنت يلي أصحى وطرطق ودانك زي ما بحكوا المصاروة
يمكن يكون فهمي بيختلف شوي، لكني أستطيع أن أزعم إني فاهم.
وصفك الممتع و البليغ لحياة هالحج ممكن تحصل فقط في الأحلام، (يعني حتى في دول العالم المتقدم ما عندهم هالأشياء) ، هاظ كان قصدي.
و اسأليني أنا عن تكافؤ الفرص، و العدالة الإجتماعية، و عن الفساد، و عن عدم احترام الناس و غيرها و غيراتها، بس برضة مش عايز أصدق إنه بلادي هيك، و أهل بلادي هيك، حابب تظل صورتهم جميلة، في مخيلتي على الأقل (بس مش للدرجة إللي وصفتيها!).
ـ
يا بنت الحلال فاهمين! إه
بنتخوث و بنغير مسار ال"حديث" بس
:)
saleh
غايتي من هاد البوست كانت واضحه
لرد النداءات الباطلة بأنو كل شي تمام
الحياة صعبة نعم
ومافي مشكلة نتحملها
بس نتحملها على قدنا
الطبقة الوسطى تقريباً إنمحت
وإن دل على شيء بدل على شي خفي عم بصير
ومش معقول نغمض عيوننا عليه ونحكي لأ كلنا ننتمي إلى الطبقات العليا كما بيوصفوا
بدون أي أدنى تفكير
haitham
يا متعلم يا بتاع المدارس
مش كل واحد و علامه!
:]]]
وامتى صحيت من الحلم ؟؟
أعجبتني القصة كثير وقرأنا مابين السطور وأعجبني مقطع الفيديو ..
وشرفني مروري هنا لاول مرة ..
haitham
ياخويا وأنت كان علامك إنجليزي
وجع البنفسج
والله هاد مش حلم
طول عمر العربي يعيش الوسطية الحنيفه
والكل بيعرف إنو الدنيا دار الزوال
بس الغريب يلي الكل مع حركات الإصلاح صار يصورنا عم نعيش في هيك عالم
كلكم وصفتوها بالحلم أو الخيال أو حتى المريخ والكل ماصدق قصتي ,, لأني لم أبتغي من أحد أن يصدقها غايتي كانت أنو أخليها مبتذله وغير حقيقية لأفند تفسيرات جماعات الموالات الكاذبة
أشكرك على زيارتك لمدونتي
وبشرفني وبتمنى مرورك مرات تانيه
عنجليزي
أمّال إيييييييييييييه
Post a Comment
:وكيل المكومنت قال