خلص ما تسكتوا
مش طبيعي شو في ناس بتحكي وتلعي
يا لهوي شو في ناس بتموت على طق الحنك وفلانه عملت وفلانه حكت ويي وعن جد ويا عليها ويا عيب الشوم ولكم لللللللللللللللأ وهالحكي إكتشفت إنو في الرجال بشكل مش طبيعي .. يا لهوي يا لهوي لما خوالي لما ييجو شو بحكوا .
جد جد كتيييير على صحتي هالكلام .
إنو بالله عليكم من وين بجيكم الخلق لتضلوا تحكوا ؟؟؟ من وين بتيجيكم الأعصاب تضلكم تلتوا وتعجنوا؟
مهو يا إنو كل الناس هيك .. يا أنو أنا عندي نقص أو ضعف في هاي الشغلة.
إختي إجت هداك اليوم وكل شوي بتنط جسمها بحكها بدها بس مجال لتفتح ديوان وتبلش فيه .. يا بنت الحلال أنا مش طايقة أي طاقة صوتية تانية .. بكفيني الدرل يلي شغال فيه واحد في الحاره تقول مشتريه جديد .. وبكفيني صراخ ولادك .. وبكفيني سواليف إبن خالك يلي وارثها عن ستي .. وبكفيني همالة البنات الزغار يلي في الحارة - وحده بتقول للتانيه " أصلاً أنا مابنزل لمستواكي " .. وبكفيني إمك دايره وراكم تمدح وتنشر إنو بنتها مرة التركتور موجوده في البلد .. هاد غير وجع الراس والسواليف يلي ما إلها طعم وعلى قولته "الفاره يلي في راسي أو النحله" بنزن بطعم والأغلب بلا طعم .. وبييجي على كل هالحكي إنو عندي عقده نفسيه من الباب المطبوق وبضلوا يطرق طرق من حركة الهوا .. يا ولاد الحلال سكروا الباب - أبداً تقولوا متبعين سياسة الأبواب المطبوقة .
جد في تلوث ضوضائي منتشر وماحد بنتبه إنو آه السمع حاسه هامه .. والضرر يلي بصير فيها كتير بأثر على الدماغ .. يا عالم إرحموا من في الأرض .
مش عارفه ليه .. بس أعتقد إني هاليومين صايره حساسه زيادة عن اللزوم .. بس أنا متأكده إنو ما حد بحب الأشياء يلي بلا طعم .. والحكي يلي بلا طعم .. والتعليقات يلي بلا طعم .. والناس يلي بلا طعم ..
بس الإشي يلي مابفهمه بحالي إنو الأوقات يلي بيهدا فيها كل شي يا بضيع الوقت بالنوم .. يا بنشغل بشي كتير معقد .. إنو ليه مابقعد وبتفكر وبحمد ربنا على هاي اللحظات الهادئه وأستمتع فيها .. بدل ما أضيعها بأي شي تاني ؟؟ عن جد بحتار في حالي مرات إنو أشتغل ولا أستمتع وأروق .
ومشان الله حد يشطب التيس بوك .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
9 comment:
انا اللي فهمتوا من الموضوع اني تركتور
معك حق ....تلوث ضوضائي
عندي منه كتير ....والخير جاي عالطريق مع وصول المغتربين....الاسبوع الجاي
....وانا اعييييييييط
تلوث ضوضائي على رأيك
أما الصورة = تحححححححححححفة
w7l
والله إزا هيك حاسس حالك
فا هاد موضوع راجع إلك
naysan
همه مغتربين بعقل
المشكلة إنو إحنا يلي مغتربين وجايين يتغربوا عندنا
بنكون ماصدقنا تيجي عطلة نريح راسنا
ضروري تكون العطلة شغلنا فيهم
لأ وما بروحوا إلا لما تخلص العطلة
زي مقطع بقعة ضوء حلقة وحياة خالقك ماني مفارقك
haitham
متزكره تردسنا عن التلوث الضوضائي في المدرسة
درس عربي كان وكانوا حاطين صورة شارع وأزمه
السلام عليكم
معك حق و اللي بقهر أكثر يكون زلمة كثير حكي يالله شو بكون "مقرف" عفواً منكم
زمان كتبت على المدونة عن نعيم الجنة بخصوص سلامة السمع إذا بتحبي هاي اللينك http://alirbidi.blogspot.com/2010/07/blog-post_06.html
alirbidi
تفسير السعدي للآيات الكريمة :
سورة مريم :
( لا يَسْمَعُونَ فِيهَا لَغْوًا ) أي: كلاما لاغيا لا فائدة فيه، ولا ما يؤثم، فلا يسمعون فيها شتما، ولا عيبا، ولا قولا فيه معصية لله، أو قولا مكدرا، ( إِلا سَلامًا ) أي: إلا الأقوال السالمة من كل عيب، من ذكر لله، وتحية، وكلام سرور، وبشارة، ومطارحة الأحاديث الحسنة بين الإخوان، وسماع خطاب الرحمن، والأصوات الشجية، من الحور والملائكة والولدان، والنغمات المطربة، والألفاظ الرخيمة، لأن الدار، دار السلام، فليس فيها إلا السلام التام في جميع الوجوه.
ومن أصدق من الله قيلاً
هلأ و بهاللحظه للاسف مش قادره اني ادعمك بالمره
لاني بحاجه لتلوث ضوضائي من ايام زمان, بدي كل العيله تجتمع و الكل يحكي و العجئه...بدي كل هاد ومشتاقه لكل هاد
بس راجعيني بعد فتره بس اصير اروح هناك, لان الكل بحكيلي بتصيري ما تصدقي و انت ترجعي على دبي :$ معقول اصير هيك !!!!
بس عجئة الصيف هاي لا بد منها بكل بيت بالاردن :)
بالنسبة للرجال اللي بحبو الحكي....فغير عن بعض جماعه هون و اول حرف من اسمهم شيشاني فتعالي شوفي اللي بشتغلو بالحكومه... ياااااا لهوي قصص "نسوان" مع كل كرهي لهالكلمه بس بتلبقلهم
متعاطفة معك جدا, ما رح احكيلك كتير كيف وضعي و اخطف الاضواء منك,لأنه البوست الاخير بيحكي عن هيك, بس لازم احكيلك اني متعاطفة معك و انك مش لحالك بالعالم هيك, العالم جننوهم و بيتهم مش الهم و بدهم مساحة للخصوصية مشان الله, بس يوم
ممكن نعمل نادي, اشخاص لهم منازل و يبحثون عن ملجأ
noor
أشخاص لهم منزل ويبحثون عن ملجأ؟؟
جد تحشيش وحسيت حالي رح أكون رئيسة النادي كمان
لا ترى إحنا بيتنا مسميينو فندق صح النوم
يا لهوي يا لهوي شو بيجي
لا وتقولي حاجزين ورا بعض
هدول بسلمو الغرفه وهدول بيجو مكانهم
وينطبق كمان المثل
مثل ماودعتي تلاقي ,, حاسه هالمثل ناحسني
الله بعين
ولا عادي مابتخطفي الأضواء
عم بنفضفض وشو بإيدنا غير نفضفض لبعض
Post a Comment
:وكيل المكومنت قال