مع إيماني الكبير بدور التعليم وتأثيره في الإجتماعيات إنو صفر مكعب على الشمال ,, بندخل المدرسه يا بنطلع نيردات يا أقل من أدبنا ما في يا في دوامة ضياع لامتناهية مش عارفين كيف نتعامل مع الحياة مع تعليمنا القادم أو حتى قادرين نتعامل مع الوضع الحالي يلي إحنا فيه .

هسا بدي أترك كل المواضيع المذكورة أعلاه وأركز علي شغلة مش بس متعلقة بالتعليم في تعليم المدرسة لا بل بالحياة والمجتمع والناس ككل ,, ليه ما علمونا كيف نتعامل مع الفشل والخسارة والمواقف الصعبة؟؟.

علمونا كيف نتحل مسائل الرياضيات ومشاكلها ,, وتعقيدات الكيمياء ,, ولا متناهية الفيزياء ,, ونفك حروف اللغتين العربية والإنجليزية ,, حللنا شيفرة السنوات المنصرمة بالحروب العالمية الأولى والثانية وما تلاها من حروب العوالم الثالثة ,, لدرجة صار التعليم كأنها وظيفة بس نخلص من الدوام بنروح منها ونقطة إنتهى

حتى في البيت , الكتب , التلفزيون , وغيره ,, بيعاملنا كأننا حوض وعم يصبوا فينا يلي همه بدهمياه ,, مفرغين منا كل ما هو ممكن يكون نقطة تحول ,, أو حتى نقطة كسر ممكن تستمر لأبد الآبدين .

ليه مابعاملونا كيف نتعامل مع المصايب (غير الزلازل والحريق) ,, مشاكلنا ,, الفشل ,, الخسارة ,, تقبل فكرة الموت ,, والمصايب وإلخ إلخ إلخ ,, وهاي تكون بشكل حصص من ونحنا صغار يقدونا يناقشونا ,, يعطونا أمثله ,, يحطونا فيها ,, ويحكولنا هيك المفروض تعمل ,, الوضع مش خطير ,, خد نفس قبل ما تعمل شي ,, فكر ,, تعامل معها بهدوء ,, آه مش مشكلة إبكي ,, خفف عن حالك بالحكي ,, لا تعمل أي تصرف إنتا مابتعرف شو نتيجته ,, وآه الإنسان بيتعب وبيجزع بهيك ظروف وهاد شعور إنساني فا لا ترتبكوا ,, وهكذا .

الشغلة مابدها ناسا لتيجي تحلل فيها ,, طلاب علم النفس بدهم وظيفة من السما ,, خلوهم يعطوا درس أو دورة كل شهرين ,, كل سنه ,, بمعدل حصة أو حصتين ,, أو ملحق من أحد المواد الإجتماعية أو التربية الرياضية أو التربية الفنية خليهم يمثلوا ويجسدوا الظرف نفسه ويفكروا كيف ممكن نتعامل معه .

آه مافي مشكلة لو خسرت بلحظة ,, مش مشكلة لو فشلت أو رسبت أو تطلقوا أهلك أو مات جدك أو صار معك مرض صحي ,, المشكلة مش في هاي الشغلات لأنها مفروضه من ربنا علينا لنتعلم ... ومابالك لما قيل (عجبا لأمر المؤمن! إن أمره كله له خير وليس ذلك لأحد إلا للمؤمن: إن أصابته سراء شكر فكان خيرا له، وإن أصابته ضراء صبر فكان خيرا له) آه علموهم كيف يصبروا ,, كيف تعلموا من دروسهم يلي بتصير فيهم والمشاكل يلي بتمر عليهم ,, والأهل ماشاء الله تقول وراهم خمسين دافوس وألف إجتماع مجلس أمن ومحاكم تمييز هيئات تساعية وعم يقرروا مصير البشرية ومش فاضيين لولادهم .

عجبني مره كانوا بعملوا مقابلات مع ناس وكان بينهم أب معوا ولاده وبناته وسألوه عن تربية أولاده حكالهم ببساطة ( أنا من الأول بتعب وبربيهم وببني فيهم كل الأساسيات وبعد هيك بتركهم للحياة يتعاملوا وما بخاف عليهم لأنو معهم الأدوات الكافية لتحميهم ) .

يتلاقي الولد أو البنت إزا صار معهم شي خلص كأنوا بجد كسرة الروح فيه ,, وبتعلم هالشغلات ليكبروا ويشنتروا وبتأثر هالشغلات بكل مستقبلهم وعلى ولادهم وللأسف بضلهم يتعاملوا مع نفس الوضع كأنهم لسا ولاد زغار ,, زي مره كانت في قعدة مع العيلة وإنكبت كاسة الكاكاو على السجادة (لهسا مابعرف مين كبها) المهم وفجأة نطت بنت عمي يلي عمرها فوق ال 25 سنة بتأشر على إبن أختي إنو " هيو هيو يوسف يلي كب الكاسة والله العظيم شفته ,, والله هوه هوه ,, أنا شفتك لما كبيتها لا تكذب " ,, طبعاً الكل صفن فيها وسكتنا ولا حكينا شي ,, لأنو بجد على كبر عمرها وتعاملها يلي إنسخط من 25 سنة إلى سنتين ونص ,, يلي فهمته إنو آه صار معها هاد الموقف وأكلت قتله على هالشغلة وهيه صغيره والموقف عم ينعاد عليها ولسا خايفه وهيه بهالعمر تاكل قتله (اللاوعي) .

بالنسبة إلي ,, الحياة يلي تصنع من الموت هيه العظمة والقوة بحد ذاتها ,, وهيك ربنا خلقنا من الطين الميت ,, فا ما بالكم في عز الإنكسار والفشل تلاقي واحد وقف على حيله وتصرف وترك الحزن والهموم وبلش يخطط شو بدو يعمل ,, وعلى طول صار يفكر بطرق بديله ... الحياة زي السباق ,, معك وقت وقدامك الطريق ,, غلطت بالطريق ,, إزا بدك تضل واقف على نفس المكان يلي ضعت فيه أمامك شغلتين ,, يا تضيع بزيادة أو تروح عليك الحياة .

ولا تنسى إن الله تواب رحيم وقال (قل يا عبادي اللذين أسرفوا على أنفسهم لا تقنطوا من رحمة الله , إن الله يغفر الذنوب جميعاً) وزيادة على إنو ربنا غفور بل هوه رحيم يعني مش بس بس بغفرلك لأ وبوسعك برحمته ,, غلطت؟ ,, قوم توب توبة نصوح ,, (كل ابن آدم خطاء، وخير الخطَّائين التوّابون).

وشوف ربنا يلي هوه خلقنا لعبادته شو عم يحكيلك ,, ما بالك أي شي تاني في هالحياة ,, الإمتحان والوظيفة والإجتماعيات مش آخر الدنيا ومش أولها كمان ,, لسا الطريق طويل ,, ويلي بتشوفه اليوم بتشوف غيره أكتر وأكتر بحلو ومر ,, وهاي متعة الحياة ,, بس الحياة زي مافيها حلو يرفعنا ,, فيها مر ينزلنا ويكسرنا ويلي هوه أكتر نوعاً ما ,, بس تخيل لو ما عندنا أي فكرة لنعرف نفكك هاد المر أو نتماشى معه كيف رح يزيد ويغطي على كل شي موجود بهالحياة .

لازم نتعلم ,, لازم يعلمونا ويفهمونا ,, ولازم نتقبل المواقف يلي بتصير معنا - نعرف كيف نرتب أفكارنا - نختار خطط بديله أو حلول - وبالنهاية نقوم ونحلها ونواجهها ,, لأنها ببساطة رح تضلها وتأثر وتأخر من نضوجنا العاطفي يلي هوه نضوج مهم بشكل كتيييييييييير كبير وما حد بنتبهله ,, وبدل ما إنت يكون فكرك بمسائل أكبر وأعلى ,, بتلاقي هالموضوع عم يحوم براسك زي الغراب وإنت مش عارف كيف تتعامل معه .