بعرف حالي
يمكن ما أكون نسخ لزق زي كل البنات ,, البنات ,, البنااااااااات ,, موضه ومكياج وصرعات وحس أنثوي مستنسخ ,, مابسمع لكل شي بينحكى عن الأنثى والأنثى لازم تعمله ,, ما بهتم لشو الناس بتحب ,, ولشو الناس بتكره ,, ما عندي صور على الفيسبوك وأنا لابسه لبس ما أنزل الله به من سلطان ,, ماعندي فيسبوك أصلاً ,, واليوم يلي كان عندي فيه - ما كان عندي مليون حد يحاكيني ويصبح عليي ,, ما عندي تويتر بناقش فيه مليون حدث سياسي ,, وبفط أول ما يصير شي وببلش ألقي خطاباتي البراقه ,, مدونتي تشمل كل ما أحب وأكره ,, كل ما يخطر أو سيخطر في فكري في أيام حياتي .
أنا جكره ,, والبعض بوصفني نكده (هاد شي برجعلهم) ,, الكل استغرب ليه سميت حالي نوريه ,, الاسم الحركي ,, الكل لو ينتبه ما بلاقيني بحكي هاي وباي ويا الله ويا ألبي ويا حبيبتي ويسلمو يا عسل ومن هالحكي ومابحكي صباح الخير وتصبح على خير وحاضر ونعم وأيوا وبأمرك وتكرمي .
يمكن دللت في ناس أكتر ما تدللت في حياتي حتى وأنا بعمر الطفولة ,, صراحة مابعرف شو يعني دلع البنات ,, مابهمني رأي الرجال فيي ,, ولا أوامر النساء بإني أتقولب في مفاهيم الأنثى المنغلقه ,, مابحب المشاكل والغيره مع الحبيب ,, بس بنفس الوقت لا يقعد يلعب على أعصابي زي يلي بشوح بالكبريت بوجهي ,, وبلومني في الآخر ليه كبيت عليه كاز وحرقته ,, بحب كرامة الرجل بكل الأوقات وبحب أعطيه المكانه والعزة والمساحة الكبيرة ,, وبتوقع في المقابل يبادلني فيها .
عصبية ,, بكره المياصة ,, بكره يلي بمدوا في الشغلة ,, يلي بصدقوا حالهم زيادة عن اللزوم ,, بكره التزمت الشديد والإنفلات الشديد ,, ولما أشوف حد بحاول يشوف حاله .. أولها بخليه ينفخ راسه قد مابده ,, بعدين بحسسه بأنو ما إلو قيمه إزا زودها ,, بكره الناس المزيفين والناس المنافقين وبنفس الوقت بخاف أكون بيوم متلهم .
مابحب الناس يلي بعيشوا مراحل مش مترافقة مع سنهم ,, زي الأطفال يلي داشعين على النت والمواقع الإجتماعية ,, وزي الكبار يلي عم يحضروا المسلسلات التركية ومهند ومرميس ولا مابعرف شو أسمها ,, وبحس كل مرحلة وإلها أدواتها وجوانبها وأشيائها الخاصة يلي ما إلها طعم إزا تقدمت في عمر أو تأخر في عمر ,, مابطيق الإنسان يلي تخطى الأساسيات في حياته وعم يسعى إلى الكماليات ,, بكره الكذب كرهاً جماً ويضرب بالخلاط ضرباً مبرحاً .
مابحب حد يتعدى على مساحتي أو ياخد مني إشي أنا مابدي أعطيهياه ,, ومساحتي تشمل الجسم وما يحيط به من حدود هوائية ومائية ومساحة أرض وصوت بما معناه مابحب حد يقرب مني كتير جسدياً زي في بنت في الجامعة ما كانت تعرف تحكي معي غير وأيدها على كتفي (إنو أوك إنا وإنتي بنات بس برضو أنا بئرف) مابحب حد يدخن في مكان مغلق وأنا موجوده فيه ويكون بدخن على تفاهة شكله (بالنسبة إلي مش كل يلي بدخنوا بحس تدخينهم إلو معنى ,, ولسبب ما يلي تدخينهم إلو معنى مابتدايق منو) ,, وما بحب حد يسكر شباك أو مجرى هواء وأنا موجوده ,, بحس هاد الشخص جد عبيط ,, بالنسبة للماء ما بحب حد يوقف بيني وبين طريقي للمي ,, بتسود الدنيا بوجهي ,, وأكيد مابحب حد مصدق حاله يصرخ ويخابط ويصدر أصوات وكأنو مفروض عليي أتقبل صوته وبياخته .
مابحب حد يفهمني غلط أو يصير يفكر إنو كلامي بصير على معنايين ,, يا الله شو بكون نفسي أخنقه أو أدعس على الساعة يلي فكرة أحكي معه في الموضوع يلي فهمه على معنيين لأنو ببساطه إنسان فيه خلل أو فيه شوكه بتنخزه ,, كلامي صريح ومش مستعده أخبي شي أو أخفي شي خطير عن شخص المفروض يعرف بهاد الموضوع ,, بكره أنحط في مواقف حرجة يصعب تفسيرها ,, بس مع هيك مابتفرق معي تفكيرهم ,, بكره أستنى ,, بكره أستنى ,, بكره أستنى ,, لسبب ما بصير مخي يغلي وأعصابي تهز وبينزل مستوى التفكير عندي إلى الإجرام .
مقولة إمشي عدل يحتار عدوك فيك مقوله بحب أطبقها ,, وإزا ما عرفت أمش عدل في موضوع ما ,, بتلاقيني قادره ألففه عمان على كعوب رجليه عشان أوصل لغاية يحتار فيي وأشتته وفي الآخر بحط الحق عليه (بس ما صارت كتير معي) ,, ماعندي مطالب كتير في حياتي وخصوصاً في الحب والزواج والشريك وإلخ إلخ ,, بس الأهم عندي فيها الأشياء الأساسية ,, ومرات تفاصيل زغيره بتعني أكبر من أكبر هديه أو كلام مزوق أو شي متل هيك ,, مابتهمني الشكليات في الأشياء والمواقف والحكي ,, بس بطلبها بالقدر العادي يلي الأنسان الطبيعي بتعامل فيها لا أقل لا أكثر .
يمكن مش محاطه بكم كبير من الناس ,, يمكن ما عندي معارف ومليون تلفون بالساعة ,, وألف صديق وصديقه وإلى ما هو ,, بس بعرف إنو عندي القدره على إني أتحمل الأشياء يلي بتصير بحياتي ,, بكره أشتكي او لما أنوجع أشكي همي لأي أنسان ,, مابحب حد يشوف دموعي ومابسمح لحد يشوفهم ,, وإزا صارت بكون موقف صعب أو شخص أكتر من قريب .
ما بثأر من حد مهما غلط بحقي ,, بس يلي بعرفه أنو نهاره أسود إزا رجع تعامل معي أو رجع غلط معي ,, الناس بتفكرني هبله أو سهله ينضحك عليها ,, بس مخي ليل نهار شغال (ولا معمل CIA) ,, بسامح بس مابنسى ,, بمل من الأشياء بسرعة كبيرة ,, بس مع هيك في أشياء ثابته في حياتي ما بغيرها ولا بغير موقفي منها ,, وزي ما حكيت بحب الأشياء البسيطه لأنو بجد الناس بتفكر بالأشياء الكبيره ونسيت إنو الأشياء البسيطه هيه يلي بتكون كل شي كبير .
في علاقاتي بحط الحدود الطبيعية وبحترمها ,, بس لو شخص حطلي حدود أكتر بدون داعي بعرف على طول إنو هاي العلاقة ما رح تستمر أو ما أعتمد كتير على استمراريتها أو إني ما أعطيها الجهد والأهمية ,, بس الناس يلي بعرفهم وقريبين مني بحب أهتم فيهم وأخاف عليهم وأعمل كل جهدي لأكون معهم في كل شي حتى لو همه ما قابلوني هاد الإهتمام بس عندي قاعدة (والله لا يؤمن أحدكم حتى يحب لأخيه ما يحب لنفسه) أو عامل الناس كما تحب أن تعامل .
طموحي كبيره وعم تكبر أكتر مع خبراتي الزغيره يلي عم تزيد يوم عن يوم ,, والخيار الأحسن يلي لقيته إني أرسم خطه بس أخليها فضفاضه ,, لأنو مابعرف شو بيوم ممكن يتغير سواء للمنيح أو للأسوأ ,, من جديد بطلت أحكي كل شي عن حالي ,, ومابحب أوصل مرحلة إنو حد يحفظني زي ضهر إيدو ,, عشان هيك ما حد بعرف مين أنا الحقيقية ,, وما أعتقد بيوم في حد رح يعرف ,, زي كل الناس بتخلي جانب سري في حياتها ,, مابحب أعتمد على الناس في أي شي لأنو بجد ما حك ظهرك غير ظفرك ,, صحيح هاي الشغلة بتتعبني وممكن تحرمني من كتير أشياء ,, بس بالنسبة إلي (أنحرم من الشغلة ولا أنذل في طلبها) ,, بحقد على حد حاول بيوم يذلني وإيماني بربنا كبير إنو يرجع ياخدلي حقي منه ,, بكره حد يظلمني أو يحرم عليي يلي بحلله على حاله وعلى غيري ,, مابحب حد يحجمني أو ما ينتبه على كل شخصيتي .
بحب أشجع حالي أعمل أشياء جديده ,, أجرب شغلات جديده ,, ماحد بدو يطلع معي سينما ,, عادي بطلع لحالي شو كاينه هالشغلة يعني ,, أنا بطبب حالي لما أمرض ,, أو لما أنوجع ,, أو لما أتعب ,, أو أحس بالحزن ,, أنا بخفف عن حالي وبتناقش مع حالي الحلول والبدائل ,, ومن جديد بطلت آخد بآراء خارجية ,, لأنها ببساطه مجرد آراء على الأغلب مارح تساعدني والأغلب لو رديت عليها وفشلت رح تحكيلي ليه رديتي علينا شو إنت ما إلك رأيي ,, بحب أكون حرة بنفسي ,, غير متوقعة ,, ومالكة نفسي ,, وما حد بيوم تصور إنو تملكني وجد قدر ,, أنا غير ,, وأنا بحب أكون غير ,, ومابحب أتعامل مع الناس يلي بيمشوا ورا كل صرعة وكل كلمه وكل تفكير لا واعي ,, بكره تضخيم الأمور ,, بكره تكبير الناس ,, وبكره أحكي عن حالي ,, بس بحب أكسر كل العادات ,, وكانت هاي أول مره بحكي عن حالي بهاي الطريقة وبهاي الأريحية .
والحمد لله يلي خلقني بهاي الحال وبهاد التفكير ,, وبتمنى بيوم أزيد على شخصيتي وأقدر أحقق طموحي بإيدي .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
11 comment:
كأني قاعد بقرأ انا شو حاب اكون
نيالك جد على هيك شخصيّة , واللي مش عاجبه ينفلق مين ما كان يكون
اللي بده يصاحب اي حدا لازم يتقبّله زي ما هو , ولا يغيّر فيه ايييييييي اشي
وبالنسبة لشغلة تفتحي قلبك وتفضفضي , سيبك من هالحكي , فش حدا بتحمّلك غيرك انتي , خذيها من تجارب هالعالم :)
بالتوفيق وان شاء الله توصلي للي براسك يا رب, سيبيكي من العالم
مع اني كنت ما اطيق اشوف اسمك لا على محجوب ولا غيره , بس صدقا بحترمك وبحترم شخصيتك 100% , بالتوفيق يا رب
lunar
جد آخر جملة فرطت على حالي من الضحك
يالهوي شو كنت ما اطيقكم (على أساس إنها هسا بطيقكم) إنتا ونمرود المتحول وإم عمر ,, خصوصاً نمروده كانت واقفه في زوري .. بس ربنا قدر ولطف ,, ويلي مايعرف الصقر بعمله كنتاكي
وأشكرك على كلماتك
هلا ب الجكارة زي اللا فيسبوك
زيي
لووول
---
أنا هكذا، من يتقبلني فمرحبا به و إلا .. فلا .. ببساطة :)
نور هانم، شو هاظ؟! بيان عسكري؟
;-))
في حاجة تعلمتها من الحياة بعد مادفعت فيها غالي، إنه "الجكارة" مع الناس مش منيحة، الواحد لازم ياخذ و يعطي (طبعا بدون ما يفرط بشيء من حقه، إلا عن طيب نفس مع الناس إللي بتستاهل).
بالتوفيق يا رب
haitham , saleh
قاريين عند شيخ واحد كأنكم؟
لأنو التنين استنتجتو من كل يلي كتبتو إنو جكره؟
في فرق بين الجكارة ورفض النمطية أو فرض الرأي الخارجي .. في فرق بين التمسك بالرأي وبين الجكاره ,, في فرق مابين إنك تصمد وتجاكر ,, في فرق مابين مابدك تبين مساوئ الطرف التاني وتسكت وتعاند وما بين تجاكر
:give:
حلو كتير الواحد يعرف حالو و يعرف شو بدو الناس تعرف عنو
حبيت انك عارفه شغلات عن حالك و راضيه فيها زي ما هي
و بحسدك على انك مو حابه تغيريها اكيد لانك واصله مرحله متقدمه من الثقه بالنفس و بحييكي عليها
لكن حلو الانسان يكون مرن مع عناصر الحياه إكمنه جزء منها
:))
ححبيت اضيف شي عن اسمك
انه لما كنت اشوفه احس انه في بنت مميزة ورا هالاسم و ما كنت اعطيكي من اسمك نصيب
و ابصر كاينه تكرهي فرتش ولا لا
:sofera:
umomar
وك يا حزيطه ليكون الحادث أثر على قدراتك المشعبراتيه ,, وك وين الحقد الداخلي
عيوط
Euphoria
صدقيني كلنا هيك ,, والغاية إني كتبت هاد البوست إنو صار في إعادة تفكير في شخصيتي وفي حالي ,, ومرت عليي فترة في شخص شككني في كل شي بعرفه عن حالي وفي كل قدراتي وصفيت سخيفه وأشياء تانيه ,, فا حبيت زي أنشرها على حبل الغسيل إزا في غبره تتنفض وإزا في إشي رطب وني ينشف ويطير مع الهوا
جد إنو مثال بايخ صح؟
وبالنسبه لفرتش ,, لا تخليني أفتح قانون مصطلحاتي ,, لا لا لا لاااااااا
بس كلو كان زمان ولا تاخد صاحب إلا من بعد عداوة
لا أستطيع أن أنكر أني استمتعت بالقراءة مع انني أميل للكتابات السياسية و الدينية.. في البداية شعرت أنني أضيع وقتي -ليس السبب مقالك بل بسبب شعوري أنني أقرأ ما لا يهمني- لكن أسلوبك في الكلام عن نفسك جذبني خصوصا إذا عرفتي أني كنت أبتسم في بضع مواضع تصفين فيها نفسك و ردة فعلك تجاه المواقف اللتي أمامك و ما يحيط حولك من أحداث بالذات موضوع "تسكير الشباك" لأنه يحدث معي شخصيا و بشكل يومي!،،،
اسمحي لي أختي أن أضيف تعقيبا بسيطا؛ أن شخصية الانسان بتطور و اختلاف مستمر طالما أنه يتنفس فشخصية الفرد تتغير بتقدم العمر لما يواجهه من ظروف تؤثر به و يؤثر بها.. فأنتي الآن لست كما كنت قبل 10 سنوات و لن تكوني كما أنت الآن بعد 10 سنوات.. و هكذا فخبراتنا اللتي نكتسبها تغير في طريقة تفكيرنا و الذي بدوره يتحكم في تحليلنا للأمور و بالتالي ينعكس على تصرفاتنا أمام الناس
دعائي لك بالتوفيق و بارك الله بك و بقلمك و أسأله عزّ وجل أن ينفعنا بما علّمنا و أن يعلمنا ما ينفعنا
فيصل
فيصل
أول شي بشكرك على التعليق وأهلا في بمدونتي
بالنسبة لهاد النص بالذات كان في بعض مواضع مابقصد فيه حالي فقط بل بالعكس بحاول أخلي الناس تبحث في ذاتها وتعرف حالها أكتر وأكتر
الناس أحياناً بتخبي حالها لأنها بتخاف تكون الوحيدة وغريبة عن الجماعة لأنها مابتعرف إزا في متلها وبالتالي بتخاف تبرز حالها ,, ومع الإخفاء شيئا فشيئا بتنسى هاي الميزة بحالها
وزي ما حكيت إنو مرات لازم تفرد أفكارك على طاولة الحوار أو حتى تفردها أمامك عشان تعرف كيف تتصرف وشو تزيل وشو تجدد وشو تضيف يلي لقيته ناقص عندك
يلي لفت إنتباهي بتعليقك غير إنك قرأت النص كامل رغم الملل ,, إنو نبهتني على إنو كمان زي يلي مضى (10سنين) كمان الأيام يلي أنا فيها بعد كمان عشر سنين رح تتغير ,, فكرة منعشة
أشكرك على التوضيح بهاي الطريقة وربنا يتقبل منك الدعاء لنا ولكم
Post a Comment
:وكيل المكومنت قال