نورنياتي: الأكثر ,,, الأفضل

الأكثر ,,, الأفضل

متزكرين زمان معجون الأسنان

آه كان اسمه سيجنال

صار سيجنال تو

وبعد شوي سيجنال بثلاثة خطوط

سجنال بالفلورايد مع خط نعنع لرائحة الفم العطرة

بعد شوي إكسترا نعنع

إكسترا نظافة وتعطير

إكستر نظافة وتعطير ومضاد للبلاك

إكسترا نظافة وتعطير ومضاد للبلاك والجير

إكسترا نظافة وتعطير ومضاد للبلاك والجير والحساسية

إكسترا نظافة وتعطير ومضاد للبلاك والجير والحساسية وبكتيريا الأسنان

إكسترا نظافة وتعطير ومضاد للبلاك والجير والحساسية وبكتيريا الأسنان وتقوية المينا

إكسترا نظافة وتعطير ومضاد للبلاك والجير والحساسية وبكتيريا الأسنان وتقوية المينا ولبياض أنصع

إكسترا نظافة وتعطير ومضاد للبلاك والجير والحساسية وبكتيريا الأسنان وتقوية المينا ولبياض أنصع .. ولبياض ثري دي لاحقاً

إكسترا نظافة وتعطير ومضاد للبلاك والجير والحساسية وبكتيريا الأسنان وتقوية المينا ولبياض أنصع .. ولبياض ثري دي لاحقاً ,, ولإعادة بناء الأسنان

طبعاً ولسا اللحظة يلي عم بحكي فيها بتلاقيهم لسا طلعوا أنواع ما أنزل الله بها من سلطان .. هاد غير شامبو الشعر والبشرة و تنضيف الحمامات والأسطح والمطابخ والسجاد والسيراميك والبلاط والرخام وصابون غسل الأيدي وأنواع الشبس والشكلاته يلي بتعطيك أحساس النعومة والجنون والرقة والمشاعر المتفجرة وإلخ إلخ إلخ وهمه عم يبيعوك أقل من 10% كاكاو وأكثر وأنواع التلفزيونات والخلويات والكمبيوترات والسيارات حتى القنوات إم بي سي ون وتو وثري وفور ودراما وماكس وبلاس وأكشن وبلا بلا بلا وتشفير و بدون تشفير موفيز موفيز ثري ماكس جولدن أشتراك بانوراما ميجا أكستر في آي بي وألماسي وفضي وديجيتال وثري دي وأتش دي وفل إتش دي

يعني وبس عم بعدد رح تصيبني الجلطه

كل يوم أكتر ,, كلو رايح على موسوعة جينس للأرقام العالمية ,, لا لا مش محلية مش وطنية مش إقليمية مش قارية لأ عالمية ,, زي مره بكتشف إنو في مس الولايات ومس أميريكا مس قارات مس العالم مس الكون ,, ملكة جمال الكون؟؟ بتتخوتوا؟؟

حتى الشهرة ,,, بتغني في بار ,, أغنية على الراديو ,, فيديو كليب على قناة محلية ,, على قناة فضائية ,, ألبوم ,, عقد إحتكار ,, إعلانات لمواد تجارية ,, ماركات عطر باسمها ,, فضايح مجلات ,, مقابلات تلفزيون ,, فضيحة جنسية ,, فلم سنمائي ,, دويتو مع مغني ما عمرنا سمعنا فيه ,, مسلسل تلفزيوني ,, برنامج حواري أو برنامج مسابقات وفوازير ,, والموضة الأحدث التصريحات السياسية ,, ترشيح لمنصب سياسي

وفي بدائل حالياً عن الشهرة الغنائية ووسائل الإعلام ,, وبلاقوها العامة على المواقع الإجتماعية بطرح كل تفاصيل حياتهم والطرمة والأحلى آرائهم السياسية المفرغة من أي معاني بس بيحكوا فيها لأن الكل بحكي عن هاد الموضوع متله متل أي فضيحة أو نوع شبس جديد (مش لتفاعل حقيقي أو عمق معنوي) زي المزة يلي بتنكش شعرها قد مابتقدر ,, والناس صارت تفكر لو تنشر صورها كل يوم وتحط أكبر قدر ممكن من الصور الناس رح تحبها وتحسها مشهورة وواو وياي ويييي ويا عليي ,, كأنو وسيلة الشهرة الشاشات بحد ذاتها

بس للأسف مش كل شي الأكثر هو الأفضل ,,, في المواد الكيميائية ببطل إلها معنى .. حسب مافهمت إنو إزا كان كريم البشرة مبيض وخافي عيوب ومرطب وواقي من الشمس ويقلل من حب الشباب ,, هاد لا تشتريه لأنو ما إلو فائدة ,, الخلوي يلي فيه مليون ميزه آخرتو ببطل يشتغل زي الخلوي يلي معي ,, بدك قنوات أكتر إدفع أكتر

جابوا لقاء مع مكتوم أمير دبي وحكولوا دبي حكالهم بحب البناء ودبي يكون فيها كل شي وأكبر شي وأحسن شي وأفضل من كل البلاد والدول والعالم ,,, سألته المذيعة ليه بدك كل شي أكبر وأحسن وأضخم (سألته بمعنى الجشع؟؟) حكالها وااااي نوت؟

إيه ,, ليه لأ يا خيي ,, لا الحمير بتشبع ولا النجيل بقل ,, نعم أو نهم أو فجع أو جشع أو شهوة وحاجة ,, لا الأشياء الجديد بتخلص ,, ولا الأدرينالين بالجسم بيتوقف

الأبشع من كل شي إنو آه في ناس حالياً بتأمن إنو المال والأشياء بتشتري السعادة ,, بتشتري أشياء بتخليك سعيد ومبسوط ومالك الدنيا ,, والأشنع إنو صاروا يدمجوا مع كل منتج زخم من المشاعر والتواصل والأناقة وحب الذات ولو صبغتي شعرك أشقر جوزك رح يرجع يحبك ,, ولو شربت هاد المشروب (الذي لا يعد سوى تسويق لفكرة مستقبليه عن المشروبات الكحولية) رح تسترجل ويرجعلك الشباب والحيوية والشعور ولو رشيت من هاد العطر حتى لو إنو شخصيتك زباله .. كل البنات رح تلحقك (زي الدبان) ,, كيف الأشياء بتعطيك معنى ومشاعر؟؟

4 comment:

Anonymous said...: المنتجات من كترها بطلت الناس تفرق وحتى المنتج نفسه صارت النسخ يلي بتقلده مشهورة اكتر منه
لكن ربط الاشياء بالمشاعر بيخلي المنتج يلزق بالراس بالعقل الداخلي والخارجي وبالجيبة يلي فيها المصاري
وكله في الاخر تخويت
بالنسبة لمنتجات تبيض البشرة فيا صبايا ويا انسات
اسرع منتج بيبيض وخلال دقيقتين
هو انك
. .........

تحطي وجهك في كيس طحين وتتأكدي انك مررت كل مناطق وجهك على كيس الطحين الابيض الناصع
وتفرجي بعدها في المراي
واو
عالطبيعة كل شي احلى; July 12, 2011 at 8:49 AM
Em Ommar said...: ليش بتكرهيني إنت
ضعت رسمي,,:sad:

حدن يجي إيطلعني من هونااااااه :c2:; July 12, 2011 at 8:58 AM
sheeshany said...: ذكرتيني بدعايات مبيضات الغسيل!
أبيض
أنصع بياضا ً
الأبيض على الإطلاق
.
.
.
و إحنا كل مررررررررررة بنشتري !; July 12, 2011 at 12:19 PM
نورنياتي said...: ummomar
يلي بسمعك بحكي أنا يلي عملت كل هالطحاويش
دا عيل تايه دا ولا إيه؟
لووول

haitham
لا تنسى يلي بعطر ويلي بعقم ويلي بيحمي من البقع ويلي يمنع إصفرار الملابس وبهتانها ورائحة عطرة وخفيف على الملابس وبياض من دون خلطات وثمن أقل وحجم أقل وكثافة أكبر; July 12, 2011 at 11:57 PM

حقوق المؤلف

جميع الحقوق في الصور أو النصوص المقتبسة أو الفيديوهات أو الأفكار وحتى نموذج البلوج كلها تعود لأصحابها لا أنا لا أنسب ما أضيفه (من غير ابتكاراتي الخنفشارية) لنفسي وإنما الإضافة لغايات التوضيح والتأمل وباقي النصوص المكتوبة فا من كتابتي وسواليفي الخاصة

شو كمان شو كمان شو كمان؟
آه وما عندي فيسبوك لا حد يدور عليي ويحكيلي متنكرة
i hate it