مسألة وقت
يلي خلاني أكتب بهاد الموضوع إيتداءً هوه قانون العفو الأخير يلي صدر ,, يعني مش فاهمه إمشوا معي خطوه خطوة في يلي بدي أحكيه .
في شخصين أرتكبوا جرائم من يلي تضمنها قانون العفو .
شخص مابحب المشاكل وفرضاً مخالفة سير حصلت معو ولأنو شخص محترم طلع على الجهة المختصة ودفع المخالفة وكمل كل الإجراءات يلي أكيد أخدت وقت طويل بس المهم ما يرتب على حاله شي وصار هالحكي قبل صدور العفو أو وجود معلومات إنو رح يصير عفو .
شخص تاني مشكلجي وعمل هالمخالفة وضربها بكندرة ومش فارقه معي أكبر راس ولو بمسكوني أو بدفعوني ليره والله لأهد الدنيا وإلخ إلخ إلخ ,, وبالفعل ما دفع مخالفاته أو أياً كانت هذا الجرائم المعاقب عليها جزائياَ .. وسمع بالعفو ,, إنبسط ,, وشمله العفو .
إوزنوها براسكم ,, مابتنوزن .
ولتوضيح المسائل بحكيلكم إنو ماقصدي بشكل مركز بس على قانون العفو أو أي تعديل قانوني حتى بييجي في صالح ناس ضد ناس بشكل محدد .
أنا قصدي عن مسألة الوقت يلي أما بكون فيها بفترات زمنية كتير متقاربة بتاخد ممكن مدة دقائق أو ساعات أو أكم يوم أو حتى لحظات (مش مدد زمنية كبيرة) ,, زي مره فلم كانت دعايته إنو لو هاي الحبيبة تأخر عليها القطار أو توقفت لتشتري إشي وتأخرت لوصلت لحبيبها يلي بسبب إنها ما تأخرت لقته بخون فيها ,, وصار وقتها زي فصل في الشاشه على كيف لو تأخر وكيف لو ما تأخرت ,, وكل الناس حسيتها إنفصلت بين هدول الحالتين ... منهم حكى أحسن تعرف بدل ما تعيش بكذب ومنهم مين حكى لو ماعرفت يمكن ما تغير شي وأستغنت عن وجع كبير أثر في حياتها ويمكن بيوم هوه ترك هديك البنت وضل مع هاي الحبيبة .
وشغلات تانية زي هيك ,, زي كلمه بتفلت من لسانك بلحظة غلط ,, حركة لو عملتها بوقت تاني عادي بس باللحظة يلي عملتها طلعت وتفسرت بشكل تاني ,, أو مثلاً صار معي موقف كنت عند الأستاذ ونادى على المراسل وعصب عليه الأستاذ ,, المراسل تطلع فيي وفهم إني أنا ,, أنا سبب هاي المشكلة والتعصيب ,, ولو الأستاذ نادى عليه قبل ما أدخل على غرفته كان فصل المسألتين عن بعض .
أو حتى شغلة حكيتها وأنا مش فاهمة الموقف وبعد لحظة فهمت الموقف وأصبت بإحراج شديييييييييييد أنو جد لو صبر القاتل على قتيله ما كان قتله .
هاي المدة الزمنية الصغيرة يلي أثرها كبير وبالعكس ممكن يغير الوضع تغييير دراماتيكي على مواقف ممكن نتجنب الإحراج فيها أو حتى مواقف باااااايخه زي شغلات بتمر معنا في الحياة زي يلي بصرخ مين سرق قلمي والقلم حامله بإيده ولو إنه أخد شوية وقت يفتش كان تجنب ممكن مسبة كبيرة رماها من غير رامٍ ,,, مين رامي؟؟
والمشكلة مابتعرف كيف تتداركها لأنك ببساطه بتكون بتفكر بالوقت أكتر من الشغلة ,, إنو أنا هسا بدي طبيخ بس لو إستنيت شوي كان إجاك طبيخ وصحن سلطة ومخلل وكاسة ببسي مع مكعبين تلج .
وفي مرات بكون عم بناقش شاهد ومش قادره أستحصل منو على المعلومة يلي بدياها ,, وببساطه لو سألته ما رح يجاوبني ,, بس لو نكشت الموضوع بشكل غير مباشر واستنيت شوي رح ألاقيه هوه عم يعطيني حتى معلومات أكتر من يلي بدياها ,, بس هات عاد إقنع نوريا تصبر على شاهد إلا بكون نفسها تحط حد السكين على رقبته .
وتراتبية الأحداث بتمنعك مرات تفكر بكيف إنت تعطي لحالك المجال تفكر بأي موضوع ,, طب مثلاً تاع قانون العفو لو صار عليه تعميم وإنمسك قبل الموافقه على القانون كان أكل هوا ,, بس لو ما إنمسك بكسبها ,, ولو صبر القاتل على قتيله ممكن كان يهرب هاد القتيل ,, ولو ما صرخت وحكيت وين قلمي ممكن أضل ساعة أفتش عليه وأنا مش مركزة ويمكن أضيع على حالي أفكار بدي أكتبها وأنا بفتش على القلم ,, إنو بجد حتى هاي المسألة صعب توازن بينها .
كون الوقت ببساطة مابتقدر تملك غير اللحظة الحالية يلي عم تشتغل فيها وتعيشها ... يلي فاتت هربت من أيدك ويلي جاية مش ملكك .
دوشتولي راسي ,, خلص كل واحد ياخد ربع ليره ويروح يشتري إشي زاكي .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
2 comment:
السلام عليكم
أنا مليش دخل
ههههههه
كل شي إله وقته و الواحد لازم يمسك لسانه و ما يحكي غير القليل و المفيد حتى لا يقع في مطبات ما إلها داعي
اولن الربع ليره بتجبش إشي زاكي
انا بدي شيبس دوريتس ازرق حجم كبير
ثانياً,, لمى مره حكتلك ماحدا فوق القانون
عملتيلي عرس وزيطه وزفه شعبيه وصل صوتها ل خامس أرض
أنا بحبش حدن يتساوى معي,, أه أنانيه وبحب حالي
بكون تعبانه ع الشغله ومضيعه وقتي" متل ما إتفضلتي" وكل تركيزي عليها,, ويجي حدن ع البارد المستريح ياخد نفس النتيجه بالأخر؟؟ ليش؟؟
يخساره,, معليناش مخالفات , عاد كان إنبسطت أنا
في شغله,, كتير بتحكيلي إياها إمي
لو صبر القاتل ع المقتول كان مات لحاله
فهمتيني؟؟
Post a Comment
:وكيل المكومنت قال