eat pray love
قطورة رح تحقد عليي عشان آخر مرة حكيت عن الجايشا حكيت انو لازم تقرأ الكتاب قبل الفلم .
بس بجد ما كنت عارفه أو أعتقد إني عرفت ونسيت إنو هاد الفلم بيسد أو أ بوك .. للأسف أنا بكره هاد الشي وبحترم أصالة مفهوم الكتاب , وحتى الكتب الإلكترونية ما بطيقها ,, بس صار يلي صار .
طبعاً إلى جانب إعجابي بمذكرات الجايشا وحالياَ هاد الفلم لازم لا انسى بالذكر ما أل تايم فيفرت kill bill يلي هوه كمان بيسد أون أ بوك يلي هوه ذا برايد , آه صح تزكرت وبرايد أند برادجدس .. بس هداك كنت أعرف إنو كتاب لأني عرفته من كاثلين كيلي ,, حد بيعرف مين كاثلين كيلي؟؟
المهم كنت عم بفتش على أفلام مش كتير عليها الضجة الأعلامية زي سخافات الأفاتار وأفلام الأكشن والحروب وإلخ إلخ يلي صارت تتغذى بشكل كبير على الحروب , لدرجة إنو في دكتور درسنا كانت إحدى نظرياته أن من يرغب في دخول الولايات المتحدة الحروب (شركات الإنتاج السنمائي ومصانع الأسلحة) لو تفكر فيها بتلاقي حالك بتشك في كل شي .. المهم بعيداً عن ذلك كله خطر في بالي أحضر هاد الفلم , لقيت عليه نقد كبير ولاذع وبيحط من قدر جوليا روبرتس بشكل صارخ .. إلخ إلخ .
قصتها إنها ما بتلاقي حالي لا بزواجها ولا بحياتها ,, وطول وقتها بتتمنى أشياء بس مش قادرة تعملها لدرجة عملت صندوق وضلت تخبي فيه كل المجلات والكتب يلي بتحكي عن أماكن بتحلم تزورها وبيجيها الصحوة الداخلية على نكتة بحكوها الإيطاليين بأنه زلمة فقير كل يوم يدخل الكنيسة قدام تمثال أحد القديسين ويضل يدعي أرجوك أرجوك أرجوك يا رب بدي أربح اللوتري أو اليانصيب وضله على هالحال لبيوم بتدب الروح في تمثال القديس وبحكيله بني أرجوك أرجوك أرجووك روح أشتري بطاقة يانصيب .
الفكرة يلي بالنسبة إلي تركزت عندي هيه نفس ما ذكرت مع أنها محور واحد من محاور الفلم/الكتاب , بنضلنا طول حياتنا نتمنى ونحلم بس ما بنفكر كيف بدنا (جديا) وبمصطلح آخر (سيريوسلي) وبتصير الشغلة عليها غبار ولما نقرب نموت بنحاول نفكر أو وقتيها بنتحسر على أشياء تمنيناها وما تذوقناها في حياتنا ,, وهي كذلك بدت في إطاليا واستمتعت جسدياً في الأكل بكل أنواعه بتذوقه وبالأستمتاع فيه .. في مشهدين يمكن مش كتير ناس فهموه إلا إذا عاشوه .. المشهد الأول أنها بتكون ماشيه بتشوف وحده في مطعم عم تاكل ,, بتصفن فيها ,, المشهد التاني هيه بتكون قاعده مكان هاي البنت بيجيها الأكل بتصير تضحك وبتطلع يمين وشمال كأنها مستحية ,, وبتبلش تاكل وهيه تضحك ,, وهون يلي بفهم من هالموقف بفهم فكرة الأكل لوحدك ,, في مطعم ,, بدون أي شخص معك ,, بالعادة الضغط طاحن إنو ييي بتاكل لحالها ,, بعديها دخلت في فكرة متعتها هيه نفسها بالأكل بدون أي حد يضغط عليها بجسمها وطريقة أكلها .
الفكرة التي تتبع هاي الفكرة هيه تحمل عواقب أحلامك , يعني أوك هيه أمنيتها كانت تلاقي السلام والراحة في الهند بس المكان كان مزدحم ولا تتوفر فيه وسائل الراحة يلي أكيد كانت تفكر فيها على سبيل المثال , بس بالنهاية لاقت السلام بداخلها وتخلت عن بعض الأشياء يلي كانت ماغصتها زي ما بنحكي ,, وكانت في هاي المرحلة بتشتد العقدة في غرفة التأمل ,, المفروض في هاي الغرفة تحس بالراحة والسكينة وتنسى كل الأفكار وتحاول تنظر في داخلك ,, بس هيه كانت مزعوجه من حالها ومن الرطوبة والحر وصوت المروحة والدبان والوقت يلي ما عم يمر لتوصل لمرحلة الإنزعاج التام يلي بنسميه (فاضت معي وبطلت أتحمل) وهاي الشغلة بتصير معنا في كل يوم , ما بالك لو صارت معك في حلم عم تحلم تقريباً كل يوم يصير ,, ببساطة بتنصدم نفساً .
آخر مرحلة كانت في بالي في أندونيسيا على ما أذكر .. وألتقت يالجزء الأخير من العنوان ألا وهو الحب ,, والحب بمعناه الأصيل يلي هيه خافت منه وخافت ترجع فيه لحالتها الأصلية يعني عدم توازنها ليحكيلها الحكيم إنو من التوازن في الحياة إنك ما تكون متزن في الحب .. طبعا عدم الإتزان مع بني آدم زي هاد .
 |
| لوك أت ذا هير |
هاد الممثل مش كتير بطيقه وحتى دوره كان شوي مش بالإنسان الرائع .. بس الموسيقى والحياة والطبيعة وطريقة تعامله معها زادت من شعبيته أكيد ,, نعم الفك الكبير وعريض المنكعين مفتوع الفاتعات مشلئب الفلنكات مسلهم الأبعاه .. شلولخ ,, بس مع هيك كان التركيز الأكبر على ثقة المرأة برجل بعد عاصفة من الإنكسارات يلي هيه عاشتها مع حب زواجها إلى حب عشقته وأختارته وأصييبت بخيبة أمل منه ,, وهوه كمان نفس الشي كان مارر بطلاقين ومن عشر سنين ما أرتبط بأي أنثى وإلى ذلك ,, وكان الإرتباط بينهم بالنهاية مستند على خوفهم من الحب والإنكسار وبنفس الوقت هوه يلي جمعهم .
حبيت الفلم حضرته إمبارح ,, وعم بفكر أرجع احضره اليوم لما أروح على البيت ..
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
6 comment:
يوف جت ميـــلdream:
ترجمتها,, يوه جتلك نيله لوووول
بديش احكي عن الفلم إلا ت أحضره
وبعدين حليّ عن هالممثل
ترى من يوم فلم
بي إس,, أي لووووف يووووه dream:
وأنا مش قادره أقدر أستطيع اطلع فيه غلط
بجوز لإنك هبله مسستخفيته؟؟؟؟
umommar
سن تن ضنو
مالك بتهبشي بالحكي با بنت
:k:
وصح نجمة وخمس علامات
خلص يالله اتسهلي
الكتاب أفضل بمراااااااااااحل من الفيلم!
:الناقد اللا سينمائي- أنا:
haitham
لو هالحكي عن كتاب عربي بحكيلك نعم
بس المشكلة إن الأجانب بحس الكتابة والأدب عندهم أضعف من عندنا
سيدنا محمد كانت معجزته البلاغة واللسان بين قوم العرب لأنهم اشتهروا بذلك ولو شو ما تشوف وتقرأ ما بتلاقي أدب يوازي أدب العرب
وهكذا , بالنسبة إلي مش كتير بستمتع بالأدب الغربي إلا ما ندر زي , والمشكلة الترجمة على تعاسيتها بتكرهك في الكتاب وقراءتها بالإنجليزي بحسسك كأنك بتقرأ مقال عن الإنترنت
ههههههه حبيت كثير نقدك للفيلم وللبطل. أنا حبيت شكله كثييييييييير. قرأت الكتاب وبعدها حضرت الفلم... الفيلم مخيب للآمال بعد قراءة الكتاب. بس بدي أختلف معاكي بآخر جزء... هي لم تجد الحب إلا بعد ما تعلمت كيف توازن بين حياة ممتعة من جهة وروحانية من جهة وأعتقد عشان هيك استطاعت تحب نفسها ومن ثم شخص آخر بكل أريحية.. هذا الجزء مش موضح بالفيلم بس الكتاب يرتكز بصورة أساسية على هذا الموضوع.
aseel
مش عارفه شو القصة مابين الكتاب والفلم
بس رح أحاول أقارن في كتاب أنا قرأته يلي هوه زمن الخيول البيضاء ما تتخيلي قديه بحب هاي الرواية لدرجة لما سمعت إنو بدو يعملوا عنها فلم أو مسلسل ضليت أدعي إنو يا رب ما حد يوافق يمثل ولا يخر ولا حتى ينجح التصوير وما يتم
لأنو بجد بكون شي مخيب للأمال
وما يماثلها زي ما إنتي حكيتي أفلام هاري بوتر
الإشي يلي بخلق الفرق إنو الشخصيات يلي في الكتاب بتكون من إبداعنا وتكويننا حتى نفس الموقف يمكن كل واحد قرأ الكتاب يفسره بطريقة معينة وعلى أثر ذلك بكون الفلم يمثل جهة نظر واحده أو خيال لشخص واحد على ما أعتقد بكون المخرج نفسه يلي بيختار أفضل الفقرات والنصوص وبركز عليها وممكن من جملة واحدة يعمل مشهد نص ساعة وممكن من فصل كامل يعمل مشهد أكم دقيقة وعلى هيك بكون مخيب للأمال
وكوني ما قرأت الكتاب فا أنا مش فاهمه شو فكرتكم وشو قصدكم أو إنطباعكم بس مع هيك بأيدكم بالرأي إنو التصوير بيحصر الفكر في نقاط معينة وببعد الواحد عن إنو يفهم النص بحد ذاته
Post a Comment
:وكيل المكومنت قال