مين إنت ومين أنا؟
الزوج بيوم من الأيام دخل على البيت ,, في الوقت المعتاد ,, متأخر ,, مصهصه ,, مبسوط ,, ومش بنفسه مرته تبلش العرس اليومي تاع ليه متأخر ولهسا بالشغل وإلخ إلخ .. فا بحاول إنو يحوم في البيت عشان يتجنب أي نقاش .. أو مشكله بسبب التأخير .
لف في البيت عمل كم شغله حضر تلفزيون ليحاول يتأكد إنو مرته نامت ويدخل ينام مرتاح البال بعد سهرته الآخر حلاوه ,, مر من جهة الغرفة لقي الضو مطفي .. البيت ساكن على غير عادته ,, وإنتبه إنو مش متغير شي من كم يوم ,, كل شي على حاله .
دخل على الغرفه لاقاها نايمه .. استغرب ,, مافرقت معو قال بحاله يا ولد ربنا بحبك وبدو يكملك اليوم على خير .. نام وإرتاح وآخر حلاوة .. الصبح صحي متأخر .. مرته صاحية قبله وقاعده بالبلكونه ,, شافها من طرف الباب وقال بلا ما أعفر على حالي خلص بجهز حالي وبفطر في الشغل .
وهكذا ,, قبل ما يطلع لمحته .. صبحت عليه سألته عن الفطور ,, ردلها إنو رح يفطر في المكتب .. ما علقت ما سألته إذا بدو شي .. إذا بدو يتغدى ,, بدو يتأخر ,, ما طلبت منو شي .. كانت في عمق حزن شديد يمنعها من الكلام ,, دارت وجهها ,, وهوه طلع من البيت ,, وهو نازل شافها من تحت وهوه بركب سيارته ,, كانت صافنه في السما وكأنها مصدومه من شي .
استغرب ضل طول اليوم يفكر شو صار شو إختلف ,, شو عمل شي غلط ,, معقول؟؟؟؟ ,, لأ مش معقول .. طب يمكن؟؟ ,, لأ لأ هيه مش من النوع يلي يخبي أو يسكت .. فكر شو يعمل .
ألو حبيبتي .
هلا حبيبي كيفك اشتقتلك ...
والله وأنا كمان .. بدي أسألك سؤال .
تفضل .
إمبارح صار شي ؟؟
كيف يعني؟
يعني حسيت إنو لما روحت على البيت في شي متغير؟
مش متزكره ,, أنا شيكت أكتر من مره بس ما شفت شي غلط .
أوك حبيبتي بس أخلص شغل بنحكي وبشوفك أكيد .
أكيييييد بس اسمع ترى السهر اليوم غييييير عن إمبارح .
جد طب ......
تكررت هالشغلة أكتر من يوم ,, والزوج يحس بوجود شي غريب ,, الشك كان بدو ياكله .. طب شو ممكن كان صار .. شو يلي غير ليصير هيك .. وين أيام زمان ,, صحيح ما كان يحب شو بصير بس برضو ... الوضع مش طبيعي .
بيوم روح بكير من الدوام ,, دخل شاف البيت من أيام مش متغير ,, الجلي زي ما هوه ,, مافي طبيخ ,, مافي غسيل ,, مرته لساتها بنفس اللبس من كم يوم ,, ما عم تطلع ,, ما عم تحكي ,, ما عم تحكي موبايل أو تستخدم نت ولا حتى أغاني ولا تلفزيون .. طول الوقت حزينه ,, دخل عليها وشافها زي يلي ميتلها حد ,, ما عرف شو يعمل ,, صرخ فيها ,, وين الأكل وين الغسيل وين ووين ,, تطلعت عليه ومن دون جدال وحكتله أوك .
قامت جهزت كل شي ,, من أكل وترتيب وتنضيف وغسيل وكلو من تم ساكت ,, رد عصب مش عارف شو يعمل ,, صرخ فيها ومنظرك إنت شايفه حالك كيف شكلك ,, إشي بسد النفس ,, روحي زبطي حالك قرفتيني ,, وبرضو قامت من تم ساكت زي الرجل الآلي تحممت غيرت لبسها وإجت تحطله الأكل ,, تفرج فيها ,, تربطت إيديه مش عارف شو يحكي مش عارف شو يعمل ,, حاول يستفزها بكلام وكلامها كان مقتطف ومختصر ,,, ما طاق الوضع حمل حاله وطلع .
ألو حبيبتي .. اسمعيني جد رح أنجن
ليش شو في؟؟
مش عارف الوضع عم بصير أسوأ
قول الحمد لله وأضحك بعبك
والله حاسس رح أطق
يلي صاححلك مش صاحح لغيرك
طيب ,, أنا بدي أطلع على السوق أشتري كم غرض وباجي
أوك عم استناك
استمر الوضع اسبوع وهوه مش قادر يتحمل ,, بس يلي تغير بعد أسبوع إنو كل يوم بلاقيها تيجي عندو بدها تحكيلو شي بس مش قادرة ,, صارت تطول في الحمام ,, تتأخر لما تعمل أكل أو أي شي ,, تسهر كتير أو بعد ما ينام هيه ترجع تقوم وتسهر .. حس إنو الوضع لا يمكن تحمله ولازم كل شي يكون واضح والصراحة لازمه بهيك موقف .
ألو حبيبتي
أهلين حبيبي مالك حاسيتك معصب
مش معصب بس صار لازم نتواجه
شو مواجهه ما مواجهة؟
بدي أعرف كل شي خلص
شو ؟؟؟؟؟
....
رجع على البيت أبكر من الوقت ,, كانت نايمه قدام التلفزيون تتفرج وسرحانه كالعادة ,, شدها من إيدها وصرخ فيها
سلمى شو في ؟؟
صفنت بخوف إنو شو في ؟؟ شو صاير ؟؟
اسمعي لا تعمليلي الوجه البريء أنا خابزك وعاجنك وبعرف ما تنبل بتمك فوله
جمال مش فاهمه عليك مالك بتصرخ؟
حالك المقلوب زي يلي شايفه عفريت دايماً ساكته دايماً صافنه ,, سلمى يلي الكل بيتعلم منها أصول الغيره والنكد ووين رحت ووين إجيت بلمت ,, ولا كأني بعمل شي وبتأخر وإلخ إلخ هسا بتحكيلي مش فاهمه عليك يا جمال ؟؟
جمال إهدى وأحكيلي شو مالك وشو غيره ونكد يلي تحكي عنها؟؟
اسمعي ترى أنا عارف كل شي ..
هون وجه سلمى أنقلب بالألوان .. سكتت ووقفت على حيلها ومشت ودارت وجهها تخبيه عنه ,, هوه هون استغرب ليه عملت هيك ,, مش المفروض تحكي آه إنتا هيك وهيك وإنا عارفتك إنك بتمشي مع فلانه وكل ليله تسهر معها؟ .. طب ليه سكتت ودارت وجهها ؟؟ معقول لهلدرجة بتحبني وكانت الصدمه عليها قوية؟؟
سملى أنا آسف ,, أنا آسف على كل جرح سببتلكياه .. ما كنت متوقع لما تعرفي تكوني بجد لهلدرجة حساسة وبتحبيني لدرجة مش متحمله وحده غيرك أحبها وأكون معها
......
أنا ما بحبها .. أنا مارح أتجوز عليكي لا تخافي ,, وبوعدك إنها هاي مرحلة ورح تنتهي من حياتي ,, وصدقيني هيه مابتعنيلي شي .. هاي مجرد بنت اغراني الشيطان فيها وخدعتني وهسا أنا صحيت لما عرفت قديه إنتي تحبيني وقديه إنتي قلبك عليي ,, هاي البنت كانت بدها فلوسي ومكانتي الإجتماعية .
(سلمى صفنت بزياده وكأنو عمارة قدامها وقعت)
آه آه هيه كانت بدها فلوسي ويلي شاطره فيه تحكيلي جيبلي وإشتريلي وخدني ووديني وأشحنلي رصيد ومن كلامها التافه ,, بس صدقيني قلبي وحياتي إلك وهسا بدنا نبدأ حياة جديدة .
سلمى رقعت ضحكة عالية .. لدرجة جنونية .. ضلت تضحك تضحك ,, لدرجة تبكي من الضحك .. هوه أول شي استغرب ,, إلتخم ,, حس بالخزي .. بعديها نرفز وعصب وكان بدو يصرخ عليها بس لما أختلط عليه إنها كانت تبكي من الضحك ولا من الوجع والخيانة والألم حس بالشفقة عليها وحس بالذنب كيف واجهها وصدمها بهالحقيقة وإنو وقعها كان صعب عليها .
بعد ما لقطت نفسها وقعدت ,, سحبت من باكيته سيجاره وقعدت وصارت تدخن وتسحب نفس طويل وتنفثه وكأنها مشتهية هالسيجاره من سنين لا بل وكأنها هسا بلشت تتنفس ,, صفنت فيه وهيه تنفث هالدخان ,, ابتسمت ابتسامة ما بتتفسر ,, هوه خاف من هالضحكة ,, حس بمقلب حس بسخف حس إنو هيه ماسكيته من الأيد يلي بتوجعه ,, هيه مش من المفروض تعمل هيك .. هيه المفروض تدايق وتضربه أو تسب عليه .. ليه عم تعمل هيك؟؟ معقول متفقة معها وهيه باعتيتها عشان تكتشف إني بجد ممكن أخونها وكنت تحت تجربة؟؟ معقول كانت مراهنه مع غيري على إني ممكن أخونها؟؟ طب معقول إنجنت؟؟
ليه عم تضحكي وتتبسميلي؟؟
.....
ليه ساكته ؟ .. ما تحكي بتعرفيني ما بحب هالأسلوب .
......
ط ...
بعرف بعرف شو بدي أحكي بس الصراحة مش عارفه كيف بدي أصيغلك كل هالحكي ,, جد مش عارفه من وين أبلش ,, كيف أبلش ,, أحكي كل شي ,, هيك أو هيك ,, أحرق كل كروتي ؟؟
كروت شو يا ست سلمى؟
(رجعت تضحك وتفرك بعينيها كأنها مش مصدقه .. طفت السيجاره ,, صفنت فيه وقالت) هسا أنا بدي أسألك سؤال واحد ,, إنتا في داخلك متأكد إني عارفه كل شي عنك وعن البنت يلي معك صحيح؟
إنو من حالتك ومن وضعك آه ,, فكرت فيها كتير ,, ليش في شي؟
طب ما خطر ببالك شي تاني؟
تاني زي شو؟ اسمعي أنا بحب يلي يحكي معي يحكي بصراحة لا تلفي وتدوري .
والله ما أنا عارفه شو أحكيلك ,, طب بلكي أنا كنت تعبانه من شي تاني ,, بلكي كنت حامل ,, بلكي عندي كآبه .. بلكي مريضه معي سرطان معي شلل معي أي شي ,, بلكي ماتلي حد عن جد ,, بلكي بدي أنتحر من الحياة ,, بلكي مش متحمله الوضع في البيت .. بلكي مش متحملة الوضع في البلد ,, بلكي حد آذيني .. بلك...
(هيه بتحكي وهوه بسمع ومصدوم ومش مصدق شو بتحكي ,, ليه مافكرت بهيك اشياء .. معقول ما بتعرف؟؟ يعني أنا يلي حكيتلها بلساني وكشفت الأمر؟؟)
أكيد هسا مستاء من حالك لأنك توصلت لنتيجة إنو إنت يلي فسدت عن حالك .. ومش عم تفكر في شي غير هالشغلة؟
(حاول يجمع أفكاره ويشد حاله عشان ما تستوطي حيطه) وشو ملخص هالكلام؟
يا سيدي ولا تزعل .. ومنيح يلي إجت على هيك ,, عشان نقعد أنا وإنت جلسة صراحة وبجد هيك الوضع أحسن عشان نفهم على بعض لأنو زي ما بحكوا الحال من بعضه ,, وما بعرف طعم الإشي إلا يلي ذاق منه .
شرحتله كل التفاصيل ,, حكتله كل شي ,, حكتله شو سبب تعبها وحزنها .. حكتلو شو كان نفسها تحكيله كل مره كانت تيجي بدها تحكي وما تقدر وتروح ,, حكتله ليه كانت تتأخر في الحمام وليه كانت تصفن وليه بطلت تقدر تهتم بشغل البيت .. هيه تحكي وهوه يحس عالمه عم يتكسر ,, بحس بقرف كل شي ,, بحس بألم عم يحرقه حرق ,, بدو يبكي بس مش قادر بدو يصرخ بس مش قادر بدو يضربها بدو ينجن ببساطة ,, والأبشع إنو كان موبايلها يرن تشوف وتفصل ,, تبعت مسج عالسريع وتكمل حكي ,, مش قادر يعمل شي ,, موبايله في جيبته عم يرن وما هدي .
ألو حبيبي
بلا حبيبك بلا زفت حلي عني مش فاضيلك
...
مسك الموبايل ورماه في الحيط راح خمسين شقفه .. هجم عليها وشدها من شعرها بحكيلها من متى هالحكي ؟؟ وشو كنتي تعملي ,, وك أنا حبيبك أنا جوزك أنا يلي بحميكي وحبيتك سنين وإنتي بهالبساطة تعملي هيك ,, وك أنا جماااااااال يلي كنتي تتمني الحرف مني وك وين الحب وين الحياة وين كل شي ,, ليه تعملي فيي هيك ,, شو عملتلك لتعملي فيي هيك؟؟ ,,, دفشها على الكنباية ودار وجهه وصار يضرب برجله على الحيط وهيه تضحك ولسا بدها تبلش حكي ,, رد هجم عليها وصرخ فيها
مين الكلب هاد ,, شو عملك ,, شو سويتو وين كنتوا تلتقوا؟؟ ومن متى هالحكي ,, من متى وإنتي تخونيني يا خاينه وأوهمتيني إنك تحبيني ,, وك أنا يلي حبيتك وحميتك ودرت بالي عليك و..
وخنتيني مع وحده تانيه ,, كنت تنام عندها كل يوم وترجعلي مصهصه وإلخ إلخ .
مسكها من وجهها وبحكيلها كيف تتجرأي وتحكي هالحكي يا خاينه ؟؟ كييييييييييف؟
أحكي شو ؟ إنك خاين؟؟ إحكي إنو مرت سنه ما تقرب عليي ,, ما تحكيلي كلمه حلوه ,, ما تتزكر أي عيد أو مناسبة أو ذكرى بيننا؟ ما تنتبه شو كنت ألبس وأتمكيج وأطلع وأحكي تلفونات وأطلع معه ,, حتى هاي ما إنتبهت عليي فيها ,, تخيل ؟
جمال قعد وحط راسه بين إيديه مش عارف يفكر ,, حاسس بشعور مختلط بين الذنب والغضب ,, بين الغلط والحنق ,, مش عارف شو يحكي .. مش عارف شو يحكيلها شو يعمل ,, هيه قعدت قدامه عم تفرك براسها من الوجع .
بدي أعرف شغلة وحده ,, ليه كنتي زعلانه الأسبوع الماضي؟
(ردت بسرعة) لأنو سافر وأنا كنت مشتاقيتله .
وبتحكيها بكل عين وقحة؟؟
... مش إنتا يلي بدك الصراحة بدون لف ودوران؟
................................... بتعرفي شو الفرق بيني وبينك؟؟
شو؟
الفرق إني طول هالأسبوع كنت خايف عليكي وخايف على زعلك لتكوني عرفتي .
عشان هيك كنت تنفر فيي وتحكيلي وين الأكل وتصرخ تحكيلي هاد منظر إنتي مش شايفه شكلك؟
آه لأنو كنت زعلان عليكي وبدي أياكي تحكي وتفضفضيلي شو جواتك ,, بس إنتي بالمقابل زعلانه على حبيب القلب ,, زعلانه لأنو مش قادره تشوفيه و ... آآآآخ يا قلبي مش مصدق يلي عم بصير .
(رن مبايلها وقبل ما تفصل سحبه منها وحكالها) بدي أعرف مين هالكلب ,, ومسمييته ماما كمان .
يا جمال مش هيك ,, شو بدك فيه أتركه بحاله .
خايفه على حبيبك يا خاينه والله لأطلع روحك وروحه .
ألو يا حيوان يا كلب ,, والله غير أطلع شياطين الدنيا عليك ,, والله لأذبحكم إنتو التنين .
جمال مالك ولك ,, شو بتسحب فلم عليي؟؟ يما منك إنتا وأفلامك ؟
حماتي؟
آه لعاد مين يعني ,, هسا سيبنا من أفلامك ,, مالها سلمى صارلي ساعه برن عليها وتفصل وتبعت مسجات بعد شو وبعد شوي؟
هوه إنتي يلي ترني؟؟
آه صارلي أسبوع مش شايفتها بدي أطمن عليها
....
مسك الموبايل ,, فصل الخط ,, فتش في المسجات ,, صحيح كانت تبعت لإمها .. فتش على مسجات أو أرقام غريبه مالقي ,, مسكها وحكالها
وينه؟
شو هوه يلي وينه؟
وين موبايلك ,, أكيد معك موبايل تاني زي الداشرات ,, ومخبيته عني ,, شو مفكرتيني هبيله تتسلي فيي؟
والله ما عندي موبايل تاني .
تركها وقلب البيت فوقاني تحتاني ,, وهوه بفتش صار يفكر فيها وفي كلامها .. كلامها مش واضح ,, كلامها أبداً ما فيه أي معلومه أو تفاصيل أو أي شي واضح ,, صار يتذكر المدة يلي مضت ,, هيه كيف كانت تلبس وين كانت تطلع وين كانت تروح .. حاول يفكر بأي شي يمسكه عليها ما قدر ,, صفن في حاله وفكر فكر فكر ,, قعد بنص الخرابة يلي عملها في البيت وهوه يفتش على دليل واحد .. رجع عليها في الصالون لقاها عم تبكي بشدة وكأنها عم تحاول تطلع روحها بالبكى ,, صفن وحس بغباءه .. قعد وهوه بتفرج في الفراغ وسألها ليه هيك عملت ؟؟
حكتله ... لأنو في مليون فرق بيني وبينك .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
20 comment:
العمر مع الشريك ينتهي ككل نهار .. بغروب ..
قد يكون جميلاً .. وقد يكون قبيحاً ..
لكن بالتأكيد .. يأتي بعده ألم الليل وحلكته ..
جميل ما كتبتي يا صديقتي ..
والعبرة أكثر من واضحة ..
"ما حدا بقول أني"
واو
إنه اخديني معك لمليون إحتمال,وما كانت هالنهايه واحد منهم
بجد واو,, أبدعتي
مش حابه أخرب النص بتعليق طويل,بس ينطفى وهج هالحكي من راسي برجع برد
بجوز بعد سنه مابعرف
وااااااااو!!!!! عن جد رهييبة! فعلا فيه مليون فرق بين البنت والشاب خصوصا في الإخلاص بعد الارتباط. بس مش كل الناس! عشان ما حدا يزعل. بستاهل الفيلم اللي انسحب عليه! وهي بتحزن بالآخر يا حرام!
من الوقاحة أن أتكلّم بأيّ شيء أمام جميلِ ما كتبتِ.
كل ما أملك من قبّعات يُرفع احتراماً.
Mr.kooz
ممم عفكرة مش دايماً الليل فيه ألم أو حلكة
لا تنسى إن الليل ينوصف دايماً بالراحة والتجديد لاستقبال نهار جديد وفي تطلعات وكذكلك العلاقات ممكن يكون إنتهاءها نهاية مخاض وطريق جديد لعلاقة أفضل
ومافهمت قصة أني؟؟
um ommar
عاد مستنيه تعليقك إنتي بالذات
وهسا تحكيلي وهج الحكي
الشعب يريد إسقاط إم عمر
aseel
تصدقي كنت بدي أكتبها بطريقة تانية إنو هيه جد عم تخونه مع حد تاني ويتفقوا مع بعض إنو إحنا تنيناتنا زي بعض وبينتهي النقاش بإنو يضلهم زي حالتها وأمشي فيها هاي النهاية بس جد ما كملت معي ولقيت شي تاني
amjad
محشوم من كل مكروه
بس جد تعودنا على تعليقاتك المطوله
واشكرك على كلامك
انا شايف انه القصة فيها أنحياز لطرف على حساب طرف وحتى لو كانت النهايه غير متوقعه الا انها واردة
أمير
أول شي زمان عنك
تاني شي أكيد فيها إنحياز لطرف عن آخر بس أنا كنت عم بحكي بصورة عامة ,, ما كانت هاممتني فكرة إنو الذكر بخون والأنثى ما بتخون .. كنت بفكر كيف ردات الفعل ممكن تتغير وممكن ناس كتير بتقبل على حالها يلي مابتقبله على غيرها ,, بعرف إنو هاي الصورة ممكن ترد بالعكس ونعم ممكن ترد بهاي الصورة
بس برضو ما أتوقع رجل ممكن يتقبل أو يقبل إنو أوك أنا بخون فا رح أسكت إنو مرتي رح تخون
زي ما حكيت لأسيل إنو فكرتي كانت بالبداية بدي أكتبها إنهم الطرفين يقبلوا الوضع إنو أوك إحنا متجوزين بس برضو كل منا حابب شخص آخر فا بيتفقوا إنو ما يزعلوا من بعض إو ينتهي النقاش بسكوت مطبق وما يحكوا شي بعد هيك وتستمر حياتهم كأنوا ما حد بعرف إرتباط التاني بطرف آخر وهون رح أطلعها من مفهوم (الخيانة) لتصير إتفاق فيما بينهم ,, بس رجعت لطبيعة الأمور وواقعيتها حسب ما جارت عليي قريحتي فيها
ماشي بتموني
أكتر شي بحبه فينا إحنا النسوانات إنه أي غرض تافهه أو حتى ملوش قيمه ماديه بنقدر نرضى فيه
وبننسى بسرعه
بسرعه كبيره
وبنغاااااااااااااظ جدن من الشخص اللي بشوف زوجته أو أخته او حبيبته حتى مبوزمه ومبغلبش حاله يتسائل بطريقة وديه إنه " شو مالك" وبيصير نرفوز وعصبي و عنتر زمانه وبعمللها حلقة إستجواب عشان يفهم شو صاير
المعادلة سهله, بالروقان والهداوه لو كانت بدها تقتله بسكينه فواكه حافيه وهوه نايم قبل بيوم,
واجا سألها برقه " شو مالك حبيبتي" رح تنسى ليش كانت زعلانه من أساسه وتاخد فتره كويسه ت تسترجع ليش هالنكد كله.
خيانه أي طرف, لا تعني وجوب خيانة الطرف التاني
وهالشي إنتي أثبتيه من خلال بطلتك "سملى" (أه مخربطه مره بإسمها ) إنه لو كنت إنتَ وسخ انا ما بجيب حقي بنفس إسلوبك
إلي رجعه اكيده
أم عمر عجبني الجمع "نسوانات" مع انه الجمع اللي انا بجمعه وهو "نسوان" ما بيعجب كثيراً من النسوان ما بعرف ليش.
يمكن الجمع تبعك جمع "مؤنث" سامع قد يرضي المطالبين بإنصاف المرأة في اللغة العربية والتي يُروى أنّها لم تُنصف الأنثى نهائيّاً :)
نسوانات من قبيل رجالات
;-)
وسايبين البيت كله وقاعدين في أوضه وحده؟
هههههه, مصطلحاتي إختراعاتي وأشيائاتي كلها ممنوع التمئلس أو التعليق عليها
برفع عليكو قضيه وبوكل نور خانوم عني
قد بعزر من أعزر
أم عمر عفكرة النسوان عندهم المذكر والمؤنث والافراد والجمع مشكلة عويصة.
مثلاً: مؤنث خروف: خروفة.
وإذا سلّمنا بهذا الجمع وبتسأل وحدة فيهم شو مؤنّث ديك؟ بتحكيلك "ديكة". هههههههههه.
شوفي اذا الشغلة فيها توكيل نور خانوم معناته انا منسحب من هسة خلص القضية انتو ربحتوها بدون ما تغلبو حالكو وتوخذو تكسي للمحكمة!
ما بقدر احكيلك غير شكراً
LUNAR.
مهو يا أنا فهمتك صح يا فهمتك غلط
عالعموم بتمنى إنو أكون فاهمه صح
:mal5oomh: تعليقي بدو حرق
لوول
ههههههههههههههههه
لأ فهمتيني صح ان شاء الله
كثير كثير عجبني البوست
واستفدت منه بشغلات كثير كمان
lunar.
استفدت منه؟
سمايل صافن
زكرتني في حالي في دعاية اتصالات يلي فيها ولاد زغار
لما يصفن الولد بالآخر ويحكيله لا دا أنا كده أشك فيك
http://www.youtube.com/watch?v=almYrlk_gcg
هههههههههههههه , تحشيش الدعاية جد
ليش انتي اقل منها الواحد يستفيد منك يعني ؟
:سمايل تعلو وجهه الجديّة:
Post a Comment
:وكيل المكومنت قال