أصلاً كل الحق على البنات
قال شو حوا يلي أغوت سيدنا آدم وهيه سبب إنو البشرية في عذاب وطلعت من الجنة
طيب وبعد هيك بنات حوا همه السبب في مشكلة قابيل وهابيل ..
خلص قززتوني في هالسواليف ,, لأ والمصيبة إن دلت على شي ,, تدل على جهل مدقع في الدين وفي كل شي لأ وبألفوا كمان .. مش إنو هدول القصتين بالذات مذكورات في القرآن .. لأ ومش إنو رواهم الرسول عليه أفضل الصلاة والسلام للناس كافة .. لأ لأ أبداً أبداً .
طبعاً لو إني أخلاقي زاحطه رح أناقشكم في مسألة إنو لو كلامكم صح - والعياذ بالله - ليش ما مسكتوا حالكم .. بسس إنتوا كاينين؟؟
لأ مارح أفرض هالفرضية للأسباب التي ذكرتها سابقاً .
السولافة ومافيها إنو وصلني أكتر من تعليق وسمعت كلام كتير في نقاشات وجدليه وقرأت إنو حتى البنت لما يخونها ما كان يسمى حبيبها (وطبع الخيانه من الزعران والمش مناح) هاد بكون الحق على البنت ليه تحب شب زي هيك .
إزا حبت شب كويس وبني آدم وفي حاله وبيوم صار موقف وما عرف يتصرف وما شمر وزمر وقام وزمهر بقولوا هاي هبلة ماعرفت تنقي غير الخويثه .
إزا واحد حبها وإنسجمت معه ودابت في دباديبه بقولوا هاي واقعه وبايره وما مصدقه على الله تلاقي شقفة ولد يهف عليها إلا هيه ميته في التراب يلي تحت رجله .
إزا حبت شب مش ولا بد من النوع المتوسط وقالولها هوه صحيح هيك بس إنتي بتفهميه وبتخليه بني آدم .. وضله على حالته .. بقولولها إي إنتي مابتعرفي إنو الشب عمره ما بتغير بحياته ؟؟ وهاي طبع وسخ وأهبل في البنات إنها موهمات حالهن إنو ممكن يغيروا (بين قوسين يصلحوه) في الشباب .
لو حبت شب مش ولا بد من النوع المتوسط والمحير وأصلحته (آه أصلحته شو ما سمعتوا هالكلمة قبل؟؟ زي أستصلاح الأراضي البور) وصار منيح ويصلي وبحاله وما يعلق ويحكي ويسهر ويسكر وصار يدير باله على شغله وعلى حاله وعيلته بصير الحق عليها كيف خلته خز ومحكوووووم من وزارة الداخلية (آه وزارة الداخلية خلص الكود تاعكم فلسسسس من كتر ما علكتوه) .
إزا ماحكت مع شباب بقولوا عنها معقدة .
إزا كانت بنت حلوه ومتعلمه وأخدت واحد ماشي حاله بقولوا مسترخصه بحالها وأبصر شو عامللها لوافقت عليه أو حتى وافقت تمشي معه .
إزا كانت بنت شنعه أو نص ماشي حالها وأخدت شب حلو ومتعلم بقولوا ساحريتلوا وعامليتلوا عمل .
إزا كانت بنت شنعه أو نص ماشي حالها وأخدت شب حلو ومتعلم بقولوا ساحريتلوا وعامليتلوا عمل .
إزا البنت حبيبها خانها أو حب عليها أو بما معناه صار يلعب في ديله بقولوا هيه يلي مقصره معه هيه يلي مابتلبسله وتتزبطله ولا لو هيه مش مهمله فيه وفي حالها كانت ما تطلع على غيرها .
إزا البنت حبيبها خانها أو حب عليها أو بما معناه صار يلعب في ديله شايليته برموش عيونها ومهتمة فيه بقولوا بقولوا كان لازم تتقل وتفهمه إنو مافي مره أحسن منها وتجيبله ولاد وتربطه ولا الزلمه بدو البنت يلي تمشي الزلمه على العجين ما يلخبطه.
إزا البنت حبيبها خانها أو حب عليها أو بما معناه صار يلعب في ديله وكانت حلوه وتتزبطلوا وتلبسلوا و بقولوا هاي طول الوقت على المكياج والكوافيرات ومش مهتمه غير في حالها ولو مهتمه فيه ما تطلع على غيرها .
إزا البنت حبيبها خانها أو حب عليها أو بما معناه صار يلعب في ديله شايليته برموش عيونها ومهتمة فيه بقولوا بقولوا كان لازم تتقل وتفهمه إنو مافي مره أحسن منها وتجيبله ولاد وتربطه ولا الزلمه بدو البنت يلي تمشي الزلمه على العجين ما يلخبطه.
إزا البنت حبيبها خانها أو حب عليها أو بما معناه صار يلعب في ديله وكانت حلوه وتتزبطلوا وتلبسلوا و بقولوا هاي طول الوقت على المكياج والكوافيرات ومش مهتمه غير في حالها ولو مهتمه فيه ما تطلع على غيرها .
لو حبت شب وقالتله بقولوا قليلة حيا ومشكوك أمرها وقالب عدادها .
لو هوه حكى معها وحكالها إنه بحبها وصارت تحبه وكان أول حب إلها والناس تعرف بقولوا هسا بظحك عليها الهبله لأنها خفيفه .
لو هوه حكى معها وحكالها إنه بحبها وصارت تحبه وكان أول حب إلها والناس ما تعرف إنو حبها الأول بقولوا تلاقيها بتحكي مع مليون شب غيره وبدها تتسلى .
لو هوه حكى معها وحكالها إنه بحبها وصارت تحبه وكان تاني تجربة إلها والناس تعرف بقولوا هاي البنت ملطشه ومش عارفه قيمة حالها وهسا بظحك عليها زي الأولاني .
وإزا مابعرفوا إنها تاني تجربة برضوا بقولوا هاظي كذابه إذا قالتلك ماعرفت غير واحد بحياتي .
إزا ما لمحت لحبيبها بالزواج وسيرته .. بشك فيها .
إزا لمحتله بغضب عليها .
إزا مابتحكي مع شباب غيره بقول هاذي هبله وميته في دباديبي ولو شو ما أقوللها واعمل رح تصدقني .
لو بتحكي مع شباب غيره بحكي هاي البنت ما بيتأمنلها ودايما مشكوك بأمرها .
خلص زهقت كملوا إنتو .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
7 comment:
مزبوط كلامك 1000000% , ما تنسي انه شو ما عمل الواحد بمجتمع زي هيك راح يطلعلوله قصة ونكشة
زي جحا وابنه لما كانوا ماخذين الحمار - بعيد عنك- عالسوق
لما ركب جحا وترك ابنه يمشي , الناس حكوا عنه فش عنده رحمة يخلي ابنه الصغير يمشي
لما ركب ابنه ومشى جحا , حكوا الولد مش محترم ابوه
لما ركبوا ال2 حكوا عنهم انهم هلكوا الحمار
ولما مشوا الاثنين وتركوا الحمار فاضي
حكوا عنهم انهم ما فيهم عقل يتركوا الحمار فاضي
فا لا تضايقي حالك, شوووووووووو ما عمل الواحد , راح تلاقي الناس بحكوا
بسم الله،
والله اللي بيعجبني في مواضيعك يا نور انها من صميم الواقع.
هسة اللي حكيتيه صحيح تماماً بس خليني أركّز على نقطتين:
- النقطة الاولى اذا انا مش عامل إشي غلط فما يهمني كلام الناس شو ما حكو.
- النقطة الثانية لو انا الشي اللي صاير عاجبني فمش ضروري أغيره أو أحس انه مش ملائم بمجرد بس كلام الناس.
بس.
وشكراً عالموضوع.
هههه ضحكتيني!!! والله وللأسف كلامك مزبوط :( بس بالنسبة لإلي بطلت تفرق معي ويقولوا شو ما بيقولوا شو بدنا بكلام الناس ;)
يختى حتى لو إنكسرت مزهريه بالبيت بكون السبب قلة إنتباهها وإهمالها بالبيت
شو بدنا نحكي ل نحكي
أختصرتي كتير بكلامك
بتحسيهم بدورو ع شماعه والسلام, إنه حدن يحمل خطاياهم " متل قصه سيدنا أدم عليه السلام" بدون ما يكونو همه غلطانين بالقصه
بحبو "معظمهم" يطلعو ملايكه وإحنا الشياطين أو الأفاعي متل ما بتصورنا قصص الخرافات القديمه
مافي مقياس ت منهم يحكولنا إنتو أخطأتو بالإختيار
إحنا ما بنقدر نقرأ الكف أو المستقبل ت نعرف نفسيات الشخص اللي تعرفنا عليه
وإجمالن,معظم العلاقات ف أولها بتكون مليانه كزب,وإحنا بطبعنا ما بنميل لتكزيب الطرف التاني عشان جعبالنا نرتاح والسلام
ف جدن صعبه إنك تقدري تميزي بين الصادق والكاذب
بجوز تيجي مع الممارسه وكثره المصايب
بس قبل هيك لا,مستحيل
وأي شب,بتعرف ع بنت مستحيل يجي يحكيلها إنه مقطع السمكه وديلها
أو إنه كزاب وبس جعباله يضيع وقت فيها ومعها
كله بيجي مع الوقت والعلاقات والتعارف بالأكتر
بتجيني حالات بأيد تعارف الشب بالبنت قبل مرحله الخطبه,وقبل ما يصير كل شي رسمي
لإنه إلا ما البنت تشوفلها تصرف يلخص اللي قدامها شو بده او شو عامل بحياته أو حتى إزنه بتخوت أو صادق
بضل الرك إنه البنت تكون واعيه وشوي عاملة متل المحققين,خصوصي إنها مرحله مفصليه بحياتها وبعتمد وبترتب عليها بلاوي بعدها
مخلصتش,برجع بحكي بعد ما شوف كومناتكم
أم عمر يا بنتي خافي الله حطمتي رقمي القياسي في طول الكومنت!
لا وشو لسة ما خلصت كمان!! إل أوه إل.
يا ستي هو انا بقارن مع زمان مرّات وبقول الوحدة كانت تتزوج زوج ولا عمرها شافته من قبل بس ييجي يطلبها من ابوها ويوافق ابوها بعد ما يسألها ويتأكد من موافقتها. وكانت الامور كثير داحلة.
يمكن عشان أيّام زمان ما كان في انحرافات فكرية ومنطقية واخلاقية عند الذكور مثل هالأيّام حيث كثرت الملاهي وما يصدّ عن ذكر الله. وصارَ الحلال صعباً (بدك تتزوج بدك مأساة و10 سنين تحويش) والحرام سهل ويسير (اللي بده الحرام بيلاقي وبسعر قليل نسبياً من الزّواج).
الله يفرج عنا وعن جميع المسلمين ويغفر لنا ما كان من ذنوبنا. آمين.
أنا خايفه ربنا بدون ما حدن يزكرني ترى
مافي أي وجهه للمقارنه بين زمانا إحنا وزمان أهلنا وحتى زمان أجدادنا
كل المعطيات إختلفت, وأصلاتن كانت ال " عيبة " واضحه والكل بتجنبها
هلأ الشاطر اللي بتفاخر ب " معايبة" اللي بيعملها
وبالأول وبالأخر ما حدن بخسر غير الإناث وأطفال العالم
ام عمر يعني برضو التذكير بالخير خير. مش ضروري اذا حكينا تخافي الله انك ما بتخافيه اصلاَ! صح؟ :)
بعدين هاي "أصلاتن" من وين جايبيتها؟ يعني انت ونور عليكم مصطلحااااااااات طقع. ههههههههه.
هسة لو الواحد بيتفاخر بمعايبة (مع تسميتها معايب) شيء أرحم من اللي احنا فيه.
الشيء الذي نحن فيه الآن أنّ العيب نفسه صار شيء عادي بل ربّما شيء مندوب. ولا حول ولا قوة الا بالله.
صدق رسول الله صلى الله عليه وسلّم إذ يقول:
" كَيْفَ بِكُمْ إِذَا فَسَقَ شَبَابُكُمْ , وَطَغَتْ نِسَاؤُكُمْ , وَكَثُرَ جُهَّالُكُمْ ؟ " قَالُوا : وَإِنَّ ذَلِكَ كَائِنٌ يَا رَسُولَ اللَّهِ ؟ قَالَ : " وَأَشَدُّ مِنْ ذَلِكَ , كَيْفَ بِكُمْ إِذَا لَمْ تَأْمُرُوا بِالْمَعْرُوفِ , وَتَنْهَوْا عَنِ الْمُنْكَرِ ؟ " قَالُوا : وَإِنَّ ذَلِكَ كَائِنٌ يَا رَسُولَ اللَّهِ ؟ قَالَ : " وَأَشَدُّ مِنْ ذَلِكَ , كَيْفَ بِكُمْ إِذَا رَأَيْتُمُ الْمَعْرُوفَ مُنْكَرًا , وَرَأَيْتُمُ الْمُنْكَرَ مَعْرُوفًا ؟ "
Post a Comment
:وكيل المكومنت قال