موضوع إنشائي لا يستحق هالتعقيد
يلي بحكي عنو هسا هو موقف ما عم يصير معي ولاحظته من خلال مراقبتي (آه مهو أنا ما عندي غير هالشي) بس بجد بلش الموضوع يكبر ويجمع دلائل وبراهين وقصص طرمه ومواقف مرت عليي لدرجة حكيت معقول جد هاي القصة ولا أنا مفسرتها غلط؟ عن شو بحكي؟ ... بحكي عن فشل الأشخاص في موضوع معين أو عدم تحقيقهم النتائج يلي كانوا يرغبوا بها ولذلك عم يكرروها بطريقه أو بأخرى مع أشخاص آخرين دون وعي .. ممكن بوعيهم؟؟ ما بعرف بس نفسي أعرف .. طب كيف ممكن شخص يكون واعي على موضوع مر فيه من فترة (قصيرة أو طويلة) وبدو يكررها بذات الظروف وبذات الموضوع (العام على الأقل) وبدو يعيش الشعور نفسو .
معقول هيه آثار الأدمان (المعنوي) لنحكيها .. بس من جانب آخر ألا وهو التجربه والفشل .. معقول يلي بحكي عنو هوه التجربة والفشل؟ (بما معناه تجرب مره أخرى لأنك فشلت مره تانيه؟) ممكن بس ليه جاييني إحساس إنو الموضوع ممكن نفصله .
لنحكي إنو إذا كنت واعي وكررت المحاولة فأنت تخوض نظرية التجربة والفشل .. بس لو كنا في وضع لاوعي بنكون في النظرية يلي بحكي عنها (أكيد مكتشفه ومكتوب عنها كتب وإلها اسم وإلخ إلخ إلخ وحقوق المؤلف العلمية والبطيخية كلها ألهم) بزيد على فكرة اللاوعي نقطة أخرى ألا وهي تكرار العملية بحذافيرها بدون زيادة أو وقاية من النتائج الفاشلة يلي صارت أو حتى من دون أي زعزعه أنو والله آه إزا كررت هالشغلة رح تصير نفس النتيجة .
الموقف يلي بحكيلكم عنو ويلي نتجت عنو كل سواليف الحصيد يلي فوق على قولة إيكوسان .. هو موقف صار مع شخص من فترة طويلة نوعاً ما وحالياً عم بكررها بإطار مختلف وأشخاص مختلفين لكن بنفس الموضوع يلي زي يلي كان يتاجر بالبطيخ وصار هسا يتاجر بالشمام (مثال متناسب مع الأجواء) هاد الشخص فشل يعني صار في مشروحه زي الشرخ في القزاز ومستحيل تقعد معو إلا بكرر هاي الحادثه فإشي طبيعي إنك تعرف تفاصيل هالقصة وفي المقابل وحالياً وبالدقيقة يلي أنا عم بكتب فيها هو عم يكرر نفس الموضوع زي كأن الأسماء بس يلي تغيرت (بطيخ أخضر بدون حزوز بيض وهسا بطيخ أخضر بحزوز بيض) .
في المقابل يلي تضخم عني وتجمع زي كرة التلج هوه بجد في أشخاص بحياتك مستعد يكرر الشغلة بنفس الطريقة عشرين مره زي توم وجيري لما يدعس توم على مشط الأرض يلي وتخبط العصاية بوجهو ويرجع يدعس عليها وتتكرر القصة لحديت ما نتعب من الضحك ويخلص المشهد وبتيجي حلقة تانية وبتكرر وبكون سعي الشخص للهدف بيعميه عن أي شي تاني (وفي مثال توم وجيري توم بدو يلحق جيري شو ما كانت النتيجه أو الآثار حتى لو ضل عشر ساعات يخبط بمشط الأرض) .
الجانب الأسوء من فكرة اللاوعي هي فكرة الشخص يلي بكرر هالحالة دون وعيه إنو إنت فشلت (أوك نفس الأدوات نفس الموضوع لا وعي وإلخ إلخ إلخ) فوق الموت خراب ديار فوق الفشل وتكراره مفكر حالو مش فاشل (أو أي مصطلح تاني غير فاشل ممكن خاطئ جاهل ...) وبكون مبسووووط إنو شوفوني ما أشطرني بس الفرق بين يلي بفكر إنو هاي الطريقه يلي صح وبين يلي بمشي في الطريقة بدون مايفكر في الصح والغلط إنو الأول اسخم من التاني ,,, يعني فلان بتجوز وحده وتنتين وتلاته وأربع مرات ومابيجيه ولاد وبفكر إنو الغلط منهم ومبسوط على حالو إنو لأ مش أنا يلي غلط إزا تجوزت وحده تاسعه هيه يلي رح تخلفلي الولد (أكيد كل هالأمور بإيد ربنا .. أنا بحكي لغايات تقريب الأفكار لا أكثر) أما التاني فهو الشخص يلي راح على مليون دكتور ولسا بجربوا حمل صناعي وأنابيب وإلخ إلخ ومش راضي يقتنع إنو في غلط (المثال يلي بحكي عنو في هاد البوست) .
أنا ضعت في يلي حكيتو فوق .. إزا حد فهم عليي يخبرني .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
4 comment:
ممم شخص يخطو في نفس الاتجاه الخاطئ اللي راح يؤدي لنفس النتائج الفاشلة بس بطرق متعددة..
مفهوم كلامك.. مش عارفة ليه يمكن فيه ناس لسا ما وصّلتها تجاربها لحد الاعتراف بالخطأ والفشل بهذه الطريقة للوصول للهدف..
يمكن هم أصلا باللاوعي ما بدهم ينجحوا لأنه على الأقل بالنسبة لهم هم عارفين النتائج مسبقا فمش مضطرين لمواجهة أي مفاجآت غير سارة..
إذا الكومنت وصلك أكتر من مرة سامحيني وامسحي الزايد :) آسفة
مممممم ممكن عارفين النتائج
يلي فهمته إنو قصدك متعتهم في (السير في نفس الطريق) هيه يلي بتخليهم يكرروا الموضوع بغض النظر عن شو ما كانت النتيجة؟
أو إنو شو الدافع يلي بخليهم يكرروا هاد الأمر؟
لا ما حدا مبسوط وهو عارف إنه راح يواجه الفشل.. بس النقطة اللي بركزوا عليها: أنا تعودت على هالخيبة.... بخافوا إذا جربوا طريق تانية تفتح لهم مشاكل جديدة وخيبات أكبر وهم مش مستعدين لها وما بعرفوا يتعاملوا معها
يعني زي اللي بعلق بال"كومفورت زون" حتى لو مش مزبوطة النتيجة النهائية والخيبة ذاتها بواجهوها بس ما بدهم يطلعوا من هالمكان لأنهم مرتاحين فيه وخايفين يطلعوا لاشي يكتشفوا إنهم ما راح يرتاحوا فيه
كبيره من يومك يا اسيل
بجد هيه هاي انو الخوف من يلي مارح يعرف يتعامل معو هوه بذاتو بدفعو يكرر الموضوع
ونقطة الكمفورت زون انو تعود على شي بعرفه والخروج من هاي المنطقه رح يخليه في دائرة رهاب المجهول
اشكرك من قلبي
Post a Comment
:وكيل المكومنت قال