انا حاليا عمري ٢٥ وداخله عن قريب في ال ٢٦ .. شغل ماشي محامية وداعسه عال ٨٠-١٠٠ ومعطيها يا معلم بس الطريق فيه شوية حفر ومطبات .. صحتي الحمد لله .. المادية مش بطاله ابدا المهم اني مستقله تمااااما عن اهلي في هاي الشغلة .. وطموحي عم بحاول ارتبها وبستنى انفذها واحققها واتعلمها واكتبها والى ما ذلك .. عزباء زي ما انتي عارفه في هاي الفترة .. مشاكل عامه اكيد موجوده .. نفسيه لا ترقى حد الشي الطبيعي .. نفسي بكتير شغلات بس زي ما قلت فوق برتب اولوياتي وقليل كتير من الناس بيعرف شو هيه .. علاقاتي الاجتماعي في وضع حرج بس صار عندي الاتصال في خط النت اهم من الاتصال بالبشر (مزحه سأسردها لاحقا) بس انتي فاهمه قصدي .

ليه بحكيلك كل هالحكي؟ بس عشان احط جهة مقابل للمقارنه مع يلي رح احكيه .. عم تتكرر قصة العريسس زي كل فترة والتانية .. مش هون المشكلة ومش هون التفاصيل .. التفاصيل انو قعدتي مع ابوي وامي هالمرة كانت جارحة باكبر ما يمكن اتحمله .. قبل شوي وانا صافنه في حالي اكتشفت انو الناس الوحيدين يلي وصفوني (بشكل او بآخر وبجميع هاي الاشكال على تعددها) همه اهلي .. مين اهلي؟ .. ابوي وامي .. المأساه انهم بحكوا انو بوكرى الناس بتعايرك بهالشي وما حد عم يعايرني غيرهم .. الاهل بدوروا على مصلحة ولادهم .. فهمتها شبعتها طلعت من حلقي شوفولكم حجة غيرها .

الانكى من كل هاد سياسة هدم الذات يلي تتمحور حول التقليص والحاضر السيء يلي انا عايشته والقادم الاغبر ازا مشيت بطريق شغلي ومدى عبثية طموحي ومدى فشلي انا ذاتيا .. في المقابل بييجي التفخيم للذات المجهوله لهاد العريسس قاهر التتر وحامي الحمى ووما يملكه من "دين" وخلق وحسب ونصسب .. وقديه هوه متحمس لييجي يشوفك انتي خص نص ومستعجل اليوم قبل بوكرى .. بابا انت ما عمرك شفته كيف بتعرف عنو كل هالقصص؟

طبعا كل هالحكي والمقاتله يلي بتصير وبالنهاية بينحكى .. والله شاورنا البنت وهيه قررت بذاتها يعني بتعرفي كل شي بالخناق الا الزواج بالاتفاق .. بابا انتا .. انتا صعب احكيلك الشي يلي بقلبي .. بس اعرف انك هدمت شي كبير فيي واعرف اني بعمري مابسامحك عليه واعرف اني بعمري مارح اصدق كلمة انك عملت هيك لمصلحتي واعرف .. يلي بربط الواحد مع اهلو هيه علاقة صلة قبل ما تكون دم ورحم وتربية والى ما هنالك .. بحكولي بوكرى بس تتجوزي وتخلفي بتعرفي قيمة اهلك .. خايفه بيوم تيجي هاللحظات وارجع اتذكر مواقفهم واقرا هاد البوست وانفر منهم بزيادة .. الكل بدو علاقه من نوع ما بالحد الادنى تكون مع اهلو بس ليه كلمالها عم تصير اصعب وشائكة وعبثية وقاتمه صعب اتراجع صعب امشي لقدام صعب تنحل بهدوء بس ضمي هاللسان بين صفين اللولي وهزي راسك زي مطسة المجالس يلي شوما قال رئيس القعده بحكيلو صح صدقت اكيد .. وقال وعلى اساس اعترضت رح يكون لاعتراضي مكان .

اما امي فبحكيلك وبرجع بسألك انو جد مش صعبان عليكي انو بنتك تروح لآخر الدنيا .. عادي هاين عليكي هالموضوع عشان لما تقعدي مع النسوان تقولي بنتي في امريكا وبنتي مش عارفه شو .. بتذكر سمعتك كنتي تحكي مع اختي وحكتلك خلص خليها عمزاجها بلكي تنبسط بيلي بدها اياه وقلتيلها بالحرف الواحد (يعني هي تنبسط واحنا نقعد بالهم) .

احكيلك مش صعب عليي اخد واحد مابدياه ومش صعب عليي اترك شغلي وطوحي وحياتي يلي ببني فيها في عمان ومش صعب علييا رتمي في بلد الحجر مابعرفه .. الصعب عليي انو رح اعمل كل هالشي عاجلا او اجلا بلا سبب وبلا اي واقع وبلا اي دراسه وبلا اي ادنى ايمان بالغيب وشو كاتبلي ربنا .. ورايحه بناء على قرار ممزوج بالشعور بالتخلي والخذلان زي راس الطرش بلا اي اعتبار لمين انا وشو عملت بهالدنيا وشو نفسي اكون وشو يلي حاببتو .. يعني صعبة تستنولكم سنة سنتين شهر شهرين حد تاني تالت سابع تاسع كرم ربنا واسع .. صعبه كتير شغلة انو يلي نفسي فيه يكون في هالبلد ساكن ومحترم وقادر يعيشني؟؟ .. معجزه هالقد الشغلة؟؟

مممم من زمان ما حكيت .. وما بتذكر بيوم قدرت احكي كل يلي بدياه من دون ما حد ينظر عليي او يحكيلي رأيه العظيم .. او عالأرجح يشرحلي تجربته او يحكيلي مأساته من باب تهون عليي مصيبتي ازا سمعت مأساته وبالآخر بينقلب الموضوع اني بساعده في حل مشكلته .. بتذكر بيوم سألني ابوي انو ليه ما بتحكي وبتفضفضي لغير امك مع انو هيه يلي اكتر وحده ممكن تفهمك وتنصحك وتسمعلك .. لهسا مش قادره الاقي الجواب وبحس حالي في ساينفيلد او جنب تشاندلر في فريندز بس اتذكر هداك الموقف .