أعوذ بالله أنا مش متزمته دينياً
من فترة قرأت على ورقة الرزنامة عن معنى كلمة متزمت وإنها بالأصل كلمة معناها الإنسان الرايق والوقور ,, تكررت معي شغلة التزمت في الدين وأعوذ بالله وأنا مش هيك وأنا مستحيل أكون هيك وكأنها تهمة إذا لزقت في الشخص رح نتطلع عليه بنظرة ذات مغزى على رأي طنفة العبد .
المعنى بحثت فيه في النت ووجدت إنو معنى الكلمة السيء هو الشائع والمتداول بين الناس بس لقيت لينك بيشرح يلي حكيت عنو سابقاً وإنو في فرق بين الشائع وبين الحقيقي وآراء تانية (وهاد اللينك)
بغض النظر على شو الشائع وشو الحقيقي مش هون يلي بحكي عنو .. يلي بحكي عنو إنو صاروا الناس يتبرؤا من هالوصف ومن هاللكلمة وإرتباطها (على الأغلب) بالدين الإسلامي والتشدد فيه والغلظة والحواجب الخميلة واللحية والخمار والنقاب والحرام والممنوع قبل الحلال والمسموح وإلخ إلخ إلخ وصارت الناس بالنتيجة عم تتنصل من كل ما هو سابق مع إنو لو نزعت عنو المفاهيم والمعتقدات الخاطئة ونزعت عن حالك الإهتمام برأي البشر ونقدهم بتلاقي حالك ببساطه الشيء يلي بتحكي عنو تزمت هو بذاته تعاليم الدين .
صعب تجيب بنت عاشت حياة الحرية في بلاد ما بتحط حسيب أو رقيب لأي شي وتقحمها في إنها تغطي جسمها وتحدد طلعاتها وتنتبه على كلامها وتلتزم بالتعاليم وتؤدي الشعائر .. ببساطه صدمه حضارية .. وصعب إنك تجيب شب عايش وبعمل السبعة وذمتها ودنجوان العصر الحديث ومأطع السمكه وديلها وفجأة تحكيله على مسؤولية وعيلة وحج وصيام والمشروب حرام والزنا محظور وإلخ إلخ .. برضو ببساطه صدمه حضارية .. إن هذا الدين لمتين فأوغل به برفق .
يلي بقرأ رح يسألني شو دخل الفقرة (يلي فوق باللون الأحمر) بالكلام يلي إنتي بتحكي فيه .. بحكيلك إنو إحنا كعرب صابتنا الآثار المعاكسة لما ذكرته .. إحنا قبل ما يكون الواحد مسلم تلاقي العربي بحب الشوارب واللحية والوقار والهدوء والأدب والأخلاق والمروءه (يلي اشك انو اغلب الناس مابتعرف معناها) كل هدول الصفات أصلاً أمور لصيقة باللرجل .. والعفة والشرف والأدب وحفظ النفس والسير على مافيه صلاح والعطف وتكوين الأسره والإخلاص للشخص الواحد هي برضو فطرة المرأة .. لما تبلش تربط ما بين مفهوم التزمت وهاي العادات بصير العقل يوازن ويخاف ويقارن ما بين ((( إذا أنا لبست الخمار الناس رح تفكرني مضطهدة والناس ما رح تحكي معي ومارح أعيش حياتي زي باقي الناس ورح يصير كل شي صعب عليي بس إذا ما لبسته الناس رح تحكي معي وتتعامل معي واعيش حياتي مبسوطه وهاد الأحلى والأحسن ))) ببساطه دماغنا هيك بشتغل الدماغ ببعد عن الألم وبقرب من الفرح .. الإنسان ببعد عن الخوف وعدم الطمأنينه وبروح على الراحة والأمان حتى لو كان الموت .. وهكذا صار الربط والتعقيد ونزع الإنسان عن فطرته والأمور الأساسية بحياته هوه الدافع إنو يخلي الإنسان يوصف أي شي بالتزمت .
وبالتالي صرنا نترك أي شي بشكل معاكس (للفقرة يلي كتبتها باللون الأحمر) .. بالنسبة إلي كان الشيخ يلي لابس أبيض وبعطي درس دين على التلفزيون هو شخص متزمت ومارح يحكي في هالدرس غير حرام تتفرجي عالتلفزيون وحرام تاكلي وحرام تلبسي وفي فتوى جديده حرام تقعدي على الكرسي .. وكان إصبعي على زر القنوات بسرعه يغير وكأنه في شي قرصني .. بيوم من الأيام حكيت لحالي طب شوفي شو عم يحكي جربي هالمره .. وبالفعل كان درس رائع وأعتقد كان الدرس للشيخ الحبيب الجفري .. وبلحظه وقفت بيني وبين حالي وحكيت شو يلي خلاني أفكر هيك ؟؟ .. مابنكر إنو لساتني بغير القناة بسرعة بس أشوف بعض الشيوخ لأنو ببساطه منهجة شدييييييييييييييد وثقيل على النفس مع إنو كلامه لا يخلو من الصحة والدعوة لصلاح الأمة .. بس ببساطة صرنا بعيدين بمسافة كبيرة عن الدين .. وفي ناس بجد عمرها ما ذاقت حلاوة الدين ومش عارفه روعته .. وعفكرة مش بالضرورة تجربها كل مرة بتصلي أو لازم تكرر شعيرة معينه لتحس فيها .. بالنسبة إلى كانت مره وحده كافية وساعيتها إذا وصلك هاد الإحساس بتطلع على كل شي بطريقه مختلفه وما بصير أبداً صعب عليك تعيش ال "تزمت كلو" بالمعنى الإيجابي .
بدي أحكي شغلة قبل ما أنسى إنو في فئة من الناس رفعت معيار ال "تزمت" لدرجة كبييييييييييييرة .. يعني إزا إنت بتصلي الصلاة على وقتها بتكون متزمت بالنسبة إلهم .. والله أعلم إنو الدين عندهم (أنا مسلم) .
بدي أحكي شغلة قبل ما أنسى إنو في فئة من الناس رفعت معيار ال "تزمت" لدرجة كبييييييييييييرة .. يعني إزا إنت بتصلي الصلاة على وقتها بتكون متزمت بالنسبة إلهم .. والله أعلم إنو الدين عندهم (أنا مسلم) .
لأوصل لنتيجة بحكي إنو عشان تفرق بين ال "تزمت" والوسطية والدين الصحيح .. لازم ببساطه تعرف مقاصد الشريعة من الأمر يلي تبحث فيه .. وتبحث كمان في إذا كان الأمر مباح وفي تركة ما في أثم وفيما إذا كنت تأجر الأجر الكبير في أداء أو ممارسة هذا الأمر .. حاول فرق مابين إنتا خايف تمارسه عشان صورتك قدام الناس ولا عشان خايف على صورة الإسلام والدين بعيون الناس .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
14 comment:
يا أهلاً بالعم لونار
جد بنبسط إنو في حد بفهم شو بحكي مش قصدي عن الموضوع قصدي عن الكلام بشكل عام لأن مرات بحس حالي بهبش تهبيش
:)
M3 enni - wal3eyaz be Allah- mesh mutazammeteh deneyyan... bs I would love to say that I understand what you say even though it is tahbeesh :-D
In a way, what you said is correct.
But also in a way, I find an excuse for those who try to defend themselves against the 'mutazammet' accusation...
Allah yehdeena jamee3an!
Regards,
Swan Lake
فكرتك صحيحه وهي الرأي الاخر وهاد يلي مابقدر استبعده او اقصيه
انا اخدت رأي يلي بنفي وبيبعد عن هالموضوع من دون وعي واخد امر التزمت بعين الناس يلي حواليه دون دراسه فيما اذا التزمت الايجابي بيناسبه او لأ
يلي انت بتحكيه وجهة نظر يلي بيعتقدوا وبآمنوا في (لا زيادة في الدين) وهاد امر متوافق مع احكام الشرع وربنا قال
– وَكَذَلِكَ جَعَلْنَاكُمْ أُمَّةً وَسَطاً لِتَكُونُوا شُهَدَاءَ عَلَى النَّاسِ وَيَكُونَ الرَّسُولُ عَلَيْكُمْ شَهِيداً
الرأي يلي حكيت عنو هم الناس يلي اغلب احكام الدين بحطوها في خانة التزمت
وبصير تعوذهم بالله من شرع واحكام الاسلام
واشكر مرورك
والله تدوينة راااائعة!! كلام سليم
وفعلاً حكيك مزبوط، موضوع الدين والتدين والتزمت كلها صارت نسبية بوقتنا
فالمتزمت بوجهة ناس معيينين ممكن يكون متهاون بنظر ناس تانيين
(أنا مثال حي على هالحكي على فكرة)
المشكلة الناس مش راضية تقتنع انو كل شيء بييجي على درجات
ربنا نزل على البشر الدين بشكل تدريجي من اول الانبياء والرسل وختمهم بدين الاسلام يلي اشتمل على كل شي في الحياة والاخرة
بس في ناس ماخده الموضوع درجة وحده لون واحد فكرة وحدة تطبق على كل الافراد وكل المجتمعات وازا فلان هيك ازا انتي ما كنتي مثله فانتي بتكوني اقل واذا انتي كنتي اكتر فا انتي بتكوني اكثر وماخده فيها
بس هل التزمت احد نتائج الاسلاموفوبيا؟
المشكلة إنه في ناس بتفصللنا و إحنا بنلبس عالعمى
ممكن...بس بنرجع لتعريف التزمت، شو هو التزمت أصلاً
وإذا فعلاً طلع أحد نتائج الإسلاموفوبيا، صراحة رح تصير صفة متزمت صفة إيجابية بنظري
:P
خالي صالح
عالعمى ولا شايفين ومستحيين من حالنا
ترى مره في شب إجى مع ضيوف وضلوا طول القعده بيوكل في حالو في الآخر بدفش في يلي جنبو بقول بدو يطلع ويرجع أبو إنتبه بحكيلو فيه إشي .. إلا الشب التاني بحكيلو والله الشب بدو يصلي بس مستحي يحكي وطالع بدو يصلي في الجامع القريب .. مع العلم إنو قدامو كان في تلة مصلويات وأبوي بالعادة بقيم الصلاة مع الجماعة
الشغلة صار إستحى وعالعمياني وعالخوف والقابض على دينه كالقابض على الجمر
وزمااان عنك يا خال
rawan
المشكلة أنا مقدرتش أحدد حتى وأنا بكتب البوست إنو هل الإسلاموفوبيا أصاب الغرب فقط ولا إحنا كمان
لأن موضوع التزمت أمر خاص بالمسلمين (بطبيعة الحال) فهل ممكن نحكي بوجودها .. وإذا إنوجدت هل ذم التزمت هو الصورة الشكلية للفوبيا ولا أساس نفسي تاني ولا مواكبة الغير ولا وسوسة شيطان لوول
mmm...
Islamophobia is a result of tazammot as I guess, mesh el 3aks...
El tazammot mnee7 bs talama enno bel2usool mesh bel far3eyyat...
as an example: el tazammot be MAFHOOM el jelbab el shar3i sa7 (la yasheff wa la yasef, wa laysa lebas shohra wala zaanah fe nafseh, wa la mutayyaban)
bs el tazammot be SHAKEL el jelbab el shar3i (enno ykoon tweel w be zrar men 2oddam) GHALAT...
got me? :-)
And yes, as you said, wejhet nazarek fe makanha...
Regards,
Swan Lake
Swan Lake
بس التزمت من زمان موجود
والخوف من الاسلام من زمان موجود
بس مفهوم الاسلاموفوبيا أعتقد بلش من بعد تفجيرات البرجين
بس هل إحنا كمسلمين ممكن ينشأ عندنا هاي الفوبيا؟
وبالنسبة لشغلة الأساس والفروع هاي جد مابعرف أأكد فيها لأنها بدها إفتاء أو نص ديني
مع هيك بقدر أحكيلك إن الناس (المتشددين بالمعنى السلبي) صار عندهم التزيد بالشكل الأقصى والناس المش متشددين صار عندهم أي إشي تشدد وتزمت وهون الخلاف بصير على التشدد نفسه ومعياره مش على أهمية الموضوع وغايات الشريعة
يعني مثلاً قبل فترة طلعت فتوى عن إنو لايجوز إن البنت تكون في غرفه لحالها مع والدها والناس هاجت وماجت وقالت مش لهلدرجة التزمت والشدة وإنتو خربتوا الاسلام والدين وفتاوي ما لها أصل ولا معنى وبعدها بأكم شهر ظهرت الصغيره يلي كان يغتصبها والدها وماتت بناء على إعتداءه هاد غير القصص الكثيرة يلي بنسمعها .. أنا مابجادل لغايات دحض الرأي الآخر أنا بحكي إنو أي رأي ممكن ينذكر في هاي الدنيا إلو محل إعتبار حتى لو كان صادر عن شخص يعاني من الإسلاموفوبيا أو يعاني من إضطهاده من تزمته لأن ببساطه كل واحد إلو تكوينه وتفسيره وموقفه من هالأمر
وأشكرك جداً
hala hala :-)
Swan Lake
كلام حلو ومفهوم
اللي بحب احكيه هون انو الدين صالح لكل زمان ومكان واللي بطبقه بكل حذافيره بريح حاله وبريح ضميره وبكون بعيد كل البعد عن التزمت
بس المشكله نظرتنا للدين بكون من خلال الشيوخ اللي من شوفهم حولينا ،يعني بطبقو كل الفرائض بس اخلاق الاسلام ولا كانها مطلوبه منه ،قصدي هون بالاخلاق انه يكون بشوش ويتعامل بلطف مع الناس ويدعو باللتي احسن فمشكله الناس اللي زي هيك بكرهك بالالتزام وبحسسك انه الدين تزمت
وفي نوع تاني دايما بجيك بطريقة الترهيب وبكون شديد في اسلوبه ساعتها الواحد عن جد بغير القناه عالسريع
ومثال اخر على التزمت هو افكار القاعده اللي بوخدو الدين بالعباطه
اعطيك مثلال اخر واحد ملتزم يدخل عالبيت وشاف اخته وامه بيحضرو مسلسل تركي وبلش يصرخ وطفا التلفزيون وصار بدو يعمل قصه طويله وعريضه كله علشان بحضرو مسلسل هلا الاشي اللي بعملوه حرام ما اختلفنا بس بيقدر يجي باللتي هي احسن وبطريقه احلا وبعدين اللي بقهر هون انه بصيح على امه وبرفع صوته وبنسى انه هاد حرام وعقوق الوالدين
فلكثرة هاي العينات في المجتمع وبتكون هاي عند كل الملتزمين جديد طبعا للاسف لهذا السبب شكلت فكرة انه الدين =تزمت عند الناس
تحياتي
دمتي طيبه
mohammad al alawneh
اول شي اهلا وسهلا فيك في مدونتي
الاشي يلي بدي احكيه انو والحمدلله لو انتبهت انا والمعلقين اجمعنا والحمد لله على نبذ التزيد الشديد في الدين وتمسكنا بالمقصد والغاية من كل ماتمارسه من شعائر او فروض او حتى من صورة المسلم
فكرتي كانت كالتالي بتتذكر كيف زمان كان لما الواحد يمسك الخلوي ويحكي في الشارع او حتى لو بنت كان معها خلوي كان ببساطه مشكوك في امرهم او ببساطه مش مقبول هالوضع وهالحكي تقريبا بأواخر التسعينات .. وحاليا الناس بلشت شوي شوي تتحلل من اي قيد او نظرة مشكوكه كانت ترفق حمل الخلوي .. بالمقابل الناس نسيت ليه كنا ننظر بعين الشك للخلوي مع ان الآثار السلبية ابدا ما انتهت في حمل الخلوي والتحدث به في اي مكان واي زمان ولو سألت حد عن نظرة زمان وهسا بحكيلك كنا زمان جاهلين ومانعرف شو فايدة الخلوي
بدك تسألني شو دخل هالمثال بحكيلك التالي .. الناس مع مرور الوقت عم تتحلل من اي قيد ولو كان بسيط ولمصلحتهم وعم تتحلل منو لانو ببساطه المفاهيم نفسها صارت تضعف يعني زمان كان كترة اللعي والحكي مع واحد وبصراخ والناس قاعده شي بخجل وبضر وقلة هيبة وزلومية بس هسا عااادي الشبكه ضعيفة والصوت بشوش مع ان جد مش موقف لطيف ولا الو من الادب مكان وهيك الناس صارت تتحلل مثلا من اللحية ومن الحجاب ومن الالتزام بالتعاليم والالتزام كمان بمظهر الدين (البشاشه ولين القلب وتقبل الآخر) زي ما ذكرت لان انا بمقارنتي رح احط الطرفين يلي بشدد بالدين ويلي بضعف بالدين (مع اني بالبوست اقتصرت على يلي بضعفوا بدينهم) بس زي ما حكيت صرنا بعااااااد عن الدين لدرجة خلينا الصورة باهته ولبسنا عالعمياني زي ما قال خالي صالح فا صار يلي بدو يمارس الدين صار يتشدد فيه بدون تفكير وصار يلي بدو يتماشى مع العصر مع قليل من الدين ينبذ اغلب تعاليم الدين والالتزامات الموجوده فيه درءاً منه لأي شبهه ممكن تتعارض مع تماشيه مع العصر
واشكرك على التعليق واهلا وسهلا فيك
وان شاء الله يلي حكيتو يكون واضح لاني مرات بعطي المثال وبنسى اشرح الغاية منو
:)
Post a Comment
:وكيل المكومنت قال