بداية فكرتي بهاد الموضع ,, قبل طرحة من قبل الدكتاتور هيثم .. كان من مقابلة تلفزيونيه مع شخص (ومع تحفظي على شخصه) .. كان في مهرجان عالمي لأفضل وأشهر مصممي الألماس في العالم ,, وكان الفائز بهذا المهرجان مصمم إسرائيلي عملت معه المذيعة مقابلة وسألته عن سبب نجاح تصميمه .. هون أصابني الفضول أشوف شو هالتصميم الخطير .. وخلال كلامه عرضوا تصميمه وكان تصميم أبسط من البساطه .. كان مبهر مش لكمية الألماس او حجم هذه الأحجار بس لطريقة تنسيقه إلها .. بس يلي بدقق في الموضوع .. أو بالأحرى بنتبه لهوه شو حكى عن تصميمه بكتشف إنو وباعترافه كان بسيط .. بس السبب يلي خلاه يفوز إن ببساطة ما حد فكر بهالشي .. الكل كان بدو يزخرف الألماس ويضيف الذهب والفضة وأشكال ونحاس وورد وإلخ إلخ من بهرجات المصممين .. بس تصميمه كان الوحيد يلي أعطى الألماس جماله برصفه بشكل بسيط وأنيق بنفس الوقت .

وهون بتوقع الناس في حيرة .. إذا مشيت ببساطة الناس ما رح تنتبهلي .. إذا مارست الموضوع بشكل إعتيادي .. الناس رح تفكرني روتيني أو مثلي مثل غيري .. وهاد الأمر ببساطة شي مستحيل .. لأن كل إنسان مستحيل يتطابق بأفعاله مع أي شخص آخر .. حتى الممثلين الإيحائيين (the mimes) ببساطة بقلدوك وبنفس شو بتعمله لكن بطريقتهم الخاصة مع إضفاء جانبهم من الفن الخاص فيهم .

 حد رح يسألني والتميز وين مكانه؟ .. بحكيلك التميز مش بالضرورة يكون بجهة معاكسة لشخصية الإنسان .. بل بالعكس هو الأمر الإعتيادي للشخص .. يعني العادي لشخص معين إنو يبث النار من فمه فهو أمر مختلف ومميز لشخص آخر ما بقدر يعمل هالشي .. الفكرة إنو قدرة شخص على فعلها وعدم قدرة شخص تاني على فعلها .

لوين بدي أوصل هون مش الفقرة يلي ذكرتها قبل شوي .. يلي بدي أحكيه إنو زي أول فقرة .. في ناس ببساطة تستغل أشياء ومواقف الغير إعتبرها عادية .. صاغها بطريقته التي يتميز بها وطلعها بنتيجة ممكن أي حد يعملها .. بس ما حد سبقه وعملها .. وطلعت بطريقة تخلب الألباب .. زي الصورة المرفقة في هاد البوست .. كلنا بنعرف المثل يلي بحكي القرد بعين إمو غزال .. والرسام يلي عمل هاي الصورة ببساطة أخد المثل .. رسمه بطريقته الخاصة التوضيحية وطلعها للعلن .

مش بالضرورة كل شي خارق للعادة والمعتاد هوه يكون واو ورائع ورهيب وخطير وهو الأجدر يكون السلم يلي يتسلقه كل شخص يرغب بالتميز .. ومن ناحية تانية مش بالضرورة كل شي اعتيادي يكون مميز .. الموضوع ما بين بين والفكرة بتكون في المجهود والتفكير وصبغ الأمر بصبغتك الشخصية وبطابعك الخاص مش أكثر .

طيب أوك .. عندي فكرة .. عندي أسلوب .. وعندي الوسيلة .. شو أعمل؟؟ .. ببساطة شوية شغل .. طابعك الخاص .. فكرة مبتكرة .. حط الخوف على جنب .. مشورة بس لا تتوسع فيها .. هاد تحليلي الشخصي للموضوع مستند للأشخاص يلي بتبتكر الأشياء وبتخترعها .. بتتذكروا برنامج كان ييجي زمان على القناة التانية (الأجنبية) للتلفزيون الأردني .. كان يجيبوا برنامج أمريكي لإختراعات تخدم الحياة اليومية .. ويلي بفوز بيحصل على فرصة إنتاج اختراعه وتسويقه .. وببساطة للي ما عرف عن شو بحكي .. بحكيلكم نسبة كبيرة من منتجات القنوات الدعائية (home shopping) هي منتجات إبتكروها ناس فكروا بشو بيحتاج الإنسان وضعوها بقالب عملي .. راهنوا على نجاحها .. ونجحوا إلى حد ما (يمكن كبير يمكن بسيط ما عندي علم) .

غطا علبة الكوكاكولا يلي بس تطعجها بتضلها ثابته ما بتنشال زي علبة الببسي هي ببساطة براءة إختراع محتكرة من قبل كوكاكولا .. واحد رح يفكر وشو هالأختراع العظيم .. الأختراع هدف من تقليل نسبة النفايات (غطا الحديد النتفه) ومن جهة تانيه عشان ما يجرح حد وهكذا .

كل حد فينا فكر بشغله .. نكته .. قصة .. موضوع معين .. ستايل لبس .. أو أي ابتكار فكر فيه .. ومر عليه يوم ولاقى غيره أبتكره .. أو أوجده على أرض الواقع .. وقال للناس أنا فكرت في هالشغلة من زمان .. أنا كان نفسي أعمل هاي الشغلة زمان .. والناس ببساطة ما صدقته وصفقوا للشخص يلي ابتكر .. شو يلي اختلف بينك وبينو.؟ .. بسيطه .. هو اشتغل شوي .

أترككم مع بعض الإبتكارات الخلابة يلي .. حلوه .