عاطفةٌ بنكهة النعناع
لسبب ما قررت آخد إجازة .. مش بداعي التعب او المشاغل او اي شي او حتى لداعي تغيير الجو .. كان نفسي اكون مع حالي مش اكتر .
وبلش الصبح موعدي مع نفسي .. لبست لبس مرتب ومريح .. ومن المزاج العام ومع الجو خفيف البرودة قررت اطلع على شارع الجامعة لجامعتي يلي درست فيها .. اشي شدني اروحلها .. وبالفعل وقفت تكسي .. الدنيا بكير شوي بس مش كتير وبطبيعة الحال كان السواق مشغل اغاني لفيروز اعتقد كان شريط لأن فترة اغاني فيروز خلصت من الراديو وللأسف كان مشغل اغنية بحبها بس مش بهيك مزاج (ليالي الشمال الحزينه .. ضلي انطريني انطريني .. ويسأل عليي حبيبي) لسبب ما غيرت مزاجي وطلع عبالي السنمن رول من سينابون بيذاااتو .. "عمو ممكن تطلع على مكه مول؟" .
وصلت وطلبت اكبر حجم وكانت غرقانه بالشوكولاته وساخنه بشكل راقي جدا .. اخترت طاوله .. السنمن رول وهوت تشوكلت والسماعات وفيروز وكتاب .. مافي حد حواليي غير كم شخص .. بالبداية ما دخلت بالمزاج يلي كنت متوقعته .. بعد فترة حسيت بالملل .. وبعدها سرحت وانا بقرأ الكتاب وبالاكل وصفت الشغلة كأني في البيت .
فكرت بشغلة ليه ما اراقب حركة الناس .. ممممم من زمان بفكر في هالشغلة واراقب تطلعاتهم وكيف بحكوا وبتصرفوا .. وبالفعلت رفعت راسي من الكتاب .. وبلشت بعين الفضول اراقب يلي موجودين .. للأسف ما في شي مختلف عن يلي بشوفه أي يوم تاني .. وانا بحوم في ناظريّ .. انتبهت بطرف عيني على شخص من بعيد عم يمشي لجهتي وتطلع عليي او بتطلع باتجاهي .. او انو بيتطلع عليي .. بالعادة بخاف من هدول الناس .. ودايما بنظر بعين الريبة لأي حد صافن فيي حتى لو كان طفل صغير .
ممم معقول انقلب السحر على الساحر؟؟ .. حاولت قد ما اقدر ما اتطلع تجاهه ولا اتطلع عليه .. وفكرت وانا بتطلع على حد تاني ارجع اقرأ او اطلع من هالمكان كلو .. مممم بطرف عيني رجعت لمحتو بيتطلع وبمشي اتجاهي حطيت ايدي تحت دقني وركيت كوعي على الطاوله ولفيت وجهي اتطلع وراي لاعرف بلكي براقب حد وراي او شي شغله .. مافي شي وراااي كلها محلات لسا مافتحت .. وبحركه (شبه طبيعية) حاولت اعملها عشان اعرف مين هوه او اعطيه نظرت (انو نعم في شي؟) وبالفعل حملت كاسة الهوتشوكلت وعملت حالي بشرب منها واجت عيني بعينه .
طلع اه جاي لعندي ومبتسم ابتسامته ما غيرها .. آآآه على هيك ابتسامه .. لو بقدر اشبهها بقول ابتسامه مشرقه اشراقيه زي الصبح اول ما يطلع .. زي الاوكسجين الصباحي النقي .. تطلعت ميلت راسي باستغراب انو ليه صافن فيي طيب؟ .. هاد الشخص بعرفه اشتغلت معو كتير ومرة فترة كنت كل يوم اشوفه .. ولظروف شغلو صرت اشوفه بالشهر مره او مرتين ومش اكتر من صباح الخير بيننا .. حتى مرات كنت ألمحه يكون بحكي مع حد وما اقدر احكيلوياها او العكس .. يعني ببساطه متل اي شخص بمر بالحياة مع اي شخص اخر بطبيعة العمل .. بس بآخر فترة حسيت بشي غريب اتجاهه بس كان ينتهي بإني بحترمه وبقدره .
ربطت ايديي بس قرب لعندي وصبح عليي وسأل عن حالي وكيفني وان شاء الله تمام .. ببساطه كان مخي فااااضي بس كان مليان حلو شعر البنات .. لون زهري زاكي يلي ما بوجع الاسنان .. سألته ليه هوه هون مع انو ما سألني ليه انا هون وجاوبني انو لمحني لما دخلت عالمول وهوه كان بيوصل اخوه لان اخوه بشتغل هون .. ومن هون ما حبيت اسأله اكتر .. واضاف انو لحقني ولما قعدت على طاولتي لف الطابق مرتين لحد ما قدر يلقط انتباهي وتيجي عيني في عينو .
بعد ما فكرت وعصرت دماغي وثقتي في حالي ووزنت السيسترهود وكل شي ووزنت لفته للطابق ولانو لحقني وكل هالبروسيس جعلكت وجهي وانا بسأله ومن هون الحوار بلش ورح ارمز لنفسي بالحرف نون ورح ارمز الو بالحرف س (سين من الناس) :
ن: بتحب تقعد؟
وبدون اي فترة زمنية ممكن تحسسني بالاحراج او تبينه مستقتل على هالشي سحب الكرسي يلي جنبي وقعد .
س: ماعندك دوام اليوم؟
ن: لا عندي بس اخدت اجازة عشان .. عشان .. يعني كيف بدي أحكيلك .. يعني هيك .
س: فاهم عليك .. بس ليه حاصره حالك هون .. يعني الواحد بروح على منتزه بتمشى بالخضار بهالأماكن يعني .
ن: على أساس إنك ما بتعرف بإن ما ذكر أعلاه مش موجود على بعد تسعميت كيلو مني يعني .
ومع ابتسامه رافقتها الضحكة ما غيرها وأنا كنت سارحة والرب راعيني ومبتسمه وخجلانه وبتطلع على اضافري .. الموقف والقعدة كانت أقرب لقعدة عمل لأن كل الحكي كان بخصوص الشغل وبلش المول يتعبى لأن القاعة يلي كنت قاعدة فيها قريبة من منطقة الألعاب للأطفال وصارت ضجة كبيرة .. ببساطة قاعدين في سوق الجمعة والسبت .
سكت بلحظات وانتبه على الضجة وركا ايديه على الطاوله وقرب عليها وهون توقعت إنو انتهى الحوار وبدو يقوم .
س: مش عارف بس اعذريني طلع ببالي مطعم بالمنطقة الفلانية على طابقين والطابق الفوقاني تقريباً كلو بلكونات وحالياً بكون منزل فطور إشي بفتح النفس .. بالعادة بفطر عندو أو بمر باخدلي شغلة قبل ما أطلع عالشغل .
ن: ماعمري سمعت فيه صراحة .
س: شو رأيك نروح نفطر فيه لأن الجو هون صار مزعج وبجد رح تنبسطي فيه وعلى جوه .
هون قعدت قعدة عرب مع حالي وبلشت أوزن بالموضوع .. بالعادة البنات .. أو البنات ذوات النوع المتعصبن والنكد يلي من نوعي ما بتحبذ هيك مواقف بالإضافة إلى إنها مش منيحة بحقي .. من ناحية تانية مش مبين عليه من النوع يلي يعزم وياخد بنات ومن هالسواليف المجهولة .. بس لسبب ما ربنا معطيه (آه ومن ضمن الآثار الجانبية للابتسامة) مصداقية والشب بجد صادق ومش مستعد يكذب وهالحكي بحكيه من فترتي الطويلة في التعامل معه .. بس الموضوع صعب .. جعلكت وجهي إشارة مني على صعوبة الموقف .. وهوه بهاي اللحظة ولكوني طولت في الرد .. إحمرّ وجهو .. وسكت وتطلع بعيوني .. وتجمدت الدنيا حوالينا .
ن : إنتا عارف هالشي صعب ويعني بتعرف هالشغلات و .
س: طب اعتبري حالك إلتقيتي فيي هناك مش هون .
مسكني من إيدي يلي مش كتير بتوجعني .. قصدو يعني إزا أنا وافقت تقعد معي هون فا ليه ما أوافق أقعد معك هناك؟
س: إنتي بتعرفيني بحترمك وأكيد سمعتي وبتعرفي إني أنا ما بتخطى حدودي .. وصفي النية وإنتي بتفكري بالموضوع .
هالمرة أنا يلي ابتسمت ابتسامه عبيطة أعبط من ابتسامة سبونج بوب .. الشب الشهادة لله ملتزم حدوده .. بس هالمواقف إلها الجانب السيء .. يعني مثلاً كيف بدنا نروح هناك؟ .. وأنا شو بعرفني بهناك .. وبلكي ما يروح هناك .. بلكي مخبى بجلدو .. بلكي .. رجعت تجمدت الدنيا فيي وأنا بتطلع بعيونو .. آه كانت زي الأفلام الصامته .. يوقفوا لحديت ما يكتبوا شرح لشو صار على شاشة سودا .
س: من شو خايفة ؟؟
ن: مش شغلة خوف ((آه امبلى - بس مش كتير)) .. بس الموقف صعب بترجاك لا تحرجني .
هوه سكت وطلع سيجاره وبلش يدخن وتعامل مع الموقف بدون أي شكل محرج وكأنه عمل إعادة تشغيل من جديد للحوار بس من دون حكي .. مر قدامنا حوار بين ولدين زغار كأنها مسرحية .. صرنا نتفرج تنيناتنا ونضحك على حكيهم .. دار وجهه عليي وحكالي شغلة بخصوص الحوار وتنيناتنا صرنا نضحك بزيادة .. دار وجهه ورجع يتطلع عليهم بس أنا ضليتني أتفرج عليه .. لسرية الموضوع ما رح أفسد عن حالي (موضوعاً) .. بس أنا للأسف عندي مشكلة بما يسمى أحلام اليقظة .. صعب تمر ساعة وما أدخل في هالدوامة .. وبلشت الآثار السلبية لهاد الإدمان يبين معي على كبر .. وللأسف كان الأخ الباشا يلي قاعد جنبي (جنبي معناها على الضلع المحاذي لضلع جهتي من مربع الطاولة) في فترة من الفترات دخل ضمن المنظومة بس كان إلو دور كومبارس إزا بقدر أسميه (يلي عندو هاد الإدمان رح يفهم عليي وغير ذلك ما رح أشرح) .. تطلعت عليه وبلشت ثورات الأفكار تقوم وتموج وتهوج .. راحوا الولدين .. بس ضلو صافن بمكانهم يلي كانوا واقفين فيه والسيجاره (لساها عروس) بإيدو .. رفع إيدو وركى وجهو بين أصابعو يلي حاملين السيجارة .
س: طيب أنا بوصفك العنوان .. أو بوصف التكسي العنوان إزا ما معك سياره ونلتقي هناك .. إنتي إختاري الطاولة .. وإعتبرينا إلتقينا هناك متل ما قلتلك .
ن: ((عم بقلب بالموضوع براسي)) .. ((تطلعت عليه بعيون نصف مفتوحة)) .. أنا ما عمري عملت هيك شي .
س: طيب؟
ن: .............. ماشي .
حسيت قلبو وقف .. وكأنو (الرولوكوستر) وقفت على اعلى نقطة وشاف النزلة قدامه .. وحسيت ابتسامتو تغيرت .. صار فيها حنيه كبيرة .. صار فيها شي بخصني .. شال الغطا عن كاسة الهوتشوكليت .. شرب منها نسبة منيحة .. معقول نشف ريقو؟؟ .. وبنص ما هوه عم بشرب ولساتو بشرب تطلع عليي بطرف عيونو والكاسة لسا بتمو .. وحس على حالو إنو هاي مش كاستو .. شال الكاسة .. تطلع عليي وهو بمسح تمو من حزوز الشكلاته يلي بالعادة تعلم على الخدود .. وصرت أضحك .
ن: (بضحك) مالك تبنجت؟
س: هاي مش كاستي صح؟؟
ن: (بضحك أعمق بس بدون صوت) .. لأ مش كاستك .. كنت طول الوقت بتمنى ما تحكي "مابدك تعزميني على شي" .
س: وهسا؟
ن: (رجعت أضحك) .. هسا خلص وصلت حصتك ما إنتي شربت نص الكاسه .
رجع صفن بالكاسه .. وصفن فيي وأنا بضحك .. ممممم أنا حقيقة ما مر عليي هيك مواقف .. بجوز هاد شي طبيعي للكل .. بس فعلاً تعاملي مع الجنس الآخر نسبته ضعيييييفة .. بس بالتقييم الإنساني كانت نظراته مبعث راحه .. مبعث لووول .. لم علبة الدخان والولاعه والمفتاح وقال يا الله .. وأنا مشيت متراخية .. وعم بضبضب بأغراضي .. ولحقته من بعد عدة خطوات .. تطلع لورا عليي .. ووقف .. استفهمت إذا في شي .. وخبرني إنو أبوه علمه إذا كنت ماشي مع إنثى أوعك تخليها تمشي وراك .. وقفت فركت عيني .. وضاع الكلام مني .. لا جد بهيك موقف شو الواحد بدو يحكي؟ .
نزلنا .. وقفلي تكسي .. فتحلي الباب .. وصاه على العنوان .. دفع الأجره سلف (نقطة قد تحسب إليه بس أنا مابحب هالشي صراحة) .. وأشرلي وحكالي إنو بدو يطلع على الكراج وبلحقني بسيارتو .. حاولت ما أفكر بشي طول الطريق بس يلي بتذكره إن الإبتسامه يومها ما فارقة وجهي .. والحمد لله إن سواق التكسي لا كان مشغل أغاني ولا برامج الصباح ولا الحويان ولا طلع من النوع كتارين الحكي .
وصلت المكان وأشرلي عليه .. وأعطاني الباقي .. وهون وقعت في حيرة آخده؟؟ .. أخليه مع السواق؟؟ .. المبلغ كان محرز مش فراطه يعني .. المهم أخدته وقلت بس اشوفه برجعلوياهم .. وعلى مسكتي الفلوس من السواق ضليتني .
دخلت المطعم/كافيه .. المكان والحمد لله كان عائلي وبيتوتي .. وفيه نسبة ناس وعائلات منيحة .. والحمد لله ما في فئات الحبيبة (النسخة الرخيصة) .. الخوف يلي كان متملكني بلش يخف .. صفنت بشجرة نخيل .. واجى عليي جرسون .. أول ما تطلع عليي لمح الدنانير والفراطة يلي في أيدي .. بس للأسف ومن شطارتي ما غيرت مستوى ايدي .. إنتو متخيلين كيف سواق التكسي بيعطي يلي وراه الفلوس .. وتخيلوا تضل ايدكو على هيك .. المهم طلع من منظر ايدي المبهر وسألني وين بحب أقعد ولحالي ولا معي شخص سموكنج ولا نن سموكنج .. وجاوبته .. طلعني فوق واخترت طاوله عالبلكونات .. مافي حد كتير بس ما في حد قليل .. البلكونه كلها كانوا محوطينها بأحواض نعنع .. والريحة كانت خياليه .. وقاعدة أنا ولسا الفراطة بإيدي وشنتتي على كتفي زي أطفال العالم الثالث إزا زاروا ديزني لاند .. وبتفرج ومزبهلة في يلي حواليي .. قصدي في كلللللللل شي حواليي .. حتى النعنع عم بصفن فيه باستغراب .
بعد لحظات وبعد ما اخدت عيني على كل شي حواليي .. اخدتني الفكرة في كيف إنو هوه بحب هاد المطعم .. وبجد بتناسب مع ذوقه وشخصيته .. وأقلها ما أخدني على هاشم زي ما في بنت خبرتني .. سألني الجرسون إزا بحب أطلب شي .. وقلتله لا بستنى حد .. بعد خمس دقايق رجع الجرسون وخبرني إنو (س) إتصل فيهم وخبرهم يخبروني إنو بالطريق .. وأنا فاغر الفهشة على رأي سعيد صالح .. وأخدتني أفلام هوليود .. قلتلو آه أوك طيب ماشي .. كلهم مع بعض .
ما طول كتير وبلحظات لقيتو إجى .. وبرضو بابتسامته ما غيرها .. كان لابس كحلي يومها .. ممم هسا انتبهت .. لما قرب عليي شلح النضاره وقعد وهوه بستعرض بعضلاته إنو كيف شو رأيك بهالمحل بالله ما أنا مذوق .. بس بأسلوب لطيف مش بكبر ونفخة راس يعني .. بتطلع لبعيد شفت يمكن خمس بلالين مربوطين ببعض وطايرين .. أشرتله يشوف .. بس للأسف أشرتله بالإيد يلي كلها فراطه ودنانير .. وساعيتها إنتبهت على حالي .. والشلون والعشرات تتطاير من فوق الطاولات .
ضحكه خفيفه .. وحكالي وطمني إنو عادي عادي ما صار شي .. (عشان ما أحس بإحراج) .. وأنا يلي وجهي صار قد اليانسونه وعلى شوي بدي أدب حالي من البلكونه لأن جميع فئات المطعم صارت تطلع علينا .. والجرسون يلي لم الفراطه حكالو حلال عليك .. ممم كرم طائي ما شاء الله .. وحاول يطلعني من الكركبه يلي عملتها .. ربط ايديه وركاهم على حفة الطاوله .. هالمرة كان قبالي .. وتطلع فيي بسألني كيف رأيي .. كانت شغاله أغنية وبحاول أعرف شو هيه .. سامعيتها قبل .. بس الصوت واطي .. شرحتلو شو عجبني في المطعم .. وريحه وطعم النعنع صار بتمي .. صار يحكيلي قديه بحب النعنع .. وسبب إختياره للمطعم هوه النعنع .. وأنا بدي أسأله عن سبب حبه للنعنع .. ارتفع الصوت (للأغنية) وكانت أغنية جوليا بطرس .. ببساطه حسيتها موسيقى تصويرية .. وحسيت الدنيا اليوم بتبالغ معي ..
على ما يبدو دمه خفيف
على ما يبدو شكله ظريف
وجوه لطيف وحكيو طريف
ومنو سخيف على ما يبدو
وتطرقني هداك المقطع وأنا في موجه عارمه من الصدمه .. وهوه ما كان منتبه في شو أنا بفكر .. وعم بتطلع باتجاهه باهتمام .. بس كنت عم بسمع شو جوليا بتحكي .. وتبلش تحكيلي بصوتها .. آه كانت بتحكيلي أنا .. لأ لأ يا (ن) إنتي مش بأحلام يقظة .. لأ لأ .
على ما يبدو طبعو كريم
وفكره سليم
وصوته رخيم
ولون عيونه ما بخونوا
وأكتر ما عاد فينا نضيف (نزيد)
ركيت بإيدي وجهي .. وخبيت إبتسامتي فيها .. وتطلعت عليه بجديه .. لسبب ما حسيته أحترم سكوتي .. وضلو ساكت ولأ الشعور ما كان مزعج .. الجو ما كان مكهرب .. ولأول مره بحياتي ما بفكر في شي أحكيه عشان أعبي فيه فراغ الكلام .. بتعرفوا هاي المواقف يلي تكون مع شخص ما بتعرفه وبتسكتوا فجأة وتحسوا بالحرج وتحاولوا تخترعوا أي شي عشان ما تحسوا بالحرج أكتر من هيك .. لأ هوه ببساطه أعطاني رخصة بالسكوت .. ما حاول حتى يطلب شي .. والجرسون كان جاي من بعيد مع المنيو .. أشرله إنو كمان شوي .. اخدت نفس طويل .. وبكل بساطه حكيتله .
ن: أنا مش كتير بعرف شو إنتو بالعادة بتحكوا .. مابعرف شو البنات بتحكي بهيك مواقف .. والمواقف يلي مرت عليي وعلى قلتها كنت بالعادة ساكته وكنت أنجبر أحكي ويتهزوا عليي ليه ما بحكي .. ومن هون بتكتشف ليه هالمواقف (على قلتها) .
س: لأ عادي .. لا تشغلي بالك .. الناس بتبالغ كتير .. وخليكي براحتك .. ولا تخافي أنا بحكي عن سته .
المواقف لهسا يلي مرت معنا كانت بالوضع العادي وتشوبها شبهة العاطفة .. حكيت بحالي مابدي أكبر الموضوع خلي الشغلة واقعية قد مابقدر .. بس صعب .. احلام اليقظة عم تنقز عليي .. بس بطريقه أو بأخرى ما اعطاها مجال .. وكان بمثابة تنويم مغنطيسي إلها .. وهاد يلي خلاني انبسط وأرتاح .. روعه إنك تنسلخ عن إدمانك .. والأروع إنك تنسلخ منو على شي رايق وهادي وأبيض وواقعي .. يلي أثقل كاهلي وسرقني من الجو شغلة الخوف من التوقعات ونتائجها .. نزلت راسي .. وكنت بفرك بأضافري .. يمكن انتبه عليي .. وبلش يحكيلي قصته مع النعنع .. وقتها ضليت على وضعيتي .. بفرك باصابعي .. وعيوني بتراقب أضافري .. وبس عم بسمعه .. وبسمع صوت النعنع وهوه عم يتحرك مع النسمه المتوسطة الخفة .
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
20 comment:
فكرت إنك حتحكي إنو حلم!
مو بالآخر إجاني هالشعور، يمكن لما وصلت لما طلب لثاني مرة تروحوا عالمطعم.
-----------
خايف أحكي إشي و ينفهم مش بالضبط معناه، متأكد إنو ما حينفهم غلط بس برضو يمكن مو بالضبط أعرف أوصّل الفكرة .. حتى كلمة (خايف) مو دقيقة يمكن!
بس يمكن الملخص إنو موقف .. إنو إنساني و عادي
يمكن تخطى بعض حدود العاديّة عند البعض بس بيضل بالأكيد ضمن حدود مواقف و مشاعر إنسانية
خلص بديش أكمّل! :))
* إنتي رهيبة بسكبك لمشاعر اللي بتيجيكي ، جد بحكي.
يا إنو بتضلي تعدلي بالكلمات يا إنو بتكتبي اللي بقلبك على طول بدون رتوش و هذا ما أظنه بل و اجزم به
كثير بيجيني هالإجساس لما بقرألك و اظن جميع من يقرأ لك .. زي تدوينة كتبتيها (رسالة الى ذاتي) و غيرها كثير
----------
وصفك للشوكولاه و رقيها تحشيش بس جميل :)
---------
مش كل الناس سيئين و لا حتى نص سيئين أو بدهم بس يقعدوا مع الجنس الآخر لأنه هدف بحد ذاته.
Haitham Jafar
أيم ان تيرز رايت ناو
بتعرف ليه؟
لأن (واكيد بتعرف) لما الواحد بطلع ببالو فكرة نص وهيه بباكورتها بتحاول وانت تكتب تلقت اكبر قدر ممكن من اصالتها واذا بلشت متأخر او ما قدرت تلقطها منيح بصير النص قريب من التقليد او باهت .. والمشكلة هاد الشي صعب تقرره حتى لو انت يلي قطفت الفكرة .. نو نو نو يلي بيقرأ هوه بنظرته او بإنعكاس الصورة بعيونه وكلاماته بتوضح الك النتيجة
اكون صادقه معك النص اخد معي من امبارح بالليل وانا بحاول اكمله (وصدقت مش تعديله).. لدرجت كنت رح اكتبه على عدة مقاطع او اجزاء واكتفي بهاد الجزء لحد الآن ويكون جزء مبتور لاني مش قادره اعطيه حقه .. وغامرت بالجزء كامل .. واستنيت من ال ٢ اي تعليق .. واجيت بتعليقك واكدت لي انو قراري كان بمحله
بالنسبة لفكرة الامر العادي رح افرد الها البوست الجاي ورح يكونلك دور فيه ورح تعرف وقتها ان الامر كان مقصود
بالنهايه شكرا لك يا عمو يوف ميد ماي داي ولا ما ببالغ
ppl like u make it worthwhile to break the promise of quitting blogger`s world :)
بالانتظار
Haitham Jafar
اوه ام جي على رأيهم .. هاي جد مسؤوليه كبييييرة
بس رح اسعالها قد مابقدر
لأن النتيجة جداً محرزه ومكسب كتيير مهم
Hey, this was just great, you really had my full attention because you succeeded in describing every detail and expressing your feelings :)
Charmed
اول شي اهلا وسهلا فيكي نورتي المدونه
تاني شي بخصوص شد الانتباه كنت خايفه يكون في بعض التفاصيل يلي تشتت القارئ بس كلامك اعطاني ثقة انو الموضوع كلو كان جزئية واحده زي ما حكيت لهيثم فوق
واشكرك جدا جدا
Mohd Jarrar
:shy:
بخصوص (جنبي) كتبتها أول مره وتوقعتكم تفهموا إنو حاطت الكرسي ولازق في كرسيي .. لا لا الرقابة بتقص الشريط بعدين .. ورجعت عدلتها .. طب شو الناس بتحكي عن حفة الطاولة ولا ضلع ولا جهة .. خبصت الأمور معي
وأشكرك على كلامك الطيب
وبجد تعليقات بتحينها (لا تسألني شو معناها) وبحترم وجودها في البوست يلي بكتبه
Mohd Jarrar
إبعد دحنا نقرا الكفت يابا
أقرأهالك غيباً؟ .. تزكرتين
:shy:
صدقني مرات بحس حالي منصور يلي في مدرسة المشاغبين
كم مرة شفتيها للمسرحية (كاملة) - أنا اظن 40 مرة!
عادي ما تستحي
عادي
:P
Haitham Jafar
يعني بدك تحسب حوالي يعني لنفرض بلشت أحضرها من عمري خمس سنوات * عيدين في السنة
+
خميسات متفرقات
+
مرات أحضرها لأن خطر على بالي
+
يعني بحدود السبعتلاف وعشرميت مره
Halla2 seebek men enno el 2usloob khayyleh w seebek men enno elwa7ad bebda men awwal kelmeh ma be2eem 3eeno 3n el saf7a gher 3ala 2akher kelmeh...
w seebek men enno el nass ra2e3, mutamayyez, wa 3afawi...
3anjad sar ma3ek? :-D
Please say yes!
Swan Lake
Swan Lake
هسا أسيبني من كل أشي
طب شوووووووووو ضل
وبالنسبة لصار معي .. أكيد نو للأسف .. سمايلي حزين .. بس يوماً ما بلكي ربنا يسهل الأمور
جد حششت على تعليقك لأني رجعت أفتش من بين سيبك على شو بدكياني اركز أو أمسك لوول
Mahu look....
Law sar ma3ek, fa kont bedi a2ollek 3anjad mashaAllaaaaaah eshi bejannen, and tet-hanni, 3anjad :-D
And if not, then mashaAllah mashaAllah mashaAllah...
What you wrote about in the next post (keep it simple) exactly applies to you... Y3ni the Israeli designer is by no chance better than you...
Great...
Spontaneous...
And leaves no space to even doubt that this is not a girl telling a real story that happened with her!
Congratulations!
Start your next book! :-D
Regards,
Swan Lake
swan lake
All what i can say that your words were as refreshing as the mint in my story ..
Ps: Also if you like this post and the style of it (32sas sarly style) i recommended some of the stories from "real stories" tag or 5arbashaty you may find something you will like "as others told me that they like"
Thx dear .. 3n jd ..
Reading comments is as نعنع as the post(s) :)
Thanks! (the nerves, right!) :P
haitham
:mal5oom:
صراحه مش قادره اقدر احدد موقفي
عيوط
what else is new! he3 he3
يا دي النيله
الطم يا واد؟؟
ألطم ويئولوا الوليه تجننت؟
:-)
I know... and I have been reading your blog for some time ago...
But this one is the best...
Ya Ne3Na3ah enti :-D
P.S: Na3Na3... great choice! I love it as well :-)
Regards,
Swan Lake
Swan Lake
سامع يا سيد هيثم شو الناس بتحكي؟
3azizaty swan lake you btmoni w welcome fiki fi all alblog .
Post a Comment
:وكيل المكومنت قال