آآآآآه بلش الخريف ,, وهاد بعنيلي شي واحد بس ,, إنو بلشت الأشياء يلي بحبها تبلش .. الناس تنضب في بيوتها والولاد الزغار في الحارة بسكتوا ,, والناس بتروح على بلدانها (الخلايجة والخطابين الهاملين وخطابات موسم الصيف) .. جد إمبارح بلش هاد الهدوء .. بتحسه جد حياة HD قسماً بالله حتى النوم صار أحلى فوق ما هوه حلو .

وبما إنو بالعادة ما بيجيني شعور منيح عن أي شي (وخصوصي مؤخراً) .. وبما إنو أنهدمت ثقتي بالناس .. وبما إنو أكتشفت يا أخي إنو يلي ما يتسمى (الحب) في هالدنيا عبارة عن "خدعة" .. وبما إنو بلشت أعود على حالي إنو ما أتأمل خير في شي .. هاليومين حاسة في شي غريب إنو إحتمال 0.01% يكون الوضع منيح .. ما بحكي إنو يصير شي .. مش رح أستنى شي .. بس الوضع العام إنو يكون يعني تبلش تترتب الأمور .

على صعيد آخر عم ببلش أرتب بأموري وأعيد تصفيط خططي .. حلو الواحد يغير هدفه ويعيش لشي تاني .. بما إنو عشت تقريباً 8 سنين لأحقق هدف معين .. صار وقت هدف تاني .. أو بالأحرى أكتر من هدف عشان أقدر أغطي مساحته الطويله .. يقشعر بدني إنو جد عم بمشي في طريق تاني .. بنبسط كتير إنو إتفقت مع حالي على شي جديد أو على خطة عبقرينو .. يختي عليي مزكاني .

وبالنسبة للتعامل البشري يلي كما قال سعيد صالح (يصعب على أمثالي فهمه) وبجد ما حد فاهم على مخي .. ويلي فهم على مخي في غيابات الجب .. رح أشتغل كل شغله بأجزاءها .. مابدك ترد عليي لعمرك .. مابدك تساعدني لعمرينك .. مابدك تفهمني لتلت أعمارك .. مابدك تصير زي البشر معي لستين ألف داهية اللي توديك ما تجيبك .. ومش رح أزعل على شوفة كتافك .. مش مستنية كتير من البشر على كل حال وخصوصاً هيك حثاله وشرذمه .. من أنتم أصلاً؟ .. يصحلكم أكون أنا في حياتكم أصلاً .

بدي أحط هاي الفقرة هون لأني جد بدي أطلعها من راسي عشان أقدر أفكر زي البشر .. أبوي أستاذ متقاعد .. بطريقة ما بعرف شو هيه (ما حبيت أسأل عنها) رجع للتدريس في المدرسة يلي كان فيها كمدرس إجتماعيات (باب النجار مخلع بس من ناحية الإجتماعيات مش من ناحية المادة لأن جد كنت شاطرة زيادة عن اللزوم في هاي الشغلات لدرجة كنت أنصدم من معلومات بعرفها بس ما بعرف كيف بعرفها) .. وبطبيعة الحال إذا متذكرين إن المعلمين بيدرسوا مواد وبنفس الوقت بكون مربي الصف (أعتقد هيك اسمه) والمدرسة يلي بدرس فيها أفردوا للسوريين صفوف خاصة فيهم وهوه استلم الصف الثامن .. لقيت مجموعة أوراق كتبوها الطلاب نفسهم .. اذا لساتني بتذكر أكيد أبوي كتب على اللوح أكم بند وحكالهم إنقلوهم على ورقة وعبوا المعلومات (اسم رباعي, مكان وتاريخ الولادة, الديانة, ولي الأمر, صفة ولي الأمر, مكان السكن الحالي, رقم الهاتف) .. بغض النظر على أن الموضوع نفسه قشعر بدني .. على قد ما كانت صدمة النتيجة إنو في أكتر من ست أولاد من نفس العيلة وأربعة كمان نفس الشي .. ولاد عم أو أخوة .. الصدمة التانية إنو تقريباً 50% منهم من مدينة درعا و 35% من دمشق والباقي من حماة وحمص .. مش كلهم ولي أمرهم والدهم في منهم أمهم ونسبتهم منيحة ومنهم خالهم وواحد أو اتنين جدهم .. يلي نساني كل هالشي أو شتت تفكيري .. إنو واحد من الأولاد كاتب في خانة (الديانة): مسلم سني .. أختلطت مشاعري وصارت نقطة ببحر .