بستغرب من هاي الشخصية إنو مثلاً صارت مشكلة إمبارح أو مشكلة كبيرة قبل فترة وإنو اليوم يعني أو بعدها بفترة بيجي وبتعامل معك إنو (هاي جايز) ولا كأنو في فراكشن إشي صار أو كان صاير .. الشغلة مش شغلة حقد وعبي قلبك أو عفى الله عن ما مضى .. مش الموضوع أبداً هيك لأن ببساطة شغلة الغفران والمسامحة بتدخل بشغلات وشغلات مش كل شي .. يعني مثلاً لا تإذيني وتجرحلي كرامتي وتبهدلني بشكل شخصي أو تمس بشخص بيعنيلي وفي الآخر (هلو برو) .. يعني الله يمسيك بالخير عمي إذا ما بتقدر تفرق .

ولإحقاق الحق يعني شغلة الإحساس نوعاً ما عندي ما تطور ووصل مرحلة البلادة وطنش تعش تنتعش ومشيها ومش بيننا وهالسواليف الطرمة .. أنا صح لا أوبدي لحظتها سطوة غضبي .. بس فعلاً الكلمة الواقفة بتوقف في زوري .. صح أنا بمزح وبزيدها في المزح وما بمانع يلي بعرفني يزيدها بالمزح معي .. مع هيك زي ما أنا ما بسمح لحالي أزودها وأجرح مشاعر حد لا حد يتوقع ما أنسطح إذا حد طب فيي بالعاطل لو كان على أي مستوى .

بعدين بالله عليكم شو مشكلة إن "ياي ما بينحكالها كلمة إلا بتزعل" لا المشكلة مش فيي أبداً .. المشكلة في العقل المتحجر والغرب المتوحش على رأي رجائي قواس .. المشكلة في إحساسك المتبلد يلي ما بعرف شو الصح من الغلط ويلي لو كررت نفس الموقف مع شخص تاني ببساطه رح يمزع وجهك إزا ما طلع يدبك عليه .. بس أنا بالمقابل وإحتراماً للعلاقة ببساطة بقلب وجهي وما بنساها وأنسحب من جزء من العلاقة .. لأن ببساطة إنتا إزا ما حسيت على غلطك هسا ومشيتها أول مره وتاني مره وتالت مره وبعديها إنسطحت وقلبت سحنتي ما تتوقع ما أبلش أسحب قوات حفظ السلام تاعتي وأبلش أخفف من تركيز هالعلاقة أو أحصرها بجانب معين .. أسحب السفير وأبقي على حسن الجوار .. عاااادي .. يلي بدق الباب بسمع الجواب .

وبالمقابل أحكى عن حالي زي ما في الصورة يلي فوق ياااااااااااااااااااااا الله شو في مواقف وشغلات لهسا ما بنساها ولا قادرة أطلعها من مخ راسي حتى مش قادرة أطلعها من النخاع الشوكي يلي إزا مرة فترة برجع بعمل إعادة إنتاج لهاي الشغلة وبرجع بشغل من جديد وجديد .. يعني صدقاً لهسا متذكره مواقف صارت معي .. لأ وبرجعلي نفس الشعور شو ما كان .. ببساطة مش كتير بنسى المواقف .. خصوصاً الإكستريم سواء سلباً أو إيجاباً للحق والباطل .. ما بنسالك المنيحه وما بنسالك القبيحة .. ولأ ولا وحده منهم بمحي التانية .. بس ببساطة إزا القبيحة صادرة عن أراده حرة واعية بتكون ببساطة شغلة ما بنسكت عنها .