فكركم بتكمل ؟؟ // إدراج كامل
كنت في الشغل ,, وصار سوء تفاهم بيني وبين حبيبي ,, ولسبب ما خفي أو غير خفي صارت الأمور في هداك اليوم تتعقد أكتر وأكتر وأنا صرت زي يلي ماسك ميه بإيدوا وعم تنكب ومش قادر يلمها .. كان يوم صعب كنت عم ببعتله مسجات وكان سوء التفاهم عم يكبر أكتر وأكتر .. قررت أواجهه وأحكي معه بهديك اللحظة ,, طلعت من الشركة ومسكت الموبايل وإتصلت أحكي معو .. حبيبي ,, شو في ليه هالقد زعلان ,, ليه هالقد حاقد؟؟ شو يلي صار لعم تحكي كل هالحكي .؟؟؟
مافي شي ,, لا ماصار شي ,, أنا عم بتبلى عليكي وبألف من راسي
مش فاهمه شو قصدك يعني؟؟ وشو قصة النكد يلي مستلمني فيها ,, حكتلك إنو مرو عليي كم يوم صعبات وطلبت منك تتحملني مش أكتر من هيك
حكتيلي يومين؟؟ إنتي متغيره وأنا مابعجبني هالوضع وعم بحاول أبررلك تصرفاتك بس للأسف المستوى يلي إنت حالياً وصلتيله أنا مابرضى فيه وأنا بجد من فترة ملاحظ عليكي كأنك بتحاولي وفي راسك موال عم تحاولي تحكيه
موال شو ومستوى شو يلي بتحكي عنه ,, أنا حكتلك كنت في فترة صعبة مرت عليي وكنت بعاني ,, يعني هيك إنت بتعاملني بالفترة يلي محتاجيتك توقف جنبي ,, مشان الله نفسي أفهم
لا تعملي حالك مش فاهمتيني ,, جد أنه نكدك مش طبيعي وصار يخلي الواحد يقرف حالو وحتى وهوه بقمة إرهاقه وتعبو بكون مش عارف يغمض عينه عشان يرتاح شوي
.....
ليه ساكته ؟؟ بشو مشغوله ,, شو واصليتك مسج من حد ؟؟ على العموم أنا قرفان أحكي وشوفي حياتك وأنا مش طايق حالي ومش طايق حدا
حسيت وقتيها إنو حمم بركانية عم تنصب عليي صب ,, زي كأن رجليي مربطين بالأرض وصبة باطون عم تغرقني وتكتم على نفسي وعم بصرخ وحبيب الروح هوه يلي عم يعيشني هاد الكابوس ,, والأبشع كان لما سكر الخط
رجعت رنيت عليه بدي أفهم شو صار بدي أعرف أصل المشكلة إنو لسا إمبارح كان يوم كتير عادي ,, واليوم بسبب حساسيتي ولأني تأخر بالرد عليه شوي من كتر ما أنا مخنوقه ,, عم بلاقيه هيك بعاملني ,, المهم رجعت رنيت بس هوه مارد ,, رجعت رنيت .. سكر المكالمه ,, رجعت رنيت بعديها وأنا حايصه في الشارع يلي جنب الشركه وفتح الخط بحكيلي
نعم؟
حبيبي مشان الله إفهمني إحكيلي شو صار وخلينا نتفاهم شوي شوي ,, بس إنك تعاملني هيك مش معقول ,, يعني شو يلي في بالك إحكيه وأنا بعطيك يلي عندي ويلي صار
وشو الفايدة ,, صارلك فتره منرفزه ,, مش عاجبك شي ,, مش عاجبك حالي ,, مش عم تردي على كلامي ,, والاستخفاف صار عندك شي عادي ,, بس اسمعي أنا من كل هالموضوع يلي خسرت لأنو فكرتك شي مختلف بس طلعتي متلك متل أي بنت مستخفه بالكل وسطحية وضليتك تتعاملي معي هيك لتخلقي حالة توتر وأزمة ثقه لتضيعي أي تواصل كان بيننا ,, والصراحة أنا مابعجبني هالحكي ,, عم تتجاهليني ,, وعم تحكي عالنت شروي غروي ,, وكل ما أحط صورة على الفيسبوك والتويتر أحكي شغله بتعمليلي طنه ورنه ,, شو عم بكفر شايفتيني؟؟ مش طبيعي النكد يلي إنتي عامليته
جد شكراً إلك ,, بس بدك تعرف شغله إنو أنا ما تغيرت ,, وكل هالأوهام يلي براسك شيلها ولا تتحججلي فيها أنا ,, إحء إحء ,, وبهاي اللحظة إنجرح صوتي من كتر ما أنا مخنقه ,, لقيت شب قرب عليي وأعطاني قزازة مي لأنو كنت عم بسعل بشكل شديد وحاسه حلقي عم يتمزع ,, مسكتها بدي أفتحها وعصلجت معي وعلى شوي كنت بدي أعيط إنو مشااااان الله شو هالحياة ,, هوه بسرعه أخدها مني وفتحها ومش قادره أتطلع فيه أو أشكره عيوني عم تدمع وعم ببلع بالمي بصعوبة تامه ,, وحكتله أنا بجد تعبانه ومش قادره أحكي
فجأة بسكر الخط في وجهي كمان مره ,, عصبت وحسيت الدنيا جد أسودت في وجهي ,, تطلعت في الشاشه وبحكي مع حالي إنو ,, سكر الخط في وجهي ,, سكر الخط في وجهي ,, سكر الخط ,, ومسكت الخلوي وبدي أتصل عليه إلا الشب خطف الموبايل من إيدي بحكيلي مابنصحك ترني عليه لأنو ما أعتقد رح يكون في مجال للحوار ,, عصبت وشديت الخلوي منو ولسا المكالمه ما تسكرت ,, قربت السماعه من داني خايفه يكون فتح الخط وسمع هاد الشب عم يحكي معي ويشك فيي إني بحكي مع حد تاني ,, - شكراً لاستخدامكم شبكة زين الرقم المتنقل المطلوب مغلق ... - وغاص قلبي في جسمي ,, وحسيت بمراره عمري ما حسيت فيها بحياتي .. سكرت المكالمه ونزلت راسي للأرض وسمعت الشب بحكيلي ,, عشان هيك حكيتلك لا تحاول لأنو شكلو المشكلة عويصه
لحظتها بكل حقد تطلعت على الشب يلي إكتشفت إني بشوفو دايماً قريب من شركتنا بس مابعرفه ,, وصار يحكيلي إنو بعرف شباب كانوا بعاملوا بهاي الطريقة البنات لسبب إنو خلص عندهم العلاقات والحب مؤقته بتنتهي ما إنو يلاقي بنت تانيه يرجع يبدا معها من جديد ,, ليه مابعرف ,, بس شكلوا في أكم صنف بالحياة ,, وهمه من هالنوع ,, يمكن هيك طبعهم يمكن عندهم ملل ,, وبنفس الوقت إنتو مش لازم ترتبطوا فيهم هالقد
الكلام يلي حكاه سكتني ,, رجعت فكرت وحاولت أطبق الحكي يلي حكاه مع يلي صار مع حبيبي ,, وبلحظات فهمت كل الموضوع ,, ولسبب ما نفسي رضيت بهاي الإجابة لسؤال مش معروف .. شكرته وضليتني رايحه ,, بطرف عيني لمحته لسا واقف بنفس المكان وكأنه عم يتطمن عليي ,, أشرتله إنو أنا منيحا ,, تبسم بإحراج وراح
بعد كم يوم ,, لقيت حبيبي شاطبني من كل إيميلاته ,, وخبرتني صاحبتي يلي هيه جارته وبتعرفه إنو حاطت صوره على إيميله إنو على علاقه بحب جديد ورح يسافروا مع بعض بعد كم يوم ,, وحكتلي إنو هاي البنت جارتهم وصارله فترة بحوم حواليها بس كانت صاحبتي خايفه تحكيلي لأنها مش متأكده من هالكلام
لسبب أو لأخر مافرق معي الموضوع ,, لأنو بالنسبة إلي الشخص يلي بدو يبيعني ,, ببيعه بأرخص ثمن .. وهيك عملت زي كأنه صفحه بحياتي وطويتها ,, ومرت الأيام ودارت الأيام بس بدون بعاد وخصام ,, كنت عم بعاني من آثار الإنسحاب ,, نعم الحب بيعمل إدمان زي المخدرات ,, بتعرفوا بكى على حزن على تخبيص بالأكل على صرف مصاريف على الفاضي على هالحكي بس ماوصلت فيي الحالة إني أسمع هاني شاكر ومصطفى كامل ,, كان همي إنو أنشغل بأي شي بس عشان أعبي الفراغ يلي تركه
وبيوم كنت ماشيه بالشارع يلي فيه شركتنا رايحه على مطعم قريب ,, بتعرفوني بطينيه وبحب الأكل ,, طلبت الأكل وعم بستنى الطلبية عشان آخدها وأطلع ,, عم بتفرج من الشباك لقيت الشب يلي ساعدني هداك اليوم واقفه قباله بنت كمان كنت أشوفها كتير ولابسين نفس الزي – يعني بشتغلوا بنفس الشركة ,, وكان واقف جنبيها شب كتير حلو لدرجة إنو مبين طنط وفافي ,, ولسبب ما صرت أتفرج على الشب يلي قبالها ,, بتطلع على شعره ووجهه ,, شلح الجكيت وبين إنو معصب ومحروق دمه وعروق جبينه بلشت تبين بس المشكله إنو مش عم يحكي شي ,, مابعرف بس كأنو هيك عادة الزلام مابحبوا يحكو بهيك مواقف ,, قربت شوي من الباب لأسمع عن شو بحكو ,, كل يلي سمعتو (حبيبي + فيسبوك + لا تزعل مني + أنا جد حبيتك) ولسبب ما زي ما أعتقد إنو إنتو فهمتو كمان ,, إنو هاي حبيبته وبدها تتركه عشان الطنط يلي معاها ,, قربت أكتر وتخبيت ورا شجرة بلاستك جوات المحل ,, يعدمني مطعم لبناني شو ديكواتهم بلا طعم ,, المهم حاولت أسمع
شايف بيبي ,, مش ئولتلك إنتا مش عم تنسجم معي يعني جد بيبي مش حاسه سار في بيننا كونكشن ,, إنتا كتير ستايلك كتير غير عن ستايلي ,, يا ألبي لا تفهمني غلت ,, بس أنا بدي أعيش حياتي وأنبسط ,, بدي هيص وأطلع وأسهر ,, أنا لسا بنوته زغيره ما ألي على كلامك تاع أنا بخاف عليكي ولا تلبسي هيك ولا تحكي مع شباب غيري ,, هاي حياتي ومابأبل إنو حد يتحكملي فيها ,, يعني ماي داد مابحكيلي شي ,, لشو إنت هسا تعئدني بحياتي ,, إنت بيتوتي ومابتحب تختلت بكتيير ناس وهيك ,, يعني حتى مابعمرك عرفت لوف غيري
مش عارفه ليه الشب ماشي مع هاي البنت ,, هوه مبين إبن فلاحين متلي ومتلكم وزي كتير ناس ,, محافظين شرقيين قلبنا طيب وما إلنا على الكونكشن الطرم يلي بتحكي عنو ,, وهيه مبينه صحيح حلوه زي اللعبة ومن بنات الهاي كلاس والأميركيان سكول والشغلات تاعتهم ,, وهوه مبين جد بحبها ,, تطلعت عليه وتزكرت حالي ,, النظره هاي يلي بتحكي عنها أغاني فيروز بكل كسرات الحب وأزماتها ,, بكل وجعها ,, وبحكيلها أنا جد بحبك وبحس حبك صار يسري بعروقي ,, أنا بخاف عليكي ومستعد أخبيكي جوات عيوني ,, أنا بعرف مين إنتي وأنا بأمر عيونك وروحي إلك ,, وأنتي مساحة الأمل يلي في حياتي
يا بيبي أنا بعرف هالحكي بس يا ألبي خلس أنا ألبي لسموان إلس (لشخص تاني) ,, وانتهى المودوع وإنتا بتعرف إنو سارلي فترة عم بحكيلك خلينا ندل فرندز وأنا جد في أشياء مابحب أعملها غير معك وإحنا
لا لا تحكيها إحنا مابعمرنا كنا صحاب والسلام ,, وك يابنت الحلال أنا بدياكي ,, أنا ماضللي شي ,, عم بستنى أهلي يرجعوا وآجي أطلبك وبتصيري مرتي
نوووووو لااااا ,, لساني زغيره عهيك شي ,, ههههه ,, عجبتيني مرتي ,, تؤبرني شو مهدوم ,, بعدين إنت بتعرف كيف دادي ووو
وبهاي اللحظة صار مخي ملخبط وهيه تحكيلي زغيره ودادي ومامي ومودي هسا (مودي طلع الطنط يلي جنبها ,, حبيتو على الفيسبوك واليوم كانوا ملتقيين وحبو بعض من أول نظرة) المهم أنا حكيت لااازم يصير شي ,, لازم الشب يحكي شي ,, أقل مافيها يبطح الطنط يلي جنبها يلي عم يتخصور زي الداشرات ,, مش طايقه أنا الوضع ,, وبلحظه فكرت أنط أدخل بنص الحوار معهم وأحاول أصلح أو أعمل شي ,, لأنو الشب شكلو دمو بغلي ,, وفكرت فيها إني أردلوا الجميل يلي عملو فيي ,, كتصرف إنساني تعاملو معي ,, ويمكن إجت الفرصة لأردلياه ,, قربت خطوه
لقيت صوت صرخ زي الرعد وبحكي (رقم 78 ,, رقم 78 ,, ياشباب مين رقمه 78 ,, 78) على قد ما صرعني صوته ,, يلي بنادي على طلبيتي ,, وحكيت في حالي بلكي هاي إشارة إنو ما أتدخل؟؟
مشيت شوي شوي أخدت طلبيتي ,, سمعت بنات متابعات المسلسل يلي برات المطعم ( بين الشب والبنت والطنط ),, ومتراهنات على أي شب رح تروح معو البنت ويلي رهانها خسر هيه يلي تدفع الحساب ,, وللأسف الأغلبية راهنت على الطنط وعلى شوي صفوا كلهم بدهم يراهنوا على الطنط ,, هالشغله أستفزتني على أشكالهم المقرفه وحكيت لاااااااء لازم أعمل شي ,, وفكرت بلكي هسا لمحني وأنا طالعه شو رح يحكي في حاله ما عملت شي ومررت مرور الكرام اللئام؟؟
زي البرغوت لقيت حالي واقفه جنبو ,, وأول شي خطر في بالي إنو شو اسمو؟؟ شو اسمو؟؟ شو اسمو؟؟ مابعرف شو اسمو طب كيف بدي أبين إني بعرفه؟؟
أول عشر ثواني أنا كنت واقفه جنبو والكل عم يصفن في الكل ,, هوه بصفن فيي هيه صفنت فيي وتطلعت عليه ,, ورجعت تطلعت على الطنط يلي معها ,, وأنا صفنت في الشب وتطلعت على الطنط وإستقرفت شكله بنظراتي الحاقده وهون إنكسر الحكي ,, تطلعت على الشب حاولت أعمل حالي فافيه زيها على أساس لاتنغر بحالها وحكتلو كيفااااااااك ,, هوه ضحك ضحكه طلعت من تم الموت ... ويلي نفسي بيوم أضحكها في خضم أيامي التعيسه // نفسي بيوم حد يراضيني بزعلي مش يزيدها عليي ,, وحسيت إنو لما ضحكها ,, عشتها أنا ,, وصفن فيي عم يضحك مش عارف شو يحكي إنو مالها هاي وليه هيك قالبه على موجة عبدون !! ,, حكتله يييييي ماعرفتني ,, شو بتعرف حد من وراي؟؟ (هون حسيت حالي بلشت أخبص) ,, هوه تدارك الضحكه
وحكالي آه هاي دانا وهاد صاحبها ,, البنت جد إسود وجهها ورح تنهار ,, سألته وبكل لهجة الأفرو- أميريكان (الأمريكان من أصل إفريقي) وحكتلو مع طعجه إنو "هااااي دااااانا وصاحبهاا؟؟!!" وقبل هوه مايفتح الشب تمو بدي أغير الموضوع
تطلعت على الطنط وحكييت ييييي كأنو شايفتك بشي مكان ,, وعملت حالي عم بفكر وبتزكر وعم بحكي "آآآآم" زي هدول الفافيات .. آآآآه تزكرت مش إنت يلي طلعت في الدعاية تاعت ال ... تاع البنات وكنت عم تركض معهم ,,, ييييي ما أهدمك متزكره كتييييير دحكنا على الكاميرشل (الدعاية) ييييييي شو جد إنك كتيييير لزيز وجد كتير بنطر لأشوفها ,, خبرني بدك تعمل غيرها ,, وهون بهاي اللحظة البنت قلبت من الآفرو – أميريكان وصارت مصري – رداحي ,,, إنو شووو مين الأخت بلا زغره ,, شو إنك بلا أخلاء ومابتعرف في الحب ,, حكيت يلا مهيه خربانه خربانه
حبيبي مالها هاي عم تسرخ علينا ,, حبيبي أنا جبت الأكل وهلأ ببرد يلا ناكلوا وخليها هاي تاخد الحبة تاعتها ,, الشب على شوي بدو يفرط من الضحك وصار يحكيلي ,, آه يلا حبيبي لا كلو ولا والأكل يبرد ,, لف إيدو حوالين كتفي وبهاي اللحظة صابتني قشعريرة خشبتني ,, وشوشني وحكالي مشان الله تحمليني بس هاي اللحظة ,, حكتله مهو الله مابقبل تقرب عليي هيك لشو عم تحكيلي مشان الله؟؟ ,, هوه إنتبه على حاله وبعد إيدو بسرعه وعمل حالو بدو ياخد كيس الوجبه من إيدي ويشوف شو فيها وهوه بكل فرح ومرح مستمتع بصحبة حبيبته ,, وكل شوي أسأله إنو بعدنا عنهم؟؟ يحكيلي إستني شوي ,, بعدنا عنهم؟؟ يحكيلي إستني شوي ,, بعدنا عنهم؟؟ يحكيلي إستني شوي ,, خلص راحوا
أنا جد لأول مره بفهم ليه بيعرقوا هالقد على المسرح وبتعبوا ,, تقولو بمثل على مسارح برودواي ,, المهم قعدنا على واحد من الكراسي يلي بالشارع وصفن بالكيس لاقاني طالبه كتير شغلات ومبين إنو بنت متلي مابتاكل كل هالقد وحكالي
مهو لازم يكون في تفسير ,, يا إنك طالبه هالأكل لكل الشركة ,, يا إنو بجد طالبيتلي أكل ,, يا إنو بجد لساتك موجوعة من القصة ماغيرها ,, لما حكى أول جملتين كنت أضحك بس لما حكى التالته درت وجهي عشان ما أبين ردت فعلي إنو آه صح كلامه بس بحركتي هاي بينت لحالها إنو هالكلام صح ,, حكيتله كدفاع عن نفسي إنو لا تشوف حالك كتير ,, ما إنت يلي فيه مش مختلف عني ,, بما معناه إنتا مننا من صنفنا وهيه منهم ,, وربنا لغاية ما عكسلنا المواقف لنشوف حالنا
هيك إنتي شايفه إنو قصتي زي قصتك ؟؟ مش عارفه يمكن كلنا في الحب مظاليم ,, بس جد مش طبيعي طريقتك وإنتي تهزي براسك زي فافيات الدوار السابع ,, أول مره بشوف بنت فلاحين بتتمدن ,, دخيلك إنتا وبنات المِدِنْ
صرنا نضحك ,, فتحت الكيس وطلعت سندويشه من السندويشات واعطيتوياها ,, أكلنا حكينا ,, حكينا كتير ,, ولأول مره من أشهر بفضفض عن يلي صار معي في قصة حبي القديمة ,, ومن ناحيته ما كان ينتقد أو يرفض يسمع ,, بالعكس كان يسمعني ,, يسأل ,, يناقش بكل بساطه بشكل ارتحت فيه ,, وماحسيت بأي ضغط أو استتفاه من ناحيته على قصة الحب الحزينه يلي إنتهت قبل ماتبدا.
حكى عن وجعو بكلمتين ,, ولسبب ما سكت بعدهم ,, ماحبيت أشد عليه ,, لسا جرحه جديد ,, بس قد ماقدرت حاولت أخليه يحكي ويفضفض بشكل مباشر عن أي شي تاني ,, المهم يغير تفكيره عن هالموضوع ,, تفاعل معي ,, حكى ,, ولأول مره بسمع "ذكر" بحكي كتير هالقد ,, وبالعكس كنت مبسوطه ومش متدايقه إنو بحكي كتير
القعدة صار لازمها قهوة ,, راح على شي كافيه وفجأة إجى وصار يناقل فنجان قهوة وبعد شوي كاستين مي قزاز وعلبة فاين وصحن فيه كيك
وبكل صدمه بحكيلو سارقهم شي؟؟ وفرطت ضحك على منظره ,, بحكيلي لأ بس الصراحة القعده على هاد الكرسي عجبتني ,, طلبت منو يجيبلنياهم هون ماقبل ,, حكتلو تبيعنياهم؟؟ أعطاني سعر طلع من زاوية مخي بس يلا مافي شي غالي على قعده بهيك جو بترد الروح
انا أستحيت لسبب ما ,, إنو الله أعلم بكم كل هدول ,, وشو خطر على باله ,, بس مسكتني الضحكه وأنا عم بتفرج على يلي جابه ,, سكتت وسرحت لبعيد
.... وكمل حكي
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
21 comment:
يعني...مش السيناريو الاطرم تبع الشيشاني اللي بدو "بوب كورن" وبابسي....(على طريقة الفافيات)
هاي القعده اللي بدها
بوشاااااار اكس لارج وبابسي دوبل
برأيي....بتكمل ومن احلى ما يمكن...ليش لاء؟
naysan
ولأول مره بقرأ تعليق وبحسو زي الآراء تاعت النقاد يلي بكتبوها على ضهر الكتب
جد تحشيش
ههههههه، الصراحة كتير عجبتني لدرجة اني حسيت القصة حقيقية.
هل القصة جد حقيقية وصاؤت معك؟؟
تسلم ايديك
حنين
نور هانم، قصة جميلة عجبتني كثير.
فيه حلقة ثانية؟! و إلا خلص كل واحد و خياله في تكملة القصة؟
?!
اي شو هاد !!! انا مش عارف على شو و لا على ايش بدي اعلق !!! جد بدها بوبكورن و ببسي
اقولك؟ مش معلق
لو إنك ما كتبتي كان أحسن
حنين
يمكن صارت يمكن ما صارت
المهم إنتي شو حسيتي
وجد عجبتك؟؟
مش شايفه الكمية المهوله من الآراء الناقده يلي كاتبينها
ويسلمو على الرد
saleh
أستاز صالح ما العبرة من القصة المذكورة أعلاه ,, ترى تعقدت من بعض الردود؟؟
وبجد تعليقك بالذات حسسني إني عملتلكم عقده من كتاباتي إنها بتكون خمسين جزء
بس جد حششت ضحك ,, وإرجع إقرأ العنوان يلي تقصدت أكتبه
ويسلمو على الرد
مياسي
شو هوه يلي "؟!" مش فاهمه
بس جد خلص حرمت أحبك
حرمت أكتب
خلااااااااااااااااااااص
w7l
دكتور زكرتني بمقطع من مسلسل عيلة سبع نجوم
بتحكي ساميه الجزائري وأيمن رضا ونورمان أسعد نفس الجمله
شو هالزمن هاد ,, شو هالتخلف هاد لسا لهسا حد بياكل هيك أشياء
عن جد حسيتك بدك تحكي نفس الشي بنفس الطريقه
أمير
كل الكتابة كانت عبارة عن خاطرة عابرة
لا غميقة ولا عميقة ولا غاية من كتابتها غير لغاية الكتابة فقط لا غير ,, وسواء كانت بمستوى عالي أو دون المستوى بضل هاد أختياري وجزء من تفكيري وكتاباتي
السلام عليكم
صراحة أنا قرأت الادراج الظهر و ما عرفت شو بدي أعلق على أساس إنه القصة واقعية و صارت معك
بس إنه فلاحة و بتحب و بتنفصل عن حبيبها عالتليفون وواحد بالشارع بسمعها بتحكي حبيبي مش زابطة ، هيك رأيي ، بس إسلوبك حلو و مع طول الكتابة الواحد قرأها كلها حتى بدون بوبكورن :)
دمت بخير
اه عجبتني لدرجة اني حسيتها حقيقية ، وفضولي اعرف هل هي هيك؟
طريقة في الكتابة حلوة ،مع انو بالعادة ما بتستهويني الكتابة بالعامية بس طريقتك جد حلوة.
استمري
حنين
هههههه
لا بصراحه
كنت بقرأ وبحكي لحالي معقول هاي قصتها!
مش معقول عندها هالحبيب اللي بيشبه ٩٠ بالميه من الاردن!
وبعدين كرت القصه
بس
alirbidi
مش حاسه في رابط بين كونها فلاحة وبين الموقف ,, القصد كان التركيز على تصرفها بين الموقف الأول وموقف البنت التانية ,, بين إحنا كيف بنتصرف والفافيات كيف بتتصرف ..ويااااادي قصة البوشار
بس جد شي بسعدني إنو في حد بيقرأ النص كامل
حنين
لأكون دقيقة معك في منها صح وفي منها ماصار ومجرد كتابة نص عابر
وبالنسبة للعامية صدقيني ما كنت أحب أكتب فيها ومش عارفه بس صار معي موقف وتوقفت عن الكتابة بالفصحى ,, مش عارفه شو صار
ويسلمو على الرد
:D
مياسي
الحبيب بيشبه 90% وااااو
صراحة جد بحب المناقشة يلي م بكون منتهيتلها وإنت بتحكوها
جد إنك تحشيش
بدون ما أرجع أقرأ أي شيء باعرف إنه القصة خلصت ع هيك بس كنت بتأمل إنك تكملي، لقد كانت محاولة فاشلة مني لجعلك تعيدين التفكير في موضوع الحلقة الثانية.
العبرة من القصة: "من طين بلادك لُط خدادك"
ـ
;-)
saleh
أشكرك يا أستاذ صالح جزيل الشكر على تعليقك الذي أثلج الصدور ,, وأرجوك لا تعتبرها فاشلة ,, بل هي مجرد توقف لتكثيف الكتابة مرة آخرى فالرأي العام شن حملة هجومية على هذا النص تحديداً
وأعدك ببروز نص جديد يدوخ عقولهم ويمحي هذا النص عن الوجود
ولك جزيل الشكر
والعبرة إجت تصيب الهدف بس للأسف إجت في الحيط يلي جنبه
بصراحة القصة روعة مع عدم التركيز على الصداع النصفي اللي صابني بنصف راسي الشمال بس
استمري جميلة جدا القصة
Stefan Andralis
Stefan Andralis
حاسه حد رح يرفع عليي قضية
يا صداع يا لخمه
يا بوشار
تصدق مش مسترجيه أرجع أقرأ شو كتبت من بعد آراءكم
بس أشكرك على الرد
وأهلا بك في بطيخ حياتي
مرحبا
بصراحة كل ما أقرأ كتاباتك بتتابني مشاعر غريبة وحالة من الدوخة اللي بتصاحب الخيال
بس زي ما بحكيلك كل مرة مبدعة بأمتياز
ومني وعلي أعتقد انه القصة صارت معك عنجد
بس لابقلك المدني
باي ذا وي
جود جوب Good Job
ألفريدو
ألفريدو
شو قصة الدوخة ووجع الراس يلي بتصير معكم؟؟
لوووووول
ولابقلي المدني؟؟
أصير أحكي
سار وهيك وآآآآم وعربي مكسر يعني
وأبدعت ب جود جوب
:D
يسلمو عالتعليق
قصة كتير حلوة وسواء حقيقية او لاء
فرب صدفة خير من الف ميعاد
ماشي ماشي يا نيسان
بشوفك عند العلم بعد الدوام! و بنشوف
هاي القصة عجبتني كتييييييييييير و مش مهم صارت او لأ, بس عجبتني الجرأة بمساعدة الشب, انه احيانا بنحتاج حدا يساعدنا و مش مهم مين, من باب النخوة, اشي من حدا غريب و بدون مقابل
Post a Comment
:وكيل المكومنت قال