يلي بدوش .. بلزموش .. مفهوم يتعلق بعمل المرأة يفتقده نص الشعب
معادلة بسيطة بطرحها لك يا أيها المواطن ..
الأخ المناضل يلي بدو يخطب بنت وما بدوياها تشتغل .. ببساطة يخطب بنت ما بتشتغل .. بنت موافقة تترك شغلها .. بنت مستقتلة تترك شغلها .. بنت مش متعلمة .. بنت مش مكملة تعليمها .. بنت بتتعلم .. بنت رح يخلص عقدها بالشغل كمان أكم شهر .. وااااااااااااااااااااااااااااااااااااااااااااااو شو كل هالخيارات ما أكترهم .
شوف ما أكترهم لا وأسمع موجودات على عينك يا تاجر .. بس قررررب وجرب وما رح تندم أبداً لأنها زي ما هيه مش فارقة مع يلي خلفك .. برضو مش فارقة مع يلي خلفهم تشتغل ولا ستين ألف عمرها ما أشتغلت .
إنهن منتشرات .. إنهن كثيرات .. إنهن ليسن الوحيدات .. إنهن في كثير منهن أنواع وأصناف وبيجين من كل طبقة وملة ودين وطول وقياس ودرجات حرارة ولون .. إنت بس تخيل وإختار .. بولوبيف مي .. بولوبيف مي .
لأ وإحزر شو بيجيك معهم كمان؟؟ .. راحة بال من ناحية الجدل (العطّال البّطال) إنو بطلعلك وبطلعلها ..لأنها ببساطة مش فارقة معها ومعاك عالموت وداعسة معك عال 120 يا معلم شو بدك أحسن من هيك .
لا وأزيدك من الشعر بيت .. تقريباً ما عندها خبرة لا بالحياة ولا بالناس ولا بالمجتمع (بعضهن) .. يعني جاييتك بمانيوال فاااااااضي وإنت عبيه وسطر فيه خطبك وجدلك وحواراتك البراقة العظيمة اللامتناهية والتي يعجز العقل البشري عن التفكير فيها او تفنيدها .
فا بعد العشرطاشر سطر يلي كتبتلكياهم فوق .. حابه أحكيلك لا تيجي تتحيون على البنات يلي تشتغل (ومنهم أنا) وتحكي لو جوزك طلب منك تتركي الشغل شو بتعملي؟؟ وانا هون رح أرد الجواب المقنع السليم (أقلها بالنسبة إلي):
1- إقرأ ما ذكر أعلاه وغايتي منه إنو زي ما ذكرت خيار ببساطة بناسبك أكتر .
2- سؤالك عبيط لأن ببساطة الدين واضح في هاي المسألة لإن مخالفة الزوج والخروج بدون إذنه ... فاهمينها .
3- كونك زلمه على فرض الثيوت إسأل سؤال مباشر بالصيغة التالية (لو أنا كنت جوزك وطلبت منك تتركي الشغل شو رح تجاوبي عليي) مش تقعد تحكيلي لو جوزك طلب منك .. شو ولاد زغار ولا قعدة بنات هاي؟
4- لما تفتح هاد الموضوع أقلها تكون حاطط ببالك السبب يلي بدك تخلي البنت تترك الشغل .. على الهامش (الحالة يلي صارت معي لما سألته عن السبب رد عليي وبكل بجاحة "بدون سبب") عشان أقلها لو البنت يلي بتشتغل إنت كتير حابب ترتبط فيها تقتنع بكلامك يا دابه .
5- لما تفتح هاد الموضوع أفتحه بشكل صريح ومتقبل فيه الإقناع أولاً وإلى جانبه الإقتناع ثانياً (على فرض إنه تحيون وبطلب من بنت بتشتغل تترك شغلها ونسي البنات يلي فوق) .
6- الرجاء عدم إستخدام أسلوب التحقير والتصغير من شأن المرأة العاملة لو كانت بتلف سندويشات لولاد الروضة حتى .. ولا تسأل عن الراتب وشو المستقبل وشو الفايدة وشو الغاية بأسلوب متناهي في الإذلال والتعدي على طموح الغير .
7- شوف حالك بالأول .. وأقعد زي المحترمين والبشر مش تربطلي إيديك ورا راسك زي يلي قاعد عالبحر :k:
8- إذا إنت حطيت (إحتمااااااااااااااااااااااااااال) لو 0.1% براسك إنو يصير معها أي قصص من يلي بتسمعها من أصحابك حط ببالك إحتمالية مقابله إلها بنفس النسبة إنك ممكن بيوم تتكرسح أو تنشل أو تنضرب سلك كهربا ضغط عالي وتصير هيه يلي تعيلك وتصرف عليك وعلى خلفتك وإنت مرتمي لا حول لك ولا قوة ولا معيل حتى .
أنا مش معترضة إنو في زلام ما بدها نسوانها تشتغل .. حرين .. ومش معترضة على فكرهم وأسبابهم سواء وجدت أم لم توجد زي الحالة يلي صارت معي .. بس بالمقابل ما بقبل شخص لسا ما صارله بالقصر إلا إمبارح العصر وجاي يقيس عليي قصص من ناس منحلين وقصص بنات استهونوا بشغلهم والمجتمع شاف شغلهم بلا فايدة .. ولا يجي يحكيلي شو هالطموح يلي عندك وإنتي ما رح تقدري تعمليها وتقعد تخطبلي وتناطح فيي على الفاضي وتطلع عليي شخصياتك الصبعطاش المنفصمة (قال ممكن أنا مابدياكي تشتغلي بس بداخلي مقتنع إن الشغل إلك مفيد أو مافي مانع تشتغلي) .. ترى جد الزلام عندهم مزاجية وتعدد شخصيات وعتهات زي ما عندنا .. بس إحنا قلبنا حنيّن يا يابا بنستحي نحكي عن زلمه إنو مزاجي .. أو إنك عمو مش راكز .. أو إنك عمو عاطفي .. ببساطة الزلمه ما بختلف عن المرأة بكتييييييييييييييييييييييييييييييييييير شغلات .. عادي برضو أقصر طريق إلى قلب المرأة معدتها .. آه إحنا كمان قلبنا قريب على المعدة .. مش لهلدرجة الناس ما بتفهم في التشريح .
بالنهاية كل واحد يطلب على قد إحتياجه .. صح؟ .. فا لا تتعنتر على يلي ما بدكياه وتجبره وتتيس على إنه يصير متل ما بدك وحسب ما بده هواك الخايس اللاعقلاني الفاشل يلي من قبل العصر الجاهلي .. ترى نساء المسلمين كانوا يشتغلوا على فكرة وأمثلتهن كثيرة.
من ناحية أخيره ولإحقاق الحق ولإبراز الجانب الإيجابي .. في شباب ورجال على قد حالهم بعرفوا وبفهموا غاية ومتطلبات الأنثى وحاجتها وشو ناقصها وشو طموحها ومعطينها ثقة وأمان وبالعكس بعطوها غطاء من الحماية وبوقفوا جنبها وبساعدوها لأنهم بحبوا يشوفوا أمهم وأختهم وبنتهم تكبر وتصير .. لأنها ببساطة مكسب إلو هوه نفسه .. بدل ما يستحي منها وتصير عاله عليه أو ببساطة تدخل في غياهب الجهل والتراجع .. وال وااال وااال في ناس رح يحكوا .. بس هالمثال موجود كتير في مجتمعنا والتسطح الذهني كل ماله بزيد عند النساء .. والطموح بموت .. والإنتاج حتى على الصعيد الشخصي أو الأسري بصير بلا غاية .. وهاد ببساطة بضرب بأساس الدين يلي أمرك (إقرأ) .. وذكرلك (هل يستوي الذين يعلمون والذين لا يعلمون) .. وكلنا بنعرف إن العمل عبادة .. والأنفس بتختلف والناس مختلفة .. ناس بتطمح وبتسعى وبتحب تزيد علمها وتطور من حالها والعمل بشكل عام وأثرت في كل البشرية وحابة أقلها تترك بصمة وحابة زي ما الرجل بحب يجيه ولد يخلد اسمه في إناث بتحب لما تموت حد يتذكرها هيه نفسها بعملها أو بإنجاز مش تعيش وتموت ما حد يتذكرها أو تعيش بإنها بنت فلان أو زوجة فلان كأنها من برنامج حماية الشهود .. وبرضو في ناس عادي راضية بحالها وعندها جوانب تانية تطور فيه ولا أذى عليهم .. وبالمقابل لا أذى على الطرف الأول كمان.
الكاتلة
إم السعد
Subscribe to:
Post Comments (Atom)
على القناة الثانية
.....
خانة إقرأ
اشي بصدم الصراحة
ريكو من دد
لا زال في الجمجمة
About Me
- نورنياتي
- عمان, Jordan
- بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض
5 comment:
أي هيك العيديات و اللا بلا!
:)
شايف بالله عليك
كل عام وانت بخير مهو ما صحلنا نعيد عليك
كونك تواريت عن الانظار
و انت بخير يا رب
بس لو هالكم واحد يقرؤ و يفهموا
و يتنازلوا عن الذهنيات و القوالب الجاهزة المعششة بمخهم عن الأنثى ة إنو ما حدا وصي على حدا! ببساطة
--------
شكرًا لآخر فقرة
صحيح
(لأ مش عم بلمح إني من هالنوع)
بس منيح بعد ال(بهادل) شوي رجعتيلنل شوي من البرستيج
:]]
-----------
بكرا دوام المدارس حيبدأ!
هورراااااااااااااي
فشكلي حأرجع شوي شوي لعالم البلوجر الافتراضي الجميل
بس يمكن لأ..
أبصر
:)
سلميلنا عأبو السعد صحيح
*يهرب*
مرات لما اكتب بكون بفش غلي ومرات بحكل لعل اذا حد قرأ يسمع وجهة نظر حد بخالفه ويكون عنده هالمعلومة لا اكثر ولا اقل
بالنسبة للفقرة اخيرة لغايات احقاق الحق
لان مرات الواحد اذاعرض جانب من الرأي
الناس ممكن تفكر انو هاد الجانب الوحيد
وبالنسبة للمدارس لسا مش محددة موقفي
ولاد الخارة رح ينضبوا بالليل ولا لأ
بس بالنسبة للهوراااااي يلي الك
رح تخبوا بس تبلش طلبات المدارس
ولا شو؟
للأسف عرض الجانب الآخر من المسألة -عمومًا- ما بيأدي لنتيجة
لأنو كلنا -معظمنا؟- أبو العرّيف و مستعد يسمع وجهة النظر الأخرى -إذا رضي يسمعها أصلًا- بس مشان ينتقي جوانب فيها بقدر يهاجمها و يثبت -لمجرد الإثبات- إنو هو الصح!
----------
دوام المدارس هون = شوية نظام في البيت!
العطلة مع هيام = طلبااااااااااااااات لا تتوقف
:)
+ النهار طويييييييييييييييييييل
المغرب حاليًا على ال10 تقريبًا!
فمع المدارس شوية شغلة النوم و ساعاته بتترتب
-----
تذكرينيش بالقواريط اللي بالحارات! من الأشياء القليلة -جدًا- اللي مش مشتاقلها بالأردن
:-]
Post a Comment
:وكيل المكومنت قال