نورنياتي: دوراسل

Showing posts with label دوراسل. Show all posts

موضوع إنشائي لا يستحق هالتعقيد

يلي بحكي عنو هسا هو موقف ما عم يصير معي ولاحظته من خلال مراقبتي (آه مهو أنا ما عندي غير هالشي) بس بجد بلش الموضوع يكبر ويجمع دلائل وبراهين وقصص طرمه ومواقف مرت عليي لدرجة حكيت معقول جد هاي القصة ولا أنا مفسرتها غلط؟ عن شو بحكي؟ ... بحكي عن فشل الأشخاص في موضوع معين أو عدم تحقيقهم النتائج يلي كانوا يرغبوا بها ولذلك عم يكرروها بطريقه أو بأخرى مع أشخاص آخرين دون وعي .. ممكن بوعيهم؟؟ ما بعرف بس نفسي أعرف .. طب كيف ممكن شخص يكون واعي على موضوع مر فيه من فترة (قصيرة أو طويلة) وبدو يكررها بذات الظروف وبذات الموضوع (العام على الأقل) وبدو يعيش الشعور نفسو .

معقول هيه آثار الأدمان (المعنوي) لنحكيها .. بس من جانب آخر ألا وهو التجربه والفشل .. معقول يلي بحكي عنو هوه التجربة والفشل؟ (بما معناه تجرب مره أخرى لأنك فشلت مره تانيه؟) ممكن بس ليه جاييني إحساس إنو الموضوع ممكن نفصله .

لنحكي إنو إذا كنت واعي وكررت المحاولة فأنت تخوض نظرية التجربة والفشل .. بس لو كنا في وضع لاوعي بنكون في النظرية يلي بحكي عنها (أكيد مكتشفه ومكتوب عنها كتب وإلها اسم وإلخ إلخ إلخ وحقوق المؤلف العلمية والبطيخية كلها ألهم) بزيد على فكرة اللاوعي نقطة أخرى ألا وهي تكرار العملية بحذافيرها بدون زيادة أو وقاية من النتائج الفاشلة يلي صارت أو حتى من دون أي زعزعه أنو والله آه إزا كررت هالشغلة رح تصير نفس النتيجة .

الموقف يلي بحكيلكم عنو ويلي نتجت عنو كل سواليف الحصيد يلي فوق على قولة إيكوسان .. هو موقف صار مع شخص من فترة طويلة نوعاً ما وحالياً عم بكررها بإطار مختلف وأشخاص مختلفين لكن بنفس الموضوع يلي زي يلي كان يتاجر بالبطيخ وصار هسا يتاجر بالشمام (مثال متناسب مع الأجواء) هاد الشخص فشل يعني صار في مشروحه زي الشرخ في القزاز ومستحيل تقعد معو إلا بكرر هاي الحادثه فإشي طبيعي إنك تعرف تفاصيل هالقصة وفي المقابل وحالياً وبالدقيقة يلي أنا عم بكتب فيها هو عم يكرر نفس الموضوع زي كأن الأسماء بس يلي تغيرت (بطيخ أخضر بدون حزوز بيض وهسا بطيخ أخضر بحزوز بيض) .

في المقابل يلي تضخم عني وتجمع زي كرة التلج هوه بجد في أشخاص بحياتك مستعد يكرر الشغلة بنفس الطريقة عشرين مره زي توم وجيري لما يدعس توم على مشط الأرض يلي وتخبط العصاية بوجهو ويرجع يدعس عليها وتتكرر القصة لحديت ما نتعب من الضحك ويخلص المشهد وبتيجي حلقة تانية وبتكرر وبكون سعي الشخص للهدف بيعميه عن أي شي تاني (وفي مثال توم وجيري توم بدو يلحق جيري شو ما كانت النتيجه أو الآثار حتى لو ضل عشر ساعات يخبط بمشط الأرض) .

الجانب الأسوء من فكرة اللاوعي هي فكرة الشخص يلي بكرر هالحالة دون وعيه إنو إنت فشلت (أوك نفس الأدوات نفس الموضوع لا وعي وإلخ إلخ إلخ) فوق الموت خراب ديار فوق الفشل وتكراره مفكر حالو مش فاشل (أو أي مصطلح تاني غير فاشل ممكن خاطئ جاهل ...) وبكون مبسووووط إنو شوفوني ما أشطرني بس الفرق بين يلي بفكر إنو هاي الطريقه يلي صح وبين يلي بمشي في الطريقة بدون مايفكر في الصح والغلط إنو الأول اسخم من التاني ,,, يعني فلان بتجوز وحده وتنتين وتلاته وأربع مرات ومابيجيه ولاد وبفكر إنو الغلط منهم ومبسوط على حالو إنو لأ مش أنا يلي غلط إزا تجوزت وحده تاسعه هيه يلي رح تخلفلي الولد (أكيد كل هالأمور بإيد ربنا .. أنا بحكي لغايات تقريب الأفكار لا أكثر) أما التاني فهو الشخص يلي راح على مليون دكتور ولسا بجربوا حمل صناعي وأنابيب وإلخ إلخ ومش راضي يقتنع إنو في غلط (المثال يلي بحكي عنو في هاد البوست) .

أنا ضعت في يلي حكيتو فوق .. إزا حد فهم عليي يخبرني .

سيسترهود ... مفهوم تفتقده كثير من إناث هذا العصر

في مقابل تضامن الذكور فيما بين بعضهم البعض تحت مبدأ انتشر هديثاً وضارباً بالعمق العلاقات بين الذكور والإناث وضارباً بالعمق الإحترام وهو وهو وإن لم يلخص تحت مبدأ فهو موجود طبعاً بطبيعة الوضع الحالي موجود لدى الذكوره سواء إنتبهو أو لاعمرهم إنتبهو .

المهم المفهوم أو المبدأ يلي صرت أسمعه كثير وبعتذر على ذكره هو (بروز بفور هوز) وما رح أترجم الكلمات مع إن مش بالضرورة يكون بالواقع ذات المعنى بس بنظري هي مجرد زيادة إزدراء لهالبشرية أقصد للإناث .

يقوم مبدأ لنشذب المصطلح (الأخوة قبل الصديقات) على تفضيل الأصدقاء على باقي الإناث في مواضع معينة وقد تكون الأغلب ,, إنو مثلاً لو صار مشكلة يأخذ الذكر رقم (1) جانب الذكر رقم (2) ضد الأنثى المرتبطة في علاقة على اختلاف مستواها مع الذكر رقم (1) ولأوضحلكم المثال بشكل شعبي بالهجايص زي ما قال أحمد زكي:

(ذات الموقف يلي فيه ال "الأباصيري الأب" يعتدي بالكلام على "الزناتي" ويقوم "الأباصيري الأبن" بتوجيه كلام صارم للأب لما يحكيله ارجوك ما تسمحش لنفسك بتقييم الموقف بدون دراسة مسبقة و الا حتخرج بمفهوم خاطئ ينعكس عن رغبتك ابتدائا في تلويس الاخرين الامر الي يجعلني مظطر في النهاية للدفاع عن صديقي دون اعتبارات اسرية بعيدة عن ارض الواقع .. هههههههه ماشربش الشاي اشرب قازوزه انا)

وهون حطنا الجمال يلي في المقابل لازم يكون في ما يسمى بالسيسترهود ألا وهو تواطئ الإناث بين بعضهم البعض في مواجهة مكائد الرجال لغايات التكاتف وحماية بعضنا البعض في مواجهة الصدوع التي تؤدي بنا إلى الحط من قدرنا في المجتمع .

أخواتي الفاضلات إن المثال القائل (يا مأمنه للرجال يا مأمنه للمي بالغربال) هو من باب دس السم في العسل كون أن ذلك ما يعود بالذكر على أن الرجل إن خان إحداكن فهو يخونها مع أحداكن الأخروات (إلا في حالة الشاذين وهم كثر) وهو ما يشكل ضربتاً في صميم السيسترهود فالرجال لا مأمن لهم نعم ولكن لنراها بعين ثاقبة تطلع إلى مغزى الكلام .

ومن ناحية أخرى البنات بغض النظر عما قلته سابقاً لازم بوجودها مع صاحبتها أختها جارتها عمتها تلاقي في شقوق كبيرة وتلاقي الوحدة بس تلاقي المنفذ ما تصدق على الله وتستغله .. يعني في بنات اللهم صلي على محمد تلاقيها جد واقفة وقفة بنت أصول (مش رح أحكي أخت رجال) مع أختها أو مع صاحبتها وتلاقيها تدافع عنها بمغيبها وبحضورها حتى ,, تلاقيها بتساعد أختها وبتآزرها وبهمها حالها ومحتالها زي ما بقولوا (بس إن شاء الله كلو بالخير) .

الكلام السابق ما بحكي إنو التشدد على طرف في مقابل الطرف الثاني لأن جماعة الحريات وحقوق الإنسان بوجعلي رااااسي لأنو ببساطه بضرب بعرض الحائط الأساس الوجودي للبشرية بوصفه (إذا بتدافع على بنت بتنسى العائلة وبتنسى إرتباطها فيها) المدافعة والحماية منيحه بس لا تتعدى وتصير صارخه ومنتزعه الحقوق من الآخرين .. يلي بنطلبوا مؤازرة معنوية .

نرجع لمرجوعنا الأول بتذكر بيوم من الأيام أكلتلكم هالطراق يا سااااتر .. كان في شخص (ذكر رقم 1) بعرفو بيوم حكالي عن صاحبه (ذكر رقم 2) يلي كتير عزيز عليه إنو اشترى أي فون ومش قادر يستعمله وكان يضحك ويحكيله ممازحاً وبتذكرها "مش قد الأيفون ليه تشتروهم" وبتذكر في حديث بعد هالموقف بكم يوم وبستذكر ذكر رقم 1 بأنو قابلت ذكر رقم 2 وفعلاً مش قدو للأيفون وإنعجق قدامي وهوه بستخدمه ... وهاتلك على سطل المي يلي أكلتو .. وبالأخير بتذكر إني إنوصفت ((بالشخص السلبي)) .. مع العلم إني كنت أتحدث من باب المزح ومن باب تعباية حكي للوقت يلي بمر .. يعني بحاول أحكي أي شي عشان يمر الوقت .. ودي الحاجة الوحيدة يلي ضربتها بالليلة المنيلة دي .

يمكن أصعب المواقف يلي مرت عليي (وكوني أنثى لوول) انو تفتش فيها على أنثى توقف في صفِك في مواقف وتلاقيها دايره وجهها أو تتصفن وكأنه ما ألها علاقة بالموضوع .

الكاتلة

أم السعد

يلعن أبو تباً

هاظ أنا بالزمنات وبالتحديد (هاي الفترة) صابتني حالة حب الآي باد ,, وبعدين أخمدتها لعدم توفر القدرة المالية وغطائها كان إني مابحب برمجيات الأبل ,,, وبالفعل أنا ما بحبها بس كان مبرر أكثر ما كان حقد دفين .

وفي التاسع والسبعين من شهر التفليسه في عام تعشاطر وتلاتميه وخمسيه وتسعين أي قبل تلات شهور زي الأسده حوشت فلوس (من كد يميني / كد تحكيمي) وبالفعل لقوطت وعملت معاهده مع أهلي وأشتريت أي باد ثريز بالشيء الفلاني وكان أرخص سعر بشوفوا في السوق عشان ما حد يحكي إنظحك عليها .

وبالفعل أول يوم اشتغلت عليه اكتأبت لأنو ما كان عندي أكاونت عالأبل وبالحنجله والمكر لقيت فلم عاليوتيوب يفك أسراره ,, ومع ذلك كان أداءه ضعيف بالنسبة إلي ,, لأنو يلي بتعود على النوكيا والوندوز وحرية الحركة والتصرف .. بغلب مع إعاقة الأبل .. يعني مرات لما ما كان عندي فلاشه .. كنت أي شي أطبعه وبدي أنقله للمكتب .. كنت أشبك موبايلي بالكمبيوتر وانسخه وفي المكتب اسحب وأنقل وأهبب شو ما بدي .. أما الزفت الأبل مكانك قف .. بس بقلولك القلب إبن كلب .. مع عدم موافقتي الموضوعيه للمثل .. بس جد جد الله لا يخلي بنفس حد شي .

بس مع مرور الوقت لما تنحصر إنو كل يلي على جهازك من برامج وأشياء محصورة بنسخ مجانية منقوصة من كل شي بتحس بالنقمة على البشرية .. ولما تشوف أكسسوارات كما هو مبين أعلاه .. بصيبك الفالج لا تعالج .. بس على كل حال دايما بقول لحالي أنا بيوم حطيت ببالي شغله وأجى يوم وقدرت أجيبها أو أنفذها .. فا بتمنى أنو أصير أحط ببالي شغلات أهم لووول قصدي شو بعرفني بلكي أنسى وبلكي (وعالأكيد) تصير عندي قدرة أشتري .. بس أحكي لحالي شو بدي فيها ....

ليش الفشخره والله إلك تلتين الخاطر .. آه إزا صار عندي إمكانيات بجيب ليه لأ .. شو وراي .. أكتب إنني أنا نزلت لعند الست عنايات هو أنا يهمني ؟!

وحابة أحكي لأم عمر خافي على صحتك يا شيخه .

وحابة أحكي لهلحدا يسلمو بعرف رح تحكي هاد شغلك .. بس برضو لو الباب ما إنفتح ما كان صار كل هالشي .

ترتيب أنيق

يختي ماأزكاني

احتياط من اللخبطة

يا جماعة مش غلط انو الناس يلي تبعتلكم مسج

تحتاط ..

ترى الأحتياط واجب انساني

لووووول

آه يا حلو

صدقني بحبك
لكن قلبك قاسي عليي

لسا أحلى أحلى وبكتير كمان ..

الجزء الأول

ومحينا القمر

لا أنت حبيبي .. ولا ربينا سوا

قصتنا الغريبي .. شلعها الهوى

وصرت عنك غريبي

إنساني يا حبيبي

إمبارح تلاقينا قعدنا عا حجر

برد وحوالينا عرياني السجر

خزقنا الصور ومحينا القمر

ردتنلو مكاتيبو

وردلي مكاتيبي

كل من طوي شراعو ... وراح بهالمدى

ولدين وضاعوا عجسر الصدى

تفارقنا بهدا ,, والدني هدا

بخاطرك .. صليلي

تسعد يا حبيبي

....

بتّطِل بيوقع مني الكاس

وحدي اللي بشوفك من هالناس

....

من بين الكل بتسرقني

وبتلج الماضي تحرقني

أنا بحووووب

وقصاد عيني في كل مكااااااااااااااااااااااااااااااااااااااااااااااااااااااااااااااااااااااان .. ومن تاني أكيد راجعيين .. أنا دايب وكلي حنين ولا عمري أبيع لو مين .. ومش قادر على الأيام ولا يوصف هوايا كلام .. وإشي إشي .. في كل مكااااااااااااااااااااااااااان .

مممم بحوووب هاي اللحظات يلي بتمر عليي بدايتاً الجو يلي بزكر في ليالي الصيف الرايقة .. الجو الهادي .. وبعديها الأيام يلي ببلش راسي يروق ويصفى وبتوصل لقناعات معينه بتأثر فيي وفي شخصيتي بشكل أو بآخر .. منها قرارات منها استنتاجات .. جد حلو تتحرر من أفكار منغصة عيشتك .. لزيز الشعور .

وقصاد عيني في كل مكااااااااااااان ..

وبحكي لهالشخص .. في رب كبير زي ما لقيته بحميك بيوم من الأيام ولقى غيرك حمايته .. يلي عزيز عليك رح يكون برحمته وبحمايته .. ولا نامت أعين الجبناء .

وقصاااد عيني .. في كل مكااااااااااان .. وبينا معاااااد لو إحنا بعااااااد .. أكيد راجع ولو بيني وبينو بلااااااد .

إنت عمري

أنت عمري اللي إبتدا بنورك صباحو

إنت إنت

إنت عمري ..

اسمعه بقلبي ,, اسمعه وحدي ,, لما يهمس اسمي

مساكين يا اللي ما دقتوا و لا عرفتوا
مرة واحدة طعم الهوى
مساكين ياريت عشقتوا
ياريتكم عشتوا دا عمركم ضاع فى الهوى
مساكين مساكين
مساكين اللي ما حسوا يوم بمعنى الانتظار
و الفرح لما الحبيب يرجع لهم اخر النهار
مساكين آه يا عينى عليهم لا داقو حلو و لا مرار
مساكين مساكين
مساكين دى العيشة من غير الهوى
من غير الهوى يا خلق نار

غريب كيف بتمر حالات على الإنسان بحس حاله في شي جديد ,, وكل شي عم يتمناه من عمر عم يلاقيه بكل حلاوته ,, لحظات بسيطه ما بتكلف كتير وممكن ما بتكلف شي ,, وبجد قادر لحظتها تبصم بالعشرة إنو كل فلوس وكنوز الدنيا مابتسوى شي قدام لحظة أو إحساس أو ضحكة أو عفوية بسيطه .

وأكتشفت إنو المشاعر الأحلى هيه يلي ما بتقدر تعبر عنها .. كأن الكلام بهرب منك ,, أو بالأحرى أنت يلي ما بتحاول تفتش عليه لأنك لساتك عايش سطوة هاد الشعور ولساتو متملكك ومخبه لحالك ,, حتى في أي موقف أو حكي بتلاقيه هاي الذكريات عم تسترجع حالها وبتلاقي حالك بتسكت وبتبتسم ابتسامة دافية .. وبيسألوك إيش في؟؟ بتجاوبهم ولا شي ,, وإنت بحظتها جواتك كل شي .

شعور جديد

عمره مر عليكم تكونوا بتفكروا بأي شي براسكم

فجأة تشوفوا حد أو شي وتحسوا بشعور

مش عارفه شو أوصفه

غريب

منعش

جديد

لزيز

مش عارفه أول مره بحس بهيك

شي مع بساطته بس مش عارفه ليه أثر فيي هالقد

بجد مش عارفه

"بهذا اليوم وبذكراه المؤلمة لا نملك إلا أن ندعو لأشرف الخلق بعد رسول الله ونقول رحمك الله وأسكنك فسيح جناته , فلقد فارقتنا وتركت بنا وجع لم ولن ينتهي"

اللـهـم اجعل عن يمينه نوراً حتي تبعثه اّمنً مطمئن في نور من نورك .

اللـهـم انظر اليه نظرة رضا فإن من تنظر إليه نظرة رضا لا تعذبه ابداً

اللـهـم أسكنه فسيح الجنان واغفر له يارحمن وارحم يارحيم وتجاوز عما تعلم ياعليم .

اللـهـم اعفو عنه فإنك القائل "ويعفو عن كثير"

اللـهـم انه جاء ببابك وأناخ بجنابك فَجْد عليه بعفوك وإكرامك وجود إحسانك .

اللـهـم إن رحمتك وسعت كل شيء فارحمه رحمة تطمئن بها نفسه وتقر به عينه .

بحبك قد الصين

ما لا يفسر

أكرر للمرة الألف أني أحبك..

كيف تريدينني أن أفسر ما لا يفسر؟

وكيف تريدينني أن أقيس مساحة حزني؟

وحزني كالطفل.. يزداد في كل يوم جمالاً ويكبر..

دعيني أقول بكل اللغات التي تعرفين والتي لا تعرفين..

أحبك أنت..

دعيني أفتش عن مفرداتٍ..

تكون بحجم حنيني إليك..

دعيني أفكر عنك..

وأشتاق عنك..

وأبكي، وأضحك عنك..

وألغي المسافة بين الخيال وبين اليقين..

***

دعيني أنادي عليك، بكل حروف النداء..

لعلي إذا ما تغرغرت باسمك، من شفتي تولدين

دعيني أؤسس دولة عشقٍ..

تكونين أنت المليكة فيها..

وأصبح فيها أنا أعظم العاشقين..

دعيني أقود انقلاباً..

يوطد سلطة عينيك بين الشعوب،

دعيني.. أغير بالحب وجه الحضارة..

أنت الحضارة.. أنت التراث الذي يتشكل في باطن الأرض

منذ ألوف السنين..

***

أحبك..

كيف تريديني أن أبرهن أن حضورك في الكون،

مثل حضور المياه،

ومثل حضور الشجر

وأنك زهرة دوار شمسٍ..

وبستان نخلٍ..

وأغنيةٌ أبحرت من وتر..

دعيني أقولك بالصمت..

حين تضيق العبارة عما أعاني..

وحين يصير الكلام مؤامرةً أتورط فيها.

وتغدو القصيدة آنيةً من حجر..

***

دعيني..

أقولك ما بين نفسي وبيني..

وما بين أهداب عيني، وعيني..

دعيني..

أقولك بالرمز، إن كنت لا تثقين بضوء القمر..

دعيني أقولك بالبرق،

أو برذاذ المطر..

دعيني أقدم للبحر عنوان عينيك..

إن تقبلي دعوتي للسفر..

لماذا أحبك؟

إن السفينة في البحر، لا تتذكر كيف أحاط بها الماء..

لا تتذكر كيف اعتراها الدوار..

لماذا أحبك؟

إن الرصاصة في اللحم لا تتساءل من أين جاءت..

وليست تقدم أي اعتذار..

***

لماذا أحبك.. لا تسأليني..

فليس لدي الخيار.. وليس لديك الخيار..

كل يوم في حب جديد

عمركم تخيلتوها؟؟ .. عمركم فكرتوها؟؟

بتتزكروا بدايات العلاقات أو بالأحرى بداية أول علاقة حب استمتعتوا فيها ويلي إعتبرتوها هيه الأولى والأخيرة شو ما كان في قبلها وإزا إجا بعدها ؟؟

كيف بدايات الحب بتكون .. كلها مشاعر جديده .. صفحات جديده .. عم تتعرف على حبيب جديد (أو أكتر) تشوف وتحس كل شي حلو معه وفيه .. بتتعلم حركات جديده .. وآه للأسف بتضل تقارن مع كل شي صار أو شفته عم يصير معك أو مع غيرك .. وبتنبسط لما تلاقي هاد الحبيب عم يكون أحسن والأحلى لما يكون أحسن من الخيال يلي بيوم فكرت فيه .. ومافي عيب لو يكون يطابق أحلامك .. يكون بحميكي وملهوف عليكي .. تبلش تحس معها بهيبة رجوليتك .. وبمعنى وبقيمة كل حركاتك الزغيره يلي بتعرفها بالحب وبتحاول تجربها وبتلاقيها هيه بس يلي تتفاعل معها .. تلاقيه يلامس ويلمس الحب الناعم يلي فيكي .

وتبلش تتوطد العلاقات .. وتتخطى مراحل الخوف يلي مريتوا فيها وتبلش تحلى ويزيد الأمان والحماية والراحة والمشاعر السلبية تبلش تروح وتيجي مكانها التسليم للحياة والفكر الأحلى .. والورد والكلام والأغاني والحكي الحلو .. وتبلش الألقاب تاخد مكانها .. ويبلش الصباح والمسا والتسليم يصيروا أحلى .. وبعد فترة تتعود/ي على صباحو/ها ومساه/ا ويبلش يشتاقلها وتبلش تحس بحمايته .

كل كلمه .. كل ورده .. كل موقف .. كل هديه ..كل أغنية أو قصيدة .. كل ضحكة وفرحة .. كل مشكلة ومن بعدها مصالحة .. كلو ببساطه ببلش ياخد معنى تاني في إطاركم إنتو ويلي بتحبوهم .

وتبلش في حوار داخلي بإنو كيف هالإنسان بلش يدخل بكل تفاصيل حياتك .. بداخلك وبتفكيرك .. كل حوار حكيتوه بترجع تتذكره .. كل صوره بعتها بترجعي تشوفيها أكتر من مره .. كل مره بتمر من مكان إلتقيتو فيها بتنرسم عليكم إبتسامه لما تتزكر لما ضحكتو أو صار موقف وقعت كاسه أو إنكب الأكل أو أي موقف محرج أو حتى سعادة القعدة بحد ذاتها .. والأغاني يلي بتيجي على تلفزيون أو راديو وتسمعوها وبلحظتها تسترجعوه ليه أهداكياها أو أهدتكياها وسمعتها كأنك أول مره بتسمعها .

تخيلوا لو هاي الشغلات بتعيشوها كل يوم بشكل جديد ومختلف .. أو كل يوم بتجدد شعوركم فيها ؟؟ أو ببساطه تحسوا إنكم كل يوم في حب جديد ....

cuuuuuuuuuuut !!! stop ..

عزيزي القارئ ,, إبليز إحضر الفلم على الله تفهم عن شو بحكي

القصه إنو آه مرات الكتابة ما بتعطي أي حق لشو إنت بتحكي ,, الكتابة ممكن تفرجيك صورة ,, تحسسك بمشاعر ,, ممكن تدفعك لتتخيل أشياء وتبني أشياء وتستحدث أشياء جديدة .

بس السؤال الذي يدور في خاطري ويؤرق مضجعي "حالياً" إنو طب والكلمات والرسائل والمسجات والكتب والمجلات والمدونات وأي كتابه لحروف ممكن تعطيك الأكشن وردة الفعل الطبيعية لكاتبها؟؟

يعني هل أنا إزا معصبه حالياً مثلاً وعم بكتب عن كبتي وقهري ووجعي وإلخ إلخ أو بكتب عن فرحتي وسعادتي والأشياء هاي هل ممكن إنت كقارئ تحس وتتفاعل بنفس المشاعر يلي أنا بحكي عنها ؟؟ أو تحس بذات الفكرة يلي أنا عم بحكي عنها دون إضافة صورتك وتحليلك الذهني الخاص فيك .

القصد يلي بحكي عنه ممكن زي تشبيه تلاقوه بمثلاً إنت راجع من البيت تعبان أو صار معك مصايب الدنيا ودخلت على البيت لقيت الكل بيضحك ومبسوط ,, يمكن في بعض الحالات تحكي بينك وبين حالك شوف هدول في شو وأنا في شو .. وفي ناس بتوصل فيهم مرحلة يحكوا هدول يمكن بضحكوا عليي وعلى فشلي ,, بس """" بالواقع """" بكون مافي إنطباق أفكارك على أفكارهم وببساطه يلي إنتا حكيتوا لم يكن إلا من نسيج خيالك .

وهون نفس الشي لما أنا أكتب موضوع معين .. ليه إنت تفهموا بشكل تاني؟؟ أوك في فرق مابين إنت تلخبط بالفهم أو إنك إنت تضيف على ما أكتبه أو ما أذكره زي كأنك بتفسر كلامي بين السطور مع إني أنا كلامي عبارة عن سطر واحد واضح وبالنسبه إلي لم أقصد شيئاً .

والمشكلة يلي عم بطرحها مش شغلة الفهم من عدمه - بكفينا مابفهموني وما حد فاهمني - بس القصد إنو بجد مرات إنت بتحكي كلمة أو شغلة بمسج أو إيميل أو أي كتابه وببساطه تفهم على الشكل الخاطئ يمكن لأنو مش حاطين علامة إستفهام أو تعجب أو نقطه لتبين إحنا يلي عم نحكي شو ردت فعلنا ,, أو حتى فواصل للجملة فا بينفهم كلامي أو كلام أي شخص بسياق خاطئ .

إنو أوك الناس بدها تدبر حالها صارت تحط السمايلات زي :) و :( و :-@ و إلخ إلخ من الرموز يلي بتوحي بشكلها الوجه وفي ناس صاروا يفضلوا الكلام المباشر وفي ناس مابتحكي إلا بمواجهة مباشرة تحت مقولة (هاد الحكي مابنفع ينحكى على التلفون) ردات الفعل الوجهية والحركية والصوتية والحسية مرات لا تنقل إلا بشكل مباشر لتنفهم .. بالإضافة إلى أن الحساسيات الزايدة والسرحان الزيادة والتجارب السيئة المسبقة والأحكام المسبقة والحكم الخاطئ ولخبطة الأمور وحتى لما ما تقرأ الكلام بشكل صحيح

أوك أعطيكم مثال حي :

رسالة من : مرحبا . ممكن تساعديني بشغلة مش عارفه أعملها ومحتاجة مساعدتك

أنا : مش عارفه مابقدر أكون عندك حالي بس بالنسبة للشغلة الفلانية خابرتك عملتيها قبل هالمرة فا ببساطة كرري نفس الخطوات

رسالة من : شكراً ومش أنا يلي عملتها هاي المرة في حد تاني ساعدني فيها

طبعاً وإنقطع الإتصال فيما بيننا بعد هيك ومش فاهمه وين الجريمة النكراء يلي عملتها وشو قصة العالم ب "شكراً" .. قسماً بالله بينسم بدني إزا حد حكالي شكراً حتى لما تنحكى بأي طريقة .

طب سؤال هيه حكتلي شكراً بالقصد المنيح وأنا فهمتها غلط عشان بكره هاي الكلمة؟؟

طب شو القصد من إنو حد تاني عملي هاي الشغلة وما بعرف شو ؟

طب أنا شو يلي غلطت فيه لما حكيت إنو تتكرر نفس الخطوات السابقة ؟؟

شايفين زي هيك مواقف مابعرف راسي من رجلييي .. إنو واااااااات .. مش فاهمه وكتير بتصير مواقف زي هيك وأكيد بتصير مع غيري لأنو أكيد مش أنا يلي إخترعت كلمة "سوء تفاهم" أو "لخبطه" أو "لخبطيطا" أو "ليخا" أو "طعه وقايمه" أو ما شابهها .

بريء يا بيه .. الشخص الوحيد يلي ما بعاملك هيك هوه الشخص يلي جد بيعرفك وجد قريب منك ,, إلى حينها يا بتلاقوا حل يا بتستنوا لأكتشف كيف مخ البشرية بتشتغل .

حقوق المؤلف

جميع الحقوق في الصور أو النصوص المقتبسة أو الفيديوهات أو الأفكار وحتى نموذج البلوج كلها تعود لأصحابها لا أنا لا أنسب ما أضيفه (من غير ابتكاراتي الخنفشارية) لنفسي وإنما الإضافة لغايات التوضيح والتأمل وباقي النصوص المكتوبة فا من كتابتي وسواليفي الخاصة

شو كمان شو كمان شو كمان؟
آه وما عندي فيسبوك لا حد يدور عليي ويحكيلي متنكرة
i hate it