نورنياتي: 5arbashati

Showing posts with label 5arbashati. Show all posts

تعب المشوار

زمان ما اجيت هون ،، زمان ما حدا اجى هون ،، تقول اتفقنا كلنا نختفي …

اشي سافر وشاف ما شاف وقلبت افكاره ورجع تاركنا ،، اشي هاجر وتركنا من اولها وكان حالف الا يترك كل اشي بذكره في حاله ومع هيك مستمر يقارن كل اشي بشوفه فينا ،، تجوز/ت وخفونا كأننا عيبه او ماضي معيب ههههه (وانا مالي يا لمبي؟) ، في يلي انقطعت به السبل مع الباقي ، في يلي اذا انوجدنا وجد واذا اختفينا ملوش مصلحه يفتش ، في يلي كبر على هالامه يلي نص شخصيته منها ، في يلي لسا بفتش كل ما هزه الحنين ، في يلي نفسه بس مقروص وخايف ، في يلي شايف وبراقب من بعيد وساكت ، في يلي ممششششش فاضي يحك راسه يلي مش لاقي يحلقه او بطل يحلقه كون الزمن عمل فعله ، في يلي نسي ،، وفي يلي انتسى ،، وفي غيبه الموت … (ادعوا لهيثم شيشاني بالرحمة) .

انا من نوع الناس يلي بحكيلك (بحبش يرجع الزمن) من باب ان الرجعه بتحمل فيها معاني الألم يلي عشتها ، مافي اشي برجع ببلاش عكل حال ، لا شكرا ، بنفس الوقت ما عندي حل للظرف الحالي ، شو بالايد لعاد؟ تعيش عالاطلال ، كل واحد ذكرياته في كيسه ، باقي الاسماء والصور في ذاكرة تخزين مخفيه في ابصر وين ، واللي يقولك قابلني قطّعه .

وين صرنا والسؤال الاكتر يلي بسأله لحالي شو كان تغير لو كله اللي صار ما صار؟؟ معقول شخصياتنا هي نفسها قبل وبعد ، ويعني ما تأثرت بهالكم الهائل من الاشخاص والاحاديث والاضطرابات النفسية والعاطفية يلي شهدتها آلاف الساعات والهواجس والعلاقات؟ طوش وقيل وقال وحب ولدنه والتنمر يلي بعجبك (مكنش عوقتنا اسمه هيك) وتنكيت عيار تقيل وعبيط وزمباوي ، في ناس بسيطه وفي ناس هبلة رسمي بتشكك في حالك انك صاحي ولا انتا الاهبل؟ ، في ناس ساعدت بمقابل وببلا ، حكي وحكي وحكي بفايد وببلا .

فاتنا القطار وهرمنا ،، مرقنا من الزنقه وحتى بعد ما تغيرت الحاره ، والوجوه شاهت اختلفت ورجعت بشكل او بآخر ، اشي مشى علينا واشي تجنبناه ونجينا منه ، ما نجينا من ذكرياتنا ، ليه كنا نستمر ونعمل بحالنا هيك؟ شو كننا عم نحاول نثبت ؟ مافي بورد عليه نقاط تسجيل ومين فاز ومين خسر وكم ضل الوقت ، وكنا مستعجلين ، ليه؟ كنا عم نهرب من حدا او خايفين من حد براقبنا؟ … لعاد شو نحكي هسا يلي واحدنا خطوته /نبضه /توتره /وساعات نومه مسجله (بالفانيه) وكل اشي بتسجل من قائمة افلامنا لشو قرأنا كتب هالسنه لشو أكلنا ووين سكننا وشو رقم رحلتنا وصورها بالتفاصيل المصطنعه ، وقادره اعرف حضرتكم وين اشتغلتوا باليوم وبالمنصب وتاريخك من ايام مدرستك الاولى الى (حاليا) ، بتحب ابعتلك نسخه من رسالتك الماجستير؟ / ابحاثك؟ مقالاتك؟ بتوقع ما عندك نسخه منها صح؟ .. كلنا هيك .

بتتذكروا دفاتر ارقام التلفون؟ لا مش الدليل ، بقصد الدفتر يلي كان جنب التلفون الارضي وكان فيه مرتبه الارقام حسب الابجديه كانت دفاتر زغيره (مش الاجنده ولا المفكره بتاعت التفكير قصدي)، كبرت مش لان الارقام كترت ، لا ، من كتر ما كنا نخربش وتتغير الارقام ، مدخل فلسطين صفر ولا ٢؟ بتلاقيه نفس الرقم مكتوب بالرقمين ونتصل على نفس الرقم بالمدخلين ، هسا البني آدم الواحد بده سجل لحاله ، حامل تلفون واحد بشريحتين والواتسابين كل واحد على رقم غير الشريحتين والفيسبوك على ايميلين وقس على ذلك مقاسين او اربعه ، اه مقاساتنا كلنا تغيرت ،، لا ، مش عضلات ، اسكت هون ، كل واحد عارف عن شو بحكي ، لا المشد مش رح ينفع هسا يا صفيه ولا الشاي الاخضر اسكتي واقعدي.

اينما كنتم ، وشوما كان وضعكم ونفسيتكم ، ورغباتكم وحجم عائلاتكم ووجباتكم وواجباتكم ، ودائرة اكتآبكم ، وعدد مرات اعتقالكم بمرض الكوروهنا ، وكم مره تركتوا شغل وسبيتوا عحالكم في بلدكم او غيره ، على حجم اشتياقكم لكل شي نفسكم تحبوه وتكونوا فيه/معه/بوقته …. الخ الخ ،، انتو ناس مناح ، كنتوا ناس مؤثرين ولا زلتم ، وصوركم وضحكاتكم وظهوركم ولو كان (اونلاين) وردودكم واحزانكم وافراحكم وتجمعاتكم وانفاسكم لا زالت تصدح في ذاكرت شخص شخصين او اكثر ، انتو مش لحالكم دام هيك ، انتو متواجدين في قلوب ناس كثير وانتو ما بتعرفوا … طبتم وطابت ازمانكم .

وهاك السجره العتيقه ،، يلي ما كنت تطيقا ،، حبيتا واشتقتلا واشتقتلك ، :dance:.

هذا البوست اهداء لجميع المحاجيب في منتديات ابو محجوب سابقاً ، abu mahjoob forum

حساب القرايا والسرايا

خلال مشاهدتي في سنوات ماضية لمسلسلات من امثال سي اس اي وشبيهاتها تبين لي بأن هاي النوع من المسلسلات وجزء كبير من السينما كمان بعتمد على فكرة ( العادة ) بمعنى انو التحليل الجرمي لمسرح الجريمة والوصول الى المجرم كان بعتمد على تتبع العادة يلي بسلكها ذاك النوع من الناس يلي يندرج تحتهم المجرم .. ما بعرف ازا كان هالإشي هوه نفسه الستيريو تايب او مجرد تأصيل للعقدة او االأحداث من قبل المؤلف ليرسخ في اذهان الناس ان الواقع فعلا هيك او حتى نسخه من قصة فردية على باقي المجتمع او على فئة من المجتمع واكبر دليل على ذلك انو انخلق في روسنا افكار كتيره عن مجتمعات فقط من الافلام واعتقد فاهمين كيف الغرب بتفرج علينا سندا لكون المجتمع الامريكي لحاله بياخد من التلفاز ٦٠ بالمية من ثقافته وفي المقابل كيف احنا بنشوف الغرب يلي بعمرنا ما اجتمعنا فيهم او عرفناهم بس برضو من التلفزيون والسينما والادب .

ركزي شوي ركزي ... بعد ما عايشنا التلفزيون وتعلمنا حركاتها المكررة وافشات الافلام والمسرحيات وكل الافكار يلي حتى المؤلفين والمخرجين صاروا يقلدوا بعض .. يعني وبعد تكرارها على ادمغتنا لعشرات المرات للسبعين سنة الاولى في حياتنا صار راسخ في ذهننا كتير شغلات متوقعين انها لما تصادفنا المفروض نعمل/نحكي هيك او يتلوها هيك او تكون نتيجتها هيك سندا انو الانسان في الامور يلي على وشك التعامل معها اما يرتجل (سواء بناء على اساسات وتفكير سليم او بشكل عفوي زي اللي بقطع شارع) او برتجع خبرة شخص غيره تعامل مع هيك موقف .. ودام علاقاتنا مع الاشخاص شبه فاشلة ومفككة وملغمة عدا عن ان الخبرات بتوصلك منقوصة ومليانه كذب وحذف ل ٧٠٪ من المعلومات فيها .. فا بتصفي عم تسترجع خبرة من التلفزيون وهون ما بحكي عن اقتباسات المسرحيات وافلام عادل امام بل بحكي عن موقف معين يكون تصورك انو اذا تصرفت مثل موقف الممثل او البطلة رح ينتج نفس النتيجة يلي وصلولها همه .

اكبر دليل على ان اللي في التلفزيون تم المحاولة لتطبيقه في كافة فئات المجتمع انك اكيد سمعت مأسات شخص او شخصه حول الحب والشغل والحياة انو ليه بفرجونا انو هيك الحياة وهيك مش هيك وبحكولنا "قصص واقعية" و "الواقع المجتمعي" والخ الخ .. عدا عن تدمر علاقاتك الاجتماعية بناء على انها مش متوافقة مع العالم (يلي محصور بين شاشة التلفاز والريموت) لأنك ببساطة بتكون مقتنع باللاوعي انو هدول الناس يلي في الشاشة ناس وبشر وعائلات وحب وحياة وكلهم هيك طيب ليه ما اكون انا هيك؟؟

بعد وقوعك من الثقوب التي تظهر في ركاكة الحبكات السنمائية والعقد للقصص اللي بحكولنا عنها دراما واقعية .. وتصل الى درجة ال (آآآآه هسا فهمت) وتبلش تسترجع كل شي مر على حياتك في مواجهتك للتلفزيون وتبلش تصاب بخيبات الامل من اول معرفتك انو المصارعة الحرة مجرد تمثيل .. مرورا بعدم امكانية تطبيق اي حركة من ابطال الملاعب وكابتن ماجد .. ثم انك ازا طلعت على التلفزيون رح تبين مصفرن وابو كشه واواعيك مبهدلات وما رح تحكي كلمتين على بعض .. ثم يتلوها انك كرجل مش كل النسوان رح تعاملك زي الحج متولي وان كنتي بنت مش دايما رح يحبك ابن الجيران او دكتور الاسنان او ازا قعدتي سنة في السجن وتطلعي ما رح يضلوا حواجبك مثل ما همه وشعرك ازا نفشتيه مش رح يصير سكسي كيرلز .

يمكن ما عندي هالتطور الاجتماعي او الحياة الاجتماعية الصاخبة يلي ممكن ااكد فيها انو يلي بصير في التلفزيون واقعي او لأ .. بس بعرف انو حتى واقعنا يلي عايشينه بطل متل ما هوه .. بطل الرجل هو اللي بنحرق دمه على فلسطين (المفروض اكمل واخواتها بس قصدي عما سبق وليس عما يتلوا) بس عم بنحرق دمه على برشلونه والريال .. المرأة العقلانية يلي كانت تحكم البيت وينسمع كلامها صارت تنضرب وتتبهدل ويرجع تصنيفها لما بين ساقيها زي ايام الجاهلية .. صحيح كنا نغني اعطونا الطفولة بس هسا الاطفال صارت تحكي اعطونا دفى ومي وشوية انسانية من بعد التعذيب والتربيط بالجنازير والقتل والاغتصاب يلي على ودنه .. يعني صرنا احنا ما بنشبه احنا .

وهون يبطح السؤال نفسه قائلا .. بكوننا مجتمع مخلخل وغير قادر على تأسيس اي تصرفات مقبل عليها في المستقبل القريب والبعيد بناء على اي خبرات انسانية او تلفزيونية كوننا يعني لا لاقيين مجرب ولا لاقيين حكيم .. وكوننا شعب عقله على قده (قلنا على قده يعني قيس قدك واعرف قديه عقلك قبل ما تطرقني مسبه) وعالأرجح ما رح نستخدمه .. السؤال يقول: طيب كيف رح نصفي نتعامل مع بعض اونقدر نتعامل مع بعض في مواقف اول مره؟ .. وهون انا بقترح تعميم فكره قد تكون .. وهون بقول قد .. قد تكون ناجحة الى حد ما .. وهون برضو بقول الى حد ما .. قد تكون ناجحة والى حد ما وممكن البعض تعجبه .. وهون بقول ممكن البعض - طيب خلص سكتت من غير لف ودوران خلصينا - انو يا جماعة اي شخص انت بتعرفه وهوه بعرفك وصار موقف بينكم ما واحد منكم (بحكم معرفتكم ببعض ومعرفتكم انو ما واحد منكم عنده خبرة بطريقة التصرف بهيك موقف) صادفه من قبل فا اعملوا زي ما بعملوا في تصور السينيما لا لا مش القصة والعقد وهالحكي .. قصدي تصرفوا عادي وواجهوا الموقف وازا ما نجحتوا من اول مره اعملوا (كااااات وقفوا.. مره تانية ثري تو وان اكشن) وبترجعوا تتعاملوا في هاد الموقف مره تانية وهكذا .. وبعد هيك بنصحكم تعمموا خبرتكم على غيركم من البشرية ضمن تجربة حديثة معاصرة واقعية اجتماعية وتمكنوا الغير من الاخذ بخبراتكم وهيك لا بموت الراعي ولا بتفنى الغنم .. وغطيني يا كرمة العلي تراني مش فاهمه عن شو بحكي.

نهاية العالم ونهاية اليوم

مع الانتشار الدائم للأفلام التي تبشر بنهاية العالم المأساوية ونهاية البشرية السوداء بشتى الاشكال من بداية الغزو الفضائي الى تدمير الكرة الارضية وفناء البشرية الا من ممثل اجنبي في العادة بكون امريكي .. فا يبطح السؤال نفسه عن موقعنا احنا أي الانسان العادي يلي ما إلو وما عليه وكيفية مواجهته لهذه الفكرة المنيلة بستين الف نيلة بالرغم من انه يتم استثنائنا دائما منها طبعا يخصم من ذلك أهرامات مصر ومن يقطن فيها بالإضافة الى احياء الهند وباكستان التي ترمز الى العالم العربي وبرضو ما بعرف ليه .. يعني ماشي انا مابعرف احكي كلمتين هنديات على بعض بس بنفس الوقت يشار الي لما احكي بالانجليزي (هاد ازا ما خلو لهجتي جيبرش) بتكون دائما بلكنة هندية او حتى بلكنة روسية .

مش هون ابدا موضوعي (اللكنة والصورة العربية في اعينهم) .. انا موضوعي يتعلق بنهاية العالم بالنسبة النا .. وهون انوه للسادة القراء الواعيين انو انا ما بحكي عن يوم القيامة والحساب ، بل انا مجرد بقارن نظرتهم لنهاية العالم بما ما تعني لنا نهاية العالم بمنظورنا الخاص زي ما حكيت المرتين السابقات .

يعني همه بالنسبة الهم هو براكين وزلازل واسفلت الشوارع بيتكسر (مش من مشي اللمبي عليه طبعا) وبالنسبة الهم البحر بغضب وبهوج عالعالم بهالتسوناميات وبجرف البشرية والعساكر ببنوا جدار والناس تتساقط خلف الجدار واشي بحكيلك زومبيات واشي بحكيلك القرود بتصير تمشي وتطخ بهالناس .. المهم انو في جرافك عفق بصير .. وطحشة ناس بتبلعها الارض .. وسيارات حبطرش واقفة بالشوارع .. رياح سوداء وزوابع تحمل البشر والبقر على حد مش سواء والباقي عندك .

اما بالنسبة النا غير .. احنا بنشوف نهاية العالم غير .. زي جدة غير .. احنا بنتهي عالمنا لما نعرف انو الراتب رح يتأخر عن قسط القرض .. لما نعرف انو حطينا يلي فوقنا وتحتنا في مشروع وانتصب علينا .. يدق ناقوس الموت لما وحدة بتحب واحد ويلقطها اخوها او حتى يجوزوها من غير من تحب او حتى ترسب في التوجيهي او اي امتحان .. وتتوقف ساعة الزمن لما بنت تكتشف انو كاين في بقعة قد راسها على بنطلونها وما حد حاكيلها او حتى بنت كاين ساحل الحجاب وشعرها من الاطراف مبين او كتفها مبين بدون ما تنتبه او حتى لما تكون بأول الدوام ويخرب اشي زي حذائك او حزامك او تنخلع ايد شنتتك .. ويبنشر عداد عمرك لما تكتشف انو وقعوا منك مصاريك او ضاعت فلوسك وانت ما بتعرف وين وقعتهم حتى .. وضاع العمر يا ولدي اذا ضيعت رقم مهم او هويتك او جواز سفرك في غربة او حتى نسيت جواز سفرك وتذكرته على باب المطار او وانت بالثلث الاخير من الطريق .

نيلة تنيل الدنيا صار معي احباط قد راسي .. مش عارفه اكمل المهم انو وصلتكم الفكرة .. انو يا جماعة احنا ناس بسيطين يعني ابسط من الطحالب في هاي الامور ونجمنا خفيف اقل شي بنبئنا بنهاية عالمنا الخاص .. مش محتاجين بركان ننصرع فيه ولا اصطدام كل كواكب المجرة فينا عشان نحس بالنهاية .. لأننا ببساطة انهز بدننا اكتر من فيفي عبدو وعشنا الصدمات اكتر من سيارات ملاهي الجبيهة الترويحية وشفنا الخراب والدمار والتجريف اكتر من اي لعبة اكس بوكس ومش رح ننقز بعد ما صرنا خبرة في اصوات التفجير وانوار القنابل والرصاص والصواريخ وهدير الدبابات والجيبات يلي على شوي رح يصيروا الصغار يقلدوا اصواتها مع اصوات البسس والعصافير .. يعني احنا تعدينا هاي المرحلة من نهاية العالم ووصلنا للجهة المقابلة ورجعنا .. وحابة ابشرهم انو رحنا على البحر وبلطناه ورجعنا زحلقة عليه .. وحاليا زاهدين في ما تبقى النا من خلقة هاللي ظل فينا من عقل .

ومع كل هالصورة السوداوية القاتمة والكاتمة اكتر من ريحة الأرجيلة ويلي انا بحكي اسمها جاي من الارجل يعني الأجرين وريحتها بتخزي زي ريحتهم لما تطلع .. بس بحب اذكركم باللحظة اللي بتروح فيها من دوامك والدنيا غاسليتك بالمطر والبرد وتبهدلت بالترويحة والأزمة وتبهدلتي بالمواصلات .. تذكروا هديك اللحظة يلي بتوصلوا فيها باب البيت وبتشلحوا جراباتكم المبلولين وتدفوا حتى لو على عين الغاز وانتو بتشموا ريحة الشاي بالميرمية او شوربة العدس وتتدثروا زي القذافي قدام التلفزيون وعيونكم تتغازل من النعس .. تذكروا اللحظة يلي بتروحوا فيها واواعيكم ملزقة فيكم من الشوب او اي قطعة اواعي لازقة بجسمكم رغما عنكم وتبدلوا بأواعي مبهبطة وواسعة زي الخيمة واغلبها بتكون ما جار عليه الزمن من اواعيكم او اواعي غيركم وتحس انو جسمك بتنفس حرية .. وتذكروا اللحظة يلي لما تكون ميت من العطش والجوع بساعات رمضان وانت مخك بسترجع كل اشي زاكي (شفته) بحياتك وتقعد تحكي لحالك انك رح تصرف ما تبقى من راتبك على هاد الأكل واللحظة يلي تحط اول لقمة فيها او اول نقطة مي فيها وترجع تتغير افكارك وتقبل بأي اكل وتطمنك نفسك انو اه كانت نزوه في حياتك ورح تمر مر الكرام وان الخطيئة اللي كنت رح ترتكبها انعصمت منها يا انسان يا مؤمن .. وتذكرهداك الليفل في كاندي كراش او اي لعبة اخرى او حتى مبارات كرة قدم وكان هالشي واقف في زورك ومؤرقك وباطت تشبدك وتتغلب عليه .. ولا تنسى حتى موبايلك او لابتوبك او اي جهاز عزيز عليك يلي يخرب خراب شنيع ويحكيلك احدهم انو اه لسا في امل وبالفعل يصلحولكياه من دون ما تروح الداتا .. وغيرها الكثير الكثير ..

يلي بدي احكيه انو مابعد الضيق الا الفرج .. فا استنوه

كماليات ليس إلا

بتذكر اليوم اللي دخلنا فيه أول مره مسجد الحرم المكي .. كنا يا دوب داخلين مكه قرر رئيس الحملة ندخل على طول على الحرم وحسب ما بتذكر كنا وراه رجال ونساء وأطفال ندعي من وراءه ونهرول الى داخل الحرم باتجاه الكعبة ,, وبكوني بنت صغيره ما كنت فاهمه إيش اللي بصير (شو مبتغاه او القصد منه) بعرف انو رايحين نشوف الكعبة بس هيبة الموقف واختلافه خلاني متأهبة في تلك اللحظة ,, ولا زلت وانا على مشارف ال 30 (مش مشارف مشارف بس قربت يعني) مصدومه من هاي الذكرى وكيف أنا الصغيره حسيت بذاك الاحساس .

دعاء وذكر ,, آمين ,, رافعه ايديي ,, حفاة ,, تعبانين من السفر ,, وعم (بركض لصغر حجمي) ,, وإذ تتجلى الكعبة المشرفة أمامي .. وهيبتها انفرضت في داخلي بشكل غريب لدرجة كنت رح ابكي .. وكوني صغيره وقد الفطعة .. سقفها كان بحدود السما وكأنك بتتفرج على السما ,, صدمه ,, استغراب .. مشاعر ما لقيتلها تفسير لا قبل ولا بعد ., ببساطه مشهد ما بقدر اشيله من راسي .

في مشهد مشابه سواء من قريب أو من بعيد .. كنت على احد المواقع وكان في مصور منزل مقطع لنفسه بصور خطوات أقدامه على احدى الأدراج ,, اصابني الفضول اعرف شو آخر الدرج .. وكان انفراج خطواته ورفعة كمرته متوافق مع نهاية الدرج يلي هيه كانت .. (قبة الصخرة) .. ببساطه استرجعت نفس الشعور يلي حسيته .. زي كأنك تتفاجئ بعيد ميلادك .. تلتقي بصديق عزيز ,, تشوف حبيب .. ببساطه شعور لا يوصف .

كان عنوان الصورة يلي قرأته لاحقاَ (الطريق إلى الأقصى) .. نزلت لأشوف التعليقات وإذ بصراع شرس ما بين المعلقين .. يحتد ضراوة بين ناس كثيرين في الآونه الأخيرة .. شو الغاية منه أو شو الهدف منه في النهاية ما بعرف وليه أصلا تطور لعراك ونزاع وصراخ ما بعرف .

بجوز ناس تحكي يمكن يهود وعرب بتقاتلوا .. لا بالعكس هالخلاف بين ناس عاديين ولا يرتقي حتى ليكون حوار ديني أو حتى تثقيفي متكامل .. هو ببساطه صراع ما بين (قبة الصخرة) و (المسجد الأقصى) .. وانو لا تضلكم تغلطوا وفضحتونا ومن هالحكي وكلام آخر بحال انزعه من دماغي لانو حكي فاضي (ما دون التفرقه أقصد) .

لا أنكر أن الأعلام والنت يصور القدس كاملة ومختزلة بقبة الصخرة .. مستثني باقي معالمها أو أهم مراكزها الدينية سواء للمسلمين أو المسيحيين .. للدرجة يلي ترسخ في ذهننا انو القدس = قبة الصخرة .. وبالمقابل رح اعطي آخر كم صورة واحكيله جاوب بسرعه واختار شو هو الحرم المكي رح يختار الكعبة .. واسأله عن المسجد النبوي يمكن يخربط بين تاج محل ومسجد الشيخ زايد .. هاد أمر انتشر ولا شك لو تسأله عن برج ايفل او قوس النصر او تمثال الحرية ما رح يخيب معه .. المسألة مش متعلقة بالجهل بقدر ما هي عبارة عن معلومات عامه اندرجت مره مرتين في حياتنا حول مقدساتنا مره في المدرسة ومره على حيط غرفة المدير يلي نخاف ندخلها وانتهى .. ما بين فرنسا الحب وامريكا الحرية هي مرتبطه بالعاطفة والمال فا لازم نتعلم عشان بلكي اجتنا فرصه أو بلكي الأجانب سألونا عيب ما نكون بنعرف .. عدا عن تكرار هالصور مليار مره في كل اشي بحياتنا .

سواء قبة الصخرة او المسجد الأقصى او حتى باب المغاربة أو حتى السوق القديم أو حتى قرى القدس ومحاسيمها (حواجزها بالعبري) الأمر ببساطه مترابط ببعضه .. لو راحت بوابه بتروح التانية ولو سقط احد المساجد رح يروح أخوه .. الأمر لا هو بالتسمية ولا هو بالصور .. الأمر إنو يكون بينك وبين الساحة (يلي فيها كل المساجد) كم كيلومتر وتنمنع تدخلها .. الأمر تكون من نفس القدس وما تقدر تزورها .. الأمر اللي ينحكالك حرام على بلابله الدوح حلال على الطير من كل جنس .. يعني الجنوب إفريقي أو من الهنلولو ممكن يزور المصلى المرواني وإنت يلي مكتوب بهويتك فلسطيني مواليد القدس يحكولك روح ممنوع تدخل .. الأمر انك تشوف ولاد وبنات تموت على بوابها وما تقدر تسحب جثتهم .. الأمر انك تشوف المصاحف والسجاد فيها يتدنس وأنت ما تقدر تخطي عتبتها حتى .. الأمر أنك تشوف حجة قد ستك وأكبر لحالها محنية الضهر رايحة تصلي الجمعة زيها زي اي انسان على كرة الأرض وتشوف ابن 18 اصغر من احفادها يتمقطع فيها ويحكيلها تروح عدارها .. الأمر انو يصدر قرار بحبسك وتغريمك والحجز على كل اموالك وفوقها تضل مديونلهم بس لأنك ساكن في بيت ورثته عن جدك وجد جدك في احدى ضواحي بيت المقدس ,, الامر انك تشوف قبور جدودك والقادة يلي ماتوا عشان كرامتك تتهدم شواهدهم وينكتب عليها عبارات بذيئة .. الأمر انك متأكد انو هاد الأشي إلك هاد المكان من حقك ويكذبك كل العالم .. وفي الآخر يزيد عليك البل أحدهم ليحكيلك انتا فوق هاد غلطان هاد مش الاقصى يا غبي .. وخليك انتا غبي وكلنا نضل اغبيا .. مش هون العيب أبداً .. العيب في مكان تاني اعتقد ...

المافيات والسيما

كنت عم بسترجع في ذهني الصوره العربية في كل هالأفلام الناتجة عن هوليود وخارجها (ويشمل ذلك المسلسلات) ,, وأي شخص متابع بشكل قريب أو بعيد لن يجد صعوبة في ظهور نمطية عجيبة سواء للعرب أو الجنسيات الأخرى التي تجد الولايات المتحدة فيها عدوة لها .. وبغض النظر عن سبب ذلك أو حتى مدى اتصاله بالحقيقة .. فقد استمرت هذه الأفلام في خلق وتكرار صورة واحدة موزعة على عدة جماعات شريرة تسعى للشر أو اهداف في باطنيتها الدهاء والمكر .. ومن خلال عمل بحث بأغلب الأفلام يلي حضرتها على مدى السنوات فقد وجدت التالي مقسماً إلى أشهر المافيا/المجموعات (أيا كانت تسميتها) ويندرج تحته تفصيلاته:

المافيا الكوبية (وتندرج تحت ذات الصفات دول امريكا الجنوبية والوسطى) :

لون البشرة:
الحنطية إلى السمراء .

غايتها:
نشر وبيع الحشيش والهروين والكوكايين وحماية بيعها وتوزيعها .

المنظر العام:
ملابس ذات الوان فاقعة وبراقه وقمصان مفتوح أزرارها إلى السرة وسنسال دهب.

الصورة النمطية لقصصهم:
حبيبة الزعيم دايما سبب المصايب.

نقطة الضعف:
إذا قتل الزعيم إنفرطت مسبحتهم وأكلوا هوا.

الممثلين:
حنطي البشرة وقدرة على إنماء الشوارب ولكنة انجليزية اسبانيوليه وينضح عرق.

الجهة المستهدفة:
الولايات المتحدة الأمريكية ورعاياها وقادتها أو دولة حصة لأمريكا واستنجدت فيها.

المافيا الروسية (وتشابهها أيضاً ألمانيا):

لون البشرة:
بيضاء وبشدة .

غايتها:
الدمار الشامل والسيطرة على العالم يوماً ما.

المنظر العام:
الشعر المسبسب وجكيت الفرو الطويل.

الصورة النمطية لقصصهم:
قدرة عالية على تحمل الكحول وقصة قديمة للأخت أو الأبناء.

نقطة الضعف:
عدم القدرة على القتال دون أسلحة.

الممثلين:
أي ممثل أبيض حتى لو أمهق وعيونه ملونات وأشقر بشدة في بعض الأحيان.

الجهة المستهدفة:
الولايات المتحدة الأمريكية ورعاياها وقادتها أو دولة حصة لأمريكا واستنجدت فيها.

المافيا الإيطالية:

لون البشرة:

حنطية إلى بيضاء.
غايتها:

السلطة للتمكن من العمل والتحرك دون مسائلة.
المنظر العام:

البدلات السوداء والهندام اللي على المسطرة وخاتم بالاصبع الصغير.
الصورة النمطية لقصصهم:

قصص عائلية وتكون الأم في القصة بدون قصة.
نقطة الضعف:

الخيانة بينهم.
الممثلين:

اي ممثل حتى لو امريكانو المهم يحكي الكلمات المفتاحية تبعتهم وأكم حرف أطالي.
الجهة المستهدفة:

الولايات المتحدة الأمريكية ورعاياها وقادتها أو دولة حصة لأمريكا واستنجدت فيها.

المافيا اليابانية (وتندرج تحتها الكورية والصينية):

لون البشرة:

الصفراء الشرق آسيوية.
غايتها:

الأسلحة.
المنظر العام:

يا بدلات بتشبه بدلات سوق البالة مع اسوارة دهب يا الكيمونو مع سيجار في تمه.
الصورة النمطية لقصصهم:

وأنا صغير كان فيه ناس كبار بيضربوني.
نقطة الضعف:

افقع لغم صراع السلطة وراحوا دعس بين الاجرين.
الممثلين:

أي ممثل عيونه ذيقات وشعره اسود ساحل.
الجهة المستهدفة:

الولايات المتحدة الأمريكية ورعاياها وقادتها أو دولة حصة لأمريكا واستنجدت فيها.

المافيا الأمريكية/الأفريقية:

لون البشرة:

السوداء على اخلاف درجاتها.
غايتها:

السيارات الفارهة والنساء والسهرة.
المنظر العام:

ملابس واسعة وألوان فاقعة وذهب ونظارات في منتصف الليل.
الصورة النمطية لقصصهم:

الحي ورفاق السوء ومعاملة البيض السيئة.
نقطة الضعف:

قلة الاحتياط لانشغالهم في الحفلات الحمراء إياها.
الممثلين:

أي ممثل أسود البشرة.
الجهة المستهدفة:

أي حد معه مصاري أو يهز كتافه قدامهم.

المافيا الأفريقية (ويندرج تحتها كافة دول القارة السمراء عدا شمالها):

لون البشرة:

السوداء الحالكة.
غايتها:

الثراء الفاحش يلي ما إلو طعم.
المنظر العام:

حيوانات برية وسيارات جيب مكشوفة والكثير من الفواكه والتحف الأفريقية التقليدية.
الصورة النمطية لقصصهم:

أهلهم أنقتلوا في مجزرة دموية.
نقطة الضعف:

سرعة موتهم وتساقطهم زي الذباب يعني من شابه أباه ما ظلم.
الممثلين:

أي ممثل أسود البشرة.
الجهة المستهدفة:

مستهدفين حالهم والمحرض بكون الجنس الأبيض لاستغلال ثرواتهم.

المافيا العربية:

لون البشرة:

الحنطية أو سمراء.
غايتها:

التدمير عن طرف وجنب والشهوانية الجنسية.
المنظر العام:

عمامة راس ودشداشة قصيرة أو ملابس رثة غير متناسقه ولحية وحواجب كثيفة.
الصورة النمطية لقصصهم:

إلو دخل في أمير عربي أو صدام أو القذافي أو القاعدة.
نقطة الضعف:

العشوائية وقلة الفهم والنساء الشقراوات.
الممثلين:

باكستاني أو أفغاني أو هندي المهم مش عربي.
الجهة المستهدفة:

الولايات المتحدة الأمريكية ورعاياها وقادتها أو دولة حصة لأمريكا واستنجدت فيها.

المافيا الأردنية (الدواوين والتلاوين):

لون البشرة:

غير معروف من كتر الوسخ والعرق.
غايتها:

التسكع ومعاكسة البنات أمام المدارس وتجميع ضربات المواس واختراع كلمات ملغومه.
المنظر العام:

الحزام يلي للحلق والشعر المسبل بالجل واسوارة جلد ووشم غير مفهوم.
الصورة النمطية لقصصهم:

غدرت فيه حبيبته أو جوزوها لغيره وهو في السجن.
نقطة الضعف:

اسم امه وخواته.
الممثلين:

لا يوجد كونه عضو مراقب.
الجهة المستهدفة:

شوفيرية وكونترولية الخط.

أنا وبكامل وعيي وأهليتي أخلي مسؤوليتي عما قمت بكتابته آنفا ...

عشان تكون انسان

صار عشان تكون انسان بالمعنى الطبيعي (الحديث) لازم ترافقك هالة من عدة اشياء تثبت إنك مش انسان اصلا عشان تثبت لنفسك انك انسان فعلا سواء من مشاعر او تصرفات او اكسسوارات أو طريق معين في الحركة واللبس أو المواقف التي قد تحيط بك.

قال تعالى (لقد خلقنا الإنسان في احسن تقويم.ثم رددناه أسفل سافلين) .. وعلى نفس مبدأ يلي يقرأ قوله (ويل للمصلين) ويسكت في ناس أيضاً بعتقدوا إنو ربنا خلقهم في أتم وجود وسيتموا على ذلك لو شو ما عملوا من خبايص وعمايل وبلاوي .. يعني أنا بضل انسان راقي ومتطور دامني معي احدث نوع موبايل ومرسيدس بتلمع وبدله ونضاره وفستان ماركته مرشومه عليه من ساسي لراسي وطالما ساكن في منطقه راقيه وبعيش الحياة الفلانية وبسافر معناه هاد ما يجعلني إنسان جدير بالإحترام وعالي الخلق ولا بد أن تتم معاملتي بأحسن من غيري ,, أنا أصلا أحسن منكم .. أنا عايش العيشة الصح ,, أنا أنا أنا .

يعني هل انت كمصنف في كوكب الأرض إنسان لازم تعمل كل إشي خارج النمط البشري وبشكل غير عادي عشان تثبت إنك عادي؟ لازم تحتقرنا عشان نحترمك؟ لازم تدافشنا عشان نبعدلك؟ لازم تصرخ عشان نسمعك؟ لازم تحملنا مليون جميلة عشان نشكرك؟ لازم تخبط علينا عشان نحس بوجودك؟ .. الأنكى إنو هاي الشغلات ما بستخدمها لمره واحده فقط لا غير .. الأمر ببلش بالتمادي من أول مره وتتعدى بعد ذلك بإنها تصير جزء من شخصيته الإحتقار للناس والتعالي والنفخه الكذابه والإتهامات الزائفة لدفع الشبهة عن نفسه هاد غير المظاهر الفاضية والتسميع على الفاضي والمليان ونبذ الأخرين وإلخ إلخ .

لازم تعمل إشي مش عادي عشان تكون عادي؟؟ ,, هل هاد بعملك إنسان درجة أولى يعني؟؟ .. هل هاد بعمل منك إشي كبير؟؟ ,, والأنكى الجماهير يلي تنحاز إلو لدرجة بصيروا "ملكيين أكثر من الملك كما يقال" .. ما بعرف إذا همه نفسهم بعرفوا إنو بكل هالعرس يلي محيط به نفسك أنت بتعمل هيك عشان توصل لنفس درجة ((العادية)) يلي انا وغيري فيها .. يلي هيه الاحترام واداء واجب الشخص اتجاهي والتعامل البشري ,, بس لأ هوه بالنسبة إلو لازم اخوفك عشان تحترمني ولازم اخليك تحت رحمتي عشان تأدي واجبك اتجاهي ولازم اتبروز قدامك وانفش ريشي عشان تعاملني زي البشر .

الاشي الغريب انو هاد نفسه الشخص إذا شاف شبيه له بتلاقيه رح ينجن ويحكيلك شوف كيف متصنع وشوف كيف شايف حاله وأصلا لو انا مكانه واصلا انا ما بعمل هيك وببلش يألف ويبيض علينا وبتستحي تحكيله مهو ما اسخم منه غير حضرتك ,, ما بعرف إذا بلحظتها بكون صحي على حاله إنو "يي انا هيك بدي أعمل؟؟ وبدي احاول ادفع الشبهة عن حالي بإني أبين الفريق بيني وبينه" ,, نفس مبدأ الجارات يلي كل وحده بتحش في التانيه لما ينجابلها سيرة إنو الأولى بتحش فيكي .

من عناصر المراهقة والكل عايشها طبعا أو على الأقل عرف كنهها ,, بإنو الواحد يتمرد على الإشي (العادي) بصفته إشي ممل ومش "كول" وإذا بدك تكون عصري وملفت للإنتباه وماشي مع الحداثة فإنت لازم تكون مش عادي .. وهالشي بالعادة يتم بالمقارنة مع الأهل أو الأشخاص يلي همه بعتبروهم مملين أو مش حلو لبسهم أو أيا كان سببهم .. هالشي يتعدى المراهقة ليستمر في نمط لمن هم بالغين مصرين على اتباع مقولة إنك لازم تكون مش عادي .. مش عارفين شو يعني إنك تكون عادي أو إنساني أو طبيعي أو على الفطرة أو أيا كان ليرفضوه أو يحاولوا يكونوا مختلفين عنه أو على خلاف معه لدرجة يعتبروه مسبه إلهم .. عدا عن ذلك بإنهم إلى حد كبير بعيشوا حياتهم (المختلفة) ضمن منطوق العادي أو الإنساني أو الطبيعي .. يعني ماشي طارش حالك وشوم وبتركب دراجة وحالق شعرك وما بعرف شو بس بعرف إنك بتعمل أكتر من 50% من أمور حياتك بالشكل يلي كلنا بنعرفه ,, لا بل حتى صفة التمرد على الواقع هو أمر طبيعي لأنها صفة من صفات الإنسان التمرد على ما يؤخره عن التقدم والتطور بس إنت اخرت التمرد يلي هو صفة طبيعية وعم تمشي فيها بالتأخر والتخلف وهو أيضا صفة طبيعية بالإنسان بإنه يغلط أو يختار الخيار الأسوأ أو يحمل ما هو فوق طاقته .

إنك تكون عادي يعني عم تأدي واجبك الأصلي (على الأقل) .. إنك تكون إنساني يعني إنك تلبي الغاية اللي ربنا خلقها لأجلها سواء في التعامل معه أو في التعامل مع المخلوقات جميعها .. إنك تكون طبيعي يعني تكون إشي كتير حلو تكون متنوع تكون مبدع تكون عم تكتشف الإختلاف يلي بميزك عن غيرك بصفتك جزء مهم رح يختل التوازن الطبيعي بدونك .. هاي الشغلات بعمرها ما بتحبط الإبداع والخير والتطور بل الإنسلاخ عنها هي يلي بتدمرنا وبتأخرنا وبتبعدنا عن كل ابداع واحسان وأكبر دليل على ذلك ان الطبيعة بلونها أو بروائحها او باصواتها الاعتيادية لازالت هي افضل ما يمكن ان يسلب عقل اي انسان .. لا زالت الاشياء الطبيعية الاكثر صحية للجسم .. لا زال التصرف على الفطرة هو الابلغ في النفس .. لا زال كل شي اساسي هو كل شيء مطلوب .

يا بلادي

سباق التلاوم

كما كلنا بنعرف من أيام المدارس سباق التتابع يلي بيتكون من مجموعات مقسمه لنصفين بتتسابق بالنصف الأولى لتسلم للنصف الثاني (الإشي) عشان تستبق معهم للوصول إلى خط النهاية .

لسبب وخلال الأحداث المؤلمة يلي مرت علينا ولا زالت وآخرها الأقباط الذين تم اعدامهم بلا سبب أو دم .. وجدت في داخلي وفي داخل كل شخص من صغير إلى مثقف وسياسي ومتدين او ملتزم أو ايا كان يحمل بين (حنكه) منظومة التتابع في التلاوم وهي للاسف عشنا فيها من سنة (آنستي بفتح النون) وللاسف لا نجد في نفسنا الرحمة او الوازع الي يخلينا نتوقف .

وهي كالتالي اعدام 21 قبطي والناس إنجنت بس الشباب اللي زي الفل اللي انقتلوا في امريكا ما حد سأل فيهم ,, انقتلوا 3 في امريكا اقل ما فيها أهلهم قدروا يودعوهم مش زي ام واب معاذ الكساسبه .. معاذ الكساسبة انجنيتوا عليه بس ما حد سأل في اللي انحرقوا في رابعة اللي حرقهم السيسي .. آه كلهم بتتذكروهم اما المساكين الفلسطينيين ما حد بتذكرهم يلي لهسا ما عرفنا شو صار في اللي حرقوا محمد أبو خضير هالكلاب المستوطنين .. وقفت على واحد؟؟ مهو حرقوا الفين في غزه .. غزة اقلها حرب وبسكتوا عليهم من السنين للسنين أما اللي كل يوم الطخ فوقهم في سوريا .. طب اسكت في ناس بتموت من الجوع في اليرموك .. اقلها هدول شهداء انتا شوف الناس اللي بتنقتل بلا سبب في تفجيرات من وقت للتاني في بيروت ولبنان .. أقل ما فيها حد حس عليهم مش مثل ميانمار يلي ما حد لليوم حس بوجعهم .. ما حد شاف موت ورعب قد اهل العراق هدل ما عاشوا من قبل زمن صدام .. طب واللي ماتوا في الصومال؟؟ هدول رح تتحاسبوا عليهم يوم القيام ومع هيك ما حد مساعدهم .. والبوسنه والهرسك بكيتوا عليهم بعين والعين التانيه وينها؟؟ .. يعني وليبيا يلي شافت الموت والجزائر يلي راحلها مليون شهيد .. ما حد شاف الموت قد اهل فلسطين .. يلي همه بيتعذبوا باسم المحرقه التي زعموها .

وبنقعد زي المعددات كل واحد يحكي انو وجعه اكثر من وجع الثاني ولو ما قتلوا معاذ بهالطريقه ما كان حد تذكر محمد أبو خضير ورابعه والشباب اللي حرقوهم اليهود في لبنان وبوعزيزي وغيرهم .. ولو حرقوه بالفسفور كان تذكرنا فسفور العراق وغزة وهكذا كسباق التتابع بنبلش كل واحد بدو يعمل من وجع الآخر تافه وبلا معنى وبستنى كأنوا ينتقم منه ويفرغه من محتواه .

الأشي الأنكى إن الأخ المناضل يلي بكون بحاربك في وجعك بكون إحم إحم لا بحل ولا بربط ولا حتى عارف كيف يحل ويربط حتى لو الأمر بيده بس زي ما بقولوا (علاك مصدي) أبداً .

كلنا توجعنا على كلنا .. كلنا زعلنا .. وكلنا ما عملنالهم إشي .. وانت يلي تلوم فيي لو عملت إلي إشي يمكن ما صارلك إشي .. زي قصه ذكرها دكتور بإنو يوم جلس جنب ختيار في الطريق يحادثه .. وخلال حديثهم دخلوا في أحوال العالم العربي وحكالوياها بجمله قد تلخص أحوالنا ويمكن ذكرتها قبل .. حكاله بما معناه (النار إذا ولعت في بيت جارك وما ساعدته يطفيها وسكرت على حالك الباب رح يجي وقت وتوصل النار لداخل بيتك) .. كلنا توجعنا على كلنا من ايام سيدنا آدم وستنا حوا لليوم .. كلنا انوجعنا على الانسان والحيوان والحجر والشجر .. كانوا من ديننا .. كانوا من بلدنا .. كانوا من لوننا .. كانوا من قارتنا .. كانوا من عالمنا .. اول عن آخر اي انسان في الكون وإن ما كان بشبهك او بنتميلك بأي شكل فهو مرتبط فيك ورح تاخد أجر من ربنا لو ساعدته لأن الأمر مش مرتبط بس حصراً فيمن هو قريب منك .

كلنا حسينا .. كلنا انوجعنا على كلنا .. وجعي وجعك .. لا تبخس في احساسي أقل ما فيها .. لانو هاد يلي بقدر عليه .

الرجل الأول

ابتداءً وقبل ما ابلش ابرم كالعادة للي ما بيعرف مين اللي في الصورة ,, بعرفكم فيه ..

اللي وارد في الصورة هو كريمر احد شخصيات المسلسل الكوميدي (ساينفلد) .. ودوره هو الجار لجيري ساينفلد المؤدي الكوميدي .. وكريمر بكون جاره بالباب وصديقه وأحد ابطال هذا المسلسل ,, ومع دوره القصير (بالمقارنه بجيري وجورج وإلين) فهو كان الشخصية الوحيدة يلي لما يدخل من الباب (لشقة جيري) يقوم الجمهور بالتصفيق له - دون غيره .

شخصية الأخ المناضل هي شخصية قد تكون مستفزه للبعض .. بسبب عشوائيتها وعدم انسجامها مع المشهد العام .. هو شخص مختلف عنهم في كللللللللللل الأشياء .. قد يوصف دائما بالمتخلف (من باب المزح) ,, في الواقع هو في أغلب الأوقات محراك الشر أو اللي بتبلش معه الحبكه .. بروح لأبعد المسافات بكسر كل الحواجز ويتخطى كل المسارات الانسانية التي تقولبنا عليها .

وهون يتبادر للانسان السؤال .. دامه مندفع ويتخطى ما هو المفروض كسره من روتين اجتماعي لا غاية منه , ودامه يتصرف على سجية الانسان الطبيعي بطريقه قريبه للإنسان الأول أو إنسان الغاب أو ماوكلي أو اياً كانت تسميتكم ويضاف إلى ذلك تعامله مع كل الأمور بالطريقه التي يفترض التعامل بها دون حساسيات وبروتوكولات ومزايدات وهاد بصير وهاد ما بصير ومن هالحكي اللي ما بشبع جوعان .. بالأضافه إلى تواصله مع الأشخاص بالطريقه الانسانية البحته ... إذن ليه كان النظر إليه بدونيه أو بإشمئزاز؟؟ .. ليه وصفناه بالعبثي والغير متحضر وبأنه منفر؟؟ .

ومع استمرار شخصية كريمر على مدى المسلسل ,, صنع المؤلف لكريمر مخرج دائم بإنو يتفوق علينا أو على فكرنا نحن المتحضرين .. كان دائما يفوز بالأفضل .. ويأخذ الأحسن .. ويتحصل على جميع حقوقه كما يجب واحداً تلو الآخر .. وإلى جانب ذلك كانت أجمل النساء (الكمبارس) في اغلب الحلقات تلتف حوله ,, كان دايماَ زي ما بحكوا المصاروه (شابطه في دراعه مزه) .. وهاي المزه مغرومه فيه وبرجوليته الفياضه (حسب ما يتم إظهاره) لأنو ببساطه مش حد متزيدن ومتفلسف ومنئرف .. لا هوه الحد اللي عارف مفاتيح النساء يلي تخبت وراء مزاودات ومتطلبات مجتمعها .

شخصيته مثيره للاهتمام .. ولا مش لأني انثى وعجبني فيه ما عجب باقي النساء يلي في المسلسل (عشان ما حد يفكر يعني) .. انما بعرف إنو في كل حياة انسان في العالم .. انسان متل هيك .. ذكر أو انثى .. هو الانسان يلي يجتمع المتزيدنون او بالفصحى "المتكلفون" على ان هذا الشخص مش متلنا وهو بسيط وبتعامل مع الأمور بشكل غير مدروس (على طريقتنا) وشوف لبسه وحركات وإلخ إلخ إلخ .. ومع ذلك فإنو هاد الشخص بغلبنا بطريقه أو بأخرى على نمط كريمر في شيء إحنا نفسنا فكرنا إنو خلص ضامنينه لأنو إحنا ماشيين على النمط المجتمعي وطرقنا المدروسه والمحسوبه والمنمقه والمزخرفه .. بس في الواقع هوه اللي كسب واحنا خسرنا .

لا شك إنو البعض مننا بتمنى إنو يخفف عن كاهليه التكلف والتزيدن والأشياء اللي فرضها علينا المجتمع .. صحيح المجتمع هوه أنا وأنت وإنت وانا ,, ولما احكي عن شي بدي اعمله بس خايفه من حكي الناس والمجتمع ,, فا بالنهاية هاد المجتمع اللي خايفه منه هو إنتا وأنا .. ولا المجتمع الغربي ليس بغريب ايضاَ او منسلخ عن طبقة التكلف بل بالعكس واكبر دليل هو الحياة الصارخه اللي بعيشها بعضهم رفضاً منه لواقعهم .. وللأسف بدل ما احنا عم نتطور (على اساس) ونخفف عن حالنا المآسي والتكلف القاتل لإنسانيتنا فإحنا عم نخنق حالنا بزيادة بأشياء ما إلها ألف داعي .

كانوا يحكوا انو الرجل الأول كان يترك عيلته عشان يجيبلهم الأكل بصفته ذو الجسد الأقوى ويعود يكمل حياته مع عيلته .. انما الآن فهو لتطوير الذات ورفعته بين الناس والمجتمع وليكون القوي امام اصحابه وسيرته الذاتيه عشر صفحات على النت وعنده ألف صاحبه على الفيسبوك ليحس برجوليته وبتطلع على مواقع اباحيه ليحس بقدرته وبضرب مرته عشان يحسسها بمكانتها انها تليه وبشتري اشياء ليبرز ويبين وبجمع المال عشان ما يحس بالعجز .

شو بدي في رجل حواجبه احلى من حواجبي شعره مقصوص بالشفره وسكسوكته بالخيط وشعر صدره بالسكر ومش قادر يكون جميل في انسانيته معي او مع غيري؟ .. شو بدي في زلمه معه الف تلفون واحدث ألف تلفون ومش قادره اتواصل معه بشكل بشري طبيعي؟ شو بهمني أكون صديقه لشخص على فيسبوك وتويتر وانستجرام وسناب شات وجوجل بلس وإلخ إلخ وهوه عنده غيري ألف بنت مايعات وغير مايعات ومش قادر يكون صديق اقدر ارتكن عليه بحاجتي لمساعدة؟ .. شو بهمني انك صاحبت ألف غيري وشفت مليون عروس غيري وقعدت عشر سنين تفتش على الفتاة المناسبه ولما لقيتني فشلت إنك تكون زوج او حبيب أو الأشي يلي قعدت عشر سنين تكونله وتستقرله؟ .. لشو تكون بتعرف الف معلومه في ألف شغله وإنت إذا حكى معك انسان وسألك بتعامله بإنه هو الجاهل واللي ما بفهم لإنك بتفهم أكتر منه؟ .

انا ما بهاجم الذكر فقط لأنو برضو الانثى عليها من العتب دور أيضاً .. اعتقد صار الوقت نخرس كل حد يتفلسف علينا .. نوقف كل حد ماخد فيها انو هاد بصير او ما بصير .. بكفي نضل لعبه بإيدهم وإحنا تروح علينا حياتنا .. اذا عندك اشي احكيه .. اذا بقلبك اشي طلعه .. اذا في طبعك امر حلو طبقه .. اذا في شي مثقل كاهلك كبه على اهله .. صار وقت نعيش زي البشر .. كما يجب أن نكون .

اشوف امورك استعجب

يخي ما شاء الله الشعب قام هام على وجهه وهز ومش عارفه شو وقاتل وزعل (عالخفيف طبعاً) , وغير صور بروفايلاته وصعب عليه ما تم انتهاكة بحق الرسول محمد , رح أحاول ما انكش كتير لاني ما بين صعبة يلي حكى عنها سيد هيثم شيشاني وما بين لا بد من التصحيح لعل وعسى حد يقرأ وينتبه على حاله أو ينتبه على حد ويخبره , ورح أحاول أختصر .

أول اشي جزء من الايمان أنك تؤمن بالله وملائكته وكتبه ورسله ,, بدك تقنعني إنو العالم ما مس الملائكة وباقي الرسل والانبياء؟؟ ,, لا أبداَ ,, مش رح أفتح النار من باب إماتة الباطل ,, بس يا ريت يصير إحساس الناس أعلى بأن باقي الرسل والأنبياء من سيدنا آدم إنتا كمان إذا بدك تنافق وتعمل حالك غيور على دين الله ورسوله إنك كمان أعصابك تنحرق على باقي الأنبياء والملائكة , ويضاف إلى ذلك كمان الصحابة والتابعين .

تاني شيء وهو جزء مهم ,, إنك يا مؤمن يلي كاتب إلا رسول الله وفداك روحي وأمي يا رسول الله وتشردقت كم يوم وغيرت كلامك وزعلت من الغرب والشرق وبلشت تفتش على أحاديث وتترجمها وتفتش على صور عالنت تثبت خلاف كلامهم .. ما بحكيلك تتثقف بالدين (وهو أمر ضروري على كل الأحوال) بس حابه احكي .. خاف الله ورسوله في كلامك وتصرفاتك وتعاملاتك .. ولا كلام الغرب بالجرايد يمحو كلامك في كل يوم بحياتك؟؟ .. ومش بس هيك بتفتري على الله ورسله والتابعين والصالحين .. بتخرج كلامهم من مضامينها لا وبتنشر الحكي بدون مصدر ولا دراسة ,, والأنكى في هاي الحالة هو اللي بطبق الدين بشكل خاطئ عينك عينك .. المهم أنو انا بطبق (اللي سمعته من الناس عن الدين) اللي بناسبني وبناسب تكبري وتفخة راسي وبنشر الجراثيم للمجتمع ويلااا .

تالت شغله ,, بس كبرنا وبدنا نخفف الاحراج عن حالنا في استذكار امر اخدناه في المدرسة بنحكي (أصلا كنت غايب عن الدرس لما اخدناه في المدرسة) أو بتنحكى بالمقابل عن حد ناسي اشي بسيط ,, فا احح مش عارفه كيف احكيها .. في ناس (شيوخ) كان عندهم تحسس من الغبرة اللي في سجادة الجامع فا كان يغيب كتير مرات عن دروس الدين .. اعذروهم يا جماعة .. يعني ازا بلش يخطب في الجامع او بين الناس او بمشابهة ما بقول خال جرار بالسواقة (بكون سايق على ال200 بالدين على الناس) وقت الاساءة للرسول ,, وبالسواليف والتصرفات عليه مبنيه على مصالحة وسمعته وحكي الناس وفلوس الناس وإلخ إلخ ..... إعرف إنو مسكين كان عنده الحساسية ما غيرها .

خلاصة الكلام دام الغرب استعصى عليه احترام الديانات كلها واقل المبادئ الانسانية وحرياتها باسم الحرية نفسها .. فا ممكن انت تصيبهم في إلههم الذي يعبدونه .. المال زي ما حكى الدكتور عمر عبد الكافي .. وتحكيلي بدنا نقاطع نقاطع .. تستاهل ذنبك ما شجعت الصناعة الوطنية وما راكمت الثقة فيها .. قال شو المنتجات الوطنية دون المستوى وبجودة منخفضه .. هيههههيو على رأي عوض أبو شفة .. مهو ما شاء الله يعني الببسي فيه الشفاء والدواء ,, ونستله والمنتجات اليهودية والاجنبية هيه يلي أثبتت انها مكونه من افضل المكونات .. إيه ..

يلا عاد

ما رح احكي انو القاء العقوبة على الجاني هي حق من حقوق المجني عليه منذ الأزل ومحفوظة بكل المعاهدات الفاشلة والقوانين المحلية والدولية والخ الخ .

ومارح احكي على انو الدول اللي في تطبيق العقوبة والقانون ضعيف هي دول ملتهبة بالجرائم بشتى انواعها ولسا بنغل فيها الى يومنا هذا بالالفية السبعين اللي عايشين فيها .

وقبل كل هالهتورات ما رح احكي انو العقوبة واقامة الحدود هي اوامر ربانية اي من اللي خلقنا كلنا ويعلم شو اصلح لنا وشو هدف وسبب كل شيء في الحياة وما بعدها .

بحب احكي لل.. خلنا نحكي عنهم ((محترمين)) انو ازا واحد قلع عين الثاني وحققنا مع الاول وبعد محاكمة ((((عادلة)))) قررنا تطبيق شرح الله والحقوق الانسانية والدولية والخنفشيارية بعد ذلك فا بترتب عليه طبعا "قلع عين" الجاني .. ومع شهادة طائفة من الناس على ذلك ومعرفة انو العقوبة تطبقت على الجاني بغض النظر مين ما كان .. فا اعتقد انو الناس نفسها رح ترتدع وتحكي بينها وبين حالها شو رح استفيد اقلع عينه عشان تنقلع عيني؟؟؟؟ وبالتالي ببتعد عن هاد الامر وما بحاول يطبقه ويتعايش في خياله نفس الحالة النفسية يلي تعلمناها في علم النفس بالربط ما بين صوت الجرس وتقديم الطعام ليصير كل ما يرن الجرس يسيل لعاب الحيوان .. بتمنى تكون وصلت المعلومه.

بس مع هيك لازم نعرف انو حتى في تطبيق العقوبة لوحدها ما بنكون حققنا النتيجة الكاملة او حتى نفذنا شرع ربنا يلي ببدأ بتعليم الافراد مسائل الحياة وتوعيتهم وفي حال اجرموا وقتها بنطبق الجريمه وبنستكملها بالموعظة الحسنه له ونشر الامر للكافة لغايات التعلم والارتداع كي لا تتكرر الجريمة ومن ناحية اخيره الوقوف على سبب هاي المشكلة ودراستها .. يعني المسأله عمرها ما كانت بهالبساطة كونها من خضم الامور الاجتماعية يلي لا بد من دراستها مع عدة اشياء مش منفردة لوحدها .

واخيرا ازا المجتمع كله عرف انو فلان قلع عين فلان وطبقت الجهات المختصة العقوبة فيه بقلع عينه ومع ذلك استمر المجتمع في ذلك فا بعتقد انو امر بعيد الاحتمال (سواء بقلع العين او اي جرم اخر) لانو بحكولك الحمار بوقع بالجورة مره وبحود عنها المرة الثانية .. اما انو يوقع فيها كل مره لحديت ما كل المجتمع يصيروا مكفوفين؟؟ ومكفوف يعني عينتينو التنتين انقلعوا فا هاد مجتمع اعتقد بستاهل الذبح مش بس قلع العين .. لانو ببساطه اذا ما ارتدع بالاشد ما اعتقد رح يرتدع بالاقل لانو وصل مرحلة عالية من ال ... ما في مرحلة لانو ببساطة المثال غير واقعي اصلاً .

نضف ودنك يا عم بخ

سلملي على خوالك

عقبال عند كناينتش

كيف تلعب بعداد عمرك؟

أغبى الطرق للموت أو (dumb ways to die) هي لعبة الكترونية أصدرتها احدى الدول للتوعية حول مخاطر (قلة الانتباه) حول قطارات المترو والتي قد تؤدي الى وفاتك بخلق لا وعي في داخلك بإنك تنقذ الشخص في اللعبة إنو ما يموت لتقدر تحصل على نقاط وتتأهل لمراحل أعلى وتجمع شخصيات (جد تحشيش) أو تكتشف طرق أغبى للموت وتنقذهم بطرق مختلفة قد تصل إنك تنفخ على موبايلك أو تخضه أو تهزه وإلخ إلخ وتشكل في داخلك المنبه انك ما تعمل هيك اشياء عشان تكسب نقاط اهم الا وهي بقائك على قيد الحياة .

فا في ظل المخاطر اللتي نعيشها في مجتمعنا هاد ما بعرف ليه ربطت بين الفكرتين - هاي الفكرة والفكرة يلي في راسي - بإنك تدفع أي شخص بهدد فيك أياً كان موضوع التهديد أو الظرف الصعيب يلي حطوك فيه أو حتى في مرحلة ((فاصلة)) لعمرك ,, وتدفع هاد الشخص بطرق (غبية .. أو غباااااوه) بردة أفعالك يلي مش مفترض تنوجد في انسان طبيعي زي ما علمتنا الأفلام والمسلسلات والخيال العلمي بالإضافة إلى القصص يلي نسمعها أو قرأناها وإلخ إلخ .

فالنفترض مثلاً إنك يوماً من الأيام إنخطفت من تنظيم (لا مارح احكي ارهابي انعلكت القصة) اوك .. من تنظيم ناس شريرين وبدهم يقتلوك كما يذاع في التلفاز وادفعولنا ولا بنقطع راسه (منذ الأزل على نفس المبدأ) .. وهمه قدامك بهددوا فيك تقعد تعيط وتحكيلهم اقتلوني اصلا انا راكبني الدين ومرتي قهرتني ومديري بالشغل بدو يفصلني وبرقبتي كوم لحم وامي وابوي بدهم يتطلقوا وامي بدها تيجي تعيش معنا هو انا ناقصني مشاكل فوق ما حماتي عايشه معنا امي كمان ,, وتعقد تعيط وخنانتك تنزل وتصيح عليهم وتقوم تقرب رقبتك على حد السكين بدك تقتل حالك ,, أوبس .

أو بيوم يوخدوك هناك (هناك في بعض الدول يلي هيه مش دولنا أكيد وبتكون أماكن بفرجونياها عالتلفزيون بحققوا معهم وبعذبوهم) وتخيل يا رعاك الله - إنهم بربطوك ودنيا ودين ويسحبوك تحت هاللمبة والغرفة يلي فيها مراية وطاوله كرسيين ولما يرفعوا عن عيونك وتكتشف إنك في غرفة تحقيق .. تسكت .. تتفرج حواليك ,, وتقول بنبرة متصاعدة .. أوه إم جي .. OMG .. يعني بالعربي (يا إلهي - بطريقة تدل على الدهشة) وتصير تنط من الفرحة وتقول واااااو أه أه هاد اللي بشوفه في الافلام والسينيما واااااا ياي مش مصدق وانا احكي لاهلي ولصحابي ورح احطوا عالفيس .. جد مش مصدق .. اكيد هلا في ورا هاي المراي حد بتفرج عليي .. جد جد مش مصدق .. ويجوا عليك الجهة التحقيقية ويسلخوك أول كف وتحكي وااااو هاد جد مش كميرا خفية يعني عن جد أنا هون .. ياي مين انتو .. شو التهمة مخدرات ولا تجسس .. ياي رح يكتبوا عني بالجرايد وعلى كل النت ... رح يوقف قلبي .. يطلع المحقق مسدس ويشلعك من راسك ويحط المسدس على نفوخك .. ااااااه لحظة هاد مسدس الماغنوم يلي بحكوا عنه؟؟ .. اوووبس .

او ياخدوك على غرف التعذيب وتعمل حالك شاذ جنسياً وعندك سادية ومازوخية ولخبطيطاتيه وتستمتع في يلي بيعملوه وتطلب أكتر واكتر و ... (نعتذر عن المحتوى كونه غير مناسب لأي نوع بشري أو حيواني حتى) .

تخيل يهجموا عليك قطاعين طرق - سراقين - معتديين يلي هو ويسحبوا المواس ويبلشوا يصرخوا عليك وازا ما اعطيتنا بنغز الموس في عينك ومن هالحكي .. بنص الحكي تحكيلي بالله أكم الساعة معك .. ولا فجأة تحكي لااااااا نسيت أشتري الشغلة من محل في طريقي هسا ازا بدي ارجع بدي اخد هداك الطريق يلي هسا رح يكون ازمة وبجوز ما الاقي مكان اصف وبدي ساعة أروح عالبيت وهسا اهلي بفكروني ابصر وين داشر وامي تصرخ عليي لأني تأخرت على الغدا اففففت .. أوبس .

او ممكن نوع آخر مثلا رن بيوم تلفونك إلا وحد بهزأ فيك وبصرخ عليك ولو ما عملت متل ما انا بدي رح أعمل كذا وكذا (أيا كان الموضوع اجتماعي شغل سياسي مالي) وبنص المكالمة تعمل .. .. تيت تيت تيت تيت تسكر الخط بوجهه .. أوبس .

او حد اتصل عليك يخبرك إنو احد الموظفين بسرقك .. او واحد بفسد عليك وبحكي عنك بالعاطل .. او واحد ناوي يعمل فيك هيك وهيك وهيك .. وانتبه على حد بقربلك قاعد بعمل هيك وهي (عادة بتكون إلها شغلة بالشرف زي ما بنسمع وبنشوف) وخلال ما هوه بحكي تصير انتا تحكي مع حدى حواليك او تقعد تتاوب او تحكيله مش سامعك علي صوتك او تحكيله مشغول شوي ممكن تحكي معاي كمان نص ساعه بكون فاضي ... أوبس .

أو تخيل تشوف حد بتكككككككرههه موت زي ما بكره ناديا الزعبي يلي بطلع بدعاية سامسونج وعلى الراديو بتقدم برنامج .. تخيل تشوفها بيوم أو اي حد متلها مخبص بوجهه وعامل مليون عملية تجميل وتيجي تحكيلها ييييي حبيبتي اجيبلك كيس تلج لأن شفايفك متورمات كتير .. سلامتك .. فيكي اشي يا جماعه حد معاه مسكن آلام او شي بخفف التورم فلانه هون محتاجيتله لان وجهها عم يتورم .. حبيبتي متحسسه من شي؟؟ .. اوبس ,, أو توشوش لوحده حواجبها قد راسي (برضو زي ناديا الزعبي) وتحكيليها بس حبيت أحكيلك قبل ما حد ينتبه إنو شكلو يلي عملتلك المكياج ما نسيت تمسح الزوايد على حواجبك لانها عامليتلكياهم كتييير كبار .. أو تخربها بالمره وتيجي عليها وتحكي واااااو انتا شبيه ناديا الزعبي؟؟ أنتا شبيه مايا دياب؟؟ واو كتير بتشبهها بس لو انك تزغر منخارك بتسير كتييير بتشبهها جد انا شفتك على اليوتيوب انك بتشبهها بس ما صدقت ... أووبس ... او وحده من اللي حجابهم كبير زي اللي بتدروشوا وتحكيلها يي بس حجابك رافع كتير شكلو في اشي معلق تحت الحجاب .. تباً.

بتزكر مره وحده بتموت في المكايدة شافتني بالمحكمة وبدها تستفزني بأي طريقه حاولت حاولت حاولت .. أخر اشي بتطلع عليي واحنا واقفين بين مجموعه بتحكيلي .. كتيير نصحانه .. بتطلع عليها وبحكيلها بتمزحي .. بالله عليكي جد انا نصحانه يييي الله يسعدك صارلي فترة بحاول انصح ومش قادره .. على حد علمي من لحظتها بطلت تحكي معي .

هؤلاء أشرف من نسائكم

هاي الجملة يلي علقت في راسي من شخص فرنسي لم أعرف اسمه أو جنسيته أو أي خلفية سياسية له , كل يلي بعرفه إنو قشعر بدني في خبر أنو وضع أمواله دفاعاً عن حقوق المنقبات في فرنسا بعد ما تم اصدار قرار بحظر النقاب .

الشخص يدعى (رشيد نكاز) فرنسي من أصل جزائري ,, تحدى القرار وهو مهدد بالحبس والغرامات بالإضافة إلى يعني أكيد خسارته المال بغرامات المنقبات يلي أثبت فعلاً أنه قام بدفعها عنهن .. سمي بأنه رجل تحدى دولة .

هذا هو رشيد نكاز .. يفي بوعده .. للدفاع عن ((حرية)) من الحريات التي تتغنى بها فرنسا بلاد التحرر من كل أشي تقريباً .. ووسم فعله الكريم بقول (هؤلاء أشرف من نسائكم) .

طبعاً جزء منكم شاهد أيضاً السيدة/الانسة المسلمة الفرنسية التي فرض عليها إظهار وجهها لدى نقاط التفتيش ونشرت الفيديو لها على اليوتيوب بتبين فيه أنها كانت تلبس (قناع طبي) تحت النقاب على أساس في حال طلب منها رفع النقاب ما رح يطلبوا منها رفع القناع .. أكيد لأسباب صحية .. مصرة على موقفها .

بعضكم فهم ليه أنا بحكي هيك .. أشي بغص في القلب إنو أنا آسفة يا نساء وبنات فرنسا أنا بقدرش أدافع عنكم مره تانية من اليوم لأنو مممم بدك نعيب الناس والعيب فينا؟؟ بدك اعيب على فرنسا وأختنا دبي والامارات عملت الأشنع منها؟؟

الأمارات ودبي يلي مش تاركه رقعة من رقعها إلا مغطى بكميرا ودورية وشرطة وكذا ورادارات وأبراج مراقبة وبتجيب النملة من جحرها وتوخد نمرة الدبور اللي طاير وتعرف البرغوت إذا كان برغوت ولا برغوته .. أعلنت عن جواز منع النقاب لأن صارت جريمة بواسطة سيدة منقبة .. مممممم (كلمة كبيرة) ,, الشخص الثاني يلي معنا اسمه أحمد الحداد وهو مفتي في دبي صحيح بعد البحث عنه في الانترنت تجد له فتاوى غريبة عجيبة أو آراء (لأن بطلت اعتبر حكي أغلب الشيوخ فتوى من بعد قصص العريفي) ومنها حول اطلاق النساء لحاهن وأنه فيه تشبه بالرجال ,, (أطلاق لحاهن؟ صدقتك) .

سيداتي آنساتي سادتي أقول قولي هذا واترك لكم المجال ,, وحابة اتنبئلكم برأي أو قرار ممكن يصدر بحكيلك منع لبس البنطلون القماش لأنو في واحد ارتكب جريمه وهو لابس نفس هاد النوع من البنطلونات .

بس حابه احكي إنو لو فعلاً طبق مثل هذا الأمر ,, ولاحقوا النساء والبنات وغصبوهم على نزع النقاب ,, وإن ذكر كمان إنو هاد ليس من الشريعة ولا معصية في تركه (زي ما قال محمد القضاة ,, أسفة الدكتور محمد نوح القضاة) .. بس تخيل قدية في نسوان رح يرابطوا في بيوتهم وما رح يقدروا يطلعوا من باب إنو هاد أشي بخصهم .. لبسوه من مبدأ تربوا عليه بإطاعة الله .. صار عزيز عليهم مخالفة مثل هيك مبدأ .. كم بنت رح تبكي .. وكم رجل حتى رح يمنع مرته وبناته يطلعوا من بعد هيك قرار .. بصعب الأمر؟؟ يمكن مش كتار؟؟ .. طيب واللي مش كتار .. ما إلهم حق وما إلهم مشاعر وما إلهم حرية شو يلبسوا؟؟ .. بتخيل لو يوم منعوا الحجاب أنا يمكن ... مابعرف .. بس عالأكيد ما رح أطلع من البيت .. كيف تيجي وتمنع شخص من شيء مرتبط فيه دينياً ونفسياً لسبب واه؟؟ .. اللي ماتت الله يرحمها وحق على الدولة القصاص من المجرم وملاحقته وتطبيق (حد الله) وهاد أمر ما حد رح يجادل فيه .. أما إنك تبني قرار مثل هيك عليه؟؟ .. آه بعرف شو موقف الإمارات من الدين وإلخ إلخ وأقعدي يا زفت .. انما تباً للإعلام والناس يلي تطواطأ مع الإمارات وتذم فرنسا والغرب على نفس الموضوع .

سيد دكتور شيخ مفتي ($%&^%^) أحمد الحداد ... حابة أحكيلك إنو البنات والنساء يلي رح تشلحوهم النقاب غصباً عنهم بسببك وبسبب من "أمرك" هدول أيديهم من أية جريمه أنضف من لحيتك ولحية اللي خلفك.

شو بتقول؟ say whaaaat

إنو أنا جد حرفياً كنت

المشكلة إنو هاد الموقع أجنبي على ما أعتقد وما شفت إشي بدل على إنو إلو عرق عربي أو اسلامي لأنو في كتير صور بنات مش لابسين منيح وشكله موقع عام , إلى جانب آخر من وين نكشوا المعلومة أو مين اللي حكالهمياها وعلى فرض إنو موقع لحد عربي أو مسلم شكله موقع منتشر لإنو فيه زيارات كتير وقصص وشغلات فا شو الرابط العجيب إنك تحط هيك إنترستنج فاكت؟

إلى جانب آخر ,, فتشت على ما ذكر ووجد ما نقل عن الرسوم بما يسمى (التلبينة) وهي معموله من الشعير أو نخالته مش من الشوفان , وفتشت برضو على النت الفرق بين التنين وطلع آه في فرق ومع هيك ممكن يكون في تفسير أو حديث آخر وأنا ما لقيته , بس غريب الموضوع الصراحة (إن أ جود واي) .

سمعنا إنو هيك حكى

الموضوع إنو كنت بحضر أفلام العكش وخربطاته فشفت هاد الفيديو يلي الناس إنصرعت وقامت وقعدت عليه (مع العلم إني كنت موافقه معه قصدي موافقه مع الصورة الخاطئة بإن البنت ما بتصير تختلي مع والدها لأن في ذات الوقت طلعت قصة البنت وابوها في الزرقاء وسبقها قصة البنت الصغيرة يلي قتلها أبوها الشيخ) بس القصة طلعت من سياقها لما وضحهها العريفي كالتالي:

وبعد هيك طلعت ببالي قصة (جهاد النكاح) يلي الكل نسبه للعريفي - ومع عدم اهتمامي بهالقصة من باب اتباعي لمبدأ الشافعي رحمه الله بالقول (بما معناه) أنه إذا وجدتم ما هو أصح من كلامي في السنة فخذوه وأتركوا كلامي .. فا مش بالضرورة كل شيخ تسمعله أو فتوى أصدرها أحدهم أن تأخذ بها إلا أذا تم الإجماع عليها أو فيها الدليل الكامل , صح عيب علينا إنو ما بنفهم بالفقه وأصول الدين وعندنا من الضعف ما بنفصفي فيه زي (المسلم بالاسم) أنما علينا مع هيك إعمال النصوص والأحكام ودراسة الموضوع وسؤال أكثر من جهة وما ناخذ الأمور على بساطتها أو ناخذها مسلوقه جاهزة ,, بالإضافة إلى إني جد ما فهمت قصة هاد النوع من الجهاد غير سمعتي وسمعنا وهاد حكى وهاد قال ,, عالعموم أنا بهالخصوص قلت يا هادي وأشوف شو اللي قاله العريفي من مبدأ إنو الشك اللي في القصة الأولى تسرب لي في هاي القصة كمان :

في حال حد ما فهم شو سبب ما حكاه طوني خليفة حول موقف الشيخ من قناة الجديد فهاد هوه خبر قناة الجديد (واربطوا الفيديو الأول مع هاد الفيديو) هاد مع العلم إنو الفيديو أدناه ما ذكر أو عرض كلام العريفي إذا أنتبهتوا إنما كان كلام سردي - لا والعنوان فخم:

جد بستغرب انا من حالي حتى .. كيف هيك ماخدين الأمور عمال على بطال مثل ما بقولوا؟؟ لا والواحد منا بنقهر إنو حدى حكى على لسانه إشي بس ما بتفرق معه كيف يقول على الناس هيك .. والمشكلة هاد الأسلوب نفسه يلي عايشين فيه في كل إشي إزا أوباما قال إحنا إرهابيين بنصدق .. الحيوان النتن وأفخاي بقولوا إنو حماس السبب إنو عيدنا ورمضاننا دمروهم حماس ,, والناس تصدق .

بغض النظر عن العريفي وغيره وكل هالقصص .. إذا بتنتبه إنو ربنا قال أنه نزل القرآن و(إنا له لحافظون) بالإضافة إلى ذلك لو تنتبه لتعريف القرآن ,, بتلاقي إنو من ضمن التعريفات أنه منقول ومتواتر ,, وعن الصحابة والتابعين العدول الثقات .. هاد الشيء كان لأنو ربنا عالم بتشكيك اللي رح يتم في نصوص القرآن وفي الكتاب نفسه يعني ولله المثل الأعلى بنعقد عقد بين بعض وواثقين ببعض وبنكتبه وبنوقع عليه وبنجيب شهود كدليل القاطع في أي حاله إنو يتقدم العقد الظاهر عليه التوقيع وبنجيب الشهود يأكدوا إنك ليه تنكر كلو ثابت وظاهر .. وعتبك على اللي مع كل هاد برجع بنكر .. شغله من التنتين يا إنتا مصر على جهلك يا مغيب عن الدنيا وجايتك حالة فقدان ذاكرة .

لا وبحكولك التكنولوجيا إتطورت وصارت تعطيك المعلومه أول بأول .. زمان تقوم الحرب وما حد يعرف فيها .. وهسا صارت الناس عندها وعي ومعرفة .. جد وإنتا تقرأ هيك جملة مصدقني؟؟ .. ما إحنا بعيننا شايفين الزيف والكذب ومع هيك بنمارسه إحنا كمان زي لعبة كنا نلعبها وإحنا زغار يلي بتكون مجموعة قاعدين جنب بعض كل الأول بوشوش التاني كلمة بسرعة والتاني لازم ينقلها للتالت كيف ما سمعها وهكذا ويلي آخر الصف لازم يحكيها بصوت عالي وعالأغلب بتطلع غلط بغلط بتكون كلمة الأول سمير بتصفي الكلمة بالأخير مدرسة .

على سيرة التطور .. في اعتقاد سائد إنو مستحيل تلاقي بني آدم على وجه المعمورة واعي ما بعرف (الدين الاسلامي) ما بحكي عن إن بعرف عنه بحقيقته وصحة جوانبه وإنه مش دين عنف .. بقصد إنو بعرف عنه من الأصل أو حتى بعرف شو هوه .. ولفت نظري هالشي من خلال فيديو لوحده بتنزل فيديوهات عالنت وكانت بتحكي في هداك الفيديو عن الحجاب وبتعرف الناس بالحجاب .. وإنصدمت إنو في تعليقات تجهل كلياً هاي القصص أو مش عارفين إنو يلي بلبسوا الحجاب مسلمين .. صراحة مش ذاكرة كل التعليقات .. بس فعلاً شعرت بالصدمة .. ولأحطكم بصورة واقعية بحكيلكم إنو في ناس عرفت عن غزة والاحتلال الصهيوني وجدار الفصل (هاي السنة فقط) ما سمعت فيها قبل ,, فا لا تستغربوا مع كلللللل هالتطور يلي مخدوعين فيه إنو آه في ناس مابتعرف الإسلام سواء وجوده حقيقته ,, ونتمنى على الله بإنو لو صار حوار بيننا وبين الناس غير العارفين بحقيقته أو وجوده بأنو لو صارت الفرصة وعلمناهم شيء عن الإسلام نكون .. بلغنا عن الرسول لو آية ..

ممكن يعني؟

بقدروش ,, مستحيل ,, مششششششش ممكن ,, لازم ولا لا لا بصير بدنهم يحكهم ويهرشهم وعلى شوي بصير معهم أكزيما وجرب إذا ما عرفوا ,, مافي مستحيل مش ممكن ,, تقول ثقب أسود وبدهم يسدوه ,, عين الشمس هسا رح تتغطى ,, روتين لازم أداءه ,, ترهل نفسي إداري لا بد من إجراءه ,, بيروقراطية حياتية لا بد من تنفيذها .

يا ولاد الحلال شو يعني مش هيك ,, لأكون واضحة ومتأكده هاد الأمر بالذات كل بني آدم في الدنيا عاش هاد المثال ,, وقيسوه على أي شيء تاني ,, هاد في فئة من الناس كل يوم رمضان لازم تسأل شو طابخين ,, لازم تعرف شو رح تتزهرم وتتدولق وتضلغص كل يوم ,, بغض النظر عن مبدأ إنو الصيام مش للأكل وإنتو ما بتفكروا إلا ببطنكم ,, لأ بترك حاله ومحتاله وبستلمك ,, شو تغديتوا وشو أفطرتوا وشو تسحرتوا؟؟ ,, وهاد الموضوع لازم كل يوم يحكيلك حتى لو يوم ما شفته فيه لازم يعرف ,, ولو كان زميلك في الدوام رح يسألك عن دوام العطلة شو وقتيها أفطرتوا ,, فصبر جميل والله المستعان ,, المشكلة إنو في أيام (زي كل البشر) الناس بتطبخ طبخة كبيرة وبتضل على يومين ولو حكيتله طبخ بايت بتطلع عليك نظرة حزينه إنو يا حرااااام إحنا بنطبخ كل يوم ليه إنتو بتاكلوا اكل بايت ,, فا بستحي الواحد يحكي خصوصاً إذا كنت قرفان الطبخ وبدكاش تعمل أكل وممكن يضل الأكل تلات أيام والرابع بنقضيها حواضر أو صحن بعتولنياه الجيران .. تباً .. أنا هاد الكابوس عايشني منذ الطفولة وحتى رمضان الماضي ,, الواحد بدو يعيط يعني .

طبعاً في نماذج للأسئلة نفس مبدأ الخوارزميات يلي اخدناها في التوجيهي ,, تبعت الدراسة مثلاً .. س: أدبي ولا علمي .. ج: أدبي .. س: يي جد درستي جامعة؟ ,, ج: أه وتخرجت من تسعين سنه .. س: جد وشو درستي؟ ووين درستي وكيف كنتي تروحي وكم معدلك وكم دفعتي وشو سويتي اشتغلتي تدربتي لقيتي شغل تاني كيف الشغل كيف الناس مع مين بتشتغلي آآآآآآآآآآآآآآآآآآآآآآه ,, يقطع اليوم اللي شفت وجهك فيه يلعن أبو تباً أمك .. هاد غير منظومة الزواج إزا متجوز في نسق معين من الاسئلة إذا مش متجوز في مسلسل تركي الليلة بدو يتألف من 170 حلقة بفضل ستر الله معك (والله دايماً بسترها معنا ومع جميع خلقة والحمد له) ,, يعني بتصفي براسك أفكار سوداوية ,, وبتلعن الساعة اللي بيوم مريت عن بسطة ببيعوا فيها أمواس ومشارط وقناوي وما وقفت واشتريتلك كم شغلة.

الحمد لله إني بنازع نفسي ما أعرف ,, لدرجة إنو الناس بتحسني غبية وهبلة إنو في مليون شغلة في ألف حد حواليي وألف موقف صار وأنا فيه وما بعرف تفاصيله ,, بس في ناس بتحس راسها زي برنامج الأكسس في أعمدة لازم تعبيها ولا بطلع عندك إيرور إنو لااااا ههناك معلومات ناقصة يا أورلانزو ,, في رؤوسهم بحرٌ من التساؤولات ,, وطول النهار بتسائلوا .

طبعاً ينقسم هدول الأشخاص حسب ملاحظتي إلى عدة أقسام بعرف منهم أكم قسم .. في قسم بسأل من باب تعباية القعدة كلام أو فتح سيرة ليس إلا ,, وهدول بتلاقيهم بضربوها إذا لزقت لزقت وإنفتح موضوع وعلى الأغلب بنسوا شو سألوك مع إنو ممكن يكون سؤال محرج بالنسبة إلك وتضل تتقلب طول ليلك من سمة هالبدن ,, بس همه رح يسألوه لأنو كما قلت مش مهتمين بالموضوع قد ما همه سألوه من باب يضيع وقت .

النوع الثاني من باب إنو تعود على هيك ,, بسأل عشان لازم يسأل ,, منو عشان لما يقعد مع ناس تانيين ما يضل ساكت بل يملأ الفراغ بما سمعه منك أو جاوبتياه تقول لقاء صحفي وبدو ينقله إلى باقي الأفراد والمجتمعات وعالأغلب بكون نوع حشري (بفتح الحاء أو كسرها نفس الشي) ,, وبحب نظرة الآخرين لما يدلو بدلوه والناس تتوسع أحداقها وتقول عن جااااااد؟؟؟ .. أعتقد عرفتوهم وكل مجتمع في متلهم ,, بدهم سيرة الناس يعلكوها بقعداتهم ,, ولو سألتهم مثلاً شو بهمك هالسؤال؟ بصفن فيك ,, صفنة زي جزء من الخوارزمية يلي ما بوديك على مكان .

النوع الثالث النوع المسموم يلي قاعد عشان يفتش على عيوبك وهفواتك ويعلو على ما أنت فيه .. مع إنك إنسان لا إلك ولا عليك وعايش حياتك زي كل هالناس .. بس الأشخاص يلي عندهم عقدة النقص بدعم يبرزوا في المجتمع حتى لو جد هاد المجتمع هوه أفضل منهم بس عقدة النقص مشنعة فيهم ,, المهم هدول الناس بتحس إنو سؤالهم مدروس وجوابك مراقب وبدخل على أجهزة شديدة الحساسية تعالج الموضوع لطرح السؤال الذي يليه ويكشف أكثر عن كنه أعمالك ويشوف شو ممكن يطرقك سؤال يجيبلك الدور يعني مثلاً: عن جد إنتا خلصت دراسات عليا وبتشتغل وراتب عالي ومتجوز وإلك بيت لحالك وسيارة .. بس مخلف؟ وإزا مخلف بنتين؟ بحس باليأس بس فجأة بسترجع جاهلية الماضي وبحكيلك ...(((يعني ما عندكم ولاد؟؟))) .. وهون في داخله يحس بالنشوة والانتصار وبشوف حاله في ستاد أولومبي وعلم بلاده يرفرف والأموات يغنون هشتكنا وبشتكنا يا ريس .. خلص لا تحاول هاد الشخص إنتصر عليك مافيها سلم أمرك لربنا ,, وعفكرة أنا هاي السنة صادفت فئة ماعندهم مشكلة يكفروا والعياذ بالله أو يذكروا أشي مخالف الشرع والدين ,, المهم يبينوا حالهم غلبوك وأبكموك ,, ومن الأمثلة البسيطة عليها كما ذكرت خلفة الولاد .

كلنا في صورة أو أخرى وقعنا في هذا الباب .. بس ما انتبهنا إنو عملنا هالشي .. وحتى أنا برضو ما كنت أنتبه لبعض الشغلات لحد ما حضرت فيديو للدكتور عبد الكافي حكى فيه عن هذا الأمر تطبيقاً لحديث الرسول عليه السلام (من حسن إسلام المرء تركه ما لا يعنيه) وذكر عدة أمثلة إحنا بتصير معنا على طول بنسألها وبنتدخل فيها بدون ما ننتبه ,, ويمكن يقول مننا إنو عادي هالسؤال مافيه اشي .. بس برضو يلي إنتا بتحكي عنو عادي يمكن ما يكون عادي بالنسبة لغيرك ,, في ناس جد كنت أحكي سؤال عادي بس أحس الحرج في عيونهم وأكره الساعة اللي سألتهمياها وحتى الناس اللي بكرههم ما بحاول استخدم هاد الأسلوب لأنه فعلاً مش رح ترضى عن حالك بعد هيك .. الله يهدينا ويجعلنا خفيفين على الناس .

خدلنا تسويره

زووم على مسؤوليتك

بتعرفوا المشهد في مسرحية ريا وسكينة لما يجي عليهم (عبد العال - العسكري) وبحكيلهم ... إنتو حتروحوا في داهية .. ويجلسوا جنب بعض جلسة الموت الأخير ويحكي (عبد المنعم مدبولي - حسب الله) ويحكي خدلنا تسويرة .. مابعرف ليه حكى هيك وبعدها فشخوا تمهم وابتسموا كلهم بس الموقف كان تحشيش .

ما تروه أعلاه تشبيه لتسويرة الموت يلي عانوها بهديك اللحظة (العصابة) .. الصورة عبارة عن "صالون ميار" ,, ميار بنت أختي يلي تسمى في أوقات كثيرة باسم (رشيدة) .. والشيء بالشيء يذكر .. هاي البنت جد خلتني احب الخلفة والولاد الصغار .. لانها صغيره وفتفوته وأشياءات اخرى بتنحكى عن الولاد الصغار ما بعرف شو هيه لأني قضيت عمر في الحقد والإزدراء من الخلفة واللي بيخلفوا .

ذس إز ميار ,, الصورة ما إلها دخل فيها بس هاي هيه بطبيعتها بإنها بتموت في اشي اسمو مكياج ولو جد بدك تبهرها وتسكتها أعطيها كومة مكياج .. بغض النظر إنو صورة (اللعبات) خضتني .. ويانهار اسوح وهيك .. بت ستل .. يوضع سره في أضعف خلقه.

ps: مش عارفه ليه قلب البوست بهاي الطريقه

fine

اللى غرب نفسه سافر من الالام المشاعر

واللى نفسه يعشها تانى هى هى المشاعر

واللى دايب بابتسامه ومن عينيه مر المشااعر

واللى نفسه قصاد حبيبه يبان عليه حبة مشاعر

حقوق المؤلف

جميع الحقوق في الصور أو النصوص المقتبسة أو الفيديوهات أو الأفكار وحتى نموذج البلوج كلها تعود لأصحابها لا أنا لا أنسب ما أضيفه (من غير ابتكاراتي الخنفشارية) لنفسي وإنما الإضافة لغايات التوضيح والتأمل وباقي النصوص المكتوبة فا من كتابتي وسواليفي الخاصة

شو كمان شو كمان شو كمان؟
آه وما عندي فيسبوك لا حد يدور عليي ويحكيلي متنكرة
i hate it