Showing posts with label all about me. Show all posts
Showing posts with label all about me. Show all posts

يا بلادي

تو هوم ات ماي كونسيرن .. أور ماي نوت


متزكرين في سك على بناتك لما فؤاد المهندس يضل يضرب في الطويل .. وفي نص المشهد بحكيله "فاضلك لفه وتاخد 75 قرش" .. ازا متزكرين أكيد ضحكتوا وازا مش متزكرين بحكيلكم شوفوا هاد اللينك .. شفتوه؟؟ ضحكتوا؟؟ .. الحمد لله .. هاد مش موضوعي بس حبيت استقبلكم بالضحكات العفوية بدون أي داعي وسبب .

بتعرفوا طيب شعور لما تنصدموا في شغله ودماغكم يعمل تأخير ثانيتين الصوت عن الصورة ويهنج ويشرت وتصفنوا في الفراغ بحاول فيها دماغك يستوعب الموقف .. زي الثانيتين يلي الولد الزغير لما يوقع وقعه شنيعة ويتطلع على امه ليتحقق من ردة فعلها إنو وقعتي مستاهله اعيط وانف ولا احك راسي وامشيها .. انا هكذا في الثانيتين من تقريباً السنة الماضية بس شكله دماغي اقرط فاهم بدل ثانيتين سانتيتاتين .. همه اتنين اتنيييين بلا قلبة دماغ .. على أمل من الله عز وجل ان يكون الفرج قريب زي دايما .

ليش بحكي هالحكي لانو وصلتني اسأله منكم ومن الكل تقريباً .. جوابها الصراحة مابعرف .. انما الحلو في الموضوع إنو بالنسبة إلي كل ما الأمور تصير صعبة (بعتذر بهالكلمة يلي رح احكيها) تصير صعبة بنت كلب .. بتصير أحلى بشكل مخيف لدرجة ببطل اصدق حالي .. صحيح بكون مكتئبة من يلي عملته فيي الأمور السيئة .. بس هالمرة فعلاً كانت امور صعبة وبنت كلب مش معروف .. وبما انها كانت صعبة بدرجة القرف بحب احكيلها إنو رح استغل الفرج بأقصى حالاته مش رح أخلى نتفه منها تعتب عليي .. فا إلى ذلك الوقت بعرفش شو أجاوب على أي إشي أو بالاحرى لساتني مش الإنسان الطبيعي أبو راس وعيون .

في الحياة وانتم كلكم افهم مني .. في يلي رح يدمرك ويمتص اخر نقطه في حياتك ورح تضل تعطيه تعطيه تعطيه (كل اشي انت بتقدر عليه) وأكتر وأكتر وفوق كل هاد مارح يعجبه .. ما تلومه ولا تلوم حالك .. والباقي عندكم .

تحياتي المعطرة بنفحات الأقحوان .

شمس الشتا .. كذابه



وببساطة في ناس مصرة تمنع عنك الحياة .. تمنعك تتنفس .. او بالاحرى تفكر كيف تتنفس .. كأنو آلة صب بتكون مجتمع كامل من الأفكار بالعظمة والتيبس النفسي .. ناس شغلها تمتص روحك .. تحطم اغلى ما عندك .. اقدس ما عندك .. ابسط ما عندك .. اه ابسط متع الحياة .. زي اللي بنكل في ميت .. زي اليهود اللي بحبسوا عظام الأسير بعد وفاته .

وبطبعك انسان مسالم بتتنازل وبتضحي وبتنسى وبتسكت وبتتعلم ما تهتم للامتهانات اللي تتعرضلها لتضلك رافع راسك .. اكيد مش رافع راسك قدام حالك .. واكيد مش رافع راسك اصلا .. انتا بتكون بس عم تكابر على حالك لتحكيلهم ضرب الحبيب زبيب .. تحكيلهم بيأس بشكل لا مباشر انو انا قبلانكم بظلمكم ومش رح اتأثر ولا انازع يا ريت تقبلوا مين انا .

بستغرب كيف هدول الناس لسا عندهم مخزون وعدة كاملة من الوسائل لاحباطك وافراغك من كل مضمون ومعنى .. انت قدامهم ما بتسوى اشي وقادرين يثبتولك .. يحرفوا الدين .. يوقعوك في مصيبة .. يبخسوا فيك .. بتحس حتى قادرين يخلوا العالم تجمع انو الاشي اللي مش عيب فيك يصير عيب .. ولسا عندهم كمان .. ولا تفكر عيوبهم ممكن تكون ستر لعيوبك .. يعني اذا انتو الاثنين فيكم نفس العيب يعني انتو تساويتوا؟ .. لا ابدا همه عيبهم الو تبرير وسبب اما انت عيبك غباء وظلم وجور عليهم .

والشغلة بتنعاد فيي كمان مره وبدم باااااارد .. لأنهم بعتبروني بارده ما عندي احاسيس؟ ولا لأنو انا يلي عملته هالقد كان بشع وهاد جزاتي؟ ولا لأني قبلت احمل نصيبي من الخطأ وهمه التزموا السكوت عن تحملها فا صفيت انا حامله كل الخطأ؟ ومابين جلد الذات وتكرار الحسابات وخوفي لوحدي من اخطائي اللي ارتكبتها مهما كان حجمها ومابين الوجع والمرار اللي جواتي .. في حلم انكسر .

كيف تلعب بعداد عمرك؟



أغبى الطرق للموت أو (dumb ways to die) هي لعبة الكترونية أصدرتها احدى الدول للتوعية حول مخاطر (قلة الانتباه) حول قطارات المترو والتي قد تؤدي الى وفاتك بخلق لا وعي في داخلك بإنك تنقذ الشخص في اللعبة إنو ما يموت لتقدر تحصل على نقاط وتتأهل لمراحل أعلى وتجمع شخصيات (جد تحشيش) أو تكتشف طرق أغبى للموت وتنقذهم بطرق مختلفة قد تصل إنك تنفخ على موبايلك أو تخضه أو تهزه وإلخ إلخ وتشكل في داخلك المنبه انك ما تعمل هيك اشياء عشان تكسب نقاط اهم الا وهي بقائك على قيد الحياة .

فا في ظل المخاطر اللتي نعيشها في مجتمعنا هاد ما بعرف ليه ربطت بين الفكرتين - هاي الفكرة والفكرة يلي في راسي - بإنك تدفع أي شخص بهدد فيك أياً كان موضوع التهديد أو الظرف الصعيب يلي حطوك فيه أو حتى في مرحلة ((فاصلة)) لعمرك ,, وتدفع هاد الشخص بطرق (غبية .. أو غباااااوه) بردة أفعالك يلي مش مفترض تنوجد في انسان طبيعي زي ما علمتنا الأفلام والمسلسلات والخيال العلمي بالإضافة إلى القصص يلي نسمعها أو قرأناها وإلخ إلخ .

فالنفترض مثلاً إنك يوماً من الأيام إنخطفت من تنظيم (لا مارح احكي ارهابي انعلكت القصة) اوك .. من تنظيم ناس شريرين وبدهم يقتلوك كما يذاع في التلفاز وادفعولنا ولا بنقطع راسه (منذ الأزل على نفس المبدأ) .. وهمه قدامك بهددوا فيك تقعد تعيط وتحكيلهم اقتلوني اصلا انا راكبني الدين ومرتي قهرتني ومديري بالشغل بدو يفصلني وبرقبتي كوم لحم وامي وابوي بدهم يتطلقوا وامي بدها تيجي تعيش معنا هو انا ناقصني مشاكل فوق ما حماتي عايشه معنا امي كمان ,, وتعقد تعيط وخنانتك تنزل وتصيح عليهم وتقوم تقرب رقبتك على حد السكين بدك تقتل حالك ,, أوبس .

أو بيوم يوخدوك هناك (هناك في بعض الدول يلي هيه مش دولنا أكيد وبتكون أماكن بفرجونياها عالتلفزيون بحققوا معهم وبعذبوهم) وتخيل يا رعاك الله - إنهم بربطوك ودنيا ودين ويسحبوك تحت هاللمبة والغرفة يلي فيها مراية وطاوله كرسيين ولما يرفعوا عن عيونك وتكتشف إنك في غرفة تحقيق .. تسكت .. تتفرج حواليك ,, وتقول بنبرة متصاعدة .. أوه إم جي .. OMG .. يعني بالعربي (يا إلهي - بطريقة تدل على الدهشة) وتصير تنط من الفرحة وتقول واااااو أه أه هاد اللي بشوفه في الافلام والسينيما واااااا ياي مش مصدق وانا احكي لاهلي ولصحابي ورح احطوا عالفيس .. جد مش مصدق .. اكيد هلا في ورا هاي المراي حد بتفرج عليي .. جد جد مش مصدق .. ويجوا عليك الجهة التحقيقية ويسلخوك أول كف وتحكي وااااو هاد جد مش كميرا خفية يعني عن جد أنا هون .. ياي مين انتو .. شو التهمة مخدرات ولا تجسس .. ياي رح يكتبوا عني بالجرايد وعلى كل النت ... رح يوقف قلبي .. يطلع المحقق مسدس ويشلعك من راسك ويحط المسدس على نفوخك .. ااااااه لحظة هاد مسدس الماغنوم يلي بحكوا عنه؟؟ .. اوووبس .

او ياخدوك على غرف التعذيب وتعمل حالك شاذ جنسياً وعندك سادية ومازوخية ولخبطيطاتيه وتستمتع في يلي بيعملوه وتطلب أكتر واكتر و ... (نعتذر عن المحتوى كونه غير مناسب لأي نوع بشري أو حيواني حتى) .

تخيل يهجموا عليك قطاعين طرق - سراقين - معتديين يلي هو ويسحبوا المواس ويبلشوا يصرخوا عليك وازا ما اعطيتنا بنغز الموس في عينك ومن هالحكي .. بنص الحكي تحكيلي بالله أكم الساعة معك .. ولا فجأة تحكي لااااااا نسيت أشتري الشغلة من محل في طريقي هسا ازا بدي ارجع بدي اخد هداك الطريق يلي هسا رح يكون ازمة وبجوز ما الاقي مكان اصف وبدي ساعة أروح عالبيت وهسا اهلي بفكروني ابصر وين داشر وامي تصرخ عليي لأني تأخرت على الغدا اففففت .. أوبس .

او ممكن نوع آخر مثلا رن بيوم تلفونك إلا وحد بهزأ فيك وبصرخ عليك ولو ما عملت متل ما انا بدي رح أعمل كذا وكذا (أيا كان الموضوع اجتماعي شغل سياسي مالي) وبنص المكالمة تعمل ..     .. تيت تيت تيت تيت تسكر الخط بوجهه .. أوبس .

او حد اتصل عليك يخبرك إنو احد الموظفين بسرقك .. او واحد بفسد عليك وبحكي عنك بالعاطل .. او واحد ناوي يعمل فيك هيك وهيك وهيك .. وانتبه على حد بقربلك قاعد بعمل هيك وهي (عادة بتكون إلها شغلة بالشرف زي ما بنسمع وبنشوف) وخلال ما هوه بحكي تصير انتا تحكي مع حدى حواليك او تقعد تتاوب او تحكيله مش سامعك علي صوتك او تحكيله مشغول شوي ممكن تحكي معاي كمان نص ساعه بكون فاضي ... أوبس .

أو تخيل تشوف حد بتكككككككرههه موت زي ما بكره ناديا الزعبي يلي بطلع بدعاية سامسونج وعلى الراديو بتقدم برنامج .. تخيل تشوفها بيوم أو اي حد متلها مخبص بوجهه وعامل مليون عملية تجميل وتيجي تحكيلها ييييي حبيبتي اجيبلك كيس تلج لأن شفايفك متورمات كتير .. سلامتك .. فيكي اشي يا جماعه حد معاه مسكن آلام او شي بخفف التورم فلانه هون محتاجيتله لان وجهها عم يتورم .. حبيبتي متحسسه من شي؟؟ .. اوبس ,, أو توشوش لوحده حواجبها قد راسي (برضو زي ناديا الزعبي) وتحكيليها بس حبيت أحكيلك قبل ما حد ينتبه إنو شكلو يلي عملتلك المكياج ما نسيت تمسح الزوايد على حواجبك لانها عامليتلكياهم كتييير كبار .. أو تخربها بالمره وتيجي عليها وتحكي واااااو انتا شبيه ناديا الزعبي؟؟ أنتا شبيه مايا دياب؟؟ واو كتير بتشبهها بس لو انك تزغر منخارك بتسير كتييير بتشبهها جد انا شفتك على اليوتيوب انك بتشبهها بس ما صدقت ... أووبس ... او وحده من اللي حجابهم كبير زي اللي بتدروشوا وتحكيلها يي بس حجابك رافع كتير شكلو في اشي معلق تحت الحجاب .. تباً.

بتزكر مره وحده بتموت في المكايدة شافتني بالمحكمة وبدها تستفزني بأي طريقه حاولت حاولت حاولت .. أخر اشي بتطلع عليي واحنا واقفين بين مجموعه بتحكيلي .. كتيير نصحانه .. بتطلع عليها وبحكيلها بتمزحي .. بالله عليكي جد انا نصحانه يييي الله يسعدك صارلي فترة بحاول انصح ومش قادره .. على حد علمي من لحظتها بطلت تحكي معي .

خدلنا تسويره


زووم على مسؤوليتك

بتعرفوا المشهد في مسرحية ريا وسكينة لما يجي عليهم (عبد العال - العسكري) وبحكيلهم ... إنتو حتروحوا في داهية .. ويجلسوا جنب بعض جلسة الموت الأخير ويحكي (عبد المنعم مدبولي - حسب الله) ويحكي خدلنا تسويرة .. مابعرف ليه حكى هيك وبعدها فشخوا تمهم وابتسموا كلهم بس الموقف كان تحشيش .

ما تروه أعلاه تشبيه لتسويرة الموت يلي عانوها بهديك اللحظة (العصابة) .. الصورة عبارة عن "صالون ميار" ,, ميار بنت أختي يلي تسمى في أوقات كثيرة باسم (رشيدة) .. والشيء بالشيء يذكر .. هاي البنت جد خلتني احب الخلفة والولاد الصغار .. لانها صغيره وفتفوته وأشياءات اخرى بتنحكى عن الولاد الصغار ما بعرف شو هيه لأني قضيت عمر في الحقد والإزدراء من الخلفة واللي بيخلفوا .


ذس إز ميار ,, الصورة ما إلها دخل فيها بس هاي هيه بطبيعتها بإنها بتموت في اشي اسمو مكياج ولو جد بدك تبهرها وتسكتها أعطيها كومة مكياج .. بغض النظر إنو صورة (اللعبات) خضتني .. ويانهار اسوح وهيك .. بت ستل .. يوضع سره في أضعف خلقه.

ps: مش عارفه ليه قلب البوست بهاي الطريقه

زفرة من نار

 

يا الله شو في جوات راسي مسبات حالياً ,, يا إلهي إرحمني ,, يعني كل ما أوهم حالي بإنو النظرية يلي حكالنياها الدكتور (غسان الجندي - بروفسور قانون دولي) إنو أكبر مستفيد من الحروب العالمية يلي بتصير هيه (هوليود) و (شركات الأسلحة/المصنعين/المستثمرين) بضلني أشكك بقصة هوليود ,, بس لما تكتمل القصة بإن هوليود - شركات الإنتاج هدفها التاني هوه (تنظيف صورة الشعب الأمريكي + خلق نمطية الصورة للشعوب الثانية) بتترسخ النظرية أكتر وأكتر براسي .

موضوع أبو غريب لا زال عالق براسي ونفسي (ومجهزة أشيائي) لأكتب عنه من زمان بس مع هيك بحكي جرح ويندمل , فترة وبتعدي , لا تذكري الناس فيه , مع هيك لسا بحس بالقرف والقهر , لسا بحس بأدنى درجات الإنسانية كل ما دماغي يعمل زي الأفلام ويعرضلي شريط الصور وحده ورا التانية , بكون نفسي أمزع دماغي للحظات لتمر الحالة .

ليه أنا شخصياً متأثرة بمجزرة فضيحة جريمة ... أبو غريب؟ لأنها ببساطة كان رفض لغزو الأمريكي السافر غير المبرر على العراق , كان فيه إعتداء على ناس سواء مجرمين أو غير مجرمين لازم يكتفى بسجنهم مدى الحياة أو إعدامهم بالطرق المتعارف عليها قانوناً (الحقن - الشنق - بالرصاص لبعض الدول) , كان فيه تجريد وتجريح للرجل العربي , حتى مجرد نشر الصور هيه إهانة - أنا مع إنو كشف الحقائق - بس بالنسبة إلي كانت هاي من المرات يلي كشف الحقيقة عبارة عن كشف للإهانة , حسيت إنو يلي إرتكبوا هاي الجرائم تعدوا على من في السجن , لكن يلي كشفوا الفضيحة هم أهانوا الشعب العربي كلو أهانوا الرجل العربي أهانوا الشخص يلي بنحتمي فيه , أهانوني .. ربطوهم متل ما بينربط الكلب , فلتوا عليهم الكلاب , قتلوهم , عذبوهم , إعتدوا عليهم , اعتدوا على حرمتهم كأموات , نكلوا فيهم وفي جثثهم , وصوروهم والشريك الثاني كان من نشر صور الجريمة .

ليه بحكي شريك يلي نشر صور الجريمة لأنو ببساطة , ما شفت ردة فعل إنعملت بحق السفله يلي إرتكبوا الجريمة (تم إطلاق سراحهم جميعاً بعد فترة قصيرة من الحبس وبجوز ما إنحبسوا أصلا) , ما شفت محاكمة دولية بتصير لقادة الجيش الأمريكي , ماشفت رد إعتبار لمن تم تعذيبة , ما شفت إشي , كل يلي شفته نشر للإهانه وشعور بإن اللي صار كان عبارة عن تخويف إنو شوفوا شو رح يصير فيكم إذا ما رديتوا على امريكا واسرائيل وعاندتونا , لأ ما رح نكتفي بقتل الأطفال وإغتصاب النساء , لأ هالمرة بدنا نغتصب رجالكم كمان .

بتذكر إنو وأنا صغيرة ولا زالت كل ما أعمل إشي مهما مر عليي الزمن ما بقدر وجهي ولا جسمي يخفي كمية الرهبة من الموقف يلي صار , هداك اليوم كسرت صحن (مش إلنا) وصار وجهي بالألوان حتى لما ينعاد فتح السيرة , في رهبة للشيء المش طبيعي يلي بصير (يلي مش بالعادة يصير) , مستغربة كيف الناس يلي إعترفوا بإنو في ناس ارتكبت جرائم , طلعوا على التلفزيون بكل أناقة ولباقة ولياقة وفم باسم , ما اعتقد الشغلة شغلة عسكرية وكذا , ما في إنسان طبيعي مخلوق مثلنا بتمر عليه هيك شغلات إلا وتشوف الموت بعيونه , ليش نكابر على حالنا شفنا الأسى بعيون أهل غزة بس كنا (متل ما قلت) نكابر على حالنا ونفكر بالأحسن ومن قوتهم كانوا يقنعونا بإنو لأ هاد مش أسى هاد شوية غبرة من البيت الي إنهد فوق راسي واستشهدوا ولادي وأبوي ومرة أخوي وبفكر كيف بدنا نرجع إنعمر الدار .

الفلم يلي صورته أعلاه , هوه إعادة شبه تجسيدية (ما حضرته) لفضيحة أبو غريب وعرض سريع لما قد يتبادله إثنان يمثل كل منهما الأبيض والأسود , حوار بين الجندي الأمريكي المدجج بالأكاذيب والعهر والسادية والوقاحة والحقارة يعني ببساطة يمثل الحكومة الأمريكية من جهة وبين الجندي يلي هوه يمثل البطل الأمريكي الأمر أبو عيون جريئة يلي راشمين صوره في النت إنو بسلم على الأطفال الأفغان شبه العراة المبهدلين ويطعمي بسه من أكله ويساعد فقراء السودان ويحمي أرض العراق الذي قام بتمزيقها مع أصدقائه ويلي ما بخلص رشاشه من الرصاص وما بيجي إلا شوية سخام على وجهه ويمثل الضمير الحي في البشرية.

وبما إنو الدماغ بمشي على مبدأ رافق المسعد تسعد (مبدأ حقيقي في علم النفس) أي أن الدماغ دايما بروح للسعادة خدوها قاعدة أساسية في عمل الدماغ , دايما الدماغ بترك الأسى وبروح للسعادة , دماغنا في افلامهم التافهة بتترك الجندي المكشر الوقح (حقيق الجيش والحكومة الأمريكية) وبروح للجندي الأمور القوي يلي بعطيني سعادة طهارة النفس البشرية ويلي بضحك على نظافة مش على خبث السفالة يلي فيه , كل هالصراع النفسي بتلاقينا (الجزء المتخلف من البشرية يلي مش عارف ربنا وين حاطه) بنطلع من إنو آه والله في جريمة إسمها أبو غريب وبنروح للصراع النفسي ما بين مين الجندي الأحسن وإنو آه حرام في منهم كتير مناح وإنو آه أمريكا اخيرا فهمت غلطتها وإنو أه لا زال يوجد صديق امريكي في الجيش الأمريكي إذا إحتل بلادكم وإنو آه يا امريكان كونوا مناح لما تروحوا تحتلوا بلاد تانية وإنو آآآآآآآآآآآآآآآآآآآآآآآآآآآآآه بدي أسب ومش قادرة .

سيريوسلي بيبول؟؟

 

 جد في فئات بشرية غريبة في هالدنيا ,, للأسف بحكي هالمرة عن الفئات العادة يعني الناس يلي مننا ,, الناس يلي مش في فئة الإنعجاق النفسي أو الفشخرة أو السخافة أو اي فئة بس تناقش في ساحة الحوار إنتا بتحكي في نفسك (مين اللي جابوا هون) أو يصدح أحدهم قائلاً له : "ماتعرفناش على الأخ؟!" .. نو نو ونو ,,, أنا بحكي عن الفئة الطبيعية إلى المتميزة .

بتمنى أول شي ما أكون منهم بس بنفسيتي بحاول أحفظ طريق الرجعة وبحااااارب حالي عشان ما أوقع في هيك غلط شنيع ,, لأني ببساطة بكون أكذب على حالي قبل ما أكذب على يلي قبالي لما احكي هالشي ,, وبصراحة يعني أجيبها من الآخر بتذكر إنها بلشت من مبدأ خالف تعرف ,, وبعدين سحبت معي إلى بعد ذلك ,, ويلي خلاها تسحب معي هيه شغله بستمتع فيها دايما .. وهي نظرة الناس انو أو ام جي ما كان لازم تحكي هالشي .

الإشي يلي بحكي عنو صار معي في المقابل ما بعرف ليه وكان من ناس مش متوقع منهم يكونوا بهالمستوى الفكري ,, لانهم ببساطة مش منووووووووو ,, وناس قريبين مننا ومنك ومني وإلخ .. بس إنو لما بلشت المناقشات ,, بسأل حالي إنو وااااو ذات اسكليتد كويكلي .. إنو عمو بتذكر في الأيام الخالية إنتا حكيتلي غير هيك ,, أو ,, رأيك ما كان هيك ,, أو مش إنتا كنت مناهض لهلموضوع ,, أو مش هالشي يلي إنت بتحكي عنو مخالف (للمبادئ يلي عندك) يا أبو المبادئ؟,, وما يصيبك في مقتل إنو بكون هاد الشخص يلي تسمع منو حد إنتا بتقاربه من مستواك أو حتى بتنظر له إنو بمستوى أعلى أو أقل ما فيها فهو مش من المستويات المتدنية فكرياً ,, إنو وات ذا فاميلي سيركس أر يو توكنج أباوت؟؟ .

مممم بغض النظر عن التدشاية يلي سمعتها قبل شوي وقطعت حبل أفكاري (تباً) ,, فا كان تحليلي إنو هدول الأشخاص ببساطة ما جرحوني ,, وتش إز كايندا هارد لأني خشبت تقريباً ,, بس رح أحكم عليهم بأحد الخيارين ,, 1- همه في الماضي لما إنطرح الموضوع أعطوا رأيهم فيه لي أو حكوا إنو هالمبدأ من من ضمن مبادئهم همه كانوا بعتذر (خجلانين/استحوا يكونوا صادقين// مابدي أستخدم كلمة كذابين لأنها ما بتنطبق عليهم في هاد المستوى الفكري) ((وهاد الشي يلي حكيت عنه في الفقرة التانية إنو بحارب حالي وبقول رأيي من الآخر عشان الناس ما تنصدم فيه بعد هيك لا "اكون استحيت أكون صادقة")) ولما رجع إنطرح الموضوع عليهم وبينت عندي الامور على غير ما كانت ظهروا عليي في مظهرهم الحقيقي الصادق برأيهم الأصلي يلي ببساطة ما كان رح يفرق معي أو يغير من رأيي فيهم لو طرحوه منذ البداية . 2- إنو يكونوا نسيوا شو حكولي زمان وهاد نوعاً ما هو أمر مشابه للواقعة يلي شرحتها أو ممكن يكون تفرع عنها بس أنا نسيت الخيار التاني وقسمت الخيار الأول إلى قسمين (بروببلي بسبب التدشاية) .

جزء من الناس هدول همه إتنين منكم يلي بدخل لهاي المدونة بعرفوهم مممم .. كل واحد منهم عارف حاله وعشان ما أحط الكل بموضع شك فا - المواضيع يلي ضمن نطاق البوست يلي بكتب فيه كان ينتهي بموقفكم الغريب دون أن أنبت ببنت شفة من بعد ذلك وعالأغلب قطعت حواري معكم من هديك اللحظة ,, واحد ممكن يحكي طيب دامك خشبتي ليه قطعتي حكي معهم؟ .. لأنو ببساطة بهديك اللحظة يلي خالفوا فيها شو حكوا بالزمنات .. صار كل شي حكوه بالنسبة إلي معكوس وكل كلمة حكوها صارت في عداد إنو ممكن يرجع هاد الشخص ويغيرها أو يبدلها بالرأي الحقيقي .

من فترة م بقصيرة حكالي حد (برضو معروف شوي بهاي المدونة) عن حد (معروف برضو بهاي المدونة وبعلق بشكل خاطف) إنو رجل حقيقي وإنو ما عندو لف ودوران .. ممم وبالفعل هاد الشخص هيك حتى لو بعرفوا عن النت .. بس أقل ما فيها كلمته في محلها .. بتمنى أكون متلو (مش رجل حقيقي بمعناها الحرفي لوول) ,, بس بتمنى من نفسي قبل ما أتمنى (وأنظّر علي أي شخص تاني) إنو أكون شخص حقيقي وكلمتي في محلها .


والصدق أنجى من الكذب

هتورات - بالة احلام



مش رح اجيب سولافة اني غايبة من تسعين سنة .. امشو معي في قصة انو ما صار شي .. شكرا لتعاونكم معنا .

لا زالت جملة (يلي مالو باله مالو عيد) بنفس صوت البياع ترن في داني .. بتزكر كنا ننزل على مخيم البقعة عشان نشتري حصيره لستي او مشمع او الغاز ابو التلات عيون ونشتري خرق (شالت الحجات الخفيفة) واشياء اخرى .. يلي زكرني في هالشي كان كالتالي:

بروح في طريقي للبيت وبمر من صويلح ومن فترة صرت اشوف بياع بسطه او عرباية بوقف قريب من الدوار وبيبيع ...... العاب ودباديب باله . مستعملة . قديمه . مستهلكة . ومنها بين عليه القدم .. ما بنكر انها مجموعه منوعه مش الشخصيات الكرتونية  يلي صعب تلاقيها في (المكتبات) لان تقريبا المكان الرسمي لشراء الدباديب هوه المكتبات (نيله) .. ما بنكر انها الطف من دباديب الحب ممم يمكن لاني ما بطيقها والدباديب يلي عندي عباره عن سعادين وخواريف بس بالوضع العام افضل (مضمونا) من الدباديب التانيه .. مين احسن هومر سمبسون ولا دبدوب احمر؟ .. القصة كانت انو اول مره وكل مره بشوفهم (اي داي ا ليتل انسايد) .. كيف تكون الشغله انو ام تشتري لابنها دبدوب عن الباله .. بتذكر (وبطبيعة طفولتي السيئة) كانت لعبتي (يلي اخدتها امي مني واعطتها لحد غيري في كل مره) كانت لعبتي (ولو انها مش بالة) صاحبتي والحد يلي بنام جنبي وبضحكلي دايما ومتحملني لو خلعت ايدها او رجلها او فك لحامها او فكت خياطتها .. عباره عن عالم متكامل .. ينشرى من البالة .. مش عارفه كيف احكي الدياق يلي جواتي من هالشي بس رح احاول اعطيكو امثلة تقريبية .. زي لما كنت تشتري الدخان فرط .. زي لما تروح عالبيت واهلك متغديين وتاركينلك صحن كلو رز وكم نتفه من باقي الطبخة .. زي لما تشتري السيارة الفلانية لانها على قد فلوسك .. زي لما .. زي لما تشتري المنتوج الاقل جودة لانو اكبر وارخص .. زي لما تسمع مباراة على الراديو او تحضرها بعد بيوم .. المقصود انها بتوفي بالغرض؟ نعم توفي بالغرض .. تأدي اللازم؟ نعم تأدي اللازم لا وبسعر افضل لما تشتري دبدوب طول ابنك بليرتين وازا فاصلته بعطيك لعبه زغيره ببلاش .. لكن هل هيه مبتغاك؟؟ .. هل نفسك بداخلها ما بتحرك فيها اي نازع او ما بنكسر فيك لو قيد انمله؟ .. القناعة جزء منها غض النظر عن يلي قلبنا بتلهفله وبتتضمن دعاء انو ربنا يعوضنا بالاحسن .. بمعنى انها ما بتحل بالكامل محل رغبتنا بالشيء او رضانا التام بالبدل .. كنت بدي احكي للناس خلو كل شي باله خلو الاكل باله خلو حياتنا وشغلنا باله .. بس ابعدوا عن العاب الزغار ودباديبهم .

ليش التشذب .. لليوم كل مره بيجي على بالي عوامة .. بتزكر البياع يلي كان في البقعة ببيعها .. سخنة .. قطر .. كتيييييير .. ولا زلت اقارن كل مره ادوقها بالمرة يلي اكلتها هناك .. في الكيس البني تاع الفلافل بس الكيس الكبير ابو عشرين حبة .

يا رب لطفك


كنفحة خير من ربنا ,, بيجيك حلم ,, تشوف فيه شخص عزيز عليك بينك وبينه ملايين الأميال (المسافة بعيدة) ,, شخص ما بتعرف عنه شي ,, ربنا بطمنك عنو ,, بريح قلبك ,, بتشوفه بأحسن حال ,, بأبهى صورة ,, بصحة كاملة ,, بالصورة يلي بتعرفها عنه بشكل أحسن مليون ألف تريليون مره .
يا ربي ما أكرمك بعبادك ,, من وسط كل النكد ,, وردة صغيرة تتفتح ..

امشي على كيفه ,, وكيفه مش عاجبه


كما قال أحمد مكي ... بغض النظر عن ضحكتك المخيفة .. والخص اللي بين سنانك .. فا إحنا إههههههء حنمشي عالخطة دي .

يا ساتر على هيك شخصية متجمدة .. ببساطة شخصية متيبسة بشكل مش طبيعي .. بنظرها يمكن آه فيها مرونة .. بس مش بالقدر الكافي لتتعامل مع شخصيات جديدة أو مختلفة .. بتلاقيه .. إنو أوك إنتا موجود .. بس لا تعمل هيك .. ولا تحكي هيك .. ولا تلبس هيك .. ولا تكون نظرتك هيك .. والأنكى لما يطرقك مورينا زان على مصدغك الأيمن ويحكيلك أنا بتقبل وجودك وشخصيتك ((بس)) لازم تكون هيك .. يلي هيه بالأحرى .. بدياك تكون نسخة عنو

عبارة تقال واكررها لزناخة الموقف .. وات ذا هيل .. شو بالنسبة إنك متقبل شخصيتي ومش عاجبك شي فيها؟؟ .. متل كأنك تحكي لواحد ياي سيارتك كتير حلوة بس لو إنها نوع تاني كان أحسن .. بالله .. بتتخوث .. من كل عقلك بتظحك عليي؟؟ .. أوك أنا من جهتي بعتبرك واحد من الشخصيات المتنوعة وبتقبلك إنك من النوع يلي بدو كل الناس بتكون متله .. بس بالمقابل هالوووووووو عاملني بالمثل .. يعني لو بدي أعامله بالمثل بكون خنت مبادئي يلي تحتم عليي أعتبار كل شخص مختلف إنسان إلو مكوناته لازم أحترمها متل ما بستنى بالمقابل تحترمني على شخصيتي (من باب المعاملة بالمثل) .. بس هالشي بمشي؟؟ .. أكيد لأ .. لأنو بدرجة التيبس يلي مش مستعد حتى يناقش في دماغه يلي قد كده .. طب يلي قد كده .. إنتا مش عاجبك لا كده ولا كده؟؟ .. المهم مش قادر يناقش حتى مش حتى يضغط على حاله بالتقبل لا لا بحكي إنو يناقش .. أو يصفن بحاله إنو يناقش .

ببساطة هدول النوع من الناس كونك مضطر إنك تتعامل معهم .. رح تتعامل معهم كالتالي :
تراقب تصرفاتهم شو بعملوا وكيف بحكوا وشو بفكروا (وعالأغلب تقليديين بنوع شخصيتهم) وتمارس كل شي على هالمبدأ .. يتبع ذلك إنك تتوقى كل شي ممكن إنو صار معك و (إنتقدوك علقوا عليك تطاوشوا معك فيه تحسسوا إنسطحوا أعطوك ملاحظة .. ألخ) وانو تحاول ما تكرر هالشي .. ممكن إزا كانت العلاقة مهمه إنك تسألهم (أعمل إيه بنفسي أنا) من باب إنك تكون الشخص المحترم في العلاقة وحرصاً على أي مصيبة ممكن يطلعوها من حواشي شخصيتهم المهولة .

أما أهم شي في هاي العلاقة أو الصورة المطبقة عليها .. حتكون شي مشابه للي فوق .. إنتا حتكون الشخص المجبصن عن أي حركة لشخصك الكريم .. وهوه يرتع ويتخمخم بحياته ومنظورة يلي بالنسبة إلك (هو منظور ضيق) رح تكون حياتك معو متل .. حاشاكم وحاشا مقداركم (مثل أول يوم تلبس شوز) .. عادي رح تشوف بعيونك الوان الشمع والفولوماستر والمائي .. رح ينضغط دماغك .. رح تفكر (كما فكرت في يوم من الأيام) إنو ليه ما تنتشر سياسة المشي بالحفاء .. رح تعيش هاي اللحظات كل مره بتكون معه - رح تتعود بعدين بس أولها هيك .. بس رح يضل شخصيتك وحواراتك الذاتية ونفسك يلي هي بالمقابل رح تكون (بغيابه) متل لما تروح عالبيت وتشلح (الشوز) وتحس إنو عم تمشي لأول مره عالقمر .

هدول الأشخاص منتشرين كتير من الأهل إلى الأصدقاء إلى الأزواج إلى المدرسين والمدراء .. هدول الأشخاص ما بشوفوا مين إحنا .. ما بشوفوك شعرك منكوش لأنك بتستحي تعمل هالشي قدامهم .. ما بسمعوك تتوجع أو تشكيلهم لأنك بتعرف شو رح يردوا عليك وعالأغلب ما بتأمنلهم .. هدول الأشخاص نفسك على طول بتكون بحالة تأهب دائمة .. هدول الأشخاص أحد أهم الأسباب لتكون مفهوم (بوجهين) .. هدول الناس بتستغلي عليهم تكشفلهم رأيك - فكرك - شخصيتك - أي شي غالي عليك بالمستوى العلاقة يلي أنتا فيها معهم .. يلي بفرقهم عن الناس الغرباء إنك مضطر تتعامل معهم وإلى حد معين ممكن يكونوا ماسكين أمر معين فيك أو سلطويين عليك بحكم العلاقة .

ملاحظة مقيته : يلي بكرهك في هدول الناس زي زناخة مستر بين فوق .. لما همه بوجودهم يقيدوك تلاقيهم يعطوك إنتقاد زغير بالنسبة إلهم .. بس بالنسبة إلك كتير كتير كتير كتير كبير .. إنو بما معناه .. خليك طبيعي .. خد راحتك .. كون على نفسك .. أو إنو يطلبوا شغلة إزا إنتا عملتها رح تدخل في خضم شخصيتك يلي همه رافضينها .. إنو يعني شو بدك ترد عليهم ,, شو بدك تحكيلهم .. متل المثل اللي بقول فوق الموت عصة قبر .. فوق ما إنتا مربطني بشو لازم أعمل وشو ما لازم أعمل .. عم تطلب مني أجمع ما بين شروطك وحريتي؟؟ .. إنو مثلاً أشتغلي بالطريقة يلي تعجبك بس تقيدي بالمليون شرط هدول لأن هيك مصلحة الشغل تتطلب .. طب يا بني آدم إنتا منطقي في طلبك؟؟ .. زي ما حكى عبد المعطي عايزه لو سمحتي ولا جدول الحصص حددي طلبك في حاجة واحدة لأني مقدرش أديك عطائين في الوقت نفسه .

بدك أخضر ماشي صار لوني أخضر .. أه أنا لوني أصفر .. بس عشان حضرت جنابك صرت أخضر .. هسا بتحكيلي خليكي أصفر عادي ما بتفرق .. شو هالهم المصبر؟؟ .. من وين بتشتروا أفكاركم؟؟ لأ لأ سيريسلي من وين؟

حد فاهم شو بحكي؟

الصورة والأصل - المحكمة والواقع


يلي بتعايش مع المحاكم وجو القضايا والمجرمين واللصوص والأوغاد (المعلم أبو لبده) طبعاً هو بقصد فيهم الموكلين يلي بيجي بترجاك بقدراتك انك تطلعة من مأزقه العصيب .. يلي ينعكس علينا تباعاً .. وكأنو المحامي يلي بدافع عن هاد الشخص ((وبناءً على طلب من هاد الشخص)) صار يقتبس من نفسه ويتمثل بما قام به موكله .

مش هون القصة ..
يا جماعة القصة تتمثل في الطريقة يلي همه برسمولنياها لنقدر نوصلها للمحكمة (طبعاً مش كل المحامين بترد على كلام موكليها) بس الأغلب بحكيلك مطرح ما بدو صاحب الحمار أربطه .. بتصفي الشغلة إنو مثلاً طخ فلان فلان .. بحكولك لا كنا بنمزح .. لا ما شفته .. لا ما كنت قاصد .. لأ أصلا أنا طخيت على الكلب يلي كان بدو يهجم عليه فا إجت الرصاصة بالغلط براس المغدور ,, وإذا كانت سرقة .. لأ ما كان موجود .. كنت في عرس إبن عمي والكل شافني .. أصلاً أنا ما بمد إيدي على الحرام ومن هالسواليف الطرمة ,, أما إذا كانت قضية ذم وقدح عدا عن إنهم بنكروا الحكي بتلاقيه أنا ما بتطلع مني الكلمة أنا ما بوسخ لساني بهيك حكي .. هاد كلام كيدي .. هاد بس بتبلى عليي لأني مش عارف شو .. وبيجيب اخوته وولاد عمو ليشهدوا أنو ما شافوا عليه العيبه ,, أما بخصوص السيارات .. بتلاقي الواحد إنو سواقتي مافي منها .. سواقتي رايقة .. هوه طحش عليي .. أنا كنت بحالي .

بغض النظر عن هاي الحالات المذكورة أعلاه وقبل ما تكون أو أكون أنا القاضي في الموضوع أو إنت الحكم حسب ما بتسمع .. بحب أحكيلك عزيزي القارئ أنك تعيش في مجتمع """يخالطة فئات متنوعه""" من جانح وسرسري وعلى أعصابه وما بعرف يسوق وما بعرف يتعامل مع الناس وما بعرف يحكي ويفكر وما عندو ذرة ضمير ولا حتى وازع ,, كيف يتوقع إنو لما يحكي هالحكي الناس تصدقوه؟

أنا أصلاً بطلت أصدق حد أصلا ليش تصدق حد من موقف واحد تعاملته معو؟؟ أو من موقف واحد والإنسان أصلاً كلو نوازع وفجور وكذب وخوف من الكشف وخوف من التهمة والسجن والبهدلة وأشياءون تانيه وخوف ياخدوا فلوسك عشان ما تقدر تشتري أي فون جديد أو يحجزوا على سيارتك يلي طول نهارك بتروع فيها البشر بسواقتهم الخامممممه .. مش فاهمه مش فاهمه جد .

قال أنا بريء يا بيه .. طب أنطم واسكت إنت أصلاً لازم المحكمة تدينك بالإعدام لما فتحت تمك وتعدمك على  كلمة "أنا" .

وهون بحكي (فئات) مش الجميع
بس هو الفئات مكونة الجميع
:P

الحياة ٢٦-٠انجاز



جد هاي السنة اجت زي يوم الأثنين .. مجلط .. زنخ .. بلا فايدة .. ومش محدد حاله ولا معروفله راس من رجلين .. على قولة مختصر مفيد خانوم (ام ابو الهنا/سامية الجزائري) - متل سيران الكلاب غبرة وقلة واجب .. ذا لولينس عم يقطع شقف من نافوخي .. الوزراء في المكتب والشغل عم يزيدوا .. طاحونة أهلي عم يعلى صوتها .. وصعود الجبال صار كالعيش في الحفر .. هزات البدن برعاية مولينكس محضر الطعام .. و نعتذر للسادة المشاهدين عن هذا العطل المعنوي ومانجيلكومش فحاجه وحشه.

الشيء والأشياء المشابهة


الموضوع أبداً ملوش دخل ... وفيروز بتغنيلي (يا خوفي إبقى حبك في الإيام اللي جاية .. واتهرب من نسيانك .. ما إتطلع في مرايه) .. لا برضو ملهاش دخل .. بس مش عارفه ليش في تحرش ذهني كالعادة من كل ما هو حواليي .. لدرجة حاسة حالي في عايشة في (هو تاون - دوكتور سوس) .

يلي بدي أحكي عنو .. إشي غريب بالنسبة إلي .. بس صرت ألاحظة بحالي .. وهالشي عفكرة موجودة عند الكل وأمر طبيعي .. بس ليه غريب بالنسبة إلي؟؟ .. لأن فيي شرش إنو بعد تكرار أكم من مره بخف إهتمامي أو لأبسطها .. المسننات ما بتتحرك عندي على بعض أكتر من تلات أربع مرات بعديها زي الزمبرك بتفط وبتفتشلها على سولافة ثانية .

توضيح .. أو بالأحرى ندخل بالموضوع .

عايشتوا شغلة في حياتكم أمر معين.. وانتبهتوا بعد هيك إنو إختياراتكم (لشخصكم مش إختياراتكم مع حد تاني) .. متشابهة في كل مرة؟ .. يعني مثلاً إكتشفت حالك بتحب الأحمر وإنو تسعين ألف مليون شغلة حواليك عم تختارها على هاد الأساس وإزا غيرت بتختار خمري أو أحمر فاهي أو أو .. أو مثلاً حد من زغره بحب جوليا روربتس فالما كبر إنتبه إنو ما بحب شكل البنات إلا الي شعرها كبير وكيرلي أو أحمر .. أو أو أو .. وصلت الفكرة؟

هالمرة بديش أدخل نفسيات .. ولاوعي .. ولحظة سعادة وعم تكررها نفسكم (مع العلم إنو الأغلب تفسيرهم هيك) .. القصد إنو (فيروز عم تغنيلي حالياً معرفتي فيك .. يا حلاوه) .. أنا بحكي عن اللحظة يلي تقعد وتصحى على حالك إنو آآآآآآه هسا فهمت أنا ليه بختار أو بفضل أو بحب أو بستمتع بأمر معين كل مره وأساس هالشغلة شي معين .. وعفكرة مش ضروري التكرار ومرور فترة زمنية طويلة .. القصة إنو يكون إختيارك للأمر ما كان مبني على الأساسات يلي إنت بالعادة بتروحلها ,, لأ .. هالمرة كان مبني على شي ما فكرت فيه حتى , أخترته أو أعجبت فيه أو (خرط مشطك) ,, لسبب ما - ما انتبهتله ساعتها .. وإزززز بعد فترة تحكي لحالك آآآآآآآه هسا فهمت القصة .

الموضوع يلي صار معي تطلب أكثر من حوالي سنتين تلاته لأكتشفت الموضوع .. وأخذ مني أكتر من حوالي الاسبوع للأسبوعين بعديها لأكتشف في كل مره كنت أختار و/أو أفضل نفس الموضوع الراجع لشيء حبيته زمان ,, ولحظتها اصفن في حالي إنو هاااه؟؟ .. وبنفس الوقت كان أي شي مختلف عن هاد الموضوع أتعامل معه زي ما تتعامل مع الاجانب .. إشي غريب بس بنفس الوقت صرت أفكر بحالي إنو معقول خياراتي بعد هيك تتغير ولا كل مره بدي أصحى على حالي بعد فترة مش وجيزة وأكتشف الموضوع. 

نقطة الضعف ,, مفهوم افتقد هذا العصر طريقة استغلاله


(تنويه .. هالحكي ممكن تكونوا بتعرفوه) .. آه كل واحد عندو نقطة ضعف .. مافي حد قد ما طلع ونزل إلا يكون عندو .. الشغلة مش أسطورة ولا قصة خيالية ولا تحدي أو كشف مستور ,, بس فعلاً قبل شوي كنت في قصة عويصة ,, وللصدق هي نفسها يلي حكيت عنها في البوست السابق ,, بلحظات فكرة بشغلة (نوعاً ما نقطة ضعفي) لأن عندي نقاط الضعف زي الغيوم بتروح وبترجع .. وقفت وطرحت عليها معطيات جديدة .. تن تن نينين .. مع معطيات ومطلوب جديد المسألة طلعلها جواب مختلف غير .. إلخ إلخ .

بفكر دام هيك .. ودام أعدائنا وأقرائنا (أقرباء أعداء) والحبايب والأصدقاء والجيران والناس يلي بتيجيك بالمستحى والمخاجلة والغرباء والتعساء والحزطاء وغيرهم وغيراتهم .. كلللللللللللهم يعزفوا على وتر نقطة الضعف ليش ما أحنا نكون منهم .. ونستغل نقطة ضعف حالنا في تحقيق مصالحنا الشخصية .

مثلاً إنت بدك تنحف وبنفس الوقت بدك تشتري شي جديد .. (عصفورين بحجر) .. بتقطع عن حالك الأكل من ناحية وبتنحف ويلي تقطعه بتوفرة لتشتري الشي الجديد .. كالبنيان الواحد يشد بعضه بعضاً .. آه أوك هاد مش المثال الأروع وأكيد ناس كتير جربته ومش كتير زبطت وبجوز في الآخر تصرف كل يلي قطعته على حالها في الأكل .. بس بضل هاد مثال ونقاط ضعف الإنسان كتير بس المهم كيف تستغلها وكيف تقدر تتفق مع حالك إنك تمشيها ,, رشوه من هون (لحالك) .. مزوغلة من هناك (ليمشي المشروع) .. بس برضو ما تكون (الرشوة والمزوغلة) مشروع فساد متكامل لأن بتطلع زي ما رحتي زي ما جيتي ونقطة انتهى .


الكاتلة
إم السعد

الفتة في ايد الفقير .. هجنة


كما هو ظاهر من العنوان اعلاه .. واضح شو قصدي ومقصدي .. بأبسط الاشياء يلي بتبسطني .. بتفقع بوجهي زي اللغم .. بتخرب .. بتقلب عليي .. المهم ضروري يصير (لوكا) على رأي هالوحده .. وبنفس الوقت مش عم بقدر اعيش بدون هاي الشغلات الزغيرة .. بكفيني كآبة الحياة الروتيني يلي لازق بوجهي يوميا ويلي عم تمشي بسلو موشن اقطع من مشهد ماتريكس ما غيرو .

يعني ازا بدي اعطيكم مثال تقريبي بحكيلكم زي الموظف يلي زادوه عشر ليرات وانبسط .. وييجي معالي النسور ويطرقه هداك الخبر انو في ارتفاع على الاسعار وخدلك يا معلم على الصاعقة .. بنتفخوا كل الشرايين يلي براسك وبترتفع درجة حرارة الدم بالدماغ وببلش بعدها انخفاض ساحق في درجة الحرارة تصحبها دوامه اغمائية وتحس انك ختيرت وتجعيدتين بروزوا وجهك وسبع شيبات زخرفوا شعرك .. زي نهاية الافلام يلي كنت متحمس تحضره .. زي الخمسة يلي اكلناهم على ستاد عمان .. زي الموقف يلي بكون فيه معك واحد تبصم بالخمسين انو اتيس منك مع ختم الدولة وبتيجي لحظة يكسب/يتعين/ينجح ... إلخ وانت لأ .. بالمختصر اشي بسطح .

بطلت اكمل وسطح

لأ مش أحلى


بديش

كيف لا تكون عصبياَ


قبل شوي وأنا مروحه على المكتب سمعت ثلاثة واقفين واحد منهم بحكي للتاني عن التالت إنو هاد الشخص أحسن بني آدم في الدنيا .. سأله التاني ليه؟ .. جاوبه الأول: لأنو مش مستعد يعصب على أي شي .. أنا قعدت أفكر أستنى بلكي بدو يخصص الموضوع .. ما حكى تطلعت على الشخص التالت .. رجل كبير بالسن بشبه الحريري تقريباً .. بس جد وجهه هادي ومن نوع الأجداد يلي بكونوا مسالمين .

بتطلع إنو جد كيف ممكن يكون الشخص مش مستعد يعصب أو يزعل على أي شي؟ .. أي أنا لما أكون ماشيه في الشارع وأشوف واحد قدامي ما بعرفه يرمي سيجارته على الأرض بحس حالي بدي أنسطح إنو تطلع على هالمخ الزفت .. وهو على مستوى سيجارة في شارع عام من شخص ما شفت وجهه حتى وممكن أكون كرهانه المنطقة حتى بس المبدأ بزعجني وبسطحني .. حتى وأنا بكتب هاي الفقرة على شعرة بدي أنسطح .

المشكلة مرات بتصير معي سواء بالشغل أو بالبيت إنو شغلات ممكن يمشيها الواحد .. أنا بتعلق في زوري بنفعش أمشيها .. ليه؟ .. لأن بخاف بلحظة من اللحظات أعيش حياة البلادة يلي كتير ناس بتعيشها .. آه بخاف أبلد وأصير متل الناس يلي بكره تصرفاتهم .. مستعدة أخلي بشنتتي قزازة عصير بتسرب وأغرق فيها ولا أرميها على مد إيدي .. مستعده أشتغل شغلي وشغل غيري عشان ما بلحظة حد يفكر (ولو فكرة عابرة) إنو ييي على إهمالهم وتيجي إجري بالموضوع .. مستعدة أعمل شغلات بحس حالي بحملها فوق طاقتي وهالشغلات بتعصبني وبكون عم أغلي بس لازم أمشي فيها عشان خوفي من البلاده .. وهون ما بحكي عن الكسل عشان ما تختلط الأمور بحكي عن "القصويين" للقربطه في الأمور والتعصيب على الأهمال فيها والبلادة يلي هيه الجانب التاني وما يترتب عليها من أهمال ورا أهمال .

آه الناس يلي فوق حكيت عنهم حياتهم أسهل وعلى فكرة همه يلي حياتهم متماشية مع المجتمع والواقع وكل شي حوالينا .. آه في شغلات لازم الواحد فيها يتبع سياسة (مطرح ما صاحب الحمار بدو الحمار أربطه) وفي شغلات أشتغلها بكاملها بس لا نكون (ملكيين أكتر من الملك) .. وشغلات لازم تطمسها وتطنشها عشان تقدر تسيطر على الشخصيات الزباله يلي قدامك لأنو (إذا أكرمت اللئيم تمردا) وإنك تهمله هوه وشغله لازم تقدمه على انك تحرق دمك على شغله عشان يتربى .. وفي وفي وفي .. بس أنا شكلي فقدت السيطرة .. أو إني مش مرنه كفاية أو في خلل من نوع ما عندي وشكله الخوف مسيطر عليي وبعصبني على أقل تقصير أو حتى ""شبهة خوف من التقصير"" .

بتذكر يمكن قبل سبع سنين أو أكتر .. كنت مرتبه البيت على سنجة عشرة ومبسوطه وقمت كل الأشياء يلي ما إلها داعي في الصالون (يلي بالعادة إمهاتنا بتحب تحتفظ فيها ولو كانت مش حلوه أو مشوهه المنظر بس بنظرهم جميله لسبب أجهله أنا) .. وفجأة أجت إمي وكنت مبسوطه والله هسا بتحطلي عشرة على عشرة ونجمة وممتازة .. إلا لقيتها كالغضب الساطع آت .. وزعلت وعصبت ورجعت كل شي مكانه وخلال ترجيع كل شي مكانه توسخت الدنيا ورجع على العهد القديم وبروزتلي تعبي بكلمة ((لا تصيبي شي في الدار وبس يصيرلك بيت بترتبي وبتقلبه مثل ما بدك)) .. ومن يومها لليوم مش متذكرة رتبت أو نضفت أو حركت ساكناً في البيت .. مش لأنو هيه حكتلي هيك .. لأن ببساطة ما في بداخلي أي دافع أعمل شي .. فقدت الدافع إني أرتب البيت حتى لو كان قايم قاعد .. ما عندي أي إهتمام حتى أو رغبة إنو أعيش في بيئة منظمة داخل بيتنا .. مش عناد الشغله بس فعلاً بطل يزعجني أو يعصبني كركبه البيت يلي بالأصل (كأنا) تدفعني إني أغير وأرتب .

نفس المكان



شعور بالإنفصال عن المكان بحد زمني فاصل ممكن يكون كم ساعة أو بين يوم وليلة .. ينفصل شعورك عن هاد المكان وأكيد بختلف من شخص لآخر .

كيف يعني؟ .. متذكرين آخر يوم مدرسة سواء توجيهي أو مثلاً خلصتوا من هاي المدرسة الإعدادية ورح تنتقلوا لمدرسة تانية .. تنتقلوا من بيت .. تتركوا شغل .. أو لأي سبب آخر يسبب بالنتيجة عدم مداومتك أو يقطع رابطة ترددك لهاد المكان .. أو بالأحرى إن هاد المكان إنت لا تنتميله بعد الآن .. الغريب هيه الفترة ما بين اليوم يلي إنت تداوم فيه وينتهي عملك وبوكرى يلي إنت جاي فيه تاخد مستحقاتك أو حتى تقدم إستقالتك أو يفصلوك .. إلخ إلخ إلخ .. هون شعورك بهاد المكان وإنتفاء ال (     ) معه .

شو المعنى إنك بيوم تكون تحس في إشي وتاني يوم تحس في شي تاني .. الإشي الغريب إنو شعورك الأخير ما بيتشابه أبداً مع الشعور يلي عشته وخضته أول يوم إنتسبت فيه لهاد المكان .. يعني ببساطة شايف المكان وعارف المكان وعايش فيه فترة طويله بس ببساطة بتحس حالك إنتقلت (مثلاً) ما بين إنت كنت موظف إلى مراجع عادي لدائرة حكومية .. هاد مش مكان خاص فيك إنت مش مخول إنت ما إلك صلاحية ووجودك آني ولفترة قصيرة .

بس يلي بدي أحكي عنه بشكل خاص إنو شو يلي بخلي المكان هاد بالأصل مكان بعنيلنا؟ هل هيه تراكم للتردد إليه؟ أو إنو دماغنا بجزئه اللاواعي بحفظ المكان وبسترجعه وبكرره ولما ننفصل عنو بصير في Error إنو في شي ناقص وممكن ببساطه تغيير هاد العنوان يلي حافظينه في دماغنا يزيل هاد الشعور؟

يعني نفس الشي يلي بعطينا الشعور الأول هوه نفسه منبع الشعور التاني؟ (بس إنو واحد بالإيجاب وواحد بالسلب) .. وهون ممكن نحكي عن وجود قدرة أو حالة على إننا نفصل حالنا أو نربطها .. يعني خلال فترة الشعور الأول (خلال فترة استمرارية الارتباط) ممكن يكونلنا القدرة نزيد كميتها وبنفس الوقت يطرأ أي شي ينقصها؟ ولا هيه شي واحد يا بينوجد يا بيختفي؟ وإن هاد النقص بالكمية هو مجرد صورة دماغية بتخوفنا من الشعور التاني أو بتحببنا بالشعور الأول؟ .. يعني مثلاً هل علامات زيادة أو وجود شخص محبب أو شراكة جزئية ممكن يزيد إرتباطنا وفي المقابل وجود شخص سالب لصلاحياتك في الشغل أو مؤذي في الدراسة أو حتى مشاكل في البيت ممكن تخوف أو تعطيك إنذار الشعور التاني؟

إذا افترضنا وجود "صحة" هاي الصورة الدماغية .. ممكن نعكسها؟ .. يعني مثلاً حد بسعى إني أنفصل من الشغل أو مثلاً زيادة في شعبية في المدرسة ... إلخ .. ونتمكن من عكس الآية؟ .. ولا هيه ببساطة درجات سلم إذا طلعت أو نزلت أول درجة ما رح تقدر تغير وضعك؟

حد فاهم شي؟

....

he is your Ex not your fix

على القناة الثانية

Dear dairy

شو في ابشع من أنو انسان يشوفك بعكسك
يشوفك بأنك كل إشي مش انتا
ويكون مقتنع بهالإشي
إنتا بنظره الشخص الشرير تبع المسلسلات
انتا عاطل انتا كذاب انتا لئيم انتا مجرم
انتا ما بتحس بغيرك انتا ببساطه مش انسان
هل انا داعش؟
هل انا كوكتيل؟
يعني هل انا باد بيبول؟

Now Playing

والأمر الواقع..يويا
قمع ومواجع..يويا
ممنوع تشكي ..يويا
وممنوع تحكي..يويا
طب نسكت ليش..يويا
لقمة العيش..يويا
يلعن أبوها ..يويا
علي جابوها..يويا
ليش السكوت ..يويا
ما كله موت.. يويا
ونموت بعزة .. يويا
ولا موتة معزة.. يويا

.....

.....

خانة إقرأ

خانة إقرأ
اشي بصدم الصراحة

أسوأ العباد عند الله

أشعار

آني لأعرفهم من قبل رؤيتهم والماء يعرفه الظامي وما وردا

ريكو من دد

ريكو من دد
لا زال في الجمجمة

حقوق المؤلف

جميع الحقوق في الصور أو النصوص المقتبسة أو الفيديوهات أو الأفكار وحتى نموذج البلوج كلها تعود لأصحابها لا أنا لا أنسب ما أضيفه (من غير ابتكاراتي الخنفشارية) لنفسي وإنما الإضافة لغايات التوضيح والتأمل وباقي النصوص المكتوبة فا من كتابتي وسواليفي الخاصة

شو كمان شو كمان شو كمان؟
آه وما عندي فيسبوك لا حد يدور عليي ويحكيلي متنكرة
i hate it

عداد الطقس

About Me

My photo
عمان, Jordan
بدي أوصل من هاي البلوج لأشياء كتير شخصية أو عفويةابلغ عنه لو آية احاول أبني فكر اقرب للصح اكسر فكرة المختلف متخلف وافضفض